Emiighom 41
41
ẠJosef ạgba ẹmhu ạramalha ọdaam mọ
1Ịphen phọ reten, esi ịyal ikpom ạsia, ọdaam eelhe phọ ạmalha, dị odi oogbom Ọphiiny aNail, 2kụ ạmiin oḍual ạsinam ẹsoghoronu, ẹbughogh ẹnuumogh, rẹḅal ghan ọgbal ọphiiny phọ. 3Oḍual ịnon ạsinam emiteghu, ẹkpolokpolo, ẹḅile ẹsoghoronu sịphe ọphiiny phọ, kụ ẹmeregha ịigaany ịpheri phọ ạsinam mọ. 4Kụ oḍual phọ ịkpolokpolo phọ ạsinam mọ ẹminogh oḍual phọ ịbughunu ạsinam mọ. Kụ ọdaam eelhe phọ ạsuma. 5Ọdi ạḅile rạnaani kụ ạmalha kẹn mụnon ạmalha, ạmiin oḍual igbogh ạsigba ịbiakpa loor oniin ozin, ẹmoogh ịnyaam, ẹnighe ọmiin. 6Ịnon oḍual ịdi ẹnyurughan enyororo yogh ịnyaam ị́moogh, emite etuman bịdi. 7Oḍual ịpe ị́moogh bọ ịnyaam, ẹminogh oḍual phọ ịpe ẹbughogh bọ, ẹmoogh ịnyaam. Kụ ọdaam eelhe phọ ạsuma, kụ aloghoma mọ mụen phọ ạmalha. 8#Dạn 2.2Rẹḅaal kụ ịphen phọ rẹeḅaghami ọdaam eelhe phọ. Kụ ọdi arom ạghiom oomo ạbuo ịiḍaany phọ odi bọ Ijipt, rꞌoomo ạbuo olegheri ịyaar phọ. Ọdaam eelhe phọ ạghaaph mạlha phọ ọdi ạḅeni bịdi, kụ ọlo alegheri ạgba ẹmhu ạmalha phọ ạḅeni nyọdi ọ́rol.
9Uwo ẹmhu ọmeleghia phọ ạḅeni ọdaam eelhe phọ mọ, “Mị malhoghoma ọpioman phọ ạmi rodon. 10Mem mọ ọdaam eelhe phọ ạghagham bọ ologhi butelhedom mọ ọdi, ụkasiom iyoor ẹpe kꞌuwo ẹmhu ugheel ẹkpar phọ, mị rꞌuwo ẹmhu ịisa phọ. 11Kụ yoor ọmalha mạlha, ḍiniin phọ aḍughul phọ, uwo ạmalha ọdi rꞌạmalha ọdi, ịpe ọgba bọ ẹmhu ạmalha phọ ụḅeni iyoor. 12Ẹpe phọ yoor ọrol bọ, oniin onyugheel ọony ọlo aHibru, otelhedom uwo ẹmhu ugheel ẹkpar phọ rꞌayoor kụ ụrol bọ, kụ yoor ọgba rạmalha phọ ayoor ạḅeni nyọdi kụ ọdi ạgba rụmhu ạramalha phọ ayoor ụḅeni iyoor; ọdi ạgba, uwo ạmalha rꞌạmalha ọdi, ạḅeni. 13Kụ ịpe ọdi ạghaaph bọ ụḅeni iyoor kụ ịdi ẹtuugh ni emite, uwo ịlo ọdi rꞌọdi; ịmi nạ ạsighe aḅulemi sịen oḍighi phọ ạmi, nyọdi nạ ạsighe asin.” 14Ọdaam eelhe phọ arom mọ ọghi ọmagh Jọsef, kụ bịdi oogborion ọghi ọsighe Jọsef omitiom sịphe otu ikoli phọ. Roghula ọleem mọ kụ roonmenan rukpe phọ ọdi, kụ aru ạmeera ghisigh ọdaam eelhe phọ. 15Ọdaam eelhe phọ ạḅeni Jọsef mọ, “Mị ụmalha mạlha kụ oye lọ arue ạgba ẹmhu ạmalha phọ ụḅeni ịmi ólho; kụ mị ạnaghan mọ nạ katue ni ạgba ẹmhu ạramalha.”
16ẠJosef ạphagharanaan mọ, “Ílho esi ạmi. Ẹnaan kẹpagharanaan ni ọdaam eelhe phọ ịdi kẹnighenaan nyọdi.”
