Luk 1
1
1Ratahigi Tiovilas:
Atatu ivusi ran lol ron̄oe huba be ramen rava roroi huri ginau duluai gabe ran lolia abemai. 2Ran rav ginau gabe nu veveana lalai kamai nin bwan̄ora gabe ran gita ginau duluai kera geki gin matara nin bwativuna i ram bev lua roroi hurira. 3Ratahigi, inau nan hiḡehiḡe didinigi huri ginau duluai kera geki nin bwativuna, i nam binihia be, nu tavuha be nav rav Vevurina la mwasin halana lalainigo. 4Nam lolia kun geki huri be gov ilo mwasigi duluai huri ginau kera gea gabe ran vagahigo ginira.
Mwa Bevean Sera na Vorana non Jon Garuhisabuga
5Haḡe la gubwen̄in Herod lavoa ḡoro Judia, tataroi vwate mwa dogo, ihana Sakaraia ata la vatugi lealeahi non Abia, tasalana ihana Elisabet; kea mulei ata la vara non ira tataroi. 6Ira tarua gekado raru to vavtutu la lolmatan God, ramuru ḡoḡoi ḡoro didinigi leo horai i silo vagahi duluai non ratahigi. 7Take nitura nu sigai bwatuna Elisabet nu mwanmwani, i raru bwatavwega saraḡo.
8Haḡe gubwen̄ vwate Sakaraia nu lalaḡo kun tataroi lol Imwa Tataro non God, batena non vatugi lealeahi nu lol rovoga. 9Hurin alen̄ara tataroi, dovon̄ana mwa hovi aluna be men dalin̄oro lol Imwa Sabuga non Ratahigi be vi tun gai bonboni, 10i sinombu duluai ram dataro avare lol sara sabuga la mahavana mwa dun gai bonboni.
11Haḡe enjel non Ratahigi mwa bisirai abena, mwa du la mwatuan tanon tataroi, aia be mwa dunuana na gaibonboni. 12Sakaraia mwa ḡitae, huina mwa ruru i mwa matagu maragai. 13Take enjel mwa bevea lalainia be, “Gosav matagu tehe, Sakaraia! Huri God nu ron̄ nom tataro, i Elisabet tasalamwa vi haḡo nitumwa atamwani i gov huri ihana gi Jon. 14Gov samwara i gov garigarinigo huria, i sinombu ivusi rav samsamwara huri non vorana. 15Huri vi vora lavoa la lolmatan ratahigi. Sihav mwin te waen sa wai wasi. Take vi masiri gin vui sabuga la mahavana kea radu lol sibwen̄in ratahina, 16i vi lol ira nitun Israel ivusi rav tabagilu mulei lalai Ratahigi gabe nora God. 17Kea vi van dotomua nin ratahigi, vi masiri gin vui i muramura kun atatun vevsera Elaija. Vi haḡo bul ira tama mai ira naturigi utegaituvwa mulei: i vi dede ira siesiehi rav tabagilu mulei huri alen̄ara vavtutu; be men lol vatuvwai sinombu be rav lalaḡo lalai Ratahigi.”
18Haḡe Sakaraia mwa bwaliu enjel be, “Be vi ḡunia nav ilo haninia? Huri inau tamaragai huba, i tasalaku mwa bwatavwega mulei.”
19“Inau uhu Kebrol. Nam du la lolmatan God, i mwa horau mai be namen avo maigo ba bev sera Roroi Tavuha geki lalainigo. 20Ta gita goi buhiga, gosav mom avo tehe, va vi sosori gin gubwen̄ ginau geki vi loli alolona, huri gom hav vinihi te mwasigi noḡu avoana, take vi visirai lol mahavana gabe nan tovoe.”
21La mahavan gea sinombu ram do hohov Sakaraia, ram dan̄an̄a huri mwa do n̄an̄avaigi lol Imwa Sabuga. 22Batena mwa bwihavare mwa hav avo te dum maira, i ram siv iloe be kea mwa hueri ginau lol Imwa Sabuga bwatuna mwa hav avo te dum maira, haḡe mwa lol dovon̄ana lalainira gin limana.
