Emiighom 48
48
ẠJekob ạngo Ifraim rꞌạManase ọghor
1Ịphen phọ reten, kụ oru ọḅeni Jọsef mọ, “Aloor ọde phọ ạna ị́nighe.” Kụ ọdi ạpham Ifraim rꞌạManase, ịyal phọ ạnmuny phọ ọdi, ạghimom ọmiin ọdi. 2Mem dị ạJekob ạnaghan bọ mọ ạJosef ọony phọ ạna maru ophogh ọdi, aḅetenu ni ạrol ude sịphe ẹmina phọ. 3#Emi 28.13, 14ẠJekob ạḅeni Jọsef mọ, “Ẹnaan Oomo Ịikpo phọ igananami ni loor iḍeenaan ịmi ẹpe Luz, ẹpe eelhe phọ aKenan kụ ịngo ịmi ọghor. 4Kụ ịḅeni ịmi mọ, ‘Mị kạngo nyịna ọoloogh ạnmuny. Nạ kạmar amuzeḍi, ạmoogh ḍita areelhe. De phọ ạḍien mị kạngo nmụny ạnmuny ạna eḍighi ẹlo ạbidi kꞌagee-pọ.’
5“Kụ nyịidipho ịyal phọ ạnmuny phọ ọmaranaan bọ nyịna ẹphen Ijipt kụ mị agbi bọ oru phọ, Mạnase rꞌIfraim, ạbuo ạmi, ịdipho aRuben rꞌạSimion oḍighi bọ bụo ạmi. 6Mụghumo nạ ạmoogh bụnon ạnmuny, pọ mị kạ́sighe mọ ạbuo ạmi. Erua ạbidi kẹḍua esi Ifraim rꞌạManase kụ etu. 7#Emi 35.16-19Mị raḍighi ghan ịphen phọ loor ẹmhu onhiin phọ ạna aRechel. Ịyaar phọ eḍighi bọ ịduon: mem mọ mị ạḍua bọ ẹpe Mesopotamia ratigheel, aRechel amugh ẹpe eten aKenan, esi dị ị́kelan rꞌẸfrat. Mị uḍi ni nyọdi ọgbal eten Ẹfrat.” (Nyịidipho Ẹfrat phọ pọ ạBetilihem.)
8Mem dị ạJekob ạmiin bọ nmụny phọ ạJosef, ọdi apuru ni mọ, “Bụen phọ ạbughen?”
9ẠJosef ạphagharanaan mọ, “Bụen phọ ạnmuny ạmi dị Ẹnaan mịngo ịmi ẹphen Ijipt.”
Kụ ạJekob ạḅeni nyọdi mọ, “Seseeny, sịghe bịdi uruom, mị ụngo bịdi ọghor.” 10Loor ikumoor ạJekob ọ́kar mun ọ́miin eten igeny, kụ ạJosef ạsighe nmụny phọ aruom nyọdi, kụ ọdi aghurughi kụ ạḅile ạkpunogh bịdi. 11Kụ ạJekob ạḅeni Jọsef mọ, “Mị úseere ologhi ọḅile ọmiin ạna kụ Ẹnaan meḍighi ịdi mị mạmiin nmụny ạna.” 12ẠJosef aḅerion nmụny phọ rụgbo ạJekob, kụ azumeri ghisigh ọdi akaram ude risigh ạJekob.
13ẠJosef aseere Ifraim ḍịghaagh ekeeny ạJekob, kụ aseere Mạnase ḍịghaagh elhiom. 14Kụ ọlo ạJekob ạgbagh rạghaagh kụ ạsighe ḍịghaagh elhiom ọdi ạzuom ẹmhu Ifraim, ghạlamo ịdipho ọdi kụ aḍighi bọ ọbumoony phọ; kụ ạḅam ḍịghaagh ekeeny ẹmhu ạManase, ọpo aḍighi bọ okumoor phọ. 15Kụ ọdi ạseph Jọsef mọ,
“Ẹnaan phọ ẹpe ạburude phọ ạmi Ebraham rꞌẠizik okumu bọ ẹseph nmụny phọ ạbuen!
Ẹnaan phọ ẹpe iiko bọ ịmi oomo asuḍughul-otu aghuḍum mọ ạmi, ẹteenye ḍio phọ ạḍien ẹseph bịdi!
16Ọokpaany Ẹnaan phọ ọpo ụtagharan bọ ịmi esi oomo ịiḅaghami ạseph bịdi!
Bịdi omitiom ḍien phọ ạmi rꞌaḍien ạburude phọ ạmi, Ebraham rꞌẠizik!
Bịdi ọmoogh ịbadi ạnmuny rꞌịbadi ạnmuny ạnmuny!”
17Mem dị ạJosef ạmiin bọ mọ ọde phọ ọno ạḅam ḍịghaagh elhiom ọdi ẹmhu Ifraim íkia ni nyọdi; kụ ạpham ḍịghaagh ọde phọ ọdi ịlo ọsighe ẹmhu Ifraim, ọḅam ẹmhu ạManase. 18ẠJosef ạḅeni ọde phọ ọdi mọ, “Kị́duon, ọde ạmi. Ọphon kụ ọkpana ọony, ḅạm ḍịghaagh elhiom ạna ẹmhu ọdi.”
19Ọde phọ ọdi ómeera, kụ ạḅem mọ, “Mị alegheri ni, mọony ạmi, mị alegheri ni. ẠManase kạmoogh ghan ni we, aḍighi ogbogh, kụ ọlo ọbam umor phọ ọdi kụ kạbugh apu nyọdi; kụ ạnmuny ạnmuny ọdi koḍighi igbogh areelhe.”
20 #
Hib 11.21
Kụ ọdi ạseph bịdi ḍio phọ ạḍiphe kụ ạḅem mọ,
“Awe Ịzirel kọsighe ghan siḍien anyina kụ ọsephom ghan we, kụ ọḅem ghan mọ, ‘Ẹnaan iḍighi aani inyina ịdipho Ifraim rꞌạManase!’” Ịduon kụ ịdi ạJekob ạsighe Ifraim ạmeremi mọ aḍiemiom Mạnase.
21Pọ kụ amem dị ạJekob ạḅeni Jọsef mọ, “Nạ rạmiin bọ ni, rẹkpul dị mị kamugh; kụ Ẹnaan phọ kịrolonaan ni nyịna kụ ạsighe nyịna aḅulemi ẹpe de ạburude phọ ạna. 22Ịdi etum pạ, nạ kábumor phọ ạna kụ ẹdi mị rạngo Sẹkem, ịma phọ ade ẹnuum mọ, ḍịphe mị ạar bọ Ạmorait rꞌelhool rꞌạkumugh ạmi.”
Currently Selected:
Emiighom 48: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
