Matiu 28
28
Oḅetenu esi aḍuugh phọ
(Mạk 16.1-10; Luk 24.1-12; Jọn 20.1-10)
1Aḍio ophooghian phọ reten rẹḅaal ḍịroor ạḍiḅel aḍio awiki phọ, kụ aMeri ọpo ạMagdala phọ rꞌọphori phọ aMeri phọ, oru ophogh oḍi phọ. 2Ade phọ iphiigha ni ẹekia ephiighaam kụ ekperenom bịn ọokpaany Ọmoogh-we phọ ạḍua ạnyu asoor ude, aakilemi ḍighiigh phọ opukiom bọ ọnhu oḍi phọ ạsighe, kụ ạrol ude ạnyu aḍighiigh phọ. 3Aḍimite phọ ọdi ịrol mụdi ọomaany. Ạsuoma ọdi ạḅaal forororo. 4Kụ abukoriom mọ oḍi phọ uphiigha ni okpereghaan kụ ọghigh we dị momuughu.
5Kụ ọokpaany phọ Ẹnaan ạḅeni nmạriir phọ mọ, “Kékiilaan. Mị alegheri ni mọ nyina rẹwa ghan Jịzos ọpo ọkan bọ oghiigh. 6Ọdi ólho sịen. Ọdi maḅetenu sịphe aḍuugh phọ, ịdipho ọdi ạḅem bọ. Itu ẹmiin esi phọ ọmuneen bọ nyọdi. 7Ịnuun ẹghi ẹḅeni bụmatuan phọ ọdi mọ, ‘Ọdi maḅetenu esi aḍuugh phọ. Ọdi raḍiemi ghan ẹpe Galili kụ okori anyina. Ẹpe kụ ẹdi nyina kẹmiin nyọdi.’ Ịphen kụ ịdi mị ạmoogh ọḅeni anyina.”
8Kụ bịdi ọnuun ọḍua sịphe oḍi phọ rꞌoghiilaan rꞌọḅaal ologhi, oghiil ọghi ọḅeni ạbumatuan phọ ọdi.
9ẠJizos ạteeny nmạriir phọ ekperenom kụ ạḅeni mọ, “Nyina edi,” kụ bịdi ọghi ọpham ruwol ọdi kụ ooseeny nyọdi. 10Kụ ạJizos ạḅeni bịdi mọ, “Kékiilaan. Ịki ẹḅeni bumor phọ ạmi bịdi ọghi ẹpe Galili. Ẹpe kụ ẹdi bịdi kụmiin ịmi.”
Ạḍughum ọnhu abukoriom oḍi phọ
11Mem dị ạnmariir phọ rọḍuaghu, buniin abukoriom oḍi phọ ọghi ẹpe ẹmha phọ kụ ọghaaph oomo ịpe emite bọ ọḅeni bụo ạrumhu ariil ạrikia phọ. 12Kụ bịdi rꞌikumoor awe phọ ookpomoghan oopuruan kụ ọghi ọngo iboom ikpoki we ẹgham mọ, 13kụ ọḅeni mọ, “Ịkaaph ghan mọ ạbumatuan phọ ọdi kụ uru omi nyọdi ọsighe ḍughul mem dị nyina rẹnaani yogh. 14Kụ ọdaam mọ ạnaghan, pọ yoor kotue ni ọkaaph oḅonyon ologhi ọdi. Ịyaar inyina kị́iḅaghami!”
15Kụ bịdi ọsighe ikpoki phọ, kụ ọtuugh ịpe ọḅeni bọ bịdi oḍighi. Kụ kꞌagee-pọ, ịphen kụ ịdi ạbuo aJu phọ rọkaaph ghan koleenye.
ẠJizos amite egaan aḍeenaan loor bụmatuan phọ ọdi
(Mạk 16.14-18; Luk 24.36-49; Jọn 20.19-23; Iiḍighi 1.6-8)
16 #
Mat 26.32; Mạk 14.28 Kụ ḍioph rꞌoniin ạbumatuan phọ ụḍua ni ọghi Galili ookpomoghan sịphe ẹeḅaraph phọ ạJizos aghol bọ ạḅeni bịdi. 17Kụ mem dị bịdi ọmiin bọ nyọdi, buniin uuseeny ni nyọdi kụ buniin ụ́kar umeeraam. 18Kụ ạJizos aru ạghaaphan rꞌạbidi kụ ạḅem mọ, “Ẹnaan mịngo ni ịmi oomo phọ ịikpo phọ ẹpe kꞌạke rꞌịsien ade phọ. 19#Iiḍ 1.8Esi ịphen phọ, ịki oomo areelhe aḅirini phọ ẹkpaariom awe phọ oḍighi bụmatuan ạmi, ewurogh bịdi mụum esi aḍien Ọde phọ, rꞌỌony phọ, rꞌUwaloor Iigbia phọ, 20ẹtughemi bịdi ooko oomo ạraraar phọ mị ạto bọ ịḅeni inyina. Kụ ilegheri mọ mị odianaan ni rꞌanyina, ḍio etum ḍio tụtu ẹteeny eekuna aḅirini phọ.”
Currently Selected:
Matiu 28: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
