Emiighom 44
44
Ạkop dị aphe
1ẠJosef ạḅeni ọsaam ịisa phọ ọdi mọ, “Doghoḍi eḍien iloghi ạsikpuru phọ ạbidi, ịlo bịdi kotue otool; kụ ạsighe ikpoki phọ aḅulemi adoghoḍi sịphe ịnhu ạsikpuru phọ ạbidi, uwo ikpoki rꞌikpoki. 2Ạsighe kọp phọ ạmi, nyọpo asilva phọ, ạlogh ologhi ạkpuru ọbam ọony phọ, rꞌikpoki phọ dị aghoom bọ eḍien phọ.” Kụ ọdi ạtuugh ịpe ạJosef ạḅeni bọ nyọdi aḍighi. 3Kụ rẹḅaal, kụ ạḅeni bịdi mọ, “Ikeel, nyina rꞌịnam adool phọ anyina.” 4Bịdi ọḍua bọ ẹpe ẹmha phọ kọ́kel, ạJosef ạḅeni ọsaam ịisa phọ ọdi mọ, “Ụgua, porogh-we phọ, kụ, mem dị nạ ạghi ạteeny bịdi, apuru bịdi mọ, ‘Uḍighi ika kụ nyina ẹsighe bọ ịkaraph kụ ẹkpiom iiḅi? Uḍighi ika kụ nyina ẹsighe bọ kọp asilva phọ ạmi ẹḍuanam? 5Ọphon phọ kụ kị́yaar dị ọde-otu phọ ạmi rạpugholom ghan miim? Ọphon phọ kụ kị́yaar dị keḍeenaan ịlo kemite ẹḅeni nyọdi? Ịphen phọ nyina eḍighi bọ ị́nighe.’”
6Mem dị ọdi ạteeny bọ bịdi, kụ ạtuugh ịpe ọḅeni bọ nyọdi ạghaaph. 7Kụ bịdi ọphagharanaan nyọdi mọ, “Eeghe kụ ịkom bọ ịphen phọ, kụ oye phọ ụmoogh bọ iyoor ạghaaph bọ ịphen phọ? Ịlo ayoor ríḍigh, dị yoor abutelhedom mọ ọdi koḍighi ịphen phọ. 8Pogh, ikpoki phọ yoor ọmiin bọ iloghi ạsikpuru phọ ayoor ẹpe Kenan, yoor ụsighe ni oḅulemi. Kụ keḍighi ika kụ yoor omi silva mꞌagol pạ otu ọde-otu phọ ạna? 9Tọrobo ọnyo ayoor dị ọwa kụ ọmiin mọ ọdi kụ aḍighi ịphen phọ, pọ ọdi amugh, kụ aḍita phọ ayoor oḍighi rẹbene ạna.”
10Kụ ọdi ạḅeni bịdi mọ, “Ẹrol ịdipho nyina ẹghaaph bọ. Tọro ọnyo anyina dị ọmiin kọp phọ ḍịghaagh ọdi, pọ kaḍighi ẹbene ạmi. Nyina ílho aani.” 11Bịdi oogborion osereghian sidool phọ ạbidi, oye ye ạkatan ghan kpụru ọdi. 12Kụ ọdi amiighom kpụru okumoor phọ ọwa, kụ ẹteeny ọbam mọ, kụ ọmiin kọp phọ ologhi ạkpuru ạBenjamin. 13Bịdi orunyian ibura ạbidi loor ọto, kụ ọsaany sidool phọ ạbidi ịnam adool ạbidi kụ oḅula ẹpe ẹmha phọ.
14AJuda rꞌabumor phọ ọdi ọghi osi kꞌạJosef ọteeny nyọdi, kụ okpuḍughian risigh odi. 15ẠJosef apuru bịdi, “Ịphen phọ nyina eḍighi bọ eeghe ọdo eḍighinom ịyaar? Nyina elegheri mọ ọdo oye dị ạrol ịduon ạmi rạmoogh ghan ni ẹḅeni.”
16AJuda ạḅem mọ, “Yoor kọḅeni nyịna eeghe? Yoor kọkaaph eeghe? Yoor koḍighi ika kụ oseleman? Ẹnaan mẹwa emitiom apum otelhedom mọ ạna. Pogh, yoor ạrebene ạna, oomo phọ ayoor rꞌọpo ọmiin bọ kọp phọ ḍịghaagh ọdi.”
17Kụ ọdi ạḅem mọ, “Ịlo ạmi riḍigh oḍighi ịphen. Ọpo ọmiin bọ kọp phọ ḍịghaagh ọdi kụ kaḍighi ẹbene ạmi. Kụ nyina, ikeel rꞌedughom, ẹghi ẹnighe, esi ẹteeny ọde anyina.”
