Matiu 22
22
Avoan Dalogai huri Ginaganiana Lol Lagiana
(Luk 14.15-24)
1Jisas mwa avo mulei gin avoan dalogai lalai sinombu. 2“Ute Lavoa atamare kun geki. Ratahigi lavoa vwate mwa lol vatuvwai ginaganiana baten lagiana non nituna. 3Haḡe mwa hora non atatun rovoga be rav warera nu tauleoinira be rav mai huri ginaganiana, take ram barihai didi mai. 4I kunia mwa hora non atatun rovoga rituai mulei mai avoana lalainira nu tauleoinira huba, mwa bevea be, ‘Ginaganiana mwa lol vatuvwainia, mwa du huba kadogaha. Bilaku buluk bubuhogoni mai buluk mwalkeloi duluai nu wehiana, i ginaganiana nu harana dautau huba kadogaha. Giv mai huri lagiana!’ 5Ta kera be nu warera ram hav lai te binbinihi huria. Ram bano huri halara be ram binihia, vwate mwa bano lol bilan ute loloara, i vwate vai lol non sitoa. 6Rituai ram haḡo batugehi ira atatun rovoga gea, ram bivilisira i ram wehira. 7Haḡe ratahigi lavoa mwa lolhoro maragai, i mwa hora ira non atatun bwaloana ram wehi kaburai atat wehiwehi bonogai kera geki, ram dumus kaburai vanuara. 8Haḡe mwa uloi non atatun rovoga mwa bevea lalainira be, ‘Noḡu ginaganiana huri lagiana nu harana mwa du dautau huba, take atatu gabe nan warera ram hav dadariha tehe huria. 9Giv vano vai la hala lavoa i giv ware atatu ivusi kun gim habwera.’ 10Haḡe kunia non atatu ram bano la hala lavoa, ram hara ḡoḡo atatu ivusi kun ram habwera, ira tavuha maira hantai. Kunia imwan lagiana mwa masiri ginira duluai.
11“Haḡe ratahigi lavoa mwa haroro alolon imwa be men gitara nu warera mai, i mwa ḡita dum atatu vwate mwa hav sagasagai te gaisagan lagiana. 12Haḡe mwa bevea lalainia be, ‘Tua, gon haroro kun hanigi bwatuna gom hav sagasagai te gaisagan lagiana?’ Take mwa hav vwaliua tehe. 13Haḡe ratahigi mwa bevea lalai non atatun rovoga be, ‘Giv vauhi batugehi limana i bwalagena ba bohainia avare lol ute meto. Aia vi dei i vi gas livona.’ ”
14Haḡe Jisas mwa bev nogonogoinia be, “God mwa uloi atatu ivusi, take gaiviha n̄an mwa ḡita luara.”
Avoan Hudaligi huri Harahara Takis
(Mak 12.13-17; Luk 20.20-26)
15Ira Varise ram bano ram lol taritari be rav sani Jisas alolona gin avoan hudaligi. 16Haḡe ram hora nora roron̄tai rituai maira gabe ram huri Herod vai aben Jisas, ram bevea be, “Vagahi, gam iloe be giḡo atat mwasigi. Gom bagahi mwasigi sinombu hurin hala gabe God mwa doronia, i gom hav matagui te atatu gaituvwa, son̄o be atatu gaivua sa tirigi. 17Goi vevea lalai kamai, gom binihi haninia? Nu vahala hurin nonda Silo be tai vol takis lalai Ratahigi lavoa ata Rom sa sigai?”
18Take Jisas mwa ilo nora taritari huri binihiv hantai i kunia mwa bevea be, “Kimiu ira hoḡoiḡoro! Huri hano gim doron be gimen ruruhiau? 19Giv lai homu be gim bol takis ginia nav gitae!”
Kunia ram lai homu lalainia. 20Haḡe mwa hudalinira be, “Nunun hei i ihan hei alun homu uhu?”
21Haḡe ram bwaliua be, “Nunun Ratahigi lavoa ata Rom.”
Jisas mwa bwaliura be, “Giv lai lalai Ratahigi ginau non Ratahigi, i lalai God ginau non God.”
22Mahavana ram ron̄oe kunia ram dan̄an̄a maragai i ram ban dagai ninia.
