Job 34
34
1-2Nyina awe ẹsu ni oboom ologhi;
iler rụru ịphen mị rạkaaph bọ.
3Nyina kelegheri ni egey eḍien mem lọ nyina ẹenema,
kụ ọlo kíkpo-ọnhu olegheri-ịyaar mem lọ nyina ẹnaghan.
4Edi esi ayira ọoḅeghion kụ ophogh aḍighiton phọ.
5AJob rạḅem ghan mọ ọno ọ́piom,
mọ Ẹnaan ímeera isophonaan nyịno igey ịiruen.
6Ọdi rapuru ghan mọ, “Mịna kạgba ika ọkpe kụ ạḅem mọ mị ạpioman ni?
Uḍighi ni ịmi eboom ịyaar elegh, kụ ạri mị úḍighi ịkaraph.”
7Nạ mạmiin ghan ni oye dị ạghigh ọdi aJob?
Ọdi rạ́logh ghan eegu Ẹnaan.
8Ọdi raaḍikuan ghan bụkaraph awe
kạḅile arelhian buḍighinom ịkaraph.
9Ọdi rạḅem ghan mọ ạsuo ólho
ọdaph ogbi phọ Ẹnaan.
10Ịnaghanan ịmi, nyina awe ọnaghan ạḍughum!
Ẹnaan Oomo Ịikpo phọ kaḍighi ni ịkaraph ḍụghum?
11 #
Ạsuo 62.12
Ọdi raanmo ghan weye ruunmo esi ịpe bịdi moḍighi bọ,
kạḅile aḍighi bịdi ịpe ẹkpianaan bọ bịdi.
12Ẹnaan Oomo Ịikpo phọ réḍighi ghan ịkaraph;
ọdi rạ́pel ghan oye kaḍighan oye.
13Oye kụ ạngo Ẹnaan ịikpo phọ ọdi ḍụghum?
Oye kụ ạḅeni nyọdi mọ aphogh ghan aḅirini phọ ḍụghum?
14Eḍighi ịyaar dị Ẹnaan ẹsighe ḍiphooghu aghuḍum,
15pọ oomo awe lọ odi komuughu ni ọḅile oten ọposo.
16Nyịidipho ịnaghanan ịmi, eḍighi ịyaar lọ nyina ẹsu ni ologhi.
17Nyina rẹḍagha ghan Ẹnaan aruukuan phọ ḍụghum?
Nyina regbiom ghan mọ ọdi ọ́phomoghian iiḅi ịiruen?
18Ẹnaan resoph ghan ni ịiruen kephume bụdaam ẹmha rꞌawe ịtooghi,
mem lọ bịdi ụ́moogh ịyaar oḍighinom ọḅile oḍighi ịkaraph awe.
19Ọdi ráḍighan ghan rạalha phọ kạgbiphoghom rukulom,
loor esi dị ọdi kụ ạlhem ni tọrotoro oye.
20Oye katue ni amugh ekperenom ḍughul.
Ẹnaan kụ ẹgur weye eler ude, pọ bịdi mophe;
ọdi rạ́kparagha ghan kụ kaghiigh ophelegbe.
21Ọdi ragon ghan ni ịgbaranuom aruwol phọ ịpe oye ratelhe bọ.
22Ufiri ólho dị katue aakpereghi
oḍighinom ịkaraph dị Ẹnaan kẹ́miin.
23Ẹnaan réseere ghan mem
dị awe kọki kụ ọdi asophonaan ọoruen.
24Ọdi rạ́wa ghan oye dị kạki ạwaaghi apogh
kụ ọdi agbi onme abuḍiemiom oseere ạbunon.
25Ịdi eḍighi bọ ọdi alegheri ni ịpe bịdi roḍighi bọ;
ọdi kagboton sịdol phọ ạbidi aagulemi mem aḍughul.
26Ọdi rạliom ghan buḍighinom ịkaraph esi lọ oomo awe kọmiin,
27loor esi dị bịdi mọwile ọdaph ọdi
ọḅile ọḅitonaan ịto phọ ọdi.
28Bịdi ọkpaariom rukulom mọ omoghi ọmagh Ẹnaan,
kụ ọdi ạnaghan ni ḍịmagh ọloghonaan ạḍighaagh phọ ạbidi.
29Eḍighi ịyaar dị Ẹnaan egbiighi mọ ọno káḍighi ịyaar,
oye ólho dị kạnughe nyọdi ẹka.
Eḍighi ịyaar dị ọdi ạaghi risigh ọdi, awe kólegheri mun ịlo oḍighi.
30Ịyaar kẹ́tol dị areelhe phọ keḍighi
kụ osophoghom ịkaraph awe ọda ạbidi.
31Job, nạ maruphughian ni ịkaraph phọ ạna ạḅeni Ẹnaan ḍụghum,
ạḅile aguanaan mọ nạ káḍighi mun ịkaraph?
32Nạ mapuru ni Ẹnaan mọ ọdi aḍeenaan nyịna ịkaraph ạna,
ḅịle kẹn nạ mameeraam ni ọwile oḍighi ịkaraph?
33Ịduon nạ aghel bọ ịpe Ẹnaan reḍighi bọ,
nạ ragbiom ghan mọ ọdi katue ni aḍighi ịpe nạ rạwa bọ?
Igbiighi phọ ịlo ạna, kị́lo ạmi;
ụḅeni iyoor ịlo nạ ạatughian.
34Tọrotoro oye lọ ạsu ologhi kameeraam ni;
tọrotoro oye olegheri-ịyaar lọ ụnaghanan ịmi kạḅem
35mọ aJob rạkaaph ọghaaph arolologhi
ḅịle mọ oomo ọghaaph phọ ọdi aḍeenaan élegheri-ịyaar.
36Ịmaar ẹetughian oomo ạraraar phọ aJob ạḅem bọ;
nyina kẹmiin ni mọ ọdi rạkaaph ghan ịlo ịkaraph awe.
37Ọdi mạsighe ọḅaar ẹmhu ạḅaram ịkaraph phọ ọdi;
risigh oomo phọ ayira ọdi rạnmoghoghoom ghan Ẹnaan.
Currently Selected:
Job 34: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
