Emiighom 43
43
Abumor ạJosef ọpam Bẹnjamin ọkimom ẹpe Ijipt
1Ịgbakuro phọ ẹpughan sịphe ade phọ. 2Kụ ẹteeny mem dị eḍien phọ ẹpe bịdi ogho bọ ẹpe Ijipt bịdi molhe ọmadan, kụ ọde phọ ạbidi ạḅeni bịdi mọ, “Ịḅile ẹghi egho mọony ẹnum eḍien.”
3Kụ aJuda ạḅeni nyọdi mọ, “Oye phọ ạphur ri rụru ayoor kụ ạḅem mọ, ‘Nyina kẹ́miin mun ghisigh phọ ạmi, omuton dị nyina ẹpham umor phọ anyina kụ ẹghimom.’ 4Eru mạar dị umor phọ ayoor rꞌayoor kụ kọki, pọ yoor kọki ni oko eḍien oruomonaan nyịna. 5Kụ eru mạar dị nạ úmeera mọ ọdi rꞌayoor kụ ọghi, pọ yoor kọ́ki mun, ịdi eḍighi bọ oye phọ ụḅeni iyoor mọ yoor ghisigh phọ ọno kọ́miin, dị umor phọ ayoor rꞌayoor kụ́ki.”
6Kụ Ịzirel ạḅem mọ, “Uḍighi ika kụ nyina riḍighi bọ ịmi ịphen phọ, ọḅeni oye phọ mọ nyina ẹmoogh ni umor?”
7Bịdi ọphagharanaan mọ, “Oye phọ amiigha loor kụ upuru iyoor ịlo ayira rꞌologhi otu phọ, apuru kẹn mọ, ‘Ọde phọ anyina odi ni? Nyina ẹmoogh ni ọnon umor?’ Yoor ụdaph ḍipuru phọ ọdi kụ ọphagharanaan bọ. Yoor úlegheri mọ ọdi kạḅem mọ yoor ọpham umor phọ ayoor kụ ọghimom?”
8AJuda ạḅeni Ịzirel ọde phọ ọdi mọ, “Bịle ọony phọ rꞌạmi ọghi, ọbo yoor rꞌạna rꞌịbam ạnmuny phọ komuughu ghan bọ. 9Mị ạsighe loor phọ ạmi ạpaghan ẹmhu ọdi. Pọ upuru ịmi ẹmhu ọdi, eru mạar dị mị ụ́pam nyọdi útigheel ụ́meremi nyọdi risigh ạna. Pọ oomo phọ ịdi ẹrol ẹmhu ạmi kꞌagee-pọ. 10Mụghumo róobinya bọ ịduon, ọbo yoor mọghi ịyal amem otigheel.”
11Pọ kụ amem dị Ịzirel ọde phọ ạbidi ạḅeni bịdi mọ, “Eru mạar dị eru ịduon, pọ ịson igeny iimuma ade phọ ẹphen ẹloghoḍi ologhi ạsikpuru phọ anyina, eḍighi ruunmo dị koonmo oye phọ: ẹnum elho eḍu, ẹnum ẹnuum aḍiowo, ọwe, ọophaghar, ọoza, iziph rꞌaghotor. 12Ịpam ni ịnon ikpoki epeeliom ịpe nyina ẹmiin bọ sịphe ọnhu ạsikpuru phọ anyina eḅulemi ẹghiomonaan, ạgama ụpioman ni. 13Ịpamam ni umor phọ anyina ẹghimom, iḅetenu ẹghi kꞌoye phọ. 14Ẹnaan Oomo Ịikpo phọ ịngo inyina ọnma ighirigiir esi oye phọ, oye phọ aḅulemi umor phọ anyina rꞌạBenjamin, ẹpham erighelom. Kụ eru mạar dị ạnmuny phọ ạmi momuughu, pọ mị phọ kẹn kamugh aani ni.”
15Awe phọ ọsighe ruunmo phọ rꞌịyal ạga ikpoki rꞌạBenjamin ọpham, oḅetenu ọghi osi Ijipt, ọghi ọteeny Jọsef. 16Mem dị ạJosef ạmiin bọ bịdi rꞌạBenjamin, kụ ạḅeni ọsaam ịisa phọ ọdi mọ, “Sịghe we phọ ạbuen ạghi ologhi otu. Kiigh ẹnam ạsaam eḍien lọ bịdi rꞌạmi kole ootaany phọ.” 17Oye phọ ạtuugh ịpe ạJosef ạḅeni bọ nyọdi aḍighi, ạsighe we phọ ạlogh kꞌạJosef.
