YouVersion Logo
Search Icon

Ạsuor 65

65
Ạḍuor oboomiom rꞌọsephom Ẹnaan
1Ẹnaan, ẹkpe ni dị yoor kooseeny nyịna sịphe Zạyon
Sịphe kụ ẹdi yoor oḍighi ịpe yoor oguanaan bọ,
2ịdi eḍighi bọ nạ rạnaghanan ghan ni ịiḅereghi.
Awe bụo ekpisi rꞌekpisi kotu kꞌạna,
3loor esi ịkaraph ạbidi.
Ạsipioman ayoor ịphue ni iyoor,
kụ ọlo nạ ạsar ạbilenaan.
4Ọḅaal ologhi odianaan bụphe nạ ạsaḅar bọ,
bụphe nạ ạsighe bọ mọ oru ọrol sịphe otu eegu phọ ạna.
Kịgbaanyan ni iyoor ẹeḍiom ịsiphe otu phọ ạna,
oomo igey ạraraar Otu Iigbia phọ ạna.
5Nạ rụnaghanan ghan iyoor esi ọngo ghan ayoor ọkpar-opu.
Kụ nạ raḍighi ghan rạraar ịiḍaany ọphelom ayoor.
Awe oomo aḅirini phọ rꞌạbudi
odi ẹḅeenyom ạriphiiny phọ oḍuom nyịna ologhi.
6Rꞌịnyaam ạna, nạ asereghi rạaḅaraph riisi,
aḍeenaan igbogh ịikpo ạna.
7Nạ ạpoomi ḍịolho otu-ḅualhe phọ
rꞌạḍiaḅa oologh phọ.
Nạ aḍighi ịyaar dị eelhe kịrokiro ekpomori ọnhu ạbidi.
8Oomo aḅirini odimom rꞌaḍiigu
esi iboom ạraraar phọ nạ maḍighi bọ.
Iiḍighi phọ ạna emitiom ịlooghi iboh
emiigh kꞌeniin eekuna ade phọ kụ esi nyẹri phọ.
9Nạ ạmaar ri rapogh de phọ esi oseere ghan ọlophia.
Ọlophia phọ ạngo ẹelha rꞌẹnuum iḅeph.
Nạ amuzeḍi sikol phọ mụum,
nạ ạngo de phọ ịizupha.
Ịduon kụ ịdi nạ aḍighi bọ.
10Nạ ạngo ọlophia dị ạmanam iizo phọ moguphogh bọ
kụ ạtophom mụum.
Nạ adughiom de phọ mụum
kụ aḍighi ịdi ịbam ịizupha phọ kesi.
11Pọ eeghe ịma ibugha dị egeny ẹrolom mọ ạna emitiom!
Tọrobo ekpisi lọ nạ ạghi, edughom kụ rẹtol ghan.
12Riisi lọ atugey ạroogho asi ịnam emuza,
ịigaany aroogbolom mọ iboh kụ edi.
13Iizo phọ iyool-ịga kụ imuza;
riisi lọ eḍiinyaan ịbiakpa kụ imuza.
Tọrotoro ịyaar ẹlo ẹḅile ẹmoor loor esi iboh.

Currently Selected:

Ạsuor 65: ẠḌI

Highlight

Share

Copy

None

Want to have your highlights saved across all your devices? Sign up or sign in

Free Reading Plans and Devotionals related to Ạsuor 65

YouVersion uses cookies to personalize your experience. By using our website, you accept our use of cookies as described in our Privacy Policy