Luk 4
4
Vui Hantai mwa Ḡal Jisas
(Mat 4.1-11; Mak 1.12-13)
1Haḡe Jisas mwa mwalue nin vanua Jodan mwa masiri gin Vui Sabuga i Vui mwa domuainia vai la vanua vuroi, 2aia vui hantai mwa lol ron̄oe huri gubwen̄ n̄avul gaivasi. Lol mahavan duluai gea nu hav gan te ginau, ataguna mara mwa siv gasia.
3Haḡe vui hantai mwa bevea lalainia be, “Sivora giḡo Nitun God, gos lol vatu uhu si vogi gi bereti.”
4Haḡe Jisas mwa bwaliua be, “Lol ravrava sabuga mwa bevea kungeki be, ‘Atatu si hav rahu tehe n̄an gin bereti.’”
5Haḡe vui hantai mwa laia vai amare i mwa bagahi darihounia gin ute ratahigi duluai ata lol ureure. 6I mwa bevea be, “Nav mahin̄ai lalainigo roron̄o mai roso duluai uhu, huri nu mahin̄aiana lalaiau i inau nav mahin̄ai dumwia lalai wani gabe nav gita luae. 7Kunia ginau duluai kera geki vi vora nomwa be gov hivbwaubwau ḡoroau.”
8Haḡe Jisas mwa bwaliua be, “Lol Ravrava Sabuga mwa bevea be, ‘Gov gogonai God gabe nom Ratahigi, i gov lalaḡo lalainia gaituvwa n̄ano.’ ”
9Haḡe vui mwa laia vai Jerusalem mwa daua la ulun ibwirin Imwa Sabuga, haḡe mwa bevea lalainia be, “Be giḡo mwasigi Nitun God gov burere sibomwa nin teti vai ata. 10Huri be Ravrava Sabuga mwa bevea be, ‘God vi tau maira non enjel be rav gitaḡorogo.’ 11Nu vevea mulei be, ‘Rav salo luago gin limara huri be gosav taturai te dum bwalagemwa vwate la vatu.’ ”
12Ta Jisas mwa bwaliua be, “Ravrava sabuga mwa bevea be, ‘Gosav ḡal te God gabe nom Ratahigi.’ ”
13Haḡe ataguna gabe vui hantai nu lol ron̄ Jisas lol hala ivusi, mwa ban dagai kalkaligi ninia.
Jisas mwa Dau Bwatun Non Rovoga Kalili
(Mat 4.12-17; Mak 1.14-15)
14Haḡe Jisas mwa dabagilu vai Kalili, i roron̄o non Vui Sabuga mwa dogo maia. Roroi huria mwa lon̄ahi vanua duluai Kalili. 15Kea mwa bagahi lol nora imwa tataro i sinombu ram lol roroainia.
Ram Barihai Jisas Nasaret
(Mat 13.53-58; Mak 6.1-6)
16Haḡe Jisas mwa ban vai Nasaret, vanua gabe nu gaivuaga aia, haḡe lol gubwen̄ mambuharai kea mwa ban kun tagaro vai lol imwa tataro. Mwa du amare be men vasogo Ravrava Sabuga, 17i ram hagai lalainia buka non Aesaia atatun vevsera. Kea mwa bugeria i mwa habwe ute nu ravae be,
18“Vui non Ratahigi mwa dogo aluku,
bwatuna nu vurai luau be nai vev sera Roroi Tavuha lalai ira hiru.
Nu horau be nai vev luae huri ribwesiva nora atat vauvauhi i huri lol
i ba lol bugeri matara ira matagara,
i mulei nav ribwesira ram dogo aten nora ivwalu
19i nai vev luae be mahavana nu mai huba be
Ratahigi vi varahu non sinombu.”
20Haḡe mwa bul ḡoro mulei buka, i mwa hagai muleinia lalainia gabe mwa ḡitaḡoro, vuvuri mwa do mahuri. I sinombu duluai lol imwa tataro ram ḡita mamaragainia, 21haḡe mwa bavora mwa avo lalainira, mwa bevea be, “Garigi haḡea ravrava uhu nu haraharai huba batena, gin ron̄oe nu vasogoana.” 22Kera duluai be ran ron̄oe ram dara i ram dan̄an̄a alun non avoan tavuha duluai gabe ran mwalue nin bwan̄ona. Ram bevea be, “Matu kea mwa hav vora te nitun Josep?”