17Ọdaam eelhe phọ ạḅeni Jọsef mọ, “Mị ụmalha dị mị ạmeera pạ oogbom Ọphiiny aNail phọ, 18kụ mị ạmiin oḍual ạsinam dị ẹḍua sịphe ọphiiny phọ ẹsoghoronu, ẹbughogh ẹnuumogh, ẹnighe ophoghoghom, kụ rẹḅal ghan ọgbal ọphiiny phọ. 19Íbia bịn oḍual ịnon ịkpolokpolo ạsinam dị ịnyaam ị́moogh ẹsoghoronu sịphe ọphiiny phọ etuman ịḅel phọ; mị kọ̋miin ghan ọdo ịpe phọ sịen ade phọ Ijipt. 20Oḍual phọ ịkpolokpolo ạsinam mọ ị́nighe bọ ophogh ẹminogh oḍual igeny ạsinam mọ ẹmoogh bọ ịnyaam ẹbughogh. 21Kụ ghạlamo ịdipho bịdi kụ ọminogh bọ ni ịpe phọ íḍeenaan sịphe aloor phọ ạbidi mọ bịdi kụ ụminogh ni. Ịdipho ẹkpolokpolo bọ ẹḅel amem mọ kụ ịdi ẹrol li, kụ mị ạsuma. 22Kụ ẹpe ạmalha phọ ạmi mị ạmiin oḍual ịphunubu ipoola ịbiakpa, ẹbughunu ẹnighe. 23Mị ạḅile ạmiin oḍual ịnon ịphunubu ipoola ọbiakpa ẹnyurughan enyororo yogh ị́moogh ịnyaam, emite etuman ịḅel phọ. 24Oḍual inyororo yogh ipoola phọ ịpe ị́nighe bọ ophogh phọ ẹminogh oḍual ịpe ẹmoogh bọ ịnyaam mọ. Kụ mị ạghaaph ịphen phọ ạḅeni bụo ịiḍaany phọ, kụ ọlo arue ạgba ẹmhu ịphen phọ ọ́rol.”
25ẠJosef ạḅeni ọdaam eelhe phọ mọ, “Ạmalha phọ ạna amuniin ni; Ẹnaan kụ iḍeenaan nyịna ịdi ọdi kaḍighi. 26Oḍual phọ igeny ạsinam mọ, pọ oḍual ạsia: oḍual phọ igeny ipoola ọbiakpa phọ, pọ oḍual ạsia. Ạmalha phọ ạna amuniin. 27Oḍual phọ ịkpolokpolo ạsinam mọ ẹsoghoronu bọ etuman bịdi, pọ oḍual ạsia; oḍual ịphunubu ịbiakpa phọ ịpe ookuugh ẹghologhol phọ aghiighom bọ aroḅologhi, pọ oḍual ạsia ịgbakuro. 28Mị ạkaaph ịphen phọ rạḅeni ọdaam eelhe phọ: Ẹnaan iḍeenaan ọdaam eelhe phọ ịdi ọdi kaḍighi. 29Nạghan, ẹeḍiom kẹtol li oomo ẹphen eelhe phọ Ijipt oḍual ạsia. 30Kụ mem dị ịphen phọ meten, oḍual ạsia ịgbakuro kẹḅile ni emite etum pạ, kụ eḍighi ịdi kobula oomo ẹeḍiom mọ ẹrol bọ pạ ade phọ; ịgbakuro phọ keleeny oomo phọ eelhe phọ Ijipt. 31Ilhom ịgbakuro phọ kẹpughan bịn kẹ́ngo rꞌẹnum eepoogh mọ ọotughian ẹeḍiom mọ ẹrol bọ pạ ade phọ. 32Ịphen kụ iḍighi bọ ịdi ạmalha phọ ọdaam eelhe phọ aḍighi bọ ịyal: ịdi eḍighi bọ ịphen phọ ịtooghi Ẹnaan. Kébia, kụ emite.
33“Kụ nyịidipho, ọdaam eelhe phọ ạnmanaghian aphogh oye lọ rạnaghan ghan ḍụghum, ạmoogh olegheri ịyaar, ạsighe nyọdi ạdaami aphogh ghan eelhe phọ Ijipt. 34Ọdaam eelhe phọ aḍighi ịphen phọ: ạmaaghi we dị kopogh de phọ, ọsighe muniin abin esi oogh asibin phọ ịpe ade phọ Ijipt kẹmoogh bọ esi oḍual ạsia ẹeḍiom mọ. 35Bịdi ookpomoghi ghan oomo eḍien igeny ạsia phọ ịpe retu bọ, ookpomoghi ọḅogh ọlogh ḍịghaagh ọdaam eelhe phọ, ẹrol dị oomo areelhe phọ Ijipt ọmoogh eḍien. 36Ookpomoghi eḍien phọ ọlogh ruutu oseerian sịen ạramha phọ, okoriom ghan oḍual ạsia ịgbakuro phọ kesoorom bọ Ijipt, ọbo ịgbakuro képiemi ghan bọ Ijipt.”
