Emiighom 37
37
ẠJosef rꞌabumor ọdi
1ẠJekob arugh ẹpe Kenan ẹpe ọde phọ ọdi ạrol bọ iiruen phọ. 2Bụen kụ oghiil ọto ạJekob.
ẠJosef ạman ḍioph rꞌoḍual ạsia kụ ạdaph ghan bumor phọ ọdi aphogh aani ghan iyool-ịga rꞌạrutu-ịga. Ọdi kụ ọbumoony sịphe ạnmuny phọ aBilha rꞌạnmuny phọ aZilpa ạnmariir ọde phọ ọdi. ẠJosef ạghi ghan ạghaaph ạḅeni ọde phọ ọdi, ịdi bịdi roḍighi ghan ịdi ị́nighe.
3Ịzirel ạphomoghian Jọsef apu oomo ạnmuny phọ ọdi, ịdi eḍighi bọ ọdi ạmar Jọsef mem dị ọdi mạkpo, kụ ạkolonaan nyọdi ạsuoma ạko kịrokiro. 4Mem dị bịdi ọmiin bọ mọ ọde phọ ạbuno ạpomoghian Jọsef apu bụno, kụ bịdi ọlogh ḍien Jọsef; kụ bịdi rꞌọdi ọrol ẹpomoghian ụ́kaaph ghan ọghaaph ẹphomoghian.
5Ḍiniin aḍughul ạJosef ạmalha mạlha, kụ ạghaaph ạḅeni bumor phọ ọdi, kụ bịdi ọlogh nyọdi ḍien bịn ọkpaariom. 6Kụ ạḅeni bumor phọ ọdi mọ, “Iseseeny, ịnaghan mạlha dị mị ạmalha. 7Yira rọgba ghan ịbiakpa ẹpe ozo phọ, kụ odi ropogh bịn ạḍigba ịbiakpa phọ ḍịphe ạmi ẹmeera zẹm, kụ ạsigba ịbiakpa phọ ịpe anyina ẹmeregha eko ḍịphe ạmi ẹlhogh ogbo, kụ ekpuḍian ẹeḅereghi ghan ḍịphe ạmi.”
8Abumor phọ ọdi opuru nyọdi mọ, “Ịduon phọ tọ nạ rạḅem ghan mọ nạ kụ kụda iyoor? Ịduon phọ tọ nạ rạḅem ghan mọ yoor kọtol eeḍian ạna?” Kụ bịdi olegheri bịn ọlogh nyọdi ḍien ọloghori loor ạmalha phọ ọdi rꞌikpo ọnhu ọghaaph phọ ọdi.
9Kụ ọdi ạḅile ạmalha mụnon ạmalha, kụ ạghaaph ạḅeni bumor phọ ọdi. Ạḅem mọ, “Ịnaghan, mị mạḅile kẹn ạmalha mụnon ạmalha. Erumuḍio phọ rꞌụnwanyu phọ rꞌiḍioph rꞌoniin ạraanaan kụ ekpuḍian ghan rịiḅereghi ghan ịmi.”
10Kụ ạghaaph ạḅeni ọde phọ ọdi rꞌabumor phọ ọdi, kụ ọde phọ ọdi ạḅaam nyọdi mọ, “Ạmalha phọ ạmuen nạ ạmalha bọ ạmughen? Mị rꞌonhiin phọ ạna rꞌabumor phọ ạna kụ kokpuḍian ọoḅereghi nyịna?” 11#Iiḍ 7.9Abumor phọ ọdi ọlogh nyọdi ḍien, kụ ọde phọ ọdi ạphamanam mạlha phọ.
Ọsighe Jọsef oboola we dị ọpham osiom Ijipt
12Abumor phọ ạJosef ọghi ẹpe Sẹkem ọngo aḍita ịga ọde phọ ạbidi ịḅal. 13Ịzirel apuru Jọsef mọ, “Abumor phọ ạna úlho ẹpe Sẹkem ọngo ịga phọ ịḅal? Tue, mị karom nyịna ạghi aphogh bịdi.”
Kụ ọdi mọ, “Mị odi ni sịen.” 14Kụ ọdi arom nyọdi mọ, “Kịa aphogh bịdi mụghumo bịdi rꞌịga phọ edi ni igeny, kụ aru ụḅeni ịmi.” Kụ ọde phọ ọdi arorori nyọdi amitiom ẹpe Eḍiiny phọ ạHebron, kụ ọdi ạghi asi Sẹkem. 15Oniin oye ạḅom nyọdi dị aphe ẹpe eḍum mọ rayeela kụ apuru nyọdi mọ, “Nạ rạwa ghan eeghia?”
16Kụ ọdi ạphagharanaan mọ, “Mị rạwa ghan bumor ạmi, dị oru ọngo ịga ịḅal. Seseeny, ụḅeni ịmi ekpisi phọ bịdi ọdi bọ.”
