Lalaḡova 6

Buluiana ninira Gaibitu

1Lol mahavana ataguna gea ira hala non Jisas ram ivusi, haḡe vigaigaiana mwa domare lol davolan ira ata Krik be ram avo la avoan ata Jius mai ira mwasin ata Jius. Haḡe ira tausala ata Krik ram bigaigai ram bevea ginaganiana be mwa harana vataha gubwen̄i mwa hav dadariha tehe mai nora bwero. 2Haḡe ira hala han̄vulu domwan gairua ram uloi ḡoḡo ira binihimwasigi ute gaituvwa ram bevea be, “Nu hav tavuha tehe lalai kamai be gamen lin̄ derai roroi gabe God mwa uloi kamai huria ba rovoi halan homu. 3Mwa du be giv gita lua atatu gaibitu alolomiu be ran masiri gin Vui sabuga i mataisao, vuvuri tav tarira huri ginau geki. 4I kamai sibomai vataha gubwen̄i gav togo nan ba tataro i ba doretore.”

5Haḡe kera lol tatanan̄a gea ram ron̄ mwandavuha gin hala geki be ira hala ram laia lalainira, i kunia, ram gita lua Stivin, atatu gabe nu masiri gin binihimwasigi garagusi mai Vui sabuga, mai Vilip, Prokoras, Nikeno, Timon, Pamenas mai Nikolas ata Antiok be amua kea Lolobon̄i take mwa lai ḡoḡoe la vatugigi non ira Jius. 6Haḡe kera gaibitu geki ram lai vatavuha nin ira hala i ram dataro ram dau limara alura i ram batavuhainira.

7I kunia avoana non God mwa mauri rahurahu. Haḡe tovtovon ira hala gaivua mwa mauri doratora vataha gubwen̄i alun binihimwasigi, lol vanua Jerusalem, i ira tataroi ivusi maragai ram binihimwasigi alun Kraes.

Ram haḡo Batugehi Stivin

8Stivin kea atatu gabe God mwa batavuhainia i nu masiri gin muramura, mwa lol tagaro i ginau dan̄an̄a lalai sinombu. 9Take sinombu ram ban burigainira, kera rituai gabe ram lol rovoga lol Imwa Tataro (mwa uloinira be) atat rahurahu, mwa bulu mai ira Jius ata Sairini i Aleksandria. Kera mai tavalura Jius ata lol uloilua ata Silisia i Esia ram dau bwatuna ram bigaigai mai Stivin. 10Take Vui sabuga mwa lai muramura lalai Stivin, i mahavana be mwa avo ram hav vwaliu te dumwia. 11Haḡe kunia ram av hantai lalai atatu rituai be ramen vevea be, “Gan ron̄oe be mwa av hantai vai alun Moses i God!” 12Ram lol loḡeloḡe sinombu la hala geki, mai ira bwatmetua i ira vagahin silo. I ram haḡo batugehi Stivin ram laia vai lolmatan Kansel. 13Haḡe ram lai atatu rituai vai alolon imwa be rav tul tenteneana vai aluna ram bevea be, “Wani geki mwa avo hantai vataha mahavana vai alun Imwa Tataro Sabuga mai silo non Moses. 14Gan ron̄oe nu vevea be, Jisas ata Nasaret geki vi salan̄ai Imwa Tataro, i vi leahi silon vanua duluai be mwa mai nin Moses!” 15Kera duluai be ram dogo lol Kansel ram gita mutmutai Stivin ram ḡitae be lolmatana mwa leahi kun lolmatan enjel.

Currently Selected:

Lalaḡova 6: HNB

Highlight

Copy