Jon 6

Jisas mwa Ban̄an Atat Vasan̄vul Valima

(Mat 14.13-21; Mak 6.30-44; Luk 9.10-17)

1Atagun ginau geki, Jisas mwa ban vai haltavalun numbu gaivua Kalili (mwa huiana mulei be numbu gaivua Taeberias). 2Sinombu gaivua mwa huria bwatuna ran gita ginau dan̄an̄a ivusi be nu lolira bwatuna nu varahura ira haroharogana. 3Haḡe Jisas mwa hae vai la vusi vwate i mwa do mahuri mai non roron̄tai. 4Mahavan taron Samsamwaran Halbisḡalau mwa sosori. 5Jisas mwa ḡitagita ute i mwa ḡita sinombu gaivua mwa mai vai abena; i mwa hudali Vilip mwa bevea be, “Tav vol dum ginaganiana halabehe be vi dadariha be tav van̄an dum sinombu n̄oto geki ginia?” 6(Mwa bevea kungeki be men lol ron̄ Vilip ta kea nu iloe huba be vi lol hano.)

7Vilip mwa bwaliua mwa bevea be, “Be tas vol bereti huri vatlegiga kun vatu vasan̄vul van̄avul gairua be sinombu duluai ras gangan ririgi aluna sihav dadariha tehe.”

8Haḡe non roron̄tai vwate, ihana Andru, tuan Saemon Pita mwa bevea be, 9“Naturigi vwate teti mwa haḡo bereti gailima mai ige gairua. Take rasav dadariha te huri sinombu duluai geki.”

10Haḡe Jisas mwa bevea lalainira be, “Gin vevea lalai sinombu ba ran tomahuri.” Haḡe sinombu ram do ata, kera n̄oto kun vasan̄vul valima. 11Jisas mwa lai bereti mwa avkari God huria haḡe mwa beteana lalai sinombu gabe ram do ata. Nu lol kunia mulei mai ige i kera n̄oto ran gan dadariha kun gabe ran doronia. 12Batena be ram ḡubwa Jisas mwa bevea lalai non roron̄tai be, “Gin haraḡoḡo mamarahana be ram hovi; tasav lol te hantainira.” 13Haḡe ram haraḡoḡo mamarahana be ran hovi, ram hogon bamasiri gete han̄vul domwan gairua gin mamarahan bereti gailima gabe sinombu ran ganira.

14Batena gabe sinombu ram ḡita ginau dan̄an̄a geki gabe Jisas mwa lolia ram bevea be, “Mwasigi geki haḡea Atatun Vevsera gabe vi mai vai lol ureure.” 15Jisas mwa iloe be rav mai ba haḡo batugehia ba lolia gim mai gi Ratahigi lavoa hurin nora doroniva mau; i mwa romaragai vai la vusi ma gahena.

Jisas mwa Lago la Ulun Wai

(Mat 14.22-33; Mak 6.45-52)

16Batena ute mwa ravravi huba ira roron̄tai non Jisas ram hivo vai la numbu gaivua vwate, 17ram ḡalo vai la waḡa i ram ban tuhi numbu gaivua vai Kapanium. Haḡe ute mwa bon̄i huba ta Jisas mwa hav votuinira te radu. 18La mahavana gea sivsivlawai gaivua mwa hivo la wai. 19Ira roron̄tai ran hua huri mahavana kun mael gaitolu sa gaivasi, batena be ram ḡita dum Jisas lago be mwa lago la ulun wai mwa mai vai gin waḡa, ram matagu maragai. 20Ta Jisas mwa bevea lalainira be, “Gisav matagu tehe, inau geki.” 21Haḡe ram lol dautau be rav lai ḡoḡoe vai lol waḡa, i darihou n̄an ram botui ute gabe ran vano huria.

Sinombu Ram Hiḡe Jisas

22Atagun gubwen̄i gea, sinombu gabe nu togo haltavalun numbu gaivua ran gita waḡa n̄an gaituvwa nu tu aia. Ram iloe be Jisas nu hav ḡalo tehe aluna mai non roron̄tai, ta ran van ninia. 23Waḡa dodolua ata Taeberias ram mai aute abena gin ute gabe sinombu ran gan bereti aia, ataguna be Ratahigi nu lai avkari huria. 24La mahavana be sinombu ram ḡitae be Jisas mwa hav to te aia, i non roron̄tai mulei, ram ḡalo vai lol waḡa keragea, ram ban vai Kapanium ram hiḡea.

