Luk 24
24
Jisas mwa Domare Mulei Mateana
(Mat 28.1-10; Mak 16.1-8; Jon 20.1-10)
1La Sande mwabon̄ gaituvwa ira vavine ram bano aben malan̄a mai wai sasav bonboni gabe ran lol vatuvwainia. 2Haḡe batena be ram botuinia ram ḡita vatu be nu tatui dagaiana nin bwan̄on malan̄a, 3haḡe kera ram dalin̄oro alolona; take ram hav habwe te Rebehin Ratahigi Jisas. 4Ha kera ram du aia ram hav lai te dum binihiva huri ginau geki, haḡe darihou n̄an atatu gairua gaisagara ran abwaga ramuru du abera. 5Kera ram matagu maragai, ram dai bwatura vai la tano, mahavana atatu gairua ramuru bevea lalainira be: “Hurihano gim hiḡe wani gabe mwa rahu abera atatmate? 6Kea sigai teti; kea nu tomare mulei nin mateana. Giv binihi dum avoana be nu vevea lalai kimiu mahavana be kea Kalili radu be: 7‘Nitun Atatu vi lin̄iana lalainira hantain lalaḡo, rai vohae vai alun volovolo i atagun gubwen̄ gaitolu kea vi rahu vi tomare mulei.’”
8Kunia ira vavine ram binihi dum non avoana, 9ram dabagilu nin malan̄a, ram bev ginau duluai geki lalai ira roron̄tai han̄vul domwan gaituvwa maira duluai. 10Ira vavine kera geki, Mere Makdalen, Joana, i Mere ratahin Semes; kera gaitolu mai ira vavine dodolua ram bev ginau duluai kera geki lalai ira hala. 11Take ira hala ram binihia be hano ira vavine ram bevea mwa hav vora te mwasigi, i ram hav binihi te mwasiginira. 12Pita mwa domare mwa rovo vai aben lulu; haḡe mwa siolo mwa ḡita gavu gabe ran nubwae ginia mwa en vuroi. Haḡe Pita mwa dabagilu mulei i mwa dan̄an̄a gin ginau be nu loli.
Lagoana Vai Emaus
(Mak 16.12-13)
13Lol gubwen̄i n̄an gea atatu non Jisas gairua ramuru ban vai la vanua mwa huiana be Emaus, mahavana kun n̄avanan vasan̄vul valima, vudolua varua vena n̄avul gaiono, nin Jerusalem, 14i ramuru bevuri ginginira huri ginau duluai be ran loli. 15Mahavana be ramuru bevuri aluna, Jisas sibona mwa mai sosorira i mwa lago bul maira; 16ramuru ḡitae take ramuru hav gita te batoia. 17Jisas mwa bevea lalainira be, “Gumuru bevuri havanau gingin kimiru la nomiru lagoana?”
Haḡe ramuru barahidu, lolmatara mwa hantai, gin busbusiana. 18Haḡe vwate ninira, ihana Kiliapas mwa hudalinia mwa bevea be, “Giḡo n̄an gaituvwa tausala aia Jerusalem gabe gom hav ilo te havanau be nu siv loli aia non̄oiha?”
19Haḡe mwa hudalinira be, “Havanau?”
Haḡe ramuru bwaliua be, “Ginau gabe nu loli lalai Jisas ata Nasaret. Wani geki kea atatun vevsera, i God mai sinombu duluai ram ḡita dabea be kea atatu muramura lol non avoana i lalaḡova duluai. 20Kera nonda muai tataroi ran lin̄ia huri be vi vevegian bamate, i ran vohae vai alun volovolo. 21I gan vinihia haḡea be kea vi ribwes Israel! Garigi gubwen̄ina mwa ḡaitolu ataguna be ginau kera geki ran loli. 22Ira vavine rituai abemai ran lolia gam dan̄an̄a maragai ran van aben lulu mabon̄ gaituvwa, 23take ram hav habwe te rebehina. Haḡe ram dabagilu ram bevea be, ran hueri ira enjel gabe God mwa lol bisirainira lalainira ram bevea lalainira be kea mwa rahu. 24Haḡe tavalumai rituai ram bano vai aben lulu ram ḡitae kunia haḡea be ira vavine ran vevea, take ran hav gitae tehe.”
