Jon 18
18
Ram haḡo Batugehi Jisas
(Mat 26.47-56; Mak 14.43-50; Luk 22.47-53)
1Ataguna be Jisas mwa bev tataro geki kea maira non roron̄tai ram bano tuhi wai kolo vwate lol walui mwa huia gi Kidron. Ute loloara lol ute gea, i Jisas maira non roron̄tai ram bano alolona. 2Judas kea gabe nu sinea mwa ilo ute gea, bwatuna be Jisas maira non roron̄tai ram mai lol ute gea vaivusi huba. 3Haḡe Judas mwa bano vai aben ira muai tataroi maira Varise, i ram laia lalainia atatun bwaloana rituai nora ata Rom, i ira gitaḡoro rituai ata lol Imwa Tataro; ram mai vai aia; mai here i tos i haḡohaḡon bwaloana. 4Jisas nu ilo ginau duluai gabe rav loli lalainia, haḡe mwa lago vai abera mwa hudalinira mwa bevea be, “Gim hiḡe ihei?”
5Take ram bevea be, “Jisas ata Nasaret.”
I Jisas mwa bwaliura be, “Inau haḡea.”
Judas gabe nu sinea mwa du aia maira. 6Mahavana be Jisas mwa bevea lalainira be, “Inau haḡea geki,” ram huhuni mulei ram hovi. 7Jisas mwa hudali muleinira mwa bevea be, “Ihei gea be gim hiḡea?”
Ram bwaliua be, “Jisas ata Nasaret.”
8Jisas mwa bevea lalainira be, “Nan vevea huba lalai kimiu be inau haḡea geki.” Haḡe mwa bevea be, “Be kimiu gim hiḡeau lin̄ira geki ba ran vano.” 9(Jisas mwa bevea kun geki huribe ginau gabe nu vevea mwa du be vi visirae gabe mwa bevea be: “Tata, nan hav lin̄ te gaituvwa ninira gabe gon laira lalaiau.”)
10Saemon Pita, nu haḡo buan bwaloana mwa derainia la turin rovoga non Muai Tataroi mwa dai haviri bwerona hala la mwatua. Turin rovoga gea ihana Malkus. 11Jisas mwa bevea lalai Pita be, “Tau mulei nom bua lol tanona! Matu gom binihia be nasav mwin te dum alun lahan ron̄ ḡagarasi gabe Tamaḡu nu laia lalaiau?”
Jisas mwa du Lolmatan Anas
12Haḡe ira atatun bwaloana ata Rom mai nora vatugi tomuai i ira gitaḡoro nora ira Jius ram haḡo batugehi Jisas, ram bauhia, 13i ram laia muana vai aben Anas. Kea taman tasalan Kaiavas, gabe Muai Tataroi lol taulu gea. 14Kaiavas haḡea nu vev luae lalai ira tomuai nora Jius be nu tavuha be atatu gaituvwa vi mate huri sinombu duluai.
Pita mwa Dugu Jisas
(Mat 26.69-70; Mak 14.66-68; Luk 22.55-57)
15Saemon Pita mai roron̄tai dolua vwate ramuru huri Jisas. Roron̄tai gea Muai Tataroi mwa ilo tavuhainia. Haḡe kea mwa bano mwa haroro mai Jisas lol aran imwan, Muai Tataroi, 16mahavana be Pita mwa du avare hurin matgatavan ara. Haḡe roron̄tai dolua gea mwa bwihavare mulei, mwa avo mai vavin daulato la gatava, i mwa lai haroroi Pita. 17Haḡe daulato gea la matgatava mwa bevea lalai Pita be, “Matu giḡo mulei roron̄tai vwate non wani gea?”
Pita mwa bwaliua be, “Inau sigai.”
18Ute nu hohoga, i kunia ira atatun rovoga maira gitaḡoro ram bal gabi talai i ram du dalisia, ram dalainia. Haḡe Pita mwa ban vai abera, mwa du mwa dalai.
Muai Tataroi mwa Hudali Jisas gin Avoan Hudaligi
(Mat 26.59-66; Mak 14.55-64; Luk 22.66-71)
19Haḡe Muai Tataroi mwa hudali Jisas gin avoan hudaligi hurira non roron̄tai i huri non silo vagahi. 20Jisas mwa bwaliua mwa bevea be, “God nam av lua lolmatan sinombu; noḡu silo vagahi nu loliana lol imwa tataro duluai, i lol Imwa Tataro, aia be sinombu duluai ram mai ute gaituvwa. Nan hav vev te ginau vwate dahuligi. 21Hurihano, be gom lai avoan hudaligi lalaiau? Lai avoan hudaligi lalainira be ram roron̄taiau. Hudalinira be nan vev hano lalainira ram ilo hano be nan vevea.”
