Jon 11
11
Mateanan Lasarus
1Atatu ihana Lasarus, nu togo Betani, mwa haro. Betani bwatutun vanua gabe Mere mai tuana Mata ramuru dogo aia. 2(Mere haḡea geki gabe nu vurai hun wai sasasavi alun bwalagen Ratahigi i mwa man̄ira gin iluna; Mere geki haḡea be tuana Lasarus gabe mwa haro.) 3Haḡe ira hogosin Lasarus ramuru hora roroi lalai Jisas ramuru bevea be, “Ratahigi, mwasin nom buluana mwa haro.”
4Mahavana be Jisas mwa ron̄oe, mwa bevea be, “Lasarus mwa haro, take mwa hav vora te gin binihiva be vi mate; take huria be men seserai lua muramura non God. Harova geki, hala huri be God men lol roroai ihaku, inau nituna.”
5Jisas mwa dabe Mata mai tuana Mere i Lasarus. 6Take gaituvwa n̄an be kunia, batena be nu lai roroi be Lasarus mwa haro kea mwa dogo aia radu huri gubwen̄ gairua. 7Haḡe mwa bevea lalainira non roron̄tai be, “Tan tabagilu mulei vai Judia.”
8Haḡe non roron̄tai ram bwaliua ram bevea be, “Vagahi, mwa siv vora non̄oiha n̄an atatu ata aia ran vevea be ramen vohago; kadogaha gom lol taritari huri tabagiluana mulei vai aia?”
9Jisas mwa bevea be, “Mahavan alo han̄vul domwan gairua huri rani gaituvwa, kunia sa? Haḡe kunia ihei gabe mwa lago ute ran maita sihav taturai tehe, bwatuna mwa ḡita gigitan ureure. 10Take be si lago lol ute bon̄i kea vi taturai, bwatuna gigita sigai huria.” 11Jisas mwa bev ginau geki vuvuri mwa avo rahurahu, mwa bevea be, “Nonda buluana Lasarus mwa maturu, take nai van ba bamatae nin maturuva.”
12Haḡe ira roron̄tai ram bwaliua ram bevea be, “Be kea mwa maturu, Ratahigi. Vi rahu magea.”
13Jisas mwa bevea gin binihiva be Lasarus nu mate, take kera ram binihia be mwa bevea huri maturuva vuroi n̄ano. 14Haḡe kunia Jisas mwa bev seserainia lalainira be, “Lasarus nu mate, 15take bwatuna kimiu nam samsamwara huri be nan hav togo te maia, huri be gimen binihimwasigi. Tan van abena.”
16Tomas (mwa uloinia be Malava) mwa bevea lalai ira roron̄tai rituai mwa bevea be, “Gida duluai tai vano mai Vagahi, huria be tai mate bul maia!”
Jisas kea Tomarean Mulei i Rahuana
17Mahavana be Jisas mwa botu, mwa habwea be ran Tavi Lasarus gubwen̄ gaivasi ḡoroe huba. 18Betani vai Jerusalem mahavana kun mael gaitolu n̄ano, 19i kera ivusi nin Judia ran mai be ramen gita Mata i Mere ba av durara huri mateanan hogosira.
20Mahavana be Mata mwa ron̄oe be Jisas mwa mai, kea mwa bwihavare mwa ban ḡorogoro halainia, take Mere mwa dogo la imwa. 21Mata mwa bevea lalai Jisas be, “Ratahigi, be giḡo gos to teti hogosiku sihav mate tehe! 22Take nam iloe be vaivotu kadogaha God vi lai te havanau lalainigo gabe gov hudalinia ginia.”
23Jisas mwa bevea lalainia be, “Hogosimwa vi tomare vi rahu mulei nin mateana.”
24Haḡe mwa bwaliu Jisas mwa bevea be, “Nam iloe be vi tomare vi rahu mulei nin mateana la nogonan gubwen̄i.”
25Jisas mwa bevea lalainia be, “Inau tomarean mulei i rahuana. Ihei mwa binihimwasigiau vi rahu, gaituvwa n̄an be mwa mate; 26i ihei gabe mwa rahu i mwa binihimwasigiau sihav mate tehe. Gom binihimwasigi noḡu avoana geki?”
27Haḡe mwa bwaliu Jisas mwa bevea be, “Uwe, Ratahigi! Nam binihimwasigi be giḡo Kraes, Nitun God, gabe vi mai lol ureure.”
Jisas mwa Dei
28Ataguna be Mata mwa bev vuvuria kunia, mwa bano mulei mwa uloi tuana Mere ḡoḡonai, mwa bevea lalainia be, “Vagahi teti kadogaha, mwa doron be vi gitago.” 29Mahavana be Mere mwa ron̄oe kungeki, mwa domare vilvilehi be men van ba ḡita Jisas. 30(Jisas mwa hav votu te radu anvanua, take kea radu lol ute gabe Mata nu habwea aia.) 31Haḡe sinombu gabe ram do la imwa bul mai Mere, ram av durae, kera mulei ram huria mahavana be ram ḡitae be mwa domare bilvilehi mwa bwihavare. Ram binihia be kea men van lol aran mate ba dei aia.