Avoan Hudaligi huri Tomarean Mulei Nin Mateana
(Mak 12.18-27; Luk 20.27-40)
23Baten gea radu ira Sadusi rituai ram mai aben Jisas. Kera geki haḡea atatu gabe ram bevea be, “Atatu si hav tomare te mulei nin mateana.” 24I ram hudaligi be, “Vagahi, Moses mwa bevea lol non silo vagahi be, ‘Be atatu mwa lagi vavine vwate nituna sigai radu i mwa mate, kunia mwa du be tuana vi lai bwerona huri be raru vi bav atatu huri tuana be nu mate.’ 25Ira huhugaituvwa gaibitu ran to maia. Muai bwana mwa lagi vavine vwate i mwa mate, nituna sigai. Haḡe bwerona mwa lagi darihou mai tihina. 26Vuvuri tihina mwa mate darihou, nituna sigai. Kunia mwa loli lalai gaitoluna vai votu kera gaibitu n̄oton̄oto ram mate, nitura sigai. 27Nogonana vavine mwa mate. 28Kunia lol tomarean mulei la nogonan gubwen̄, kea vi vora tasalan ihei ninira? Bwatuna kera gaibitu duluai ran lagi maia.”
29Take Jisas mwa bwaliura be, “Gim bahala maragai! Bwatuna be gim hav ilo te Ravrava Sabuga sa muramura non God. 30Bwatuna be kera be ran mate rav tomare mulei, rai vora kun ira enjel lol ute atamare, i rasav lagi tehe. 31Huri tomarean mulei nin mateana, matu gim hav vasogo te avoana gabe God nu vevea lalai kimiu? 32Huri mwa bevea be, ‘Inau God non Ebraham, God non Aisak, i God non Jekob.’ Take God gea nora God gabe ram rahu, mwa hav vora te nora God gabe ran mate.”
33Mahavana be sinombu ram ron̄ avoana gea ram dan̄an̄a maragai huri non silo vagahi.
Muan Leo Horai
(Mak 12.28-34; Luk 10.25-28)
34Batena be ira Varise ram ron̄oe be Jisas mwa lol ira Sadusi gin non avoana ram buhiga, bwatuna gea ram mai utegaituvwa. 35Haḡe tuara vwate ninira, kea vagahin Silo, mwa lol ron̄ Jisas be men ruruhia gin avoan hudaligi vwate, 36mwa hudalinia be, “Vagahi, hava leo horai nu marahi liu nin Silo duluai?”
37Jisas mwa bwaliua be, “Leo horai geki be nu marahi liu be, ‘Giv tabe Ratahigi gabe nomiu God gin lolomiu duluai i gin atmatemiu duluai i gin binihimiu duluai.’ 38Geki haḡea muan leo horai i nu marahi ninira duluai. 39I gairuan leo horai mulei nu henhen ḡunia, ‘Giv tabe irahei dodolua kun kimiu sibomiu.’ 40Silo non Moses duluai mai Silo vagahi non ira atatun vevsera ram du duluai alun leo horai gairua geki.”
Avoan Hudaligi huri Kraes Gabe Wani Vurai
(Mak 12.35-37; Luk 20.41-44)
41Mahavana be ira Varise ram ḡoḡo utegaituvwa, Jisas mwa hudalinira be, 42“Gim binihi haninia huri Kraes? Kea varan hei?”
Ram bwaliua be, “Kea ata la varan Deved.”
43Haḡe Jisas mwa bevea be, “Be kunia, huri hano Vui Sabuga nu hogoinia lalai Deved be men uloi Kraes be non Ratahigi? Bwatuna be Deved mwa bevea be,
44‘God Ratahigi mwa bevea lalai noḡu Ratahigi:
Gov togo la mwatuaku
havava nav tau nom ivwalu aten vavarahin bwalagemwa.’
45Be kunia Deved mwa uloinia be ‘Noḡu Ratahigi’, kun hanigi Kraes mwa bora ata la varan Deved?”
46Haḡe atatu vwate mulei sigai be men vwaliu dum avoana non Jisas. I mwa dau bwatuna lol gubwen̄i gea atatu vwate mwa hav mom hudali te Jisas gin avoan hudaligi mulei.
Currently Selected:
Matiu 22: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
