Emiighom 38
38
AJuda rꞌạTamar
1Ịdi emite mem mọ ọpo phọ, aJuda ạwile bumor phọ ọdi bịn akiton ạghi kꞌonhiin ọlo Ạdulam dị oghol mọ aHira. 2Ạrol sịphe phọ kụ ạmiin oniin ọnyani ọlo aKenanait ḍien ọde phọ ọdi ughol mọ ạSua. Aphin ọnyani phọ, kụ ịyal ạbidi ọrolan esi. 3Kụ aamor ạmar olephiri, kụ ọdi aghol ḍien ọony phọ mọ Er. 4Ạḅile kẹn aamor ạmar olephiri, kụ onhiin phọ aghol ḍien ọony phọ mọ Onan. 5Kụ ạḅile kẹn aamor ạmar olephiri kụ onhiin phọ aghol ḍien ọony phọ mọ aSela. Ọdi ạrol ẹpe Kezib kụ ạmar bọ nyọdi.
6Kụ aJuda aphinanaan Er ọkpana phọ ọdi ạnir dị oghol mọ ạTamar. 7Er ọkpana phọ aJuda oye ạsipioghom risigh Ọmoogh-we phọ, kụ Ọmoogh-we phọ aghiigh nyọdi. 8Kụ aJuda ạḅeni Onan mọ ạsighe ạnir phọ umor phọ ọdi aphin, ạmaraghinaan umor phọ ọdi nmụny. 9Onan alegheri ni mọ ạnmuny phọ ạbuphe kọmaraghi bọ kạ́buo ọno; kụ tọrobo amem lọ bịdi ọrolan esi, Onan azuughi ghan osiim aloor phọ ọdi ude, ọbo ọdi kạmaraghinaan bọ umor phọ ọdi nmụny. 10Ịphen phọ ọdi aḍighi ghan bọ ikia ni Ọmoogh-we phọ, kụ Ọmoogh-we phọ aghiigh aani kẹn nyọdi. 11Kụ aJuda ạḅeni Tạmar ạnir ọony phọ ọdi mọ, “Keel kꞌọde ạna ạrol dọl ekpukele ạnir, tụtu aSela ọony phọ ạmi ạmanam.” Ọdi ạghaaph ịduon loor oghiilaan mọ ọphon phọ kạḅile amugh kẹn ịdipho abumor phọ ọdi. Kụ ạTamar agheel kꞌọde phọ ọdi.
12Ịman mem bịn ọnyani phọ ạSua, ạnir phọ aJuda, amugh, ọodereghi Juda. Kụ aJuda rꞌaHira ọlo Ạdulam ọyaghiri phọ ọdi ọghi ẹpe Timna ophogh ạbuphe rọsam bọ suphuugh iyool-ịga phọ ọdi. 13Kụ ọghi ọḅeni Tạmar mọ ọde olhom mọ ạna aten ni rạki Timna ọsam ghan asuphuugh iyool-ịga phọ ọdi. 14Kụ ọdi ạkaranaan rukpe arukpukele ạnmariir phọ, ạsighe ịnon arukpe aanmenaan, aakpereghian loor ọdi azua ghisigh ọdi ạmana kụ ạghi ạrol ẹpe eḍighom Enaim koten bọ kụ ọki Timna, ịdi eḍighi bọ ọdi mạmiin mọ aSela maphoph ạmanam, kụ ụ́sighe nyọdi ụngo mọ ọdi aphin.
15Mem dị aJuda ạmiin bọ nyọdi, bịn agbiom mọ ọdi oliom-ẹmha, ịdi eḍighi bọ ọdi aakpereghian risigh ọdi. 16AJuda akiton asoman nyọdi sịphe eten phọ kụ ạḅeni nyọdi mọ, “Seseeny tue, tue olegherian.” Ọdi ólhegheri rꞌẹnum mọ ọdi ạnir ọony phọ ọno.
Kụ ạnir phọ mọ, “Nạ kụ́ngo ịmi eeghe kụ ịyal ayira ọtolan esi?” 17Kụ ọdi ạḅeni nyọdi mọ, “Mị kạngo nyịna mọony ạtu-ọga.”