22Batena be Jisas mwa bevea kungeki, gitaḡoro vwate mwa rabasia mwa bevea be, “Gom avo kunia lalai Muai Tataroi huri hano!”
23Jisas mwa bwaliua mwa bevea be, “Be nan vev ginau te vwate be nuhav tavuha tehe, vevea lalai sinombu kadogaha be havanau. Take be inau nan vev mwasigi alun ginau gabe nan vevea, huri hano be gom rabasiau?”
24Haḡe An as mwa horae, vai aben Kaiavas Muai Tataroi mai gao vauvauhi radu aluna.
Pita mwa Dugu Jisas Mulei
(Mat 26.71-75; Mak 14.69-72; Luk 22.58-62)
25Pita mwa du amare radu aia mwa dalai. I kera rituai ram bevea lalainia be, “Matu mwa hav vora te giḡo mulei vwate, roron̄tai non wani gea?”
Take Pita mwa dugua mwa bevea be, “Sigai, nam hav vora te vwate ninira.”
26Haḡe turin rovoga non Muai Tataroi vwate, havan wani gabe Pita nu tai haviri bwerona, mwa avo amare, mwa hudaligi be, “Matu nan hav gitago te bul maira loloara?”
27Take Pita mwa bev muleinia be, “Sigai, inau sigai” haḡe toa mwa dotoreto darihou.
Jisas mwa du Lolmatan Paelat
(Mat 27.1-2,11-14; Mak 15.1-5; Luk 23.1-5)
28Ram lai Jisas mabon̄ gaituvwa nin imwan Kaiavas vai lol imwan tomuai vevev Paelat. Ira Jius ram hav doron tehe be rav haroro lol imwan tomuai gea, huribe ram doron be rav melmelo tavuhai lolmatan God huribe kera rav gan dum ginaganianan Halbisḡalau. 29Haḡe Paelat mwa bwihavare mwa hudalinira be, “Gim bevegi wani uhu alun hano?”
30Ram bwaliua ram bevea be, “Gasav lai te bonogainia lalainigo be kea nuhav lol te ginau vahala vwate.”
31Paelat mwa bevea lalainira be, “Kunia kimiu sibomiu giv laia ba bevegia hurin nomiu silo.”
Haḡe ram bwaliua ram bevea be, “Mwa hav mahin̄a tehe be kamai gai vevegi atatu vwate huri mateana.” 32Geki mwa loli huribe men lol dum avoana non Jisas gim mai gi mwasigi, avoana nu vevea mahavana be nu avo huri halana be kunhanigi kea vi mate.
33Paelat mwa haroro mulei lol imwana mwa uloi Jisas mwa bevea be, “Giḡo mwasigi ratahigi lavoa nora Jius sa sigai?”
34Jisas mwa bwaliua be, “Avoan hudaligi geki mwa mai ninigo sage atat dodolua ram beveau lalainigo?”
35Paelat mwa bwaliua be, “Matu gom binihia be inau Jiu? Nom sinombu sibomwa maira muai tataroi gabe ram lin̄igo lalaiau. Gon lol havanau?”
36Haḡe Jisas mwa bevea be, “Noḡu ute Ratahigi mwa hav vora te ata lol ureure geki; be noḡu ute ratahigi sivora ata lol ureure geki, kera gabe ram huriau ras bwalo ḡoroau huribe sihav lin̄iau te lalai muramura non ira lavoa nora Jius. Noḡu ute Ratahigi mwa hav vora te ata lol ureure geki!”
37Haḡe Paelat mwa hudalinia mwa bevea be, “Giḡo Ratahigi Lavoa, mwasigi?”
Jisas mwa bwaliua be, “Gom bevea be inau Ratahigi Lavoa. Nan vora i nan mai lol ureure bwatuna ginau gaituvwa geki, be nav avo huri mwasigi. Ihei tehe mwa du huri mwasigi vi roron̄taiau.”
38Haḡe Paelat mwa hudaligi be, “Havanau be mwasigi?”
Ram Bevegi Jisas huri Mateana
(Mat 27.15-31; Mak 15.6-20; Luk 23.13-25)
Kunia Paelat mwa bwihavare huri sinombu mwa bevea lalainira be, “Nam hav habwe te vahalana vwate be namen vevegia. 39Take hurin alen̄an vanuamiu, God nam lin̄ atat vauvauhi gaituvwa lalai kimiu lol mahavan Halbisḡalau. Gim doron be namen lin̄ ratahigi lavoa nora Jius lalai kimiu?”
40Haḡe ram bwaliua gin haharigiana be, “Sigai, kea sigai! Gam doron Barabas!” (Barabas kea atat susura i nu wehi atatu.)
Currently Selected:
Jon 18: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
