Luk 18
18
Aḍidogh dị ọsighe ekpukele ạnir rꞌoogboom ịiruen kụ odoghom
1Kụ ạJizos adogh ḍidogh phọ ạḍien ịlo ọtughemiom ạbumatuan phọ ọdi mọ ẹkpe ni ọoḅereghi ghan oomo amem, mọ bịdi kúdugh. 2Ọdi ạḅem mọ, “Oogboom ịiruen dị Ẹnaan úkiilaan ghan, oye ụ́logh ghan eegu, ạrol li eniin ẹmha. 3Oniin ekpukele ạnir ạrol kẹn ni ẹmha phọ ẹpe, dị ụ́gba ghan mem oru esi oogboom ịiruen phọ ọḅem ghan mọ, ‘Soph ugheelemi ịmi esi oye phọ rꞌạmi rọokonoghian bọ.’ 4Íbia ni oogboom ịiruen phọ ómeera oḍighi ịphen phọ, kụ ekureriom mọ ọdi ạḅemom ologhi mọ, ‘Ghạlamo ịduon mị Ẹnaan rákiilaan ghan bọ ni, ḅịle kẹn mị we eegu rạ́logh ghan bọ ni, 5kụ loor oomo ịiḅaghami phọ ạnir phọ ọphon rụngo bọ ịmi, mị kasoph ni ịpe esi bọ nyọdi akeelemi nyọdi. Ọbo ọdi kạkoromi ghan bọ oru ịsien tụtu mị amunenom.’”
6Kụ Ọmoogh-we phọ ạḅem kẹn ạloghom mọ, “Ịnaghanan ịpe oogboom ịiruen phọ ọpo asiph rꞌakeel úlegheri bọ ạghaaph bọ. 7Nyina regbi mọ Ẹnaan késoph ịiruen ekeelemi we phọ ọdi rọlom bọ nyọdi ọloghonaan ạḍighaagh ḍughul rꞌootaany phọ ḍụghum? Ọdi kaabinya ni ọloghonaan ạbidi ḍịghaagh ḍụghum? 8Mị rịḅeni ghan inyina mọ ọdi kaagborion ni asoph akeelemi bịdi. Kụ ọlo mem mọ Ọony phọ Oye katu bọ, kạmiin nụun ni bụphe omeeraam bọ nyọdi sịen aḅirini phọ ḍụghum?”
Aḍidogh dị ọsighe ọnyo aFarisi ḅịle rꞌọbonyiom iisogh kụ odoghom
9ẠJizos ạḅile ni adogh ḍidogh phọ ạḍien ạḅeni we dị ọmoogh oḍuom ologhi mọ ạbuno awe aruukuan, kụ rọḍagha ghan bụnon mọ, 10“Ịyal awe ụghi ni Otu Ịiḅereghi phọ ịlo ọoḅereghi. Oniin ọnyo aFarisi, ọphori phọ ọbonyiom iisogh.
11“Ọnyo aFarisi phọ ạmeera kụ ạaḅereghiom ologhi ọdi mọ, ‘Ẹnaan, mị rạseph ni nyịna mị ụ́tol aani bọ ịdipho ạbueri awe phọ rozirion ghan bọ rạraar ạbunon kạanyi koḍighi yogh ịkaraph, oleeghi ẹmha, ḅịle mị ụ́tol bọ kẹn ịdipho ọbonyiom iisogh phọ ọphon. 12Mị ạtuan ghan ni ịiḅereghi rạtol ọkoony ịyal amem wiki. Mị radi ghan ni oomo ạraraar phọ mị ạmoogh bọ kạsighe ghan muniin ạngo nyịna.’
13“Kụ ọbonyiom iisogh phọ ạmeera egher, ómighirom ophoophe ghisigh ọdi ophogh kꞌạke, kụ aphumugha ekpologhi ọdi kụ ạḅem mọ, ‘Ẹnaan, mị ọkaraph oye. Ụnma ịmi ighirigiir.’ 14#Mat 23.12; Luk 14.11Mị rịḅeni ghan inyina mọ Ẹnaan isoph ni egheelemi oye phọ ọphon kụ ọdi ạpham ọsar ọwilenaan agheelom, kọ́phori phọ, ịdi eḍighi bọ tọrobo oye lọ aphoophe loor ọdi Ẹnaan kesooromi ni, kụ tọrobo oye lọ asooromi loor ọdi Ẹnaan kepophe ni.”
ẠJizos ạngo ọghor ịbam ạnmuny
(Matiu 19.13-15; Mạk 10.13-16)
15Kụ ụsighe ni ghạlamo rꞌịbam ạnmuny dị pụruku rotelhe oruom Jịzos mọ ọdi ạḅam rạghaagh ọdi rụmhu ạbidi. Ạbumatuan phọ rọmiin kụ ọḅaam we phọ ạbuen. 16Kụ ạJizos ạmagh mọ bịdi oru kụ ạḅem mọ, “Imeera ịbam ạnmuny phọ oru ụteeny ịmi. Kémirighan bịdi. Ọmar phọ kꞌẸnaan ọlo ọdo phọ ạbuen phọ. 17Mị ạkar rịḅeni ghan inyina mọ oye lọ úsooromi loor ịdipho ọbumoony káḍigh ọmar phọ kꞌẸnaan bịn emuneen.”
Ịlo oniin ọolha
(Matiu 19.16-30; Mạk 10.17-31)
18Kụ oniin uwo ẹmhu apuru Jịzos mọ, “Ogey ọtughemia, mịna kaḍighi bọ ika kụ ạmoogh aani ghuḍum kꞌagee-pọ?”
