Emiighom 42
42
Abumor phọ ạJosef ọki Ijipt ogho eḍien
1Mem dị ạJekob ạnaghan bọ mọ eḍien edi Ijipt, ọdi apuru nmụny phọ ọdi mọ, “Nyina reephoghoghan ghan ịdipho phọ ịlo ika? 2#Iiḍ 7.12Mị ạnaghan mọ eḍien edi ẹpe Ijipt. Ịki ẹpe phọ egho eḍien lọ yira kole ọtol, ọbo yira komugh ghan bọ.” 3Kụ ḍioph phọ abumor phọ ạJosef ọghi Ijipt ogho eḍien. 4Kụ ạJekob óromom aani Bẹnjamin umor phọ ạJosef mọ ạdaph bumor phọ ọdi ạghi aani loor esi oghiilaan ịlo kemitenaan nyọdi.
5Ạnmuny phọ Ịzirel ụdaph ni bụnon ạbudi rọki aani ogho eḍien phọ, ịdi eḍighi bọ ịgbakuro isoor aani ni ẹpe Kenan. 6ẠJosef aḍighi uwo ẹmhu dị rapogh oomo ade phọ; ọdi kụ aalhaghi ghan eḍien phọ oomo awe eelhe phọ ẹpe. Abumor phọ ạJosef ọghi osi, kụ ozumeri ghisigh ạbidi ude esomanan ạJosef. 7ẠJosef ạmiin bọ bịdi, bịn alegheri ni mọ abumor ọno; ọdi óḍeenaan loor ọdi, ạrologhuom ghan bịdi mụdi aruuruen, kụ apuru bịdi mọ, “Nyina ạbuo ẹghen?”
Bịdi ọphagharanaan mọ, “Yoor ụḍua Kenan kụ oru ogho eḍien.”
8ẠJosef alegheri ni mọ bịdi abumor ọno, kụ bịdi nyọdi úlegheri. 9#Emi 37.5-10ẠJosef ạatughian mạlha phọ dị ạmalha bọ kụ apuru bịdi mọ, “Nyina iru oḅiligha ọmiin ẹdaḅa ẹmha phọ ịlo ẹrol.”
10Kụ bịdi ọphagharanaan nyọdi mọ, “Eeye, oye dị ụmoogh iyoor, abutelhedom mọ ạna uru ogho eḍien. 11Ḍita phọ ayoor ạnmuny ogina oye; yoor awe eeḅi ẹzo. Abutelhedom mọ ạna útu iḅiligha.”
12Kụ ọdi ạḅeni bịdi mọ, “Eeye, nyina iru ọmiin ẹdaḅa ẹmha phọ; nyina ị́tu ịnon kụ eru.”
13Kụ bịdi ọḅeni nyọdi mọ, “Abutelhedom mọ ạna, ḍioph rꞌịyal abumor, yoor ạnmuny ogina oye ẹpe Kenan, kụ pogh, ọdi aḍighi ọbam odi rꞌọde phọ ayoor, oniin ọnyo ayoor ólho.”
14ẠJosef ạḅeni bịdi mọ, “Ịphen kụ ịdi mị ạtu bọ kụ ịḅeni inyina mọ nyina iru iḅiligha. 15Loor esi ịphen phọ kịiḅeghion ni inyina opogh. Esi aghuḍum mọ ọdaam eelhe phọ, nyina kékeel, tụtu nyina ẹghi ẹsighe ọbam umor phọ anyina ẹsighe eru. 16Itom oniin ọnyo anyina ạghi ạsighe umor phọ anyina ạsighe aru. Kịkasiom inyina otu ikoli ọoḅeghion sịagba phọ anyina opogh mụghumo nyina rẹgba ni igeny. Mụghumo kígeny, esi aghuḍum ọdaam eelhe phọ, ageny ni nyina ạbuo iḅiligha.” 17Kụ ạsighe bịdi ạkasaghiom otu ikoli ịraar aḍughul-otu.
18Kụ remunughan ịraar aḍughul-otu kụ ạJosef ạḅeni bịdi mọ, “Ịtuugh ịphen eḍighi ọbo nyina ẹrol eḍum, ịdi eḍighi bọ mị oye dị rakiilaan ghan Ẹnaan. 19Dị nyina eru ni bugeny awe, pọ oniin umor anyina asugha pạ otu ikoli phọ ịkasaghiom bọ inyina. Ạbueri phọ ọsighe eḍien phọ ọghiomonaan kꞌanyina, loor esi ịgbakuro phọ. 20Ị́bile ghan, ịki ẹsighe ọbam umor phọ anyina iruom ịmi, ẹrol dị olegheri mọ ịpe nyina rẹkaaph bọ kọ́kpe; ọbo nyina kemuughu ghan bọ.”
Kụ bịdi ọtuugh ịdipho phọ oḍighi. 21Oniin ạḅeni nyoniin mọ, “Erugh iphum ni iyira ageny, ịlo ekpisi umor phọ ayira. Yira ụmiin ni ịdipho rẹeḅaghami bọ ologhi phọ ọdi, mem mọ dị ạsighe bọ ologhi ạghusan kụ ụuḅereghiom bọ iyira kụ yira ụ́naghan bọ. Ịphen kụ ịkom bọ ịiḅaghami phọ ịphen risoroghuom bọ iyira.”