23Haḡe baten gubwen̄in non lalaḡova mwa nogo lol Imwa Tataro, kea mwa dabagilu mulei vai la imwana. 24Gubwen̄ gaiviha n̄an ataguna, naturigi mwa bulus Elisabet tasalana i mwa hav lin̄ te imwana huri vula gailima. 25I mwa bevea be, “Uhu gaha ratahigi mwa buluiau, huri nu lai dagai noḡu busbusiana la lolmatan sinombu!”
Mwa Bevean Sera na Vorana non Jisas
26Batena be vulan Elisabet mwa ḡaiono, God mwa hora enjel Kebrol vai la vanua bwatutuga Nasaret lol vanua Kalili. 27Mwa bano mai avoana lalai daulato gogona vwate gabe Josep ata la varan lavoa Deved nu lai mahalei huria. Ihan daulato Mere. 28Haḡe enjel mwa bisirai abena mwa bevea be, “Tamwata na togo bul maigo! i Ratahigi na togo abemwa mwa batavuhainigo liu!”
29Avoana non enjel mwa biaroi maragai Mere, mwa binihi dali sinen avoana helheloi be kun hanigi. 30Haḡe enjel mwa bevea lalainia be, “Gosav matagu tehe, Mere, huri God mwa ḡita dabego. 31Gov ros atatu i gov haḡo nitumwa atamwani, i gov huri ihana gi Jisas. 32Ke vi lavoa i rav uloinia be Nitun God Holomare hae, i Ratahigi God vi lolia gi lavoa kun sibina Deved, 33i kea vi vora ratahigi lavoa ḡoro ira varan Jekob vai tuai, i non ute ratahigi lavoa mosmosianana nu sigai!”
34Haḡe Mere mwa bevea lalai enjel be, “Matu vi dum kunhanigi kunia bwatuna inau daulato, nam hav togo te radu mai atamwani?”
35Take enjel mwa bwaliua be, “Vui Sabuga vi himai alumwa, i roron̄o non God vi malugo; bwatuna kea vi uloi naturigi vi vora abemwa be naturigi sabuga vi uloiana be Nitun God. 36Gov binihi dum Elisabet havamwa mwa ros atatu huba lol bwatavwena i wani gea, ram bevea be kea mwanmwani vulana gaionona kadogaha. 37Ginau ririhai nu sigai be God si hav lol te dumwia.”
38Haḡe Mere mwa bevea be, “Inau vavinen rovoga non Ratahigi; na dum aluku kun gabe gom bevea.” Haḡe enjel mwa ban ninia.
Mere mwa Siro Elisabet
39Haḡe atagun gubwen̄i gea Mere mwa lol vatuvwai, mwa hae vilehi vai la ute vusvusi, la vanua bwatutuga vwate ata Judia. 40I mwa dalin̄oro alolon imwan Sakaraia mwa helheloi Elisabet. 41Batena Elisabet mwa ron̄ avoan helheloi non Mere, naturigi mwa rihui sibwen̄ina. Haḡe Elisabet mwa masiri gin Vui Sabuga, 42i mwa av lua gin silo gaivua mwa bevea be, “Giḡo wani vatavuha liura vavine duluai, i vwain lolomwa mulei vi vora wani vatavuha! 43Hurihano ginau gaivua kun geki mwa loli lalaiau, be ratahin noḡu Ratahigi mwa siroau? 44Huri gita la mahavana nam ron̄ nom avoan helheloi naturigi aloloku mwa rihu gin samwarana. 45Ute samsamwara lalainigo be gom binihi mwasigi be avoana non Ratahigi lalainigo vi mai gi mwasigi!”
Mere mwa Uloi Roron God Gin Iboi
46Haḡe Mere mwa bevea be,
“Atmateku mwa uloi roron Ratahigi;
47loloku mwa samsamwara huri God Varahuku,
48huri kea nu vinihi dumwiau, non atatun rovoga!
Huri gita nin kadogaha vataha sinombu rav uloiau be vatavuha,
49huri ginau dan̄an̄a be God Muramura nu lolia lalaiau.
