Malakai 1
1
1Ḍịen kụ adom dị Ọmoogh-we phọ arom Malakai mọ ạḅeni weye phọ Ịzirel.
Ẹphomoghian Ọmoogh-we phọ esi Ịzirel
2 #
Rom 9.13
#
Azay 34.5-17; 63.1-6; Jer 49.7-22; Izik 25.12-14; 35.1-15; Ẹmos 1.11, 12; Obad 1.1-14 Ọmoogh-we phọ rạḅeni ghan weye phọ ọdi mọ, “Mị ịphomoghian ni inyina.”
Kụ ọlo bịdi ọpagharanaan mọ, “Ika kụ ẹdi nạ maḍeenaan ẹphomoghian phọ ạna esi ayoor?”
Ọmoogh-we phọ ạpagharanaan mọ, “Ịso rꞌạJekob uḍighi ni bumor, kụ ọlo mị mạphomoghian Jẹkob rꞌẹemara ẹemara phọ ọdi, 3ḅịle kẹn mị mạlhogh ḍien Ịso rꞌẹemara ẹemara phọ ọdi. Mị maagulemi de ạraaḅaraph phọ Ịso ạḅile ạḅitonaan de phọ ạḅogh ạngo sịno.”
4Eḍighi ịyaar dị ẹemara ẹemara phọ Ịso, awe phọ Idom kụ ọḅem, “Moogulemi rạmha phọ ayoor kụ ọlo yoor kọḅile ni ọloghoḍi ruutu phọ,” pọ kụ amem dị Ọmoogh-we phọ kạpagharanaan mọ, “Bịdi ọḅile ọlogh-ạa, mị kạḅile ni alereghi. Awe kọmagh bịdi mọ ‘Ẹkaraph eelhe’ ḅịle kẹn mọ ‘Eelhe dị Ọmoogh-we phọ mạghagham ologhi kꞌagee-pọ.’”
5Awe phọ Ịzirel kọmiin ni ịphen phọ rꞌariḍien ạbidi kụ bịdi ọḅem mọ, “Ọmoogh-we ạmoogh ni ịikpo ghạlamo ekpisi ade dị íḍighi de Ịzirel!”
Ọmoogh-we phọ ạḅaam bụpinyon rịkia phọ
6Ọmoogh-we Oomo Ịikpo phọ rạḅeni ghan bụpinyon rịkia phọ mọ, “Ọony rạngo ghan ni rughuenian ọde ọdi, ḅịle kẹn otelhedom rạngo ghan ni rughuenian ọde-otu ọdi. Mị kụ ọde anyina — eeghe kụ iḍighi bọ kụ nyina ịmi eegu ị́logh bọ? Nyina mịḅitonaan ịmi, kụ pụruku nyina repuru ghan mọ, ‘Ika kụ ẹdi yoor ọḅitonaan bọ nyịna?’ 7Ịphen kụ ịdi nyina eḍighi bọ — nyina ẹsighe eḍien dị ị́moogh ịyaar oḍighinom kụ rẹngo ghan sịphe enmeny phọ ạmi. Kụ nyina egbi opuru, ‘Ika kụ ẹdi yoor nyịna eegu ụ́logh bọ?’ Mị kịḅeni inyina — ọgbanaghi phọ ạmi nyina ị́sighe ị́manami ịyaar. 8#Dut 15.21Mem dị nyina ẹsighe ẹnam dị ẹmoogh ikpom ariḍien mụghumo ẹdi ímoon mụghumo ẹdi eḍighi ẹgha kụ ẹphighironom ẹkia ịngo ịmi, pọ ịduon phọ nyina regbiom ghan mọ ịiḅaghami ílho ḍụghum? Ịsighe ọdo ẹnam mọ ẹpe ẹngo ọdaam ẹmha phọ ophogh! Kẹḅaal li ologhi ọdi ḍụghum mụghumo oḍighinaan anyina ịyaar lọ nyina ẹlom?”
9Nyịidipho, nyina ariil ạrikia phọ, ịki ẹlhom Ẹnaan oḍighinaan ayira iiḅi, ophogh. Ọdi kạ́naghanan ịiḅereghi phọ anyina, kụ ịiḅaghami phọ edi esi anyina. 10Ọmoogh-we Oomo Ịikpo phọ rạḅem ghan, “Kịḅeeraan ịmi lọ oniin ọnyo anyina kakughi yogh rughuugh Otu Ịiḅereghi phọ bịn ikikima inyina ọghi ghan ọkpooni ẹepu ạnian sịphe ọgbanaghi phọ ạmi. Mị ụ́moogh mun ḍịḅeeraan esi anyina; mị kạ́sighe inmo phọ nyina iruom bọ ịmi. 11Awe aḅirini phọ emiigh eniin eekuna ẹghi esi ẹpheri phọ rụngo ghan ni ịmi rughuenian. Tọrotoro ekpisi bịdi rọsu ghan ni ịmuwa kụngo ịmi kọḅile ọphinyon igey ạrikia kụ ụngo ịmi. Oomo phọ ạbidi rụngo ghan ni ịmi rughuenian! 12Kụ ọlo nyina rimuton ghan ịmi eephoogh mem dị nyina rẹḅem ghan mọ ọgbanaghi phọ ạmi ọ́man mạar kụ ẹḅile kẹn ẹsighe eḍien dị nyina ketoph kụ rẹngo ghan sịphe enmeny phọ ạmi. 13Nyina ẹḅem mọ, ‘Ạraraar phọ ịphen mịpher iyoor!’ ḅịle kẹn nyina repoophe ghan risigh anyina kiphoghomiom ịmi. Nyina rẹsighe ghan ẹnam dị omi mụghumo ẹdi eḍighi ẹgha mụghumo ẹdi ímoon kụ kịngo ịmi. Nyina regbiom ghan mọ mị kạsighe ni ḍụghum? 14Itonyonaan kụ edianaan oye lọ ạsighe ẹnam lọ ị́moogh ịyaar oḍighinom kụ ạphighironom ẹkia ụngo ịmi mem dị sịphe aḍita ịnam mọ ọdi ogey ọga odi ni dị ọdi aguanaan ọngo ạmi. Ilegheri mọ mị aḍighi ni ogbogh ọdaam, ḅịle kẹn awe oomo areelhe phọ ruuseeny ghan ni ịmi.”
Currently Selected:
Malakai 1: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