32Mere mwa botu aben Jisas, i mahavana be mwa ḡita dum Jisas, mwa hovi lol bwalagena, mwa bevea be, “Ratahigi, be giḡo gos togo teti, hogosiku sihav mate tehe!”
33Jisas mwa ḡitae be mwa dei maragai, i mwa ḡitae mulei kunhanigi sinombu gabe ram dogo bul mai ira tarua uhu ram dei maragai; kunia mwa hagavira, i mwa binbinihi. 34Jisas mwa hudalinira mwa bevea be, “Gin tavinia halabehe?”
I kera ram bwaliua be, “Mai ba ḡitae, Ratahigi.”
35Jisas mwa dei. 36Haḡe sinombu ram bevea be, “Ia, gin gitae kunhanigi mwa dabea!”
37Take kera rituai ram bevea be, “Matu kun be nu lol matagara ram ḡita mulei ute, huri hano mwa hav tuḡoro te Lasarus nin mateana?”
Jisas mwa Lol Barahu Lasarus
38Haḡe Jisas mwa ron̄ mwahantai maragai, mwa bano vai la bwaru malan̄a gabe ran tau rebehin Lasarus alolona i ran tau ḡoro bwan̄on malan̄a gea mai vatu. 39Jisas mwa bevea lalainira be, “Gin lai dagai vatu.”
Mata hogosin Lasarus gabe nu mate, mwa bwaliu Jisas mwa bevea be, “Vi bon hantai maragai, Ratahigi. Gubwen̄ gaivasi huba atagun tavtavigi!”
40Jisas mwa bevea lalainia be, “Matuke nan hav vevea te lalainigo be gov gita muramura non God, be gov binihimwasigi?” 41Haḡe ram lai dagai vatu. I Jisas mwa dada vai amare mwa bevea be, “Nam avkarigo Tata, huri be gom roron̄taiau. 42Nam iloe be giḡo vataha mahavana gom roron̄taiau, take nam bevea kungeki bwatuna sinombu kerageki, huribe rav binihimwasigi be giḡo gon horau.” 43Ataguna be mwa avo vuvuri kun geki, mwa ulo gin silo gaivua mwa bevea be, “Lasarus, mwalue!” 44Haḡe kea mwa mwalue, limana i bwalagena lol gavun mateana radu, i gavuna dalis ḡoro lolmatana mwa dogo radu. Jisas mwa bevea lalainira be, “Gin tugu dagai gavu ninia, ba lin̄ia na lago.”
Ram Dari Halana be rav Wehi Jisas
(Mat 26.1-5; Mak 14.1-2; Luk 22.1-2)
45Sinombu ivusi gabe ran mai be ramen varahi ron̄ Mere ram ḡita ginau be Jisas nu lolia, i ram binihimwasiginia. 46Take kera rituai ram dabagilu huri ira Varise i ram bev ginau gabe Jisas nu lolia. 47Haḡe ira Varise rituai maira muai tataroi ram ḡoḡo maira Kansel ram bevea be, “Tav lol hano? Kimiu gin gita ginau dan̄an̄a gabe wani geki mwa lolira! 48Be tav lin̄ia vi van rahurahu la hala geki, atatu duluai rav binihimwasiginia, i ira lavoa ata Rom rav lol silo be nonda Imwa Sabuga vi salan̄aian kaburai mai vanuanda!”
49Atatu vwate alolora, ihana Kaiavas, kea haḡea Muai Tataroi lol taulu gea, mwa bevea be, “Kimiu ira taltaleana. 50Matuke gim hav vinihi te dumwia, be nu tavuha lalai kimiu be giv lin̄ atatu vwate vi mate huri sinombu, ninia be vataha vara lol ute duluai men nogonogo?” 51Mwasigi be, mwa hav vev te ginau geki gin mwasin non avoana sibona; take huria be kea Muai Tataroi lol taulu gea, kea mwa bev serae be mwa du be Jisas vi mate huri sinombu ata Jius duluai, 52i mwa hav vora te hurira n̄an, take be men haḡo bul mulei sinombu non God gabe ran visalsala gi rebehi gaituvwa.
53Mwa dau bwatuna baten gea ira lavoa non ira Jius ram lol taritari be rav wehi hani Jisas. 54Jisas mwa hav lago te lol ute gitagita lol vanua Judia, take mwa mwalue mwa bano lol ute abena gin vanua vuroi, lol bwatutun vanua vwate mwa huia gi Evrem, i aia kea mwa dogo maira non roron̄tai.
55Haḡe taron Samsamwaran Halbisḡalau mwa sosori, haḡe sinombu ivusi ram hae nin bwatutun vanua duluai vai Jerusalem huri lol melmeloi hurin alen̄ara, be rav melmelo lolmatan God vuvuri ram siv togo huri samsamwara. 56Haḡe kera ram hiḡe Jisas, i batena be ram ḡoḡo ute gaituvwa lol Imwa Tataro, ram hudaltali mulmuleinira ram bevea be, “Gim binihi haninia? Daga kea sihav mai te lol samsamwara?” 57Ira muai tataroi maira Varise ran vev daua, be atatu vwate vi iloe be Jisas mwa dogo behe, take vi seseraiana lalainira, huria be rav haḡo batugehia.
Currently Selected:
Jon 11: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