25Jisas mwa bevea lalainira be, “Ira daloi, gim ravrava maragai be gimen binihimwasigi ginau duluai gabe ira atatun vevsera ran vevea! 26Matuke nu hav maron̄ron̄o te lalai Kraes wani Vurai be men ron̄ḡagarasi alun ginau kera geki i gim haroro lol sarisarina?” 27Haḡe Jisas mwa dugu halana lalainira huri havanau nu vevea huria sibona alolon Ravrava Sabuga duluai, nu tau bwatuna lol buka non Moses mai ravrava non ira atatun Vevsera duluai.
28I batena be ram la sosori vanua be ram bano huria, Jisas mwa la rahurahu dotomua kun be men van rahurahu; 29take ramuru borotainia ramuru bevea be, “To mai kamaru; ute nu ravravi huba.” I kea mwa haroro mwa dogo maira. 30Haḡe kea mwa do mahuri be men gan ginau bul maira, mwa lai bereti, mwa batavuhainia; i mwa biha borae mwa laia lalainira. 31Haḡe matara mwa matavugeri i ramuru siv gita batoia be kea, i mwa binogonogo dagai nin lolmatara. 32I ramuru bevea ginginira be, “La mahavana be mwa avo mai gidaru la hala, i mwa dugu halan ravrava sabuga duluai lalai gidaru taru ron̄ mwandavuha maragai ginia?”
33Haḡe ramuru domare darihou ramuru ban mulei vai Jerusalem, aia ramuru habwe ira roron̄tai han̄vul domwan gaituvwa ram du utegaituvwa mai atatu rituai 34ram bevea be, “Ratahigi nu tomare mwasigi! Kea nu visirai aben Saemon!”
35Haḡe ira tarua ramuru bevea lalainira huri ginau be nu loli lalainira la hala, i kun hanigi raru gita batoi Ratahigi mahavana be nu viha bora bereti.
Jisas mwa Bisirai Abera non Roron̄tai
(Mat 28.16-20; Mak 16.14-18; Jon 20.19-23; Lala 1.6-8)
36Mahavana be ramuru bev hurinia Ratahigi sibona mwa du bora lolora darihou mwa bevea lalainira be, “Tamwata na togo abemiu.”
37Haḡe huira mwa ruru, ram matagu maragai, i ram binihia be ram ḡita vui. 38Take mwa bevea lalainira be, “Huri hano gim matagu maragai? Huri hano gim binihi gairuruai kungeki lol binihimiu? 39Gin gita limaḡu mai bwalageku, i gin gitae be inau siboku. Gin sibweriau, gitae, bwatuna be vui vigohona mai huina sigai kunia gabe gim ḡitau mai rebehiku.”
40Mwa bevea vuvuri mwa bagahira gin limana i bwalagena. 41Take kera ram hav binihi te mwasiginia, ram masiri gin samwarana i binihi lalan̄ana; i kea mwa hudalinira mwa bevea be, “Ginaganiana tehe abemiu?” 42I kera ram lai tavihen ige manogo lalainia, 43ke mwa laia mwa ḡania lol matara.
44Haḡe mwa bevea lalainira be, “Geki haḡea ginau be nan vevea lalai kimiu mahavana be nan togo radu mai kimiu: ginau duluai nu ravae huriau lol Silo non Moses, i Ravrava non ira Atatun Vevsera, i lol bukan Sam mwa bisirai mwasigi.”
45Haḡe mwa havan̄ nora binihiva be ramen ron̄ batoi Ravrava Sabuga duluai. 46I mwa bevea lalainira be, “Geki havanau mwa ravae be: Kraes wani Vurai vi ron̄ ḡagarasi i vi tomare nin mateana atagun gubwen̄ gaitolu, 47i lol ihana roroi huri binihi leahi, i tugu kaburai vuro vi toretore huria vataha vanua duluai vi tau bwatuna Jerusalem. 48Kimiu haḡea turatura huri ginau kera geki. 49I inau siboku nav horae vai alumiu ginau gabe Tamaḡu nu tatauleo huria. Take giv hohov lol bwatutun vanua vai votu muramura ata amare vi himai alumiu.”
Jisas mwa Hae Vai Amare
(Mak 16.19-20; Lala 1.9-11)
50Haḡe Jisas mwa domuai bwihavareinira nin bwatutun vanua vaivotu Betani, i kea mwa hagai lua limana mwa batavuhainira. 51I batena be mwa batavuhainira, kea mwa ban dagai nin lolmatara i mwa lai muleinia vai amare. 52Haḡe ram ḡogonainia i ram dabagil mulei vai Jerusalem, ram masiri gin samwarana gaivua, 53i ram dogo huri mahavana duluai lol Imwa Tataro ram avkari God.
Currently Selected:
Luk 24: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