23Haḡe mwa bevea lalainira be, “Nam binihi mwasigi be gi vev dum avoana uhu lalaiau be, ‘Dokta, varahu muleinigo.’ I mulei giv vevea lalaiau be, nav lol ginau teti la mwasin bwatutun vanuaḡu, ginau duluai be gin ron̄ora ran loli Kapanium. 24Nam bev ginau geki lalai kimiu be, atatun vevsera sihav lai te dum ḡoḡoana la mwasin bwatutun vanuana.”
25“Giv roron̄taiau: nam bev mwasigi be ira bwero ivusi Israel la gubwen̄in Elaija, la mahavana gabe nu hav uhe tehe huri taul gaitolu i udui maro gaivua nu dum vanua gea. 26Take Elaija nu hav horana tehe lalai ihei tehe Israel, haḡe ta lalai bwero vwate lol ute Sarevat lol vanua ata Saidon. 27Gita ira lepa ivusi Israel la gubwen̄in atatun vevsera Elaija, take nu hav varahu te vwate ninira ta Neman n̄an ata Siria.”
28Mahavana be sinombu lol imwa tataro ram ron̄oe, ram masiri gin lolhoro. 29Kera ram domare, ram rav dagai Jisas nin bwatutun vanua, i ram laia vai la n̄olivun vusi gabe bwatutun vanua nu haḡoana aluna. Ram binihia be rav vohai kaburainia la bwabwa, 30take mwa lago lol davolara sinombu i mwa ban dagai.
Atatu mai Vui Hantai
(Mak 1.21-28)
31Haḡe Jisas mwa ban vai Kapanium, bwatutun vanua vwate ata Kalili, aia mwa bagahi sinombu la gubwen̄ mambuharai. 32Kera duluai ram dan̄an̄a gin non silo vagahi, bwatuna mwa avo gin roron̄o. 33Haḡe atatu vwate lol imwa tataro vui hantai nu lolia; mwa haharigi gin silo gaivua, mwa bevea be, 34“Ee! gom doron havanau mai kamai, Jisas ata Nasaret? Matu gom mai teti be gomen lol kaburai kamai? Nam ilogo; be giḡo horata sabuga non God!”
35Haḡe Jisas mwa borotai vui hantai, mwa bevea be “Gov buhiga, ba mwalue dagai nin wani gea!” Haḡe vui hantai mwa bohai wani gea vai ata lolmatara duluai, i mwa mwalue dagai ninia, nu hav lol te hantainia.
36Haḡe sinombu ram dan̄an̄a ram avo ginginira be, “Hava avoana kera geki? Gin roron̄o mai muramura atatu geki mwa hora lua ira vui hantai, i ram mwalue!” 37Haḡe roroi huri Jisas mwa lon̄ahi ute duluai lol vanua gea.
Jisas mwa Barahu Harova Ivusi
(Mat 8.14-17; Mak 1.29-34)
38Haḡe Jisas mwa mwalue nin imwa tataro mwa ban vai lol imwan Saemon. Ratahin tasalan Saemon mwa haro gin rurutia gaivua, i ram hudali Jisas huria. 39Haḡe kea mwa ban mwa du hurin batana, mwa av wasi lalai rurutia be vi lin̄ia. Haḡe rurutia mwa lin̄ia, i vavine mwa domare darihou mwa lol ginaganiana lalainira.
40Haḡe ataguna be alo nu roro huba kera gabe nora buluana ram haro gin lalan̄an harov dodolua ram laira vai aben Jisas; i kea mwa dau limana alura mwa barahu duluainira. 41Kunia mulei vui hantai ram mwalue nin sinombu ivusi ram haharigi ram bevea be, “Giḡo haḡea Nitun God!” Haḡe mwa borotai ira vui hantai be rasav avo tehe bwatuna ram iloe be kea haḡea mwasigi Kraes.
Jisas mwa Doretore Lol Imwa Tataro
(Mak 1.35-39)
42Haḡe mwa ran mabon̄i mwa domare nin bwatutun vanua, mwa ban dagai vai lol ute bibieli. Take sinombu ram hiḡea mahavana be ram habwea, ram lol ron̄oe be si hav vis te dagai ninira. 43Take mwa bevea lalainira be, “Noḡu be nav seserai Roroi Tavuha huri Rahuan Gara gabe God mwa Ratahigi ḡoro non sinombu alolona lalai bwatutun vanua dodolua mulei, bwatuna be kea haḡea lalaḡova gabe God nu horau huria.” 44Haḡe kea mwa doretore lol imwa tataro vataha vanua.
Currently Selected:
Luk 4: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