AJuda ạaḅereghian Jọsef loor ạBenjamin
18AJuda ạghi ạteeny Jọsef kụ ạḅem mọ, “Sey, oye dị ụmoogh ịmi, seseeny, mị rạaḅereghi ni nyịna. Meera otelhedom mọ ạna ạghaaph ịyaar. Kạ́kagham ologhi otelhedom mọ ạna. Nạ phọ kụ ọdaam eelhe phọ ni rꞌaloor. 19Ọde-otu phọ ạmi upuru iyoor abutelhedom mọ ọdi mọ, ‘Nyina ẹmoogh ni ọde rꞌumor?’ 20Yoor ụphagharanaan ni mọ, ‘Yoor ọmoogh ni ọde dị maḍighi okumoor oye, rꞌọbam umor, dị ọmar sịen ọde phọ ayoor mạkpo bọ. Umor ọdi mamugh, ogina phọ ọdi kụ asughanaan onhiin phọ ọdi, ọde phọ ọdi ạpomoghian nyọdi iboom.’ 21Nạ ụḅeni ni iyoor butelhedom mọ ạna mọ, ‘Ịpam nyọdi erumom, mị ụsighe riḍien ạmi ụmiinom aani nyọdi.’ 22Kụ yoor ọḅeni nyịna mọ, ‘Ọbumoony phọ kátue ạbile ọde phọ ọdi. Eru mạar dị ạwile ọde phọ ọdi, pọ ọde phọ ọdi kamugh ni.’ 23Kụ nạ ụḅeni iyoor abutelhedom mọ ạna mọ, ‘Eru dị umor phọ anyina útu, pọ nyina ịmi rị́miin.’
24“Mem mọ yoor ọghi bọ osi ọteeny otelhedom mọ ạna ọde phọ ạmi, yoor ụghaaph ni oomo ịpe nạ ọpo ụmoogh bọ iyoor ạghaaph bọ ọḅeni nyọdi. 25Ọde phọ ayoor ạḅile ni urom iyoor mọ, ‘Ịḅile ẹghi egho ẹphurukpu eḍien,’ 26kụ yoor ọḅeni nyọdi mọ, ‘Yoor kọ́ki, dị ọbam umor phọ ayoor rạ́ki aani. Omuton dị ọdi rạki aani, pụruku yoor kọki, ịdi eḍighi bọ yoor bịn ọghi dị ọbam umor phọ ayoor ụ́ki, pọ yoor ghisigh oye phọ rọ́miin.’ 27Otelhedom mọ ạna, ọde phọ ạmi, ụḅeni iyoor mọ, ‘Tọ nyina elegheri ni mọ aRechel ạnir phọ ạmi ụmaranaan bọ ịmi ịyal alephiri ạnmuny, 28kụ oniin mụwile ịmi, kụ mị ragbi mọ elhom ẹnam mẹkiriph nyọdi ịpherepe. Kꞌaḍio phọ mị nyọdi ụ́miin mun. 29Eru mạar dị nạ ạsighe nyọon asugha phọ ḍịghaagh ạmi kụ ịkaraph emitenaan nyọdi ẹpe eten phọ, tọ pọ mị kạpam ọto rꞌạsuol kụ akeelom ọmar iḍim.’
30“Kụ nyịidipho kụ mịna ạghi asi ẹpe kꞌotelhedom mọ ạna, ọde phọ ạmi, kụ ọony phọ rꞌayoor kụ úkeel, oomo oḍuom ologhi aghuḍum mọ ọdi, ọony phọ ọphon phọ bịn. 31Yoor ogheel kụ ọdi ọ́miin mọony phọ rꞌayoor, pọ ịnon ílho, aḍuugh bịn, pọ yoor abutelhedom mọ ạna kọsighe sụol otelhedom mọ ạna ọde phọ ayoor rꞌọto osiemi nyọdi ọmar iḍim. 32Mị otelhedom mọ ạna ụsighe loor ạmi kụ ạphaghan esi ọde phọ ạmi loor ẹmhu ọbumoony phọ; kụ mị ạḅeni nyọdi mọ, ‘Mụghumo mị ụ́pam mọony phọ útigheelom, pọ ịkaraph ạmi ẹrol ẹmhu ạmi kꞌagee-pọ.’ 33Nyịidipho, mị rạaḅereghi ni nyịna, kpạripe lọ ọony phọ kụ kạtol, pọ ụsighe ịmi otelhedom mọ ạna ạkasaghiom sịen kꞌạna, ạwile ọony phọ ạdaph bumor phọ ọdi agheel. 34Mịna katelhe bọ ika kụ akeel kꞌọde phọ ạmi, dị ọbumoony phọ ịmina ụ́daph? Eḍighi ẹekaany rꞌigbiririph ọrol kụ ọmiin ịkaraph phọ ịpe kesoroghuom bọ ọde phọ ạmi.”
Currently Selected:
Emiighom 44: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
