Emiighom 47
47
1ẠJosef ạghi ạḅeni ọdaam eelhe phọ mọ, “Ọde phọ ạmi, rꞌabumor phọ ạmi, rꞌịga rꞌạsinam rꞌoomo aruphua phọ ạbidi mọḍua ẹpe Kenan osi Gosen.” 2Ạpham buniin abumor phọ ọdi, oogh ạbidi, aru aḍeenaan ọdaam eelhe phọ. 3Ọdaam eelhe phọ apuru bumor phọ ọdi mọ, “Nyina reḍighi ghan eeghe ọdo oḍighi?”
Kụ bịdi ọḅeni ọdaam eelhe phọ mọ, “Abutelhedom mọ ạna, rꞌạburude phọ ayoor, abupoghom ịnam.” 4Bịdi ọḅile ọḅeni ọdaam eelhe phọ mọ, “Yoor morigheel ẹphen, ịdi eḍighi bọ abutelhedom mọ ạna ụ́moogh ịḅal ọngo ịnam mọ ạbidi; ịgbakuro phọ ẹpughan ẹpe Kenan; kụ yoor rọoḅereghi ni nyịna mọ meera abutelhedom mọ ạna orugh ẹpe Gosen.” 5Ọdaam eelhe phọ ạḅeni Jọsef mọ, “Ọde phọ ạna rꞌabumor phọ ạna morigheel ẹphen. 6Ade phọ Ijipt ạḍia ạna, tụghemi ọde phọ ạna rꞌabumor phọ ạna ekpisi lọ ẹḅeeraan nyịna, bịle bịdi orugh ẹpe Gosen, kụ nạ alegheri sịphe ogbo aḍita abumor phọ ạna bụlo ọmoogh ịnyaam, pọ sịghe aru bịdi ophogh ghan ịnam mị ịphen ạmi.”
7ẠJosef ạsighe Jẹkob ọde phọ ọdi aru aḍeenaan ọdaam eelhe phọ, kụ ạJekob ạseph nyọdi. 8Ọdaam eelhe phọ apuru Jẹkob mọ, “Nạ mạman bọ sịen ika ạsia?”
9ẠJekob ạḅeni ọdaam eelhe phọ mọ, “Ạsia dị mị ạrol iiruen ẹman bọ oniin okuron rꞌịraardi ạsia; ạsia ghuḍum mọ ạmi ịphurukpu ni bịn, rꞌiboom ịminimiin. Ạsia phọ ạmi kẹ̋man sịa ạburude phọ ạmi, mụghumo ạsia dị bịdi ọrol iiruen.” 10ẠJekob ạseph ọdaam eelhe phọ, kụ amite kꞌọdi ạḍua. 11ẠJosef ạsighe ọde phọ ọdi rꞌabumor phọ ọdi arughemi de ẹpe Ijipt, ḍigeny ade ẹpe Rameses, ịdipho ọdaam eelhe phọ ạḅem bọ. 12ẠJosef ạmaar ri ạpham ọde phọ ọdi rꞌabumor phọ ọdi, aako ghan bịdi rꞌoomo ọto ọde phọ ọdi, ạngo ghan bịdi eḍien, bụo otu rꞌotu.
Ịgbakuro
13Eḍien emuneen ẹpe oomo ade phọ; ịgbakuro phọ ịbugh ni iboom tụtu eḍien emuneen oomo areelhe phọ Ijipt rꞌoomo areelhe phọ aKenan. 14ẠJosef aakpomoghi oomo ikpoki phọ ọmoogh bọ ẹpe Ijipt, rꞌịpe ọmoogh bọ ẹpe Kenan, ikpoki ịpe oghoom bọ eḍien phọ, ạsighe ạghiomonaan ọdaam eelhe phọ. 15Mem dị awe phọ molhiom oomo ikpoki phọ ạbidi ọmadan ẹpe Ijipt rꞌẹpe Kenan, kụ oomo awe phọ Ijipt ọghi ọteeny Jọsef kụ ọḅeni mọ, “Ụngo iyoor eḍien. Esi ẹmhu eeghe kụ ẹdi yoor kọtol egbodo ạna kụ omuughu? Ikpoki phọ ayoor memuneen.”
16ẠJosef ạphagharanaan bịdi mọ, “Ịngo ịmi ịnam mọ anyina, mị ịngo inyina eḍien, ẹrol mụdi uunmenan ni, eru mạar dị ikpoki inyina ílho.” 17Bịdi ọghi ọsighe ịnam mọ ạbidi oruom Jọsef, kụ ạJosef ạsighe eḍien aanmenenom rụsu phọ rꞌiyool-ịga phọ rꞌạrutu-ịga phọ rꞌạsinam rꞌịnam adool phọ ạbidi. Bịdi ọsighe ghan oomo phọ ịnam mọ ạbidi kụ onmiom ghan eḍien lhạ phọ ạḍiphe.
