Emiighom 40
40
ẠJosef ạgba ẹmhu ạramalha ạbuo ikoli phọ
1Kụ ịphen phọ reten, kụ ọmeleghia ọdaam mọ Ijipt rꞌọsaam ịisa phọ ọdi ọpioman oḍighi ịdi ị́nighe ọde-otu phọ ạbidi ọdaam mọ Ijipt. 2Ọdaam eelhe phọ Ijipt ạghagham ịyal phọ ạbuo iiḍighi phọ ọdi ologhi, uwo ẹmhu ịmeleghia phọ rꞌuwo ẹmhu ịisa phọ. 3Kụ ạsighe bịdi ạghi ạlogh ikoli kꞌuwo ẹmhu ugheel ẹkpar phọ, eniin phọ esi phọ ọlogh bọ Jọsef ikoli phọ. 4Kụ uwo ẹmhu phọ ạḅogh bịdi ạlogh ḍịghaagh ạJosef mọ arelhenaan ghan bịdi sidom.
Bịdi ụrol li sịphe ịminighan amem, 5kụ ḍiniin phọ aḍughul phọ, ịyal phọ ạbidi ọmalha yogh mạlha, uwo ạmalha rꞌạmalha mụo ọdi, kụ ọwa ghan ẹmhu ạmalha ẹlo oye rꞌoye, ọmeleghia phọ rꞌọsaam ịisa phọ ọdaam mọ Ijipt odi bọ ikoli phọ. 6Kụ rẹḅaal, ạJosef ạghi ophogh ạbidi kụ ạmiin mọ iloghi phọ ạbidi ị́ḅaal, 7kụ apuru bịdi mọ, “Eeghe nyina ekururu bọ?”
8Kụ bịdi ọḅeni nyọdi mọ, “Ịyal phọ ayoor ụmalha ni mạlha, kụ oye dị kạgba ẹmhu ạramalha phọ ụḅeni iyoor ólho.”
Kụ ạJosef ạḅeni bịdi mọ, “Awe kụ iyira ẹmhu ọdo phọ ịphen kíḍeenaan, emuton Ẹnaan bịn. Ọgba ẹmhu ọlo esi Ẹnaan ḍụghum? Iseseeny, ịkaaph ịḅeni ịmi.” 9Kụ uwo ẹmhu ịmeleghia phọ ạghaaph ịpe ọdi ạmalha bọ ạḅeni Jọsef mọ, “Mị ạmalha ạmiin vain dị ạmeera risigh ạmi. 10Avain phọ ạmoogh bọ ịraar ịla. Avain phọ ạtol dịadi ramiteghom ipoola, kụ oomo ipoola phọ rẹkar, kụ ịphunubu phọ rẹḅaalogh ịlo agrep. 11Sịphe ạmalha phọ, mị ụpham tọbili ọdaam eelhe phọ ḍịghaagh, kụ amimighi agrep phọ ạlogh ạngo nyọdi.”
12ẠJosef ạḅeni nyọdi mọ, “Ẹmhu ạmalha phọ ạna ịduon; ịraar phọ ạsigo phọ, pọ ịraar aḍughul-otu. 13Esi ịraar aḍughul-otu ọdaam eelhe phọ ratu ọsighe ạna oḅulemi ḍigbaany ạdol phọ ạna, kụ nạ ạḅile ghan ạmeleghi miim ạngo nyọdi ịdipho ẹḅel amem mọ nạ aru bọ ọmeleghia ọdi. 14Kụ ọlo ịmi kúwula mem mọ kẹnighenom bọ nyịna. Ụnma ịmi ighirigiir, ọghiom ghan ologhi ọdaam eelhe phọ omitiom ạmi sịen otu ikoli phọ ịphen. 15Ịmi phọ, umi ịmi ẹpe ade ạbuo aHibru phọ kụ ọḍuanam, kụ ẹphen phọ kẹn, mị mạar ụ́piom, kụ ụsighe bọ ịmi ọlogh sịen otu ikoli phọ.”
16Mem dị uwo ẹmhu ịisa phọ ạnaghan bọ ịpe ọgba bọ mạlha phọ, mọ ẹnighenaan ni nyọdi, kụ ọdi ạḅeni Jọsef mọ, “Mị phọ kẹn ụmalha dị mị arool ịraar arugunum ạbred. 17Kụ ologhi egunum mọ ẹpe edi bọ ạnyu phọ, ọdo kịrokiro ịphalaḅaal asikek edi ologhi dị ọsaaghinaan ọdaam mọ, kụ ịnun eru ghan rele ghan sịphe ologhi egunum mọ edi bọ ẹmhu ạmi.”
18ẠJosef ạphagharanaan kụ ạḅeni nyọdi mọ, “Ẹmhu ạmalha phọ ạna ịduon; ịraar phọ arugunum mọ, pọ ịraar aḍughul-otu. 19Esi ịraar aḍughul-otu ọdaam eelhe phọ Ijipt katu ạsighe nyịna sịen phọ ạpam akeel, kụ ạsighe nyịna asinemi loor oreeny, kụ ịnun etu pạ phọ eekpophi ghan nyịna.”
20Rẹman ịraar aḍughul-otu phọ, aḍio phọ ạḍiphe kụ aḍio dị ọmar ọdaam eelhe phọ, ọdi alianaan ẹyaal oomo ạbuo iiḍighi phọ ọdi, kụ ạpham uwo ẹmhu ịmeleghia phọ ọdi rꞌẹmhu ịisa phọ ọdi aphoophe sịphe ogbo ạbidi. 21Ọdi ạsighe uwo ẹmhu ịmeleghia phọ aḅulemi ḍigbaany ạdol phọ ọdi. 22Kụ ạsighe uwo ẹmhu ịisa phọ asin, ịdipho ạJosef ạgba bọ ạḅeni nyọdi. 23Kụ ọlo uwo ẹmhu ịmeleghia phọ awula ni Jọsef, ọ́otughian mun nyọdi.
Currently Selected:
Emiighom 40: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
