Prerito ke Kaam I Buk Ke Baare Meñ
I Buk Ke Baare Meñ
Luuk ke i dusra buk hei jon u likhis hei. Uske pahila buk Luuk ke Susamaachaar ke naam se jaana jaay hei. Isman i sab bataay hei “ki suru se aur swarag jaay tak kon cheej karis aur sikhaais hei” (1.1,2). Agar i buk nai likhaata to ham log nai jaane paata ki Yeeshu ke vachan pe chale waala chela log keisan keisan dukh uṭhaain. “Tum log Yarushalam, Juḍia, Samaaria aur dunia meñ sab jagha hamaar baare meñ bataana.” (1.8)
I buk meñ bahut se des ke naam likhaan hei, jahañ pe Maseehi sandes bheja gais hei. Lekin jab Yeeshu swarag chala gais tab i feisla kare meñ takleef bhais ki kon Parmeshwar ke log hei. Aur jeise ki Yeeshu ke sab se pahila log Yahuudi rahin, tab sab koi sochin ki uske vachan khali Yahuudi log ke waaste hei. Lekin Prerito ke Kaam meñ, Pawitr Aatma i dekhaay ke waaste hardam rahe hei ki Yeeshu duuno Yahuudi aur geir Yahuudi ke bachaay aais raha, aur Parmeshwar ke log, sab des ke jaat ke sab bhaasha ke log hei.
Pahila jhagṛa Yahuudi aur Maseehi log meñ bhais, aur Yahuudi agua log Yeeshu ke vachan ke ṭhukraay dees (4.1-31; 7.1-59) Lekin sab se baṛa samasya pahila chech meñ tab bhais, jab chela log i nai samjhin raha ki Yeeshu ke pichchhe chale ke waaste Yahuudi bane ke jaruuri nai hei. I sab tab se badle laga jab se Filip, Samaaria jabarjasti jaay ke sandes baaṭis (8.7-25), aur ab Peeṭa, Konelias, Romi aami ke kepṭan ke ghare gais. (10.1-48)
Aakhri meñ, Peeṭa jaay ke Yarushalam ke chech meñ bataais, (11.1-48) aur ek sabha bolaawa gais (15.3-35) aur bichaar kara gais ki kon Yeeshu ke pichchhe chale sake hei. Sabha khatam hoy se pahile, sab koi i maan leen ki Parmeshwar ke Aatma ulog ke rasta dekhaawe hei ki geir Yahuudi aur Yahuudi log ke lage Yeeshu ke susamaachaar pahuñchaawa jaay.
Jon sab se jaada sandes dees, uske naam Pol raha, aur buk meñ kaafi uske geir Yahuudi ke beech kaam ke baare meñ bataay hei. Aakhri meñ u sandes ke Raom le gais, jon ki u ṭaaim dunia ke sab se khaas nagar raha (28.16-31) Luuk ke i buk likhe ke ek khaas maksad i raha ki u dekhaay sake ki sab bagal Maseehi sandes ke feilaay meñ ulog ke kuchh nai roke sake hei.
Dui saal tak Pol ek bhaaṛa ke ghar meñ raha aur jon koi bhi uske dekhe aais uske welkam karis. U himmat se Parmeshwar ke raaj ke baare meñ parchaar karis, aur Prabhu Yeeshu Maseeh ke baare meñ sikhaais, aur uske koi bhi nai roke ke kosis karis. (28.30,31)
I Buk Pe Ek Najar
Yarushalam meñ susamaachaar ke parchaar (1.1–8.3)
Juḍia aur Samaaria meñ susamaachaar (8.4–12.25)
Susamaachaar feilaay ke Pol ke pahila safar (13.1–14.28)
Yarushalam meñ ek khaas nirnay (15.1-35)
Pol ke dusra safar (15.36–18.22)
Pol ke tisra safar (18.23–21.16)
Yarushalam meñ Pol ke giraftaari (21.17–23.22)
Pol ke Keisariya le jaawa gais (23.23–26.32)
Pol ke Raom le jaawa gais (27.1–28.31)
Currently Selected:
Prerito ke Kaam I Buk Ke Baare Meñ: FRHNT
Highlight
Share
Copy
Want to have your highlights saved across all your devices? Sign up or sign in
Fiji Romanised Hindi © Bible Society of South Pacific, 2016.