Emiighom 46
46
ẠJekob rꞌọto ọdi oḅerenu okeel ẹpe Ijipt
1Kụ Ịzirel aḅetenu aakoroghian oomo aruphua phọ ọdi ọghi erelhe phọ, ạghi asi Beersheba kụ aḍighi yogh rạraar aghuḍum ạngo Ẹnaan phọ Ạizik ọde phọ ọdi aaseeny ghan bọ. 2Ẹnaan eru esi Ịzirel ụmalha ḍughul, kụ ẹmagh mọ, “Jẹkob, Jẹkob.”
Kụ ọdi ameera mọ, “Mị odi ni sịen.”
3Kụ ọdi ạḅeni nyọdi mọ, “Mị kụ Ẹnaan, Ẹnaan phọ ọde phọ ạna. Kákiilaan ogheel ẹpe Ijipt. Mị kạbughe ni nyịna ẹpe phọ, aḍighi eboom eelhe. 4Mị rạdaph ni nyịna kạghi aani ẹpe Ijipt, kụ mị kạḅile ni ạsighe nyịna aḅulemi. ẠJosef kạsighe ni rạghaagh ọdi kụ apukiom riḍien ạna.”
5ẠJekob aḅetenu ẹpe Beersheba, kụ ạnmuny phọ Ịzirel ọsaany Jẹkob ọde phọ ạbidi, rꞌịbam ạnmuny phọ ạbidi rꞌạnmariir phọ ạbidi ologhi oghuugh-ude phọ ọdaam eelhe phọ ạngo bọ mọ ọghi ọsaanyom nyọdi. 6#Iiḍ 7.15Kụ bịdi ookoroghian ịnam mọ rꞌaruphua phọ ịpe bịdi ọmoogh bọ ẹpe Kenan ọghi osi Ijipt; ạJekob rꞌoomo ọto phọ kꞌọdi, 7ạnmuny phọ ọdi rꞌạnmuny ạnmuny phọ ọdi, ạnmanyaan ọdi rꞌạnmuny ạnmanyaan phọ ọdi, rꞌoomo ọto kꞌọdi rꞌọdi ọghi osi Ijipt.
8Ịphen kụ asiḍien ạnmuny phọ Ịzirel ogheel bọ Ijipt, ạJekob rꞌạnmuny ọdi. ARuben ọkpana ọony phọ ạJekob, 9rꞌạnmuny aRuben: Hanok, Palu, Hẹzron, rꞌaKami. 10Ạnmuny ạSimion: Jẹmuel, Jamin, Ohad, Jakin, Zohar rꞌaSaul, ọony ạnir ọlo aKenan. 11Ạnmuny aLivai: Gerson, Kohat, rꞌaMerari. 12Ạnmuny phọ aJuda: Sela, Pẹrez rꞌaZera (Er rꞌOnan, ạbueri phọ ạnmuny aJuda umugh ẹpe Kenan.) Ạnmuny ạPerez: Hẹzron rꞌaHamul. 13Ạnmuny Ịsaka: Tola, Pua, Jashub rꞌaSimron. 14Ạnmuny ạZebiulon: Sered, Elon rꞌaJaleel. 15(Bụen phọ ạnmuny dị aLia ạmaranaan Jẹkob ẹpe Mesopotamia, rꞌaDaina ọnyani phọ ọdi. Oomo ạnmuny phọ ọdi, nmạnyaan rꞌalephiri, ọman bọ ịraardi rꞌịraar ạnmuny).
16Ạnmuny ạGad: Zefon, Hagi, Suni, Ezbon, Eri, Arod rꞌAreli. 17Ạnmuny Ạser: Imna, Isva, Isvi, Beria rꞌaSera umarani ạbidi; ạnmuny aBeria: Heber rꞌạMalkiel. 18(Bụen ạnmuny aZilpa ọpo ạLeban ạngo bọ Lia ọnyani phọ ọdi; bụen kụ ạbudi ọdi ạmaranaan bọ Jẹkob, ḍioph rꞌodiiny ạnmuny).
19Ạnmuny aRechel ạnir phọ ạJekob: Jọsef rꞌạBenjamin. 20#Emi 41.50-52Ạnmuny dị ạJosef ạmar ẹpe Ijipt: Mạnase rꞌIfraim; Ạsenat ọnyani aPotifera oyil ạrikia phọ ọlo aOn kụ ạmaranaan nyọdi. 21Ạnmuny ạBenjamin: Bela, Beker, Asbel, Gera, Nemon, Ehi, Ros, Mupim, Hupim rꞌArd. 22Bụen phọ kụ ạnmuny dị aRechel ạmaranaan Jẹkob, ọman bọ ḍioph rꞌinya ạnmuny.
23Ạnmuny ạDan: Husim. 24Ạnmuny ạNaftalai: Jazeel, Guni, Jẹzer rꞌaSilem. 25Bụen phọ kụ ạnmuny aBilha, ọpo ạLeban ạngo bọ Rechel ọnyani phọ ọdi, ọpo ạmaranaan bọ Jẹkob, oḍual ạnmuny.
26Oomo ọto ạJekob dị rꞌọdi ogheel bọ Ijipt. Bụdi oru ọkaraghi ạbudi dị kụ ạmar, dị ụ́ḅaram nmạriir ạnmuny phọ ạJekob, ọman bọ odiinydi rꞌodiiny awe. 27#Iiḍ 7.14Ạnmuny phọ, bụphe ọmaranaan bọ Jọsef ẹpe Ijipt, ịyal ạnmuny: oomo ọto ạJekob dị ogheel bọ ẹpe Ijipt, oḍualdi awe.
ẠJekob rꞌọto ọdi ẹpe Ijipt
28Kụ ọdi arom Juda mọ ọdi ạghi ạteeny Jọsef ạḅeni mọ ọdi aru ạmiin nyịno ẹpe Gosen, kụ bịdi ọghi osi Gosen. 29ẠJosef aḍigh oghuugh ade phọ ọdi ạghi ọmiin Ịzirel ọde phọ ọdi ẹpe Gosen, aḍeenaan loor ọdi nyọdi; kụ aghinighi orum ọdi ạrol sịphe orum mọ ọdi amoghi yogh ebia. 30Ịzirel ạḅeni Jọsef mọ, “Mẹnighe dị mị kamugh, mị mạmiin bọ ghisigh ạna alegheri bọ mọ nạ odi ni.”
31ẠJosef ạḅeni bumor phọ ọdi rꞌọto ọde phọ ọdi, mọ, “Mị kạki ạḅeni ọdaam eelhe phọ mọ abumor phọ ạmi rꞌọde phọ ạmi rꞌọto ọdi ọrol ghan bọ ẹpe Kenan moru osi kꞌạmi. 32Oḍighi awe phọ ạbuen ophogh ghan rꞌookonom ghan ịnam, kụ bịdi ọpam ni ịga phọ rꞌạsinam mọ, rꞌoomo aruphua phọ ạbidi. 33Eḍighi ịdi ọdaam eelhe phọ ịmagh inyina kụ ipuru inyina mọ, ‘Eeghe kụ oḍighi anyina?’ 34pọ ịpagharanaan nyọdi mọ, ‘Oḍighi abutelhedom mọ ạna ophogh ghan ịnam kꞌẹghoroghor ayoor kꞌarodon, yoor rꞌạburude ayoor,’ ẹrol dị nyina etugh ẹphen Gosen, ịdi eḍighi bọ abupoghom ịnam ạḅaphanya ni ẹphen Ijipt.”
Currently Selected:
Emiighom 46: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
