Mạk 1
1
Ịdi ạJon oburogh mụum ạghaaph
(Matiu 3.1-12; Luk 3.1-18; Jọn 1.19-28)
1Ooḅi ọghaaph ịlo ạJizos Kraist Ọony phọ Ẹnaan 2#Mal 3.1amiigh ịdipho oyil Azaya ạmiin bọ. Ọdi ạge pạ ạḍinya phọ ọdi ịdi Ẹnaan ẹḅeni Mọony phọ ọdi mọ,
“Pogh aani, mị ratom ni ọokpaany ạmi dị kaḍiemi
ghan aselemi eten aseenaan nyịna.
3 #
Azay 40.3
Oye atu ni rạlooghi ẹpe ẹdala phọ mọ,
‘Ọmoogh-we ratu. Iseleminaan eten phọ ọdi
esele yogh iloghi phọ anyina!’”
4Ịmiin phọ imunughan mem mọ ạJon oburogh mụum mọ amite bọ ẹpe ẹdala phọ kụ ạghaaph ghan mọ, “Ikiton esi ịkaraph phọ anyina eru mị iwurogh mụum, ọbo Ẹnaan ẹsar ịwilenaan inyina.” 5Kụ oomo ạbuo eelhe phọ aJudia rꞌẹmha phọ aJeruselem ụghi ghan ni ọteeny nyọdi, kụ ọgba ịkaraph phọ ạbidi omitiom, kụ ọdi awurogh ghan bịdi mụum ẹpe Ọphiiny ạJodan.
6 #
2 Ạbud 1.8
ẠJon ạkpologhian ghan ạsuoma asuphuugh ạsikamel rꞌokuughaam ozu ẹnam. Eḍien ọdi, igurubia rꞌẹnuum aḍiowo. 7Kụ ọdi ạghaaph ghan mọ, “Oye dị upu ịmi ratu ni, dị mị ụ́manam ozuman ọokpo iḍigh arokoro phọ ọdi. 8Mị ạsighe mụum kụ riwur inyina, kụ ọdi phọ kạsighe Uwaloor Iigbia phọ kụ iwurom inyina.”
Ịdi owur Jịzos mụum
(Matiu 3.13-17; Luk 3.21-22)
9Ịphen phọ eten bọ íbia kụ ạJizos ạḍua ẹpe Nạzeret aGalili, aru ạteeny Jọn, kụ ạJon awur nyọdi mụum pạ Ọphiiny ạJodan. 10Kụ ạJizos rạsoghoronu pạ ạmuum mọ, bịn ạmiin ni okuaḍio dị rakughuronu, rꞌUwaloor Iigbia, dị ạghigh ọkurughozo, dị rasoorom nyọdi. 11#Emi 22.2; Ạsuo 2.7; Azay 42.1; Mat 3.17; 12.18; Mạk 9.7; Luk 3.22Kụ ẹḍogh ẹḍua ẹpe kꞌạke kụ ẹḅem mọ, “Nạ kụ ogina Ọony phọ ạmi. Eḍighinom ịyaar phọ ạna kụ ịḅeeraan ịmi iboom.”
Ịdi ọdegh Jịzos ophogh
(Matiu 4.1-11; Luk 4.1-13)
12Kụ egina amem bịn Uwaloor Iigbia phọ ạpham Jịzos ạghimom ẹpe ẹdala phọ. 13Kụ ọdi ạrol ẹpe ẹdala phọ inyadi aḍughul-otu, kụ aSetan ạdeghogh nyọdi aphogh. Kụ ẹpe phọ, ilhom ịnam ịrol li, kụ ạruukpaany phọ Ẹnaan kụ iiko ghan nyọdi.
ẠJizos ạmagh inya ạbukoniom ạkoni
(Matiu 4.12-22; Luk 4.14-15; 5.1-11)
14Mem mọ mosiph bọ Jọn ọlogh ikoli phọ, kụ ạJizos ạghi ẹpe Galili, kụ ạghaaph ghan ooḅi ọghaaph phọ Ẹnaan mọ, 15#Mat 3.2“Amem mọ mẹteeny. Ọmar phọ kꞌẸnaan masi sịen ẹda ạḍighaagh. Ikiton esi ịkaraph anyina emeeraam ooḅi ọghaaph phọ.”
16Eniin aḍio ạJizos ratelhe oogbom Ọphiiny aGalili, kụ ạmiin ịyal ạbukoniom ạkoni, Saimon rꞌẠndru, umor ọdi, dị rozu ghan ọzuguru. 17Kụ ạJizos ạḅeni bịdi mọ, “Itu ịdaph ịmi. Mị kiḍighi inyina bụo ạkoni awe.” 18Kụ egina amem bịn bịdi ọwile ịzuguru phọ ạbidi ọdaph nyọdi.
19Kụ ạJizos arelhe ạghi ghisigh ẹphurukpu, kụ ạmiin Jems ọony aZebidi, rꞌạJon umor ọdi, dị odi ologhi oghuugh rọokoḍi ghan ịzuguru phọ ạbidi. 20Kụ ọdi rọmagh bịdi, bịn bịdi ọwile Zebidi ọde phọ ạbidi, rꞌiphirineen awe phọ pạ ologhi oghuugh phọ, kụ ọghi ọdaph nyọdi.
