Ạsuor 34
34
Esi oboomiom ẹnighe Ẹnaan
1Mị rạseph ghan Ọmoogh-we phọ oomo amem.
Mị kạ́bile ghan oboom ọdi.
2Uwaloor ạmi raatumaam ghan Ọmoogh-we phọ;
bụphe osooromi bọ loor ọnaghan ịphen phọ bịn iloghi ạbidi ẹḅaal.
3Itu ịdaph ịmi ọbughe Ọmoogh-we phọ,
ọḅophoghan omitiom ḍien phọ ọdi.
4Mị ụmagh ni Ọmoogh-we phọ kụ ọdi ạnaghan kụ ụphagharanaan ịmi;
kụ ụphel ịmi ạsighe esi eepuph phọ mị rakiil bọ.
5Bụphe rọgbiphoghom bọ ophogh nyọdi bịn oomanam,
bịn umugholoor bịdi ósiph mun.
6Uwekulom oye phọ ọphon ạmagh Ọmoogh-we phọ,
kụ ọdi ạphel nyọdi ạsighe esi oomo ịiḅaghami phọ ọdi.
7Ọokpaany Ọmoogh-we phọ atughan rꞌawe phọ ạbuphe rokueni ghan bọ nyọdi,
kụ rạtophoron ghan bịdi kạsighe.
8 #
1 Pit 2.3
Ịinema Ọmoogh-we phọ bịn nyina kẹmiin ni ẹnighe phọ ọdi;
ạḍiseph rẹtolonaan ghan oye phọ ọpo aḍuom bọ ologhi nyọdi.
9Ịlogh eegu Ọmoogh-we phọ, nyina awe phọ ọdi.
Ịyaar rékuom ghan oomo ạbuphe rọlogh bọ eegu phọ nyọdi.
10Rekuom ghan ni ugheel ạnam-dịka kụ rẹmiinom ghan ọkoony.
Kụ ọlo ịyaar rékuom ghan bụphe rọwa bọ Ọmoogh-we phọ.
11Nmụny phọ rꞌạnmanyaan phọ, itu ẹnaghan ịphen kịḅeni bọ inyina.
Mị kịtughemi inyina ọlogh eegu Ọmoogh-we phọ.
12 #
1 Pit 3.10-12
Ạnhian oye kụ ẹdi aghuḍum rạpu?
Obia aḅirini phọ ọmiin aani igey rạpu?
13Pọ mạar ạphama nem ạna, kạ́ḅemogh sịkaraph;
ạmaar ạphama ịidoronhu ạna, kạ́kaaph ghan ọghaaph iigbegheḍiom.
14Bịle oḍighi yogh ghan ịkaraph,
aḍighi ghan igey, wạ ẹepho ạḅaram kụ ạrolom.
15Ariḍien Ọmoogh-we phọ esomoghi bụo aruukuan phọ
ạḅile apoghoghomi reḅeri ọdi rạnaghan ghan emoghi ạbidi.
16Arisigh Ọmoogh-we phọ ókpoghoronu esi abuḍighinom ịkaraph phọ.
Kapiemi ni bịdi sịen aḅirini phọ, kụ kọ́otughian ghan mun bịdi.
17Bụo aruukuan phọ omoghi, Ọmoogh-we phọ rạnaghanan ghan ni bịdi,
kạḅile ạphel bịdi ạsighe esi ịiḅaghami.
18Ọmoogh-we phọ atuman bụo amukum ologhi phọ;
ọdi rạpel ghan bụphe ụ́moogh mun bọ oḍuom-ologhi.
19Ịminimiin oye aruukuan ẹpughan,
kụ ọlo Ọmoogh-we phọ rạpel ghan nyọdi kạsighe esi oomo ịminimiin phọ ọdi.
20 #
Jọn 19.36
Ọmoogh-we phọ raako ghan oomo ịḅarara phọ ọdi,
rꞌoniin ówunaan.
21Ịkaraph kẹze ni bụo ạsipioghom mọ,
kụ koogulemi ni bụphe ọlogh bọ ḍien bụo aruukuan phọ.
22Ọmoogh-we phọ mạtagharan ruwaloor abutelhedom mọ ọdi.
Currently Selected:
Ạsuor 34: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