Jisas Bereti huri Rahuana

25Batena be sinombu ram habwe Jisas haltavalun numbu ram bevea lalainia be, “Vagahi, gon mai teti baten hano?”

26Haḡe Jisas mwa bwaliura mwa bevea be, “Nam bev mwasigi lalai kimiu, be gim siroau mwa hav vora te bwatuna be gim ḡita batoi ginau dan̄an̄a be nam lolia, ta bwatuna be gin hogon bamasiri tabwan̄imiu gin bereti be gin ganira. 27Gisav lalaḡo tehe huri ginaganiana be vi hantai dumwi ta giv lalaḡo huri ginaganiana gabe vi togo huri rahuana vai tuai. Geki haḡea ginaganiana gabe inau Nitun Atatu nav laia lalai kimiu, bwatuna God Tata nu tau dovon̄an non roron̄o aluku huba.”

28Haḡe ram hudalinia ram bevea be, “Gav lol hano huri be gav lol dum hano be God mwa doron kamai be gav lolia?”

29Jisas mwa bwaliura mwa bevea be, “Hano be God mwa doron be giv lolia be giv binihimwasigi wani gabe nu horae.”

30Haḡe ram bwaliua ram bevea be, “Havanau dan̄an̄a be gov lolia? Ba gav gitae ba binihimwasiginigo? Gov lol hano? 31Ira sibimai ran gan mana lol vanua vuroi, kunia n̄an be ravrava sabuga mwa bevea be, ‘Nu lai bereti atamare lalainira be rav ganira.’ ”

32Jisas mwa bwaliura mwa bevea be, “Nam bev mwasigi lalai kimiu be hano Moses nu laia lalai kimiu nu hav vora te bereti nin lol ute atamare; Tamaḡu haḡea mwa lai mwasin bereti atamare lalai kimiu. 33Huri be bereti gabe God mwa laia kea gabe mwa himai nin lol ute atamare i mwa lai rahuana lalai ureure.”

34Haḡe ram hudalinia ram bevea be, “Ratahigi, lai bereti gea lalai kamai huri vataha mahavana.”

35Jisas mwa bevea lalainira be, “Inau haḡea bereti huri rahuana. Ihei be mwa mai vai abeku maro sihav ḡas te dumwia. Ihei gabe mwa binihimwasigiau sihav mandou tehe. 36Kun nan vevea huba lalai kimiu be gim ḡitau haḡea ta gim hav binihi te mwasigiau radu. 37Kera gabe Tamaḡu mwa laira lalaiau rav mai vai abeku. Nasav vev te kaburai ihei tehe gabe mwa mai huriau, 38bwatuna nan himai nin lol ute atamare be nav lol doroniva non wani gabe nu horau mai ta barabe noḡu doroniva siboku. 39I doroniva non wani be nu horau be nasav lin̄ te vwate ninira gabe nu laira lalaiau, take be nav lol domarei muleinira vai lol rahuana lol nogonan gubwen̄i. 40Huri havanau be Tamaḡu mwa doronia, mwa doron be kera duluai be ram ḡita Nituna i ram binihimwasiginia rav haḡo rahuana vai tuai. I nav lol domarei muleinira vai lol rahuana lol nogonan gubwen̄i.”

41Haḡe sinombu ram dau bwatuna ram bin̄utun̄utuinia bwatuna be mwa bevea be, “Inau haḡea bereti be mwa himai nin lol ute atamare” 42Haḡe ram bevea be, “Wani uhu Jisas nitun Josep gam ilo tamana i ratahina. Kun hanigi be mwa bevea be mwa mai nin ute atamare?”