18Aruugu rasiph we phọ, ịdipho ọsighe bọ bịdi ọlogh kꞌạJosef kụ bịdi ọḅem ghan mọ, “Ụtuan ikpoki phọ bịdi oḅulemi bọ odoghoḍi ologhi ạsikpuru phọ ayira ẹḅel amem mọ kụ ụlogh bọ iyira sịen kꞌọdi, ẹrol dị ạmoogh eepoogh uzuom iyira ụsighe iyira aḍighi rẹbene, ạsighe ịnam adool phọ ayira.” 19Bịdi rọghi rosi kꞌạJosef odi sịphe ọnhu-aḍibuo otu phọ kụ ọghi ọteeny ọsaam ịisa phọ ọdi kụ ọḅem mọ, 20“Oye dị ụmoogh iyoor, ẹḅel amem mọ yoor oru bọ ẹphen ogho eḍien phọ, 21yoor oten rokeel, yoor osi esi ọmina ḍughul rọkarion sịkpuru phọ ayoor kụ ophogh ikpoki phọ yoor oghoom bọ eḍien phọ ediighi ịnhu ạsikpuru phọ ayoor, uwo ịlo ọdi rꞌịlo ọdi, kụ yoor ọpam ni otumom. 22Yoor ọpam ni ịnon ikpoki ịdi yoor kokoom eḍien. Yoor úlegheri oye phọ aḅulemi bọ ikpoki phọ adoghoḍi sịphe ạsikpuru phọ.”
23Kụ ọdi ạphagharanaan bịdi mọ, “Ịpoomi iloghi phọ anyina. Aruugu inyina kúsiph. Ẹnaan phọ anyina, Ẹnaan ọde phọ anyina kụ aḅulemi bọ ikpoki phọ ạlogh sịphe ạsikpuru phọ anyina. Mị ạar ri ikpoki phọ anyina.” Kụ ọdi ạghi ạsighe Sịmion aruom bịdi.
24Oye phọ ạsighe bịdi ạghi kꞌạJosef, ạngo bịdi mụum bịdi ootola ruwol ạbidi, ạngo ịnam adool phọ ạbidi ịḅal. 25Kụ bịdi ookpomoghi ruunmo phọ okoriom ghan Jọsef mem lọ dị aru ootaany. 26ẠJosef arigheel, kụ bịdi ọsighe ruunmo phọ bịdi ọpham bọ ọngo nyọdi, kụ okpuḍughian esomanan ọdi. 27ẠJosef apuru bịdi ịlo ologhi otu, kụ apuru mọ, “Ọde phọ anyina amoon ni; okumoor oye phọ ọpo nyina ịḅeni bọ ịmi, odi ni?”
28Kụ bịdi ọphagharanaan nyọdi mọ, “Otelhedom mọ ạna, ọde phọ ayoor amoon ni, odi ni.” Kụ bịdi ozumeri yogh rụmhu ạbidi ude esomanan ọdi.
29Ọdi ạnmanaghian kụ ạmiin Bẹnjamin umor phọ ọdi, ọony onhiin phọ ọdi, kụ apuru bịdi mọ, “Ọphon kụ ọbam umor phọ anyina, ọpo nyina ịḅeni bọ ịmi? Ẹnaan ẹrolonaan nyịna, mọony ạmi.” 30ẠJosef aagborion ạḍua ịdi eḍighi bọ aloor ọdi regbirighaan loor umor phọ ọdi, ạwa ghan esi ạaghian kụ omoghi, kụ aḍigh ẹpe otu phọ ọdi amoghi yogh. 31Kụ aatola risigh ọdi, aru amite ạphama loor ọdi, kụ ạḅem mọ, “Ịsighe eḍien ẹsighe eru.” 32Kụ ọḅamanaan eḍien ẹlo ọdi gem, ọḅamanaan ẹlo ạbidi gem, ọḅamanaan ẹlo ạbuphe rꞌọdi role bọ gem. Bụo Ijipt kómeera ọḅaran rꞌạbuo aHibru olhian eḍien, ịdi eḍighi bọ iigbia ni ẹpe Ijipt. 33Kụ bịdi ọrol otuman nyọdi, oniin aruom nyoniin, kụ abugbogh phọ ọtuugh oye aruom oye ọrol ẹpe eekuna phọ. Awe phọ oniin akiton aphogh nyoniin, kụ iḍigh iikia esi ạbidi. 34ẠJosef ạsighe eḍien phọ nyẹpe ọdi adiemi bịdi, kụ abin mụo ạBenjamin kụ ạbugh apu mụo ạbidi oogh amem. Kụ bịdi olhe ọphughol, kụ iloghi ạbidi ẹḅaal kụ robo.
Currently Selected:
Emiighom 43: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
