Emiighom 29
29
ẠJekob ạghi asi ạteeny kꞌạLeban
1ẠJekob aḅetenu erelhe phọ dị rạki bọ ẹpe erumuḍio phọ remite ghan bọ. 2Ekperenom bịn ạteeny ghuḍia sịphe ạraaghana phọ, rꞌịraar aḍita iyool-ịga dị ẹmina ekitonom. Rọkpa ghan mụum sịphe aghuḍia phọ kụ ọngo ịga phọ. Aḍighiigh phọ rookpereghiom ghan bọ ghuḍia phọ ẹbugh, 3kụ, mem lọ oomo iyool-ịga phọ meekpomoghan sịphe phọ, pụruku abukoriom ịga phọ kookilemi ghan ḍighiigh phọ ọsighe sịphe ọnhu aghuḍia phọ, ọngo mụum ịga phọ, ọḅile oḅulemi ḍighiigh phọ ookpereghiom ọnhu aghuḍia phọ.
4ẠJekob apuru bukoriom iyool-ịga phọ mọ, “Bumor ạmi, nyina ịḍua ẹghen kụ eru?”
Kụ bịdi ọḅeni nyọdi mọ, “Yoor ụḍua Hạran.”
5Ọdi apuru bịdi mọ, “Nyina elegheri ni Lẹban ọony phọ aNahor?”
Kụ bịdi ọphagharanaan nyọdi mọ, “Yoor olegheri ni nyọdi.” 6Kụ apuru bịdi mọ, “Amoon ni?”
Kụ bịdi ọḅem mọ, “Amoon ni. Mịin, aRechel ọnyani ọdi ạpam ni ịga ratumom.”
7ẠJekob ạḅeni bịdi mọ, “Ipogh. Sịen aḍio phọ edi bọ ni, kụ kẹ̋teeny bọ mem ookpomoghi ịga phọ egina esi, eeghe kụ nyina ị́ngo bọ bịdi phọ, ẹḅile ẹsighe bịdi eḅulemi ẹḅal ịḅal.”
8Kụ bịdi ọḅeni nyọdi mọ, “Yoor kótue oḍighi ịdipho tụtu oomo ịga phọ mesiighi sịen kụ yoor mookilemi ḍighiigh phọ ọgbole sịphe ọnhu aghuḍia phọ. Pọ kụ amem dị yoor kọngo mụum ịga phọ.”
9Bịdi odi rọkaaph ghan bịn, pọrono aRechel mạpham ịga ọde phọ ọdi ratumom. Ọdi kụ rapogh ghan ịga phọ. 10Mem dị ạJekob ạmiin bọ Rechel ọnyani phọ ạLeban umor onhiin phọ ọdi, rꞌịga phọ ạLeban umor onhiin phọ ọdi, ạJekob ạghi ḍigina amem aakilemi ḍighiigh phọ ạgbole sịphe ọnhu aghuḍia phọ, ạngo mụum ịga umor onhiin phọ ọdi. 11ẠJekob ạkpun Rechel bịn awagharan ramoghi. 12ẠJekob ạḅeni Rechel mọ, “Mị ọony ọnyani ọde ạna; ọony ạRibeka.”
Kụ aRechel aghiil ạghi ạḅeni ọde phọ ọdi. 13Mem dị ạLeban ạnaghan bọ ịlo ạJekob ọony umarani phọ ọdi, ọdi aghiil li ạghi ạteeny nyọdi, aghurughi, ạkpun nyọdi, ạpham nyọdi asiom ologhi otu, kụ ạJekob ạghaaph oomo ịpe emiteghu bọ ạḅeni Lẹban. 14ẠLeban ạḅeni nyọdi mọ, “Ageny ni nạ ịḅarara ạmi ḅịle rꞌaḍizu ạmi,” kụ ạJekob ạrol pạ kꞌọdi okpom ụnwanyu.
ẠJekob akumu Lẹban loor ẹmhu aRechel rꞌaLia
15ẠLeban ạḅeni Jẹkob mọ, “Nạ kúkumu ịmi oopho bịn sịen dị nạ aru ọnyo asiya ạmi. Ụḅeni ịmi ịlo mị kạkpe ghan nyịna.” 16ẠLeban ạmoogh ịyal ạnmanyaan: ḍien okumoor phọ ughol mọ aLia, ọbam mọ mọ aRechel. 17ALia ạmoogh ni iidugha ariḍien; kụ ọlo aRechel kụ amite oye ạnighe.
18ẠJekob ạphomoghian Rechel, kụ ọdi ạḅem mọ, “Mị kakumu nyịna oḍual ạsia, loor ẹmhu aRechel ọbam ọnyani phọ ