Ạsuor 35
35
Ịiḅereghi ịlo ọloghonaan ạḍighaagh
1Ọmoogh-we, zuom elephiri bụphe rotu bọ ozuom ạmi elephiri;
aruphiom ẹgham bụphe rotu bọ oruphiom ạmi ẹgham mọ.
2Sịghe ọsuaram ikpo rꞌokuughaam ịinya ẹgham
kụ ạmeera ụlhoghonaan ịmi ḍịghaagh.
3Sịghe ọsoph rꞌakubu ạmeera asophoghom bụphe ruusophoghian bọ ịmi,
kụ ạḅeni uwaloor ạmi mọ, “Mị kụ ọpelia ạna.”
4Guugulemi bụphe roosophoghian bọ uwaloor phọ ạmi,
umugholoor asiph bịdi.
Gbạragbarami bụphe rọwa bọ ophiemi ạmi,
bịdi oḅulolom rꞌẹgum ọman.
5Bịdi ọghigh ịdipho ịpherepher, ookuugh aghughom bịdi,
ịdipho Ọokpaany Ọmoogh-we phọ raporogh bọ bịdi.
6Areten ạbidi eḍuan eḍighi ufiri ẹḅaram rẹghorom,
ọokpaany Ọmoogh-we phọ ạgur bịdi alher ude.
7Mị mạar bịdi ụ́piom kụ bịdi ọbooghian ulherenaan ịmi ọseki.
Mị mạar bịdi úḍighi kụ bịdi oguphanaan uwaloor ạmi ghẹle.
8Amuphe azuom bịdi ekperenom,
bịdi omeleghu ịseki phọ bịdi ulherenaan bọ ịmi,
omeel oḍighanaan muphe phọ bịdi ugbiighiom bọ ịmi.
9Loor ẹmhu Ọmoogh-we phọ, uwaloor ạmi kabo ni;
ologhi uwaloor ạmi kạḅaal li ịdi eḍighi bọ Ọmoogh-we phọ mụphel ịmi.
10Oomo ịḅarara ạmi kepuru ghan mọ,
“Ọmoogh-we, ạnhian rꞌạna kụ iileeny,
ọpo ạphel bọ uwekulom ạsighe rạghaagh ạbuphe ọmoogh bọ ịikpo opu nyọdi,
uwekulom mọ rꞌọpo ekuom bọ esi ạbuphe rọgbiphoghom bọ nyọdi?”
11Ạbugbaam ọkpe phọ moḅerenu rupuru ghan ịmi ịlo ạraraar dị mị ulegheri aani.
12Bịdi ụkpe ịmi ịkaraph esi iiḅi;
kụ uwaloor phọ ạmi maakurughan.
13Mem dị bịdi úmoon, mị umuuna ghan kpụru;
mị aghine loor ạmi eḍien,
akul orum ạmi ạlogh akururu kụ ạaḅereghi.
14Mị akururu kụ ạtol dọl oye dị ẹrol dịadi ọyaghiri mụghumo umor ọdi kụ amugh,
kụ mị akururu odimom rꞌọto dịadi oye lọ onhiin ọdi amugh.
15Kụ mem lọ ịiḅaghami isoorom ịmi bịn bịdi mookpomoghan robo;
ḅịle bụo ạreer phọ ughol ịmi ookpomoghan,
kụ mị úlegheri ghan,
kụ ụpham ịmi rọkalaghian.
16Ịdipho awe lọ kọmilogh ẹkugha,
kụ rọkirigha yogh rạlhaal ạbidi kuphoghomiom ịmi.
17Ọmoogh-we, nạ rapogh ghan ịduon phọ bịn kꞌạpur amem?
Tọphoron uwaloor phọ ạmi ạsighe esi amuphe,
ạphel ghuḍum mọ ạmi ạsighe rạghaagh ạnam-dịka phọ.
18Mị kạngo nyịna ḍịseph sịphe ogbo ookpomoghan phọ,
kụ mị aboom ghan nyịna esi aḍita awe.
19 #
Ạsuo 69.4; Jọn 15.25 Kámeera mọ ạbumulogh-ḍien phọ ạmi
oghol ẹmhu ạmi oboh,
bụphe kẹn mị mạar ụ́piom bọ
ụmepheghi ghan ịmi.
20Bịdi rọ́kaaphom ghan rꞌoodugha ọnhu bịn,
kụ rọwa ghan sighiton kọghi esi ạbuo ẹepho phọ orugh bọ sịen ade phọ.
21Opoghoghomi yogh ịnhu ạbidi ọyaghaghami ruphoghomiom ghan ịmi kụ rọḅem ghan mọ,
“Yoor mọmiin ịpe nạ raḍighi yogh bọ.”
22Ọmoogh-we, nạ rạmiin aani bọ ni ịphen phọ.
Káḅoorian, Ọmoogh-we.
Kạ́kel loor ạmi.
23Ọmoogh-we, nmaanmanam aḅetenu ụphel ịmi.
Ḅetenu usophonaan ịmi ọoruen. Ọmoogh-we, nạ kụ Ẹnaan ạmi.
24Sịghe ruukuan phọ ạna kụ asophom ọoruen phọ ạmi, Ọmoogh-we,
Kámeera bịdi ụmilogh ịmi.
25Kámeera bịdi ọḅem pạ iloghi phọ ạbidi mọ, “Yoor mọkpar opu nyọdi.
Ịduon kụ ịdi yoor ọwa bọ.
Kị́duon kụ.”
26Umugholoor asiph bịdi! Ọgbaragbara asoor pạ ogbo phọ ạbidi!
Bụphe robo ghan bọ mem lọ mị odi esi ịminimiin.
Bịdi omuuna umugholoor rꞌaroofola,
bụphe ụtu bọ ịmi kụ ophoophe yogh loor ạbidi.
27Bụphe mị ạnighe bọ iloghi ạbidi ọmiin ghan
ọmoogh iboh rꞌọḅaal ologhi kụ ọḅem ghan mọ,
“Ọmoogh-we phọ ạbugh ni.
Ọpo edughom otelhedom mọ ọdi ẹḅeeraan bọ ni nyọdi.”
28Anem mọ ạmi kẹkaaph ghan ịlo aruukuan Ọmoogh-we phọ,
kụ mị kaboom ghan nyọdi oomo aḍio phọ.
Currently Selected:
Ạsuor 35: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
