Matiu 5

Toretore la Vusi

1Jisas mwa ḡita sinombu ivusi ram mai, i mwa hae la vusi, mwa do mahuri. Haḡe non roron̄tai ram mai, ram dogo dalisia, 2i kea mwa dau bwatuna mwa bagahira.

Mwasin Ron̄ Mwandavuha

(Luk 6.20-23)

3Mwa bevea be, “Irahei be ram lin̄ rosora hurin nora doroniva, kera haḡea rav ron̄ mwandavuha,

huri be kera haḡea Ute Lavoa atamare vi vora nora!

4Irahei gabe ram deidei, kera haḡea rav ron̄ mwandavuha,

huri be God vi lol bamahurinira.

5Irahei be ram lin̄ maḡemu, kera haḡea rav ron̄ mwandavuha,

huri be God nu tatauleo be ureure geki vi vora nora.

6Irahei be maro mwa ḡasira i ram mandou huri ginau vavtutu, kera haḡea rav ron̄ mwandavuha,

huri be God vi lol bamasirinira.

7Irahei be ram ḡita hagav atatu, kera haḡea rav ron̄ mwandavuha,

huri be God vi gita hagavira.

8Irahei be nora binihiva nu melmelo, kera haḡea rav ron̄ mwandavuha,

huri be rav gita God.

9Irahei be ram lol tamwata lalai vataha atatu, kera haḡea rav ron̄ mwandavuha,

huri be God vi uloinira be ira nituna.

10Irahei be atatu ram lol ḡagarasira huri nora lalaḡova vavtutu, kera haḡea rav ron̄ mwandavuha,

huri be kera haḡea Ute Lavoa atamare vi vora nora.

11“Kimiu gabe atatu ram bev hantai kimiu, ram lol ḡagarasi kimiu, i ram hul hantai kimiu huri be kimiu noḡu atatu, kimiu mulei giv ron̄ mwandavuha. 12Giv samsamwara i giv garigari kimiu, huri be giv lai volimiu gaivua lol ute atamare. Kera ran lol ḡagarasi atatun vevsera atamua kunia.

Solo mai Gigita

(Mak 9.50; Luk 14.34-35)

13“Kimiu kun gabe solo huri atatu duluai. Be solo si leahi garagarana, ginau sigai be si lol dum muleinia be men garagara. Solo gea si hantai i si vohaian kaburai, i atatu ras lago aluna.”

14“Kimiu haḡea gigita huri atatu duluai. Be gis lol vanuamiu alun vusi holomare vwate, vanua gea si hav hili te dum. 15Atatu si hav tumus te bulu vuvuri gim dabwa ḡoroe gin disi. Take vi taua la mwasin tanona bora sinen imwa be vi gigitai n̄oto atatu be ram dogo alolon imwa. 16Kunia mulei kimiu giv lol seserai nomiu gigitana vi gigita la lolmatara atatu, be rav gita batoi nomiu lalaḡova tavuha. Haḡe rav siv uloi roron Tamamiu atamare.

Silo Vagahi huri Silo non Moses

17“Gis hav vinihia tehe be inau nam mai be namen vohai kaburai Silo non Moses mai silo vagahi non ira atatun vevsera. Inau nam hav mai tehe be namen lol kaburainira, ta be namen seserai mwasin binihiva ata lol nora silo vagahi. 18Nam bev mwasigi lalai kimiu be, ute atamare i ureure vi togo radu, giv gitae be tavihen ravrava vwate si hav laian te dagai nin Silo vai votu ginau duluai vi nogo. 19Kunia ihei mwa daha havanau kolo tehe ata lol leo horai, i mwa bagahi atatu rituai be rav huria, wani gea vi to hivhivo maragai lol rahuan gara gabe Ute Lavoa atamare. Ita be ihei gabe mwa ḡoḡoi ḡoro leo horai i mwa bagahi atatu be rav huria, wani gea vi lai tanoi lol Ute Lavoa atamare. 20Nam bevea lalai kimiu be, giv haroro dum n̄an Ute Lavoa atamare be giv vora atat binihi mwasigi garagusi liu nin ira vagahin Silo maira Varise.

Silo Vagahi huri Lolhoro

21“Gin ron̄oe nu veveana lalainira ata tuai be, ‘Gisav wehiwehi te atatu.’ I mulei mwa bevea be, ‘Be ihei mwa wehi atatu, wani gea vi lai silo vevegi huria.’ 22Itake kadogaha inau nam bevea lalai kimiu be, ihei mwa lolhoroi tuana, wani gea vi lai silo vevegi huria. I ihei mwa bev bwarebware tuana, kea vi laiana vai lol imwan harahara gaivua. I ihei mwa uloi tuana be ‘Giḡo len̄len̄aga!’ wani gea vi haroro lol gabin ron̄ḡagarasi. 23Kunia mulei be gos mai mai nom hogoi be gomen vohainia lalai God la olta i gom binihi dumwia be giru vigaigai mai tuamwa vwate, 24gov lin̄ nom hogoi aben olta, i goi vano ba lol tamwata maia, vuvuri gom siv tabagilu be lai mulei nom hogoi lalai God.

