Ạsuor 17
17
Ịiḅereghi oye dị úlegheri aani
1Ọmoogh-we, ler rụru ạnaghan emoghi phọ ạmi rꞌịiḅereghi phọ ạmi
ịpe mị ụ́sighe bọ ologhi ẹḍim kụ rạaḅereghiom.
2Nạ kụ kasoph ọoruen ugheelemi ịmi,
ịdi eḍighi bọ nạ kụ raagbo ghan ịiruen dị esel.
3Nạ alegheri ni ịitughian phọ ạmi.
Nạ maru ụteeny ịmi ḍughul phọ;
Nạ mạaḅeghion oomo ologhi ạmi apogh
kụ nạ ọ́miin sịpioghom.
4Mị rạ́kaaph ghan ịkaraph ịdipho ạbueri phọ rọkaaph ghan bọ.
Mị maḍighi ni ịpe nạ ạto bọ,
Mị kőrelhe ghan reten awe igbagbaar eḍighinom ịyaar.
5Ịgbaranuom aruwol phọ ạmi rẹ́daph ghan reten ạbuphe rozirion bọ rạraar ạbunon awe
kụ mị kọ̋piom ghan eten phọ ạna.
6Ẹnaan, mị ạmagh nyịna, nạ rạnaghan ghan ni nyịna.
Ler rụru ạnaghan ịphen mị rạkaaph bọ.
7Uḍeenaan ịmi eboom ẹphomoghian phọ ạna kụ ụphel ịmi atene,
nạ ọpo ạsighe bọ ḍịghaagh elhiom mọ ạna kạphel atene bụlo oḍighom nyịna.
8Uuko ịmi ịdipho ọony ekpeḍien phọ ạna, umuphonom ịmi,
ạaghi ịmi eeḍian araphaaph phọ ạna.
9Ụsighe ịmi esi ạbuo ạsipioghom mọ rụgbiphoghom bọ ịmi.
Arephelegbe ạbumulogh-ḍien ukoom ịmi.
10Igbiririph ílho pạ ologhi phọ ạbidi kụ rootuma ghan iituma bịninin.
11Mụdaph ịmi, uko ịmi okitonom,
rọwa ghan eepoogh onyu ạmi olher.
12Bịdi ọkigh ịdipho ạnam-dịka
lọ ạaghian rekori ghan ọkiriph ạmi ịpherepe.
13Ọmoogh-we, ḅetenu. Sịghe elhool ẹgham mọ ạna asophoghom bụmulogh-ḍien phọ ạmi,
ạkpar apu bịdi ụphelom ịmi rạghaagh ạbuo ạsipioghom mọ.
14Ọmoogh-we, sịghe ịminimiin phọ nạ aseenaan bọ bịdi
ạlhiom bịdi rꞌạnmuny phọ ạbidi rꞌoghiil atum oghiil.
15Kụ mị kạmiin ni nyịna, ịdi eḍighi bọ mị ịkaraph úḍighi.
Mem dị mị aḅetenu, mị kabo ni iboh iboom ọmeera aghisigh ạna.
Currently Selected:
Ạsuor 17: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
