Matiu 7
7
Kéegboonaan ịiruen bụnon awe
(Luk 6.37-38, 41-42)
1“Kéegboonaan ịiruen bụnon, ọbo Ẹnaan kiigboonaan aani inyina. 2#Mạk 4.24Ịpe nyina keegboonaan bọ bụnon kụ ịdi Ẹnaan kiigboonaan aani ni inyina. Ịpe nyina edi bọ ẹngo bụnon kụ ịdi Ẹnaan kedi ni ịngo aani inyina. 3Iḍighi bọ ika nụun kụ nạ ạmiin bọ ọpherepe ạḍipe phọ ọpo aḍigh bọ ekpeḍien umor phọ ạna, kụ nạ óloghoma bọ mọ aḍiboom ạḍupo edi aani ni ologhi ekpeḍien phọ ạna? 4Nạ kạḅeni bọ ika umor phọ ạna mọ, ‘Mị ạsighe ọpherepe ạḍipe phọ aḍigh bọ ekpeḍien phọ ạna,’ kụ ạri aḍiboom ạḍupo edi aani ni ologhi ekpeḍien ạna? 5Nạ olegheri-ịlo-ọnon, ịlo-ạna-úlegheri. Pụr ạsighenaan ḍiboom ạḍupo phọ eḍigh bọ ekpeḍien phọ ạna, pịdi nạ ạmaar ạsighe ọpherepe ạḍipe phọ ọpo odi bọ ologhi ekpeḍien umor phọ ạna.
6“Ịyaar dị eḍighi ẹlo iigbia kẹ́ngo suogh, ọbo bịdi keḅula ilomi inyina, ḅịle kẹn ịyaar dị ẹman ikpoki kẹ́ngo rophoropo, ọbo bịdi kẹezeghiom ruwol.”
Ịlom ghan ẹwa ekar
(Luk 11.9-13)
7“Ịlom ghan, kịngo ni inyina. Ịwa ghan, nyina kẹmiin ni. Ikar ghan, kighughuronaan ni inyina. 8Tọrobo oye lọ ạlom, kọngo ni nyọdi. Oye lọ ạwa kạmiin ni. Oye lọ akar, kokughuronaan ni nyọdi. 9Ọghen ọde sịphe ogbo phọ anyina kụ ẹdi ọony ọdi kạlom eḍien, kụ kạsighe ẹna kụ ạngo; 10mọ ọdi ạlom ena, kụ kạsighe ẹkaraph-ịyaar kụ ạngo? 11Ghạlamo nyina ạbukaraph phọ, bịn rẹngo ghan ni nmụny anyina igey ạraraar, kụ ẹghiom nụun ologhi ịdi Ọde phọ anyina odi bọ kꞌạke phọ kạngo bụphe ọlom bọ nyọdi igey?
12 #
Luk 6.31
“Ịlo nyina rẹwa mọ awe iḍighi inyina kụ kẹnighe, kụ ẹtuugh eḍighi bụnon awe. Ịduon kụ ẹmhu iilogh phọ aMozis rꞌịtughemi ariil phọ.”
Ọkololoony ọnhu-aḍibuo phọ
(Luk 13.24)
13“Itelhe eḍigh ọnhu-aḍibuo phọ ọphon ạkololo bọ, kọ́phori phọ. Ọnhu-aḍibuo phọ ọpo ạregh bọ, eten phọ edugh ni kụ eekuna phọ amuphe, kụ bụdi rọdaph eten phọ ẹpe phọ ọbugh ni. 14Ọnhu-aḍibuo phọ ọphon ạkololo ni, ḅịle kẹn eten phọ ẹkpar ri, kụ eekuna phọ aghuḍum, kụ bụdi rọdaph eten phọ ẹphen okom ni.”
Ireeny rꞌiimuma phọ ạbidi
(Luk 6.43-44)
15“Igona loor anyina esi ariil ọkpe. Ẹphen ạnyu phọ bịdi ọkigh iyool-ịga, kụ iloghi phọ ạbidi eḍighi ịlo ilhom ịnam. 16Esi iimuma ạbidi kụ ẹdi nyina kelegheriom bịdi. Oḍebe oreeny rámuum ghan rughuuny oogiri, ḅịle kẹn ịkughuro rémuum ghan rughuuny ọmir. 17Ogey oreeny ramuum ghan igey iimuma, ọkaraph oreeny ramuum ghan ịkaraph iimuma. 18Ogey oreeny rámuum ghan ịkaraph iimuma, ḅịle kẹn ọkaraph oreeny rámuum ghan igey iimuma. 19#Mat 3.10; Luk 3.9Tọrobo oreeny dị úmuum igey iimuma koler ri oguom nịan. 20#Mat 12.33Ịduon phọ kẹn kụ ẹdi nyina kẹsighe iimuma phọ ạbidi kụ elegheriom riil ọkpe phọ.”
Mị kꞌekulha inyina ki̋lhegheri ghan
(Luk 13.25-27)
21“Oomo phọ ạbuphe rụmagh bọ ịmi mọ, ‘Ọmoogh-we, Ọmoogh-we,’ kụ kóḍigh ọmar phọ kꞌẸnaan. Bụphe oḍighi bọ ịpe Ọde phọ ạmi odi bọ kꞌạke phọ rạwa bọ kụ koḍigh. 22Ḍio ịiruen phọ, ịbadi kụmagh ghan ịmi mọ, ‘Ọmoogh-we, Ọmoogh-we, yoor ughol li ḍien phọ ạna kụ ọghaaph ọghaaph ạna, ophorogh yogh ruru, oḍighi yogh ịiḍaany!’ 23#Ạsuo 6.8Kụ mem mọ ọpo phọ mị kạḅeni ni bịdi mọ, ‘Mị kꞌekulha inyina ki̋lhegheri ghan. Ịḍua sịen ghisigh ạmi. Nyina awe dị reḍighi ghan ịkaraph.’”
Ịyal ạbuloghom ruutu
(Luk 6.47-49)
24“Loor ịphen phọ, tọrobo oye lọ ạnaghan ikpo ọnhu phọ ạmi ịphen kụ ạtuugh aḍighi, mị kạmaaniom nyọdi oye olegheri-ịyaar dị aphighi otu ọdi ạnyu aḍighiigh. 25Kụ ọlophia ạloph, aḍigho eḍigh, oghim aghim kụ aphum otu phọ ọpo, kụ ómeel, ịdi eḍighi bọ opighi ạnyu aḍighiigh.
26“Kụ tọrobo oye lọ ạnaghan ikpo ọnhu phọ ạmi ịphen kụ ụ́tuugh uḍighi, mị kạmaaniom nyọdi uwo elologhi dị aphighi otu ọdi ạnyu ịisaar. 27Kụ ọlophia ạloph, aḍigho eḍigh, oghim aghim kụ aphum otu phọ ọpo, kụ ameel. Pọ eeghe ọdo emeleghuom dị otu phọ ameleghu!”
Ịikpo phọ ạJizos ạsighe bọ kụ rạtughemiom
28 #
Mạk 1.22; Luk 4.32 ẠJizos rọmadan ọghaaph phọ ọphon, kụ ịtughemi phọ ọdi eḍighi iikia esi awe, 29ịdi eḍighi bọ ọdi ạtughemi bịdi ịdipho oye dị ạmoogh ịikpo, kị́dipho ạbutughemia iilogh phọ ạbidi.
Currently Selected:
Matiu 7: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