19Kụ ạJizos mọ, “Nạ ụtuan eeghe kụ ụmagh bọ ịmi mọ ‘ogey’ phọ? Ogey oye ólho emuton Ẹnaan bịn. 20#Ẹḍua 20.14; Dut 5.18; Ẹḍua 20.13; Dut 5.17; Ẹḍua 20.15; Dut 5.19; Ẹḍua 20.16; Dut 5.20; Ẹḍua 20.12; Dut 5.16Nạ alegheri ni iilogh phọ mọ, ‘Ẹmha kále, enu kạ́ko, imi kámi, ịkaraph ạsiagba kạ́gbaanaan oye, ọde rꞌonhiin lọgh eegu.’”
21Kụ ọdi mọ, “Kꞌẹghoroghor ạmi, mị raako ghan ni oomo phọ iilogh phọ ịphen.”
22Mem dị ạJizos ạnaghan bọ ịphen phọ, kụ ạḅeni nyọdi mọ, “Eniin ịyaar bịn kụ ịḅile esughanaan nyịna oḍighi, keel aalhaghi oomo ạraraar phọ nạ ạmoogh bọ ạsighe ikpoki phọ ạngo rukulom, bịn nạ kạmoogh ni ẹelha ẹpe kꞌạke, kụ aru ụdaph ịmi.” 23Kụ ọdi rọnaghan ịphen phọ bịn akiriri, ịdi eḍighi bọ ọdi ạmoogh ni eboom ẹelha.
24ẠJizos rọmiin ịdi ọdi akiriri bọ kụ ạḅem mọ, “Ẹkpar ri iboom dị awe phọ ạbuphe ọmoogh bọ ẹelha koḍigh ọmar phọ kꞌẸnaan. 25Edugh ghụn ni dị ạkamel kạbol epogh ạlaga epu dị ọolha kaḍigh ọmar phọ kꞌẸnaan.”
26Kụ bụphe ọnaghan bọ ịphen phọ upuru ni mọ, “Ạnhian nụun kụ ẹdi kọpel bọ otene?”
27Kụ ọdi mọ, “Ịlo ẹkparanaan oye edughanaan ni Ẹnaan.”
28Kụ aPita ạḅem mọ, “Yoor phọ ạbuen ọbile ni ịpe yoor ọmoogh bọ kụ rọdaph bọ nyịna.”
29Kụ ọdi mọ, “Mị ạkar rịḅeni ghan inyina ịphen phọ. Oye ólho dị mạwile otu ọdi, mꞌạnir, mꞌabumor, mꞌọde rꞌonhiin, mꞌạnmuny loor ẹmhu ọmar phọ kꞌẸnaan, 30dị kónmoom iboom ịdi epu pạ sịen aḅirini phọ ọphon, kụ aḅirini phọ ọpo ratu bọ ọdi kạmoogh ghuḍum kꞌagee-pọ.”
ẠJizos ạkaaph akol ḍuugh phọ ọdi amuneni ịraar amem
(Matiu 20.17-19; Mạk 10.32-34)
31Kụ ọdi ạsighe ḍioph rꞌịyal ạbumatuan phọ atenom ọgbal kụ ạḅeni bịdi mọ, “Ịnaghan, ịduon yira rọki bọ Jeruselem, komuneni oomo phọ ạraraar phọ ariil phọ Ẹnaan ọge bọ ịlo Ọony phọ Oye. 32Kọsighe ni nyọdi ọlogh rạghaagh aruuruen, kụ ọnmoghoghoom yogh, ọgilaam, omurughiom ịghor, 33ọgurogh, kụ okiigh, kụ ḍughul otu dị kemuneniom ịraar kụ ọdi aḅetenu esi aḍuugh phọ.”
34Kụ ạbumatuan phọ ụ́naghan ẹmhu ọghaaph phọ ọphon. Ạaghinaan ni bịdi ẹmhu phọ, kụ bịdi úlegheri ịpe ạJizos aghol bọ kụ rạkaaph.
ẠJizos ạḅarion riḍien oniin ọlom-le
(Matiu 20.29-34; Mạk 10.46-52)
35Eniin aḍio ạJizos ạtol rapogh Jeriko, kụ oniin oye ikpom ariḍien ạrol li ude ọgbal oḅodo phọ ạlom ghan ịlom, 36kụ ạnaghan mọ aḍita awe rotu oten kụ apuru mọ, “Eeghe kụ imite?”
37Kụ awe phọ ọḅeni nyọdi mọ ạJizos ọpo ạNazeret kụ ratu oten.
38Kụ ọdi ạlooghi mọ, “Jịzos, ọony aDevid, ụnma ịmi ighirigiir.”
39Kụ bụdi ọrol risigh uubophoghi ni nyọdi mọ, “Kpomori ọnhu ạna,” kụ ọdi ạkparami ịlooghi phọ mọ, “Mọony aDevid, ụnma ịmi ighirigiir.”
40Kụ ạJizos ạmeera kụ ạtooghi mọ ọsighe oye phọ oruom nyịno. Ọdi mạabeeph kụ ạJizos apuru nyọdi mọ, 41“Nạ rạwa mọ ạmi aḍighinaan nyịna eeghe?”
Kụ ọdi mọ, “Oye phọ, mị ụḅile ụmiin eten.”
42Kụ ạJizos ạḅeni nyọdi mọ, “Mịin eten. Omeeraam mọ ạna maakonom nyịna.”
43Kụ egina amem bịn ọdi ạmiin eten kụ ạdaph aani Jịzos, kụ aboom ghan Ẹnaan. Kụ oomo awe phọ ọmiin bọ ụngo aani ni ḍịseph Ẹnaan.
Currently Selected:
Luk 18: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