22 #
Emi 37.21, 22 ARuben ạphagharanaan kụ apuru bịdi, “Mịna ḍịen inyina ị́ḅeni mọ kúḍighi ọbumoony phọ ịkaraph, kụ nyina ị́naghan bọ? Tụ mẹteeny, nyịidipho ịḅaal phọ ọdi regbeela.” 23Bịdi úlegheri mọ ạJosef rạnaghan ni ịpe bịdi rọkaaph bọ, ịdi eḍighi bọ ọnon oye kụ ạgba ghan ịpe ạJosef rạkaaph bọ kạḅeni bịdi. 24Kụ ạJosef aaghiraan ạgumom bịdi ọman kụ amoghi, kụ aaghiraan asoman bịdi kụ bịdi ọghaaphan. Kụ ọdi ạsighe Sịmion sịphe ogbo phọ ạbidi kụ ạphaḍi nyọdi risigh ạbidi.
Abumor ạJosef ọki okeel ẹpe Kenan
25ẠJosef arom ạḅeni mọ idoghoḍi eḍien emuzeḍi sịkpuru phọ ạbidi, eḅulemi ikpoki ịlo oye rꞌoye ẹlhogh ologhi ạkpuru phọ ọdi, kụ ẹngo bịdi eḍien lọ bịdi kole ẹpe eten phọ. Bịdi ọtuugh ịpe ọḅeni bọ bịdi oḍighi bịdi. 26Kụ abumor phọ ọsighe riiḍien phọ ọsaany loor ịnam adool phọ ạbidi onyeene ogheel. 27Rọghi rosi esi ọmina ḍughul, oniin ọnyo ạbidi ạkatan kpụru phọ ọdi ọngo eḍien ẹnam adool ọdi, bịn ạmiin ikpoki sịphe ọnhu ạkpuru phọ, 28kụ ạḅeni bumor phọ ọdi mọ, “Ịmiin. Oḅulemi ni ikpoki phọ ịlo ạmi, edi ni sịen ọnhu ạkpuru phọ.” Kụ ariiḅio ạbidi ẹphepheghu, aruugu asiph bịdi, bịdi rokpereghaan, kụ ọḅem ghan mọ, “Ịphen Ẹnaan riḍighi bọ iyira ịghen?”
29Bịdi ọghi osi ologhi otu ọteeny Jẹkob ọde phọ ạbidi ẹpe Kenan, kụ ọghaaph oomo ịpe emitenaan bọ bịdi ọḅeni nyọdi mọ, 30“Oye phọ ọpo ạda bọ ẹmha phọ umophoghuom ni iyoor ụsighe iyoor mọ yoor ụghi iḅiligha ẹpe eelhe phọ, 31kụ yoor ọḅeni nyọdi mọ, ‘Yoor útu iḅiligha. Yoor awe dị rọgba ghan ịpe eru bọ ịne. 32Yoor ḍioph rꞌịyal abumor ạnmuny oniin ọde, kụ oniin ólho, kụ ọbam mọ rꞌọde phọ ayoor odi ẹpe Kenan.’ 33Oye phọ ạmoogh bọ eelhe phọ ụḅeni iyoor mọ, ‘Ịphen kụ kiḍeenaan ịmi mọ nyina abugey awe ni: ịwilenaan ịmi sịen oniin umor anyina, ẹsighe eḍien phọ ẹpham egheel, ẹngo ọto anyina loor ịgbakuro phọ. 34Ịsighe ọbam umor phọ anyina iruom ịmi, pụruku mị kalegheri mọ nyina kạ́buo iḅiligha, mọ nyina igeny awe ni, pụruku mị kaseere umor phọ anyina ịngo inyina, kụ nyina egbi omuul ghan aḍighi ẹmha phọ ẹphen.’”
35Kụ ẹteeny mem dị bịdi ọkarion sịkpuru phọ ạbidi ooku eḍien phọ ude, kụ mịin, oye ye phọ ạmiin ḍịghoroghi ikpoki phọ ịpe odi ologhi ạkpuru phọ ọdi. Kụ mem dị ọde phọ ạbidi rꞌạbidi ọmiin bọ sịghoroghi ikpoki phọ, kụ eḍigh ruugu esi ạbidi. 36ẠJekob ọde phọ ạbidi ạḅeni bịdi mọ, “Nyina mẹze nmụny phọ ạmi ẹmadan. ẠJosef ólho, ạSimion ólho, kụ nyịidipho nyina meru kẹn ọsighe ạBenjamin. Kꞌịphen kꞌịphen phọ kụ emiteghunaan ghan ogina oye, oniin phọ ạmina.”
37ARuben ạḅeni ọde phọ ọdi mọ, “Eru mạar dị mị ụ́pam Bẹnjamin útigheel, pọ zẹ ịyal phọ ạnmuny phọ ạmi. Ḅọgh nyọdi ụngo ịmi. Mị kạpam ni nyọdi atighelom ạngo nyịna.”
38Kụ ọdi ạḅeni nyọdi, “Ọony phọ ạmi rạ́daph inyina kạghi. Umor ọdi mamugh, kụ esugha ogina phọ ọdi. Kụ eru mạar dị ịkaraph emitenaan nyọdi ẹpe eten phọ, tọ pọ mị kạpam ọto rꞌạsuol kụ akeelom ọmar iḍim.”
Currently Selected:
Emiighom 42: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