17Kụ oye phọ ạḅeni nyọdi mọ, “Bịdi mọḍua ẹphen. Mị ụnaghan ghan dị bịdi ọḅem ghan mọ, ‘Itu ọghi Dotan.’” ẠJosef ạwa bumor phọ ọdi, kụ ạteeny bịdi ẹpe Dotan.
18Mem dị bịdi ọmiin nyọdi egher, kụ bịdi oopuruan ọḅoph ọnhu mọ oghiigh nyọdi. 19Kụ oniin ạḅeni nyoniin mọ, “Ịmiin, uwo ạramalha phọ ratu-o. 20Itu oghiigh nyọdi, osumeeny nyọdi ologhi ooni, kụ ọgba mọ elhom ẹnam kụ ighiigh nyọdi, kụ yira ọrol kụ ọmiin ịpe ạramalha phọ ọdi keḍighi bọ.”
21ARuben ạnaghan kụ rạwa ọphel ạJosef ọsighe. Kụ ạḅeni bịdi mọ kúkiigh nyọdi, 22kúzu ịḅaal, osiph nyọdi bịn osumeeny ooni phọ ọphon sịen ẹdala phọ. Oye nyọdi kụ́ḅogh uḍighi ịyaar. Ọdi ạtuan ọphel ọdi ọsighe rạghaagh ạbidi, ọtophoron ọdi ophune ọghiom ọde ọdi kụ ạghaaph bọ ịphen phọ. 23ẠJosef ạghi ạteeny bumor phọ ọdi, kụ bịdi osiph nyọdi ọkporion ạsuoma ạko kịrokiro phọ dị ạkpologhian bọ. 24Kụ bịdi ọsighe nyọdi osumeeny ologhi ooni, dị ạmuum úlho ologhi.
25Bịdi ọrologhu ude role eḍien kụ bịdi ọmiin ḍita abumuul ḍighi ạbuo Ịsmaelait rꞌasidool dị ọḍua ẹpe Gịliad, rꞌạsikamel ạbidi, ọsaany rolho rꞌamaa eeḅi eḍu rọkimom Ijipt. 26AJuda apuru bumor phọ ọdi mọ, “Eeghe ạsuo kụ ẹdi yira kọmoogh, eru mạar dị yira oghiigh umor phọ ayira, kụ ạaghi ịḅaal phọ ọdi? 27Itu ọsighe nyọdi oola bụo Ịsmael phọ. Ạraghaagh ayira kị́ḅogh nyọdi. Ọdi umor ayira. Ọdi rꞌayira iniin ịḅaal.” Kụ abumor phọ ọdi omeeraam. 28#Iiḍ 7.9Abumuul ḍighi ạMidian phọ roten kụ abumor phọ ọghi ọsighe Jọsef ophune, ọsighe nyọdi oola ịyaldi ipoḍi asilva, kụ bịdi ọpham nyọdi osiom Ijipt.
29Mem dị aRuben ạghi bọ ẹpe ooni phọ kụ Jọsef ụ́miin, ọdi arunyian ni ibura odi loor ọto, 30kụ roḅula ẹpe abumor phọ ọdi ọrol bọ, kụ ạḅem mọ, “Ọony phọ ólho sịphe ologhi ooni phọ, kụ mịna kakeel ẹghen?”
31Kụ bịdi ọsighe ạtu-ọga oghiigh, ọsighe ạsuoma phọ ạJosef ookilighiom ịḅaal phọ. 32Bịdi ọsighe ạsuoma ạko kịrokiro phọ ọpham oruom ọde phọ ạbidi kụ ọḅeni mọ, “Ẹphen ịyaar dị yoor ọmiin. Mạar aphogh mụghumo ọphon ạsuoma ọony phọ ạna ni.”
33Ọdi alegheri ni ạsuoma ọony phọ ọdi, kụ ạḅem mọ, “Ọphon phọ odi ni; elhom ẹnam meghiigh mọony phọ ạmi, ẹkiriph Jọsef ịpherepe iikia ílho.” 34ẠJekob ạphanyi ibura ọdi loor ọto, amunughian rukpe-ọto, ạto mọony phọ ọdi ịminighan ariiḍio. 35Oomo ạnmuny phọ ọdi rꞌạnmanyaan phọ ọdi ọghi ghan ọodereghi ghan ọdi, kụ ọdi ómeera mọ ọodereghi nyọdi, kụ ạḅem mọ, “Mị kạdaph ni mọony phọ ạmi akeel aani ẹpe oḍi phọ ạto nyọdi.” Ịdipho kụ ẹdi ọde phọ ọdi amoghi.
36Mem mọ ạmuen phọ, ẹpe Ijipt, awe ạMidian ọsighe Jọsef ọolha Pọtifar, otelhedom ọdaam eelhe phọ aḍighi bọ uwo ẹmhu ugheel ẹkpar phọ ọdi.
Currently Selected:
Emiighom 37: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