Ọdaam eelhe phọ ạdaami Jọsef ophogh ghan ade phọ Ijipt
37Ịitughian phọ ịphen ịḅeeraan ni ọdaam eelhe phọ rꞌoomo awe iiḍighi phọ ọdi. 38Ọdaam eelhe phọ ạḅeni bịdi mọ, “Yira kótue ni ọmiin ọnon oye dị ạrol ịduon phọ, oye dị uwaloor Ẹnaan phọ odi uloor.” 39Ọdaam eelhe phọ ạḅeni Jọsef mọ, “Tụtu Ẹnaan kụ eḍeenaan bọ nyịna oomo phọ ịphen, ọnon oye dị ạmoogh ọnaghan ạḍughum rꞌolegheri ịyaar ịduon ạna ólho. 40#Iiḍ 7.10Nạ kụ kạda otu phọ ạmi. Ịlo nạ ạghaaph kụ ịdi awe phọ kọdaph ghan, emuton sịphe ạgada ọdaam ẹmha phọ bịn kụ ẹdi mị kapu nyịna. 41Nạghan. Mị mạdaami nyịna ophogh oomo eelhe phọ Ijipt.” 42#Dạn 5.29Ọdaam eelhe phọ ạkpotonaan gulu phọ ọdi sịphe ạḍighaagh phọ ọdi, ạsighe ạlogh ḍịghaagh ạJosef, ạsighe ịma ạrusuoma iidugha ạkpologhi Jọsef, ạnyagharanaan ikoli agol phọ ọdi ạnyaari orum ạJosef. 43Ọdi ạsighe ẹnam oghiilom mọ ọdi, nyẹpe emuneniom bọ ịyal phọ, ạngo Jọsef mọ aghiilom ghan, kụ bịdi ọrol sịphe arisigh phọ ọdi ọlooghi mọ ikpuḍughian. Ịduon phọ ọdi ạsighe nyọdi ạdaami oomo areelhe phọ Ijipt. 44Ọdaam eelhe phọ ạḅeni Jọsef mọ, “Mị kụ ọdaam eelhe phọ, omuton nyịna ạJosef ọnon oye ólho, dị kapoophe ghan ḍịghaagh ọdi mꞌowol ọdi ạnyu sịen oomo eelhe phọ Ijipt.” 45Ọdi aghol ḍien Jọsef mọ aZafenat Pania, aphinanaan Jọsef ạnir, ọnyani aPotifera oyil ạrikia phọ ọlo ạHeliopolis. Oghol ḍien ọnyani phọ mọ Ạsenat.
Kụ ạJosef amite ạghi arelhe yogh oomo areelhe phọ Ijipt. 46ẠJosef ạman bọ ịraardi ạsia mem mọ dị amiigh bọ oḍighi kꞌọdaam eelhe phọ Ijipt. 47Oḍual ạsia ẹeḍiom mọ, ade phọ esoor eḍien emuzeḍi. 48Kụ ọdi aakpomoghi ghan eḍien oomo oḍual ạsia phọ, mem mọ ạmuphe phọ eḍien imuza ni eelhe phọ Ijipt, kụ ọdi aakpomoghi ghan riiḍien aseenaan rạmha phọ ịpe orugh bọ otuman bịdi. 49Eḍien dị ạJosef aakpomoghi iḍiza emuza ịdipho ịisaar ọphiiny. Mẹphughan kụ ọdi ạwile ọ́tooghi ghan mun, ịdi eḍighi bọ mẹphughan ọtooghi.
50Tụtu rẹteeny bọ sịa ịgbakuro phọ, ạJosef mạmar ịyal ạnmuny. Ạsenat, ọnyani phọ aPotifera oyil ạrikia phọ ọlo ạHeliopolis, kụ ạmaranaan nyọdi. 51ẠJosef aghol ḍien ọkpana ọony phọ ọdi mọ ạManase, ẹmhu aḍien phọ pọ ịduon mọ, “Ẹnaan meḍighi ịdi mị mawula oomo ịminimiin phọ ạmi rꞌoomo ọto kꞌọde phọ ạmi.” 52Ọdi aghol ḍien esoony ọony phọ ọdi mọ Ifraim, ẹmhu aḍien phọ pọ ịduon mọ, “Ẹnaan meḍighi ịdi mị mạrol sịphe ade ịminimiin phọ ạmi rạmaraghian.”
53Oḍual ạsia ẹeḍiom mọ ẹrol bọ sịphe eelhe phọ Ijipt emunughan. 54#Iiḍ 7.11Kụ oḍual ạsia ịgbakuro phọ emiigh, ịdipho ạJosef ạghaaph bọ. Ịgbakuro phọ ileeny eleeny oomo ịnon arikpisi; kụ oomo ạramha phọ Ijipt eḍien edi ni. 55#Jọn 2.5Mem dị oomo phọ Ijipt rọmiinom ọkoony kụ awe omoghiom ghan ọdaam eelhe phọ eḍien, ọdaam eelhe phọ ạḅeni oomo awe phọ Ijipt mọ, “Ịki esi ạJosef, kụ ịlo dị ịḅeni inyina ẹtuugh eḍighi.” 56Kụ mem dị ịgbakuro phọ melheeny oomo Ijipt, ạJosef aghunyon oomo aruutu phọ dị asereghi bọ eḍien phọ, kụ aalha ghan we Ijipt, ịdi eḍighi bọ ịgbakuro phọ mẹphughan ẹpe Ijipt. 57Ịgbakuro phọ eleeny oomo aḅirini phọ, kụ oomo aḅirini phọ ọghi ghan Ijipt kụ ogho ghan eḍien esi ạJosef, ịdi eḍighi bọ ịgbakuro mẹphughan oomo aḅirini phọ.
Currently Selected:
Emiighom 41: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