25“Nu tavuha be gov lol tamwata vilvilehi mai ihei be gumuru hav to te tavuha bulu, la mahavana be gumuru hav haroro te radu lol imwan harahara. Bereva gim laigo vai aben wani vevegi, i kea vi laigo vai aben ira polis, i ira polis rav taugo lol imwa vauvauhi. 26Nam bev mwasigi lalainigo be, gosav mwalue te dum nin imwa vauvauhi vai votu be gov vohai doren nom homu huri bugumwa.

Silo Vagahi huri Alen̄ Daḡataḡa

27“Gin ron̄oe huba mwa beveana be, ‘Gisav taḡataḡa tehe.’ 28Ita inau nam bevea lalai kimiu be, ihei atamwani mwa ḡita vavine mwa doron be si vahala maia, kea mwa daḡataḡa huba lol lolona. 29Be matamwa la mwatua mwa loligo gom buroga, lai dagainia ba bohai kaburainia! Nu tavuha be tavalun matamwa si vano, ninia be si vora rebehimwa n̄oto si vano vai lol gabin ron̄ḡagarasi. 30Be limwamwa mwatua mwa loligo gom buroga, tai n̄adua ba bohai kaburainia! Nu tavuha be udumwa n̄an si vano, ninia be si vora rebehimwa n̄oto si vano vai lol gabin ron̄ḡagarasi.

Silo Vagahi huri Tugu Harabultai

(Mat 19.9; Mak 10.11,12; Luk 16.18)

31“I mulei mwa beveana be, ‘Ihei mwa doron be vi tugu nora lagiana mai tasalana vi rav seserainia gi dovon̄ana be mwa harabora nin tasalana.’ 32Ita inau nam bevea lalai kimiu be, ihei mwa bev dagara tasalana ninia, be tasalana mwa hav lol te ginau vahala lalai ahoana, kea mwa buroga, huri be mwa lol tasalana mwa lol vuro be si lagi mulei. I atamwani be mwa laia, kea mulei mwa lol vuro.

Silo Vagahi huri Tatauleo Wasi

33“Gin ron̄oe nu veveana lalainira ata tuai be, ‘Gisav lol te salil nomiu avoan garagara. Take giv lol haraharai nomiu tatauleo gabe gin lolia lolmatan God.’ 34Ita inau nam bevea lalai kimiu be, gisav vev te avoan garagara. Gisav vev te ihan ute atamare, bwatuna be kea Imwa Tataro non God. 35Gisav vev te ihan ureure, bwatuna be ureure mwa dogo aten muramura non God. Mulei gisav vev te ihan Jerusalem, bwatuna be kea vanuan Ratahigi lavoa. 36Mulei gisav vev te bwatumiu, bwatuna gisav lol te dum ilun bwatu gaituvwa be vi maita sage vi meto. 37Giv vevea be ‘Mwasigi’ sa ‘Sigai’, kunia nu dadariha. Gisav vev te avoan dolua mulei, bwatuna be avoan dodolua gea mwa mwalue nin vui hantai.

Silo Vagahi huri Alen̄ Rabaraba

(Luk 6.29,30)

38“Gin ron̄oe huba mwa beveana be, ‘Mata ḡelen mata, livo ḡelen livo.’ 39Ita inau nam bevea lalai kimiu be, gosav ḡele te hantai lalai hei be mwa loligo. Be ihei mwa rabas valamwa la mwatua, lin̄ia na rabasia la mwairi mulei. 40Be ihei vi laigo vai lol imwan harahara, vi vigaigai maigo huri nom soti, lin̄ia na lai nom koti mulei. 41Be mandevai atatun bwaloana ata Rom vwate mwa hudali bonogainigo be gov ros non gete huri mael gaituvwa, rosia huri mael vwate mulei. 42Be atatu mwa hudalinigo gin ginau vwate, gov laia lalainia. Be atatu mwa doron hano huba ninigo, gov mahin̄ainia lalainia.

Lolotabetabe huri ira Ivwalu

(Luk 6.27,28,32-36)

43“Gin ron̄oe huba mwa beveana be, ‘Giv tabe nomiu buluana, i giv barihai nomiu ivwalu.’ 44Ita inau nam bevea lalai kimiu be giv tabe nomiu ivwalu, i giv tataro hurira gabe ram lol ḡagaras kimiu. 45Be giv huri hala geki, kimiu giv vora ira nitun Tamamiu lol ute atamare. Bwatuna God mwa lol alo mwa ḡigita alura hantai maira tavuha saraḡo, i mwa hora uhe alura ram bavtutu maira ram hav vavtutu tehe. 46Matu ke huri hano gim do gi binihia be God vi tavwe kimiu huria be gim dabe atatu n̄ano gabe ram dabe kimiu? Ira harahara homu mulei ram lolia kunia. 47Be giv vev ran tavuha lalai nomiu buluana n̄ano, kunia gim hav liu tehe lalaḡova non atatu dodolua. Ira len̄len̄aga mulei ram lol dum kunia. 48Mwa du be giv to vavtutu tavuhai kun Tamamiu amare mwa do vavtutu tavuhai.

Currently Selected:

Matiu 5: HNB

Highlight

Copy