Ạnir phọ apuru nyọdi mọ, “Nạ kạpaghan eeghia, tụtu nạ ạsighe aru?” 18Kụ ọdi apuru mọ, “Eeghe ịyaar kụ ịnighe dị mị kạphaghan bọ nyịna?”
Kụ ạnir phọ ạphagharanaan nyọdi mọ, “Agulu rꞌịkuta orum mọ ạna, rꞌịkpara phọ ạna.” Kụ ọdi ạsighe rạraar phọ ạngo ạnir phọ, kụ bịdi oḍigh otu ọrolan esi, kụ ọdi ạamoromi nyọdi. 19ẠTamar aḅetenu agheel ạkaranaan ibura phọ, ạsighe rukpe arukpukele ạnmariir phọ ọdi amunughian.
20AJuda ạsighe ạtu-ọga phọ ạngo ọyaghiri phọ ọdi ọlo Ạdulam phọ, mọ ạsighe ạghi ạngo, ạsighenom rạraar phọ dị ạphaghan bọ ḍịghaagh ạnir phọ. Ạki, ọ́miin. 21Ọdi apuru we Enaim mọ, “Odi ẹghen oliom-ẹmha ạnir phọ ạrol ghan bọ sịen eten phọ?”
Kụ bịdi ọphagharanaan mọ, “Oliom-ẹmha ạnir ẹphen ólho ghan.”
22Ọdi aḅula kụ ạḅeni Juda mọ, “Mị ụ́miin ạnir phọ. Awe ẹmha phọ ụḅeni ịmi mọ olhiom ẹmha ạnir ólho ghan ẹmha ạbuno.”
23AJuda mọ, “Bịle ọdi ạsighe aani ọbo umugholoor kusiph ghan bọ iyira. Mị mạngo ọga phọ mọ ọghiomonaan nyọdi kụ nyọdi ụ́miin.”
24Esi ịraar ụnwanyu kụ oru ọḅeni Juda mọ, “ẠTamar ạnir ọony phọ ạna kụ aphegh bọ ịlo olhiom ẹmha phọ, kụ nyịidipho malhe ẹmha raamor.”
Kụ aJuda ạḅem mọ, “Ịsighe nyọdi emitiom ọkpooniom nịan.” 25Kụ ọsighe Tạmar omitiom, kụ ọdi arom ạghiomonaan ọde olhom mọ ọdi kụ ạḅem mọ, “Oye phọ ạmoogh bọ rạraar phọ ịphen kụ uumoromi bọ ịmi. Ḅẹeḅeghion aphogh gulu phọ rꞌịkuta orum mọ rꞌịkpara phọ ịphen mọ nạ kalegheri ni uwo ạraraar phọ.”
26AJuda ameeraam mọ ịlo ọno ni, kụ ạḅem mọ, “Ạnir phọ kụ aakuan loor upu ịmi, ịdi eḍighi bọ mị úmeera ụsighe nyọdi ụngo Sela phọ ọony phọ ạmi.” Kụ ọdi ọ́rolan mun ạnir phọ.
27Kụ ẹteeny mem dị oghunughun rakun Tạmar, kụ ọmiin mọ ịyal ạnmuny kụ odi ọkuruḅaka phọ ọdi. 28Mem mọ oghunughun phọ rakun bọ nyọdi, kụ oniin ọony phọ amitiom ḍịghaagh, kụ ọmaramia phọ ạsighe ịtogh-tọgh iri ạkagh ḍịghaagh ọony phọ kụ ạḅem mọ, “Ọphon kụ ọḅel.” 29Ịdipho dị aḍur bọ ḍịghaagh phọ ọdi ạlogh ologhi, íbia bịn ọmar umor phọ ọdi, kụ ọmaramia phọ ạḅem mọ, “Ẹphen phọ eeghe ọdo ịyaar dị nạ mạkoghoronu bọ ịduon.” Kụ ọtuan ịphen phọ oghol ḍien ọdi mọ ạPerez. 30Kụ ogbi ọmar umor phọ ọdi rꞌiri phọ ọkagh bọ ḍịghaagh phọ ọdi; kụ oghol ḍien ọdi mọ aZera.
Currently Selected:
Emiighom 38: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