18Ạlha phọ ạḍiphe emuneen, lhạ phọ ḍịphe etum bọ pạ kụ bịdi ọḅile oru esi ọdi kụ ọḅeni nyọdi mọ, “Ye dị ụmoogh iyoor, yoor nyịna kạ́aghinaan: oomo ikpoki phọ ayoor, yoor molhiom ọman, oomo ịnam mọ ayoor ịlo ạna ọde-otu phọ ayoor; ịyaar iyoor ísugha mun; ịyaar dị ẹḅile esughanaan iyoor ọḅogh ọngo ọde-otu phọ ayoor, aruzu phọ rꞌade phọ ayoor bịn. 19Esi ika kụ ẹdi yoor kọtol sịen egbodo phọ ạna kụ komuughu, yoor rꞌade phọ ayoor? Legheri ghụn ạsighe eḍien ughoom iyoor rꞌade phọ ayoor, ẹrol dị yoor rꞌade phọ ayoor oḍighi rẹbene ọdaam eelhe phọ. Ụngo iyoor ịizupha ọzuph yoor ọrol kúmugh, ọbo ade phọ ayoor keḍighi ghan bọ ọkpagha.”
20ẠJosef aghooghinaan ni ọdaam eelhe phọ oomo ade phọ Ijipt. Tọrobo ọlo Ijipt aal li de ọdi, ịdi eḍighi bọ ịgbakuro phọ ịiḅaghami ni bịdi iboom. Oomo ade phọ Ijipt eḍighi ḍịo ọdaam eelhe phọ. 21Kụ we phọ, ạJosef ạsighe aḍighi rẹbene ọdi, emiigh eekuna phọ ẹphen esiemi eekuna phọ ẹpe Ijipt, 22omuton rere ariil ạrikia phọ bịn kụ ịdi ọdi úko, ịdi eḍighi bọ ọdaam eelhe phọ kụ ạngo bịdi de phọ mọ bịdi ọrol: kụ iḍighi kụ bịdi rere ịlo ạbidi úbologhi. 23ẠJosef ạḅeni we phọ mọ, “Ipogh, mị migho inyina rꞌade phọ anyina rodon, ạngo ọdaam eelhe phọ. Nyịidipho, ịporono ịizupha ịlo anyina, ịsighe ẹghi ẹzuph sịphe ade phọ. 24Ẹteeny mem ibugha nyina kedi ghan eḍien phọ oogh abin, ẹsighe bin ẹngo ọdaam eelhe phọ. Nyina ẹsighe inya abin ịlo nyina kẹḅile ẹzuph sịphe ade phọ ele eḍien anyina rꞌọto anyina, rꞌeḍien ẹlo ịbam ạnmuny phọ.”
25Kụ bịdi ọḅeni nyọdi mọ, “Nạ mạphel ghuḍum ayoor. Ẹḅeeraan nyịna ọde-otu phọ ayoor, pọ yoor koḍighi ni rẹbene ọdaam eelhe phọ.” 26ẠJosef ạlogh ologh ẹpe oomo eelhe phọ Ijipt dị odi ni kꞌarodon: ọdaam eelhe phọ kapin ghan muniin abin esi oogh asibin phọ, omuton rere ariil ạrikia phọ kụ ịdi ítu ịlo ọdaam eelhe phọ.
Ịlom ạJekob dị ekureri
27Bụo Ịzirel urugh ẹpe eelhe phọ Ijipt, ẹpe ade dị oghol mọ aGosen, kụ ọmoogh ruphua, ọmaraghi omuzeḍi. 28ẠJekob arugh bọ ẹpe eelhe phọ Ijipt ḍioph rꞌoḍual ạsia. ẠJekob ạman bọ oniin okuron inyadi rꞌoḍual ạsia kụ amugh. 29#Emi 49.29-32; 50.6Kụ rẹteeny mem dị ạJekob kamugh kụ ọdi ạmagh Jọsef ọony phọ ọdi, kụ ạḅeni nyọdi mọ, “Eru mạar dị nạ ạmoogh ni igbiririph ạmi rꞌọgba igeny esi ạmi, pọ mị rạaḅereghi ni nyịna, lọgh ḍịghaagh ạna ịtaany ạmi. Seseeny, ịmi kúḍi ẹphen Ijipt. 30Uḍi ịmi atumeriom ọde phọ ạmi; urool ịmi ạḍuanam ẹphen Ijipt, ụsighe ịmi ạghimom ẹpe ẹkaraph eḍum mọ ạburude phọ ạmi kụ iḍi ịmi.”
ẠJosef ạḅem mọ, “Mị kạtuugh ni ịphen nạ ụḅeni bọ ịmi aḍighi.”
31Kụ ạJekob ạḅeni nyọdi mọ, “Kunya.” Kụ ạJosef akunya. ẠJekob abeḍian ẹpe ẹmhu ẹmina phọ.
Currently Selected:
Emiighom 47: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
