Ạsuor 66
66
Ạḍuor oboomiom rꞌọsephom Ẹnaan
1Itu eeseeny Ẹnaan rꞌạḍiolo iboh, oomo aweye.
2Ịmoor eghueniom ḍien phọ ọdi;
ẹngo nyọdi ḍịseph oghueniom.
3Ịḅeni Ẹnaan: “Pọ eeghe oḍighi ịiḍaany dị nạ aḍighi.
Ịikpo phọ ạna ẹbugh ni iboom
dị ạbumulogh-ḍien ozumeri rụmhu egbodo ạna esi oghiilaan.
4Tọrobo oye sịen ade phọ raaseeny ni nyịna;
bịdi rọmoor sụor oboomiom ạna,
bịdi rọmoor sụor oboomiom aḍien phọ ạna.”
5Itu ẹmiin ịdi Ẹnaan meḍighi;
ẹmiin ịiḍaany phọ ọdi igbo awe.
6 #
Ẹḍua 14.21;
Jos 3.14-17
Ọdi akiton ọphiiny atene ḍịgharaghar ade;
ạburude ạburude ayoor ụḅeeny ọphiiny phọ owol ade.
Sịphe kụ ẹdi yoor ọmoogh iboh esi ịpe ọdi aḍighi bọ.
7Ọdi ạda kꞌagee-pọ rꞌigbogh ọdi
kụ anaan riḍien ọdi reelhe phọ.
Ọḅaar ẹmhu kụ́tol ophoghom ọdi.
8Iboom Ẹnaan ayira, oomo areelhe;
iḍighi ịdi kọnaghan ḍịseph phọ anyina.
9Ọdi kụ ạpham ghuḍum ayira
kőmeera yira omeel.
10Nạ muphogh ni iyoor ạmiin ạḅile ụuḅeghion iyoor, Ẹnaan;
ịdipho ropoghom ghan bọ silva nịan,
ịdipho kụ ẹdi nạ muphogh iyoor.
11Nạ ameera dị yoor omeel ḍiphil
kụ ạḅam ḍigbogh adool rạman ayoor.
12Nạ ameera dị ạbumulogh-ḍien kụ ọkpar upu iyoor;
yoor urelhe ghan ologhi ạnian rꞌaḍigho,
kụ nyịidipho nạ mụsighe iyoor asiemi esi ạdol ẹereegh.
13Mị kạpam ịinua ẹkia oguom ạnian kụ atumom pạ otu phọ ạna;
mị kạngo ni nyịna ịlo mị aguanaan.
14Mị kạngo ni nyịna ịlo mị ạḅem mem mọ mị ạrol bọ esi ịiḅaghami.
15Mị kạngo iyool-ịga ịlo ọsu ịsiphe enmeny phọ;
mị kạpighironom ẹkia ilephiri ạsinam rꞌạrutu-ịga,
kụ ạmughi phọ kạki ẹpe okuaḍio.
16Itu ẹnaghan, oomo ạbuphe oghueni bọ Ẹnaan,
mị kịḅeni inyina ịpe ọdi muḍighinaan bọ ịmi.
17Mị amoghiom nyọdi ọloghonaan ạḍighaagh;
mị ạmoor sụor ạsephom nyọdi.
18Mụghumo ịkaraph kụ ịdi mị ạatughian ghan bọ pạ ologhi phọ ạmi,
Ọmoogh-we phọ ịmi mụ́naghanan.
19Kụ ọlo Ẹnaan ẹkar ri ịnaghanan ịmi;
ọdi mạnaghanan ịiḅereghi phọ ạmi.
20Mị ạseph Ẹnaan loor esi dị ọdi óghel ịiḅereghi ạmi,
ḅịle kẹn ókikima ẹphomoghian phọ ọdi esi ạmi.
Currently Selected:
Ạsuor 66: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