Ịlo oye dị eru eghola
(Luk 4.31-37)
21Kụ bịdi ụghi ni Kạpaniom, kụ rẹteeny ḍio ophooghian phọ, kụ ạJizos aḍigh pạ obughotu phọ kụ ạtughemi. 22#Mat 7.28, 29Kụ ịtughemi phọ ọdi iḍighi ni iikia esi awe, ịdi eḍighi bọ ọdi ạtughemi bịdi ịdipho oye dị ạmoogh ịikpo, kị́dipho ạbutughemia iilogh phọ.
23Ị́man mem bịn oye dị eru eghola aru aḍigh obughotu phọ ạbidi, kụ ạlooghi mọ. 24“Jịzos, ọnyo ạNazeret, nạ rụwa ghan iyoor eeghe ịyaar? Nạ uru ophiemi ayoor ḍụghum? Mị alegheri ni oye dị nạ aru. Nạ kụ oye aghuḍuul phọ kꞌẸnaan.”
25Kụ ạJizos amooghaam nyọdi mọ, “Ḅoorian amite loor ọdi ạḍua!”
26Kụ eru phọ ẹsiiny oye phọ kụ ạlooghi, kụ emite loor phọ ẹḍua. 27Kụ oomo phọ ạbidi omaghagha yogh, kụ oniin apuru ghan nyoniin mọ, “Ịphen phọ ịghen ọdo? Ịphen ịghen ọdo imoom ịtughemi? Rꞌịikpo kụ ạtooghi ghan rạraar rạngo ruru, bịn kụ aruru phọ rẹnaghanan ghan nyọdi.”
28Bịn ọdu phọ ọdi aaleghaan oomo areelhe phọ etuman bọ Galili.
ẠJizos aakonom ịbadi awe
(Matiu 8.14-17; Luk 4.38-41)
29Kụ bịdi romite pạ obughotu phọ, kụ ọghi kꞌaSaimon rꞌẠndru, kụ aJems rꞌạJon ụghi aani ni. 30Kụ pạ otu phọ, onhiin ạnir aSaimon ạmina ni, dị osipheeny odi uloor, kụ ọghaaph ịphen phọ ọḅeni Jịzos. 31Kụ ọdi ạghi ạpham ḍịghaagh ạnir phọ aphoophe ạrolomi ude, bịn osipheeny phọ amite, kụ ạnir phọ ạko bịdi igoni.
32Dulhe mem dị ẹnam-aḍio memeel ighool, ụsighe ni oomo ạbidi úmoonogh, rꞌạbudi aruru eghola yogh, oruom nyọdi. 33Kụ oomo ẹmha phọ uukpomoghan ni sịphe ọnhu-aḍibuo otu phọ. 34Kụ ọdi aakonom ni ḍita ạbuo ạreezegh, ạḅile aphorogh yogh ịbadi aruru, kụ ọdi ómeera mọ aruru phọ ẹtagharan ọnhu, ịdi eḍighi bọ bịdi ilegheri ni nyọdi.
Ọghaaph ạJizos ẹpe Galili
(Luk 4.42-44)
35Eḅon ạḍiroor kụ ạJizos aḅon aḅetenu ạḍua ạghi ekpisi dị enamian, kụ ạaḅereghi. 36Kụ aSaimon, rꞌạbuphe rꞌọdi ọrol bọ sịphe, ụwa ni nyọdi ọghi 37ọmiin, kụ ọḅeni nyọdi mọ, “Oomo awe phọ rọwa ni nyịna.”
38Kụ ạJizos ạḅeni bịdi mọ, “Itu ọḍua ọghi ịpheri phọ ạramha phọ etuman bọ ẹphen, mị ụḅile ụkaaph ooḅi ọghaaph phọ ụḅeni aani bịdi. Esi ịphen kụ ịdi mị ạtuan bọ aru.”
39 #
Mat 4.23; 9.35 Kụ ọdi arelhe yogh oomo phọ aGalili ạghaaph ghan ịlo Ẹnaan pạ arubughotu phọ ạbidi, ạḅile aphorogh yogh ruru.
ẠJizos aakonom oye ẹzegh ọku ufe
(Matiu 8.1-4; Luk 5.12-16)
40Oniin oye dị ẹzegh ọku ufe eḍighi aru ni ạteeny Jịzos, akpuḍian kụ ạḅem mọ, “Seseeny, lọ nạ kameera ni, pọ uukonom aani ịmi.”
41Rꞌigbiririph kụ ạJizos asele ḍịghaagh ọdi ạḅogh nyọdi, kụ ạḅem mọ, “Mị ameera ni. Ḍum!” 42Kụ ẹzegh ọku ufe phọ ẹnighe, bịn oye phọ aatolonu. 43Kụ ạJizos ạphur nyọdi rụru mọ, “Nyeene agheel, 44#Lịv 14.1-32ụ́kaaph ghan ụḅeni oye. Kịa aḍeenaan loor phọ ạna-oyil ạrikia phọ. Kịa ạphighiron ẹkia ootolonu phọ ẹpe aMozis ạtooghi bọ, ịlo oḍeenaan awe mọ nạ mamoon.”
45Kụ oye phọ rọḍua, bịn amiigh ogbeelom ịphen phọ oleenyemi, tụtu ạJizos ạwile omite egaan rạmha phọ, kụ ạrol ghan rikpisi dị enamian. Kụ ụḍuaghu ghan ni oomo areelhe phọ ọghi ọteeny nyọdi.
Currently Selected:
Mạk 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