43Jisas mwa bwaliura mwa bevea be, “Gisav mom ḡurutu tehe. 44Atatu vwate sihav mai te huriau vaivotu be Tata vi lin̄ia lalaiau; i nav lol domarei muleinia vai lol rahuana lol nogonan gubwen̄. 45Ira atatun vevsera ran ravae be, ‘God vi vagahi atatu duluai.’ Ihei tehe gabe mwa ron̄ Tata i mwa huhui ginau ninia, kea vi mai vai abeku. 46Geki mwa hav vora te gin binihiva be atatu vwate nu gita Tata; kea n̄an gabe nu mai nin God nu gita Tata. 47Nam bev mwasigi lalai kimiu: kea gabe mwa binihimwasigi mwa haḡo rahuana vai tuai. 48Inau bereti huri rahuana. 49Ira sibimiu ran gan mana lol vanua vuroi ta ran mate. 50Take bereti gabe mwa himai nin lol ute atamare, ihei tehe gabe vi gania sihav mate tehe. 51Inau haḡea bereti rahu gabe mwa himai nin lol ute atamare. Be ihei tehe be mwa ḡan bereti geki kea vi rahu vai tuai. Bereti gabe nav laia lalainia gabe vigohoku, gabe nam laia be ureure vi rahu ginia.”

52Non avoana geki mwa dau bwatun vigaigaian lolhoro bora lolora. Ram bevea be, “Wani uhu vi lai hanini vigohona lalai gida be tav gania?”

53Jisas mwa bevea be “Nam bev mwasigi lalai kimiu, be gisav gan te vigohoku inau Nitun Atatu i be gisav mwin te dagaku gisav lai te dum rahuana. 54Ihei tehe gabe mwa ḡan vigohoku i mwa mwin dagaku mwa lai rahuana vai tuai, i nav lol domareinia vai lol rahuana lol nogonan gubwen̄. 55Huri vigohoku kea mwasin ginaganiana: i dagaku mwasin ginau mwinu. 56Ihei tehe gabe mwa ḡan vigohoku i mwa mwin dagaku mwa dogo aloloku i inau alolona. 57Tata gabe mwa rahu mwa horau mai i bwatuna kea inau mulei nam rahu. Kunia mulei wani gabe mwa ḡan vigohoku vi rahu bwatuna inau. 58Geki haḡea bereti gabe nu himai nin lol ute atamare; nu hav vora te kun bereti gabe ira sibimiu ran gania, take ataguna ram mate. Ihei gabe mwa ḡan bereti geki vi rahu vai tuai.”

59Jisas mwa bev ginau geki batena mwa bagahi lol imwa tataro Kapanium.

Avoana huri Rahuana Vai tuai

60Atatu ivusi be ran huria ram ron̄ avoana geki ram bevea be, “Iratua, silo vagahi geki nu wasi. Ihei vi roron̄tai dumwia?”

61Ihei mwa hav vev te hano lalai Jisas take mwa ilo batoi hano ram ḡurutuinia huria mwa bevea lalainira be, “Matu avoana geki mwa lol kimiu be gimen ron̄ mwahantai? 62Kunhanigi be gis gitau inau Nitun Atatu be nas hae mulei vai lol ute gabe nan togo aia amua? 63Ginau gabe mwa lai rahuana kea Vui Sabuga non God, take muramura non atatu nu hav dadariha tehe. Ta avoana duluai gabe nam laia lalai kimiu mwa lai rahuana i Vui Sabuga. 64Take kimiu rituai gim hav binihi te mwasigi radu.” (Jisas nu iloe la bwativuna irahei be rasav vinihi te mwasigi, i ihei be vi sinea.) 65Haḡe mwa bev rahurahuinia be, “Bwatuna haḡea nan vevea lalai kimiu be ihei sihav mai te dum huriau vaivotu be Tata vi lolia vi maron̄ron̄o lalainia.”

66Bwatuna non avoana geki atatu ivusi be ran huri Jisas ram dabagilu ninia. 67Haḡe mwa hudali non roron̄tai han̄vul domwan gairua mwa bevea be, “Matu kimiu mulei gim doron be giv van dagai niniau?”

68Haḡe Saemon Pita mwa bwaliua be, “Ratahigi, gav mom ban aben ihei? Giḡo n̄an gom haḡo avoana huri rahuana vai tuai. 69I kadogaha gan binihimwasigi i gam iloe be giḡo Wani Sabuga gabe mwa mai nin God.”

70Haḡe Jisas mwa bwaliura mwa bevea be, “Matu nan hav gita te lua kimiu han̄vul domwan gairua? Take vwate nin kimiu atmate!” 71Kea mwa avo huri Judas gabe nitun Iskariot. Huribe Judas gabe vwate ninira han̄vul domwan gairua, vi sine Jisas.

Currently Selected:

Jon 6: HNB

Highlight

Copy