Ihana nu sabuga;
50non hagavi mwa do vataha lalan̄a vai tuai
aberahei ram ḡogonainia.
51Kea mwa lol ginau muramura gin limana
mwa lus bisalsalai ira sagere mai nora taritari.
52Kea mwa rav hurira ratahigi lavoa nin tanora,
mwa hagai luara binihi maḡemu.
53Kea mwa ban̄an gubwa ira marogagasi gin ginau tavuha;
i mwa ḡoro vuroi ira ratahin homu.
54Kea mwa lol haraharai non tatauleo gabe nu vevea
lalai ira sibida i mwa bului Israel non atatun rovoga.
55Kea mwa binihi radui Ebraham be vi hagavia mai
irahei ataluna vai tuai vai tuai!”
56Mere nu togo mai Elisabet huri vula gaitolu vuvuri mwa siv tabagilu mulei vai la vanuana.
Vorana non Jon Garuhisabuga
57Haḡe vulan Elisabet mwa nogo, kea mwa bav atamwani. 58Kera ata la vanuana mai ira havana ram ron̄oe be Ratahigi mwa ḡita dabe maragainia i ram samsamwara bul maia.
59Haḡe atagun wik gaituvwa ram mai be ramen tav dovon̄ana alun naturigi, i be rav huri ihana gi Sakaraia hurin ihan tamana. 60Take ratahina mwa bevea be, “Sigai! Ihana vi vora Jon.”
61Take ram bwaliua be, “Ihan ira havamwa vwate sigai kunia!” 62Ram lol dovon̄ana lalai tamana be vi vora ihana ihei.
63Haḡe Sakaraia mwa hudaligi huri tanon ravrava i mwa ravrava aluna be “Ihana be Jon.” I kera duluai ram dan̄an̄a ginia. 64La mahavana n̄an kea Sakaraia mwa avo dum mulei, i mwa dau bwatuna mwa uloi roron God. 65Ta hui ruru mwa dum ata la vanuana, i ram bev ḡoḡonai avoanan ginau duluai kera geki vataha ute vusvusi Judia. 66Haḡe kera duluai be ran ron̄oe ram binbinihi aluna i ram bevea be, “Wahu naturigi uhu vi mai gi hava atatu?” Huri liman Ratahigi mwa dogo maia.
Avoan Vevsera non Sakaraia
67Haḡe tamana Sakaraia mwa masiri gin Vui Sabuga, mwa bev sera avoana non God be:
68“Tav lol roroai Ratahigi, God nora ata Israel!
Huri nu atei non sinombu be men vol muleinira.
69Huri nu lol domare Varahu muramura huri gida,
kea ata la varan non atatun rovoga Deved.
70Kun mwa datauleo gin bwan̄ora non atatun vevsera sabuga ata tuai be:
71Vi varahu gida nin nonda ivwalu i nin muramura nora
duluai gabe ram hun̄ai gida.
72I mwa bevea mulei be vi hagav ira sibida,
i be vi binihi radui non tatauleo sabuga.
73Kea nu lol avoan ḡaragara lalai sibida Ebraham,
74be vi varahu gida nin liman nonda ivwalu,
tav siv lol mahuri rovoga lalainia.
75Gin togoana sabuga mai vavtutu la lolmatana
vataha gubwen̄ida duluai.”
76“Take giḡo naturigi vi uloinigo be atatun vevsera non God holomare hae.
Huri goi van dotomua nin Ratahigi
be gov lol vatuvwai matanhalana huria,
77gov lol non sinombu rav iloe be kea
vi varahura gin binihi kaburai vurora.
78Bwatuna be nonda God nu lolo hagavi kea vi hora mai varahu,
Nin amare lalai gida vi ḡun alon varahuva mwa domare i mwa sarisari aluda
79be vi gigitainira gabe ram dogo lol ute meto i lol malumalun mateana,
i vi bula matanhalada la halan tamwata.”
80Haḡe naturigi mwa mauri wasi lol rebehi i atmatena. Kea mwa dogo la vanua vuroi vaivotui gubwen̄ be kea vi visirai alolona abera ata Israel.
Currently Selected:
Luk 1: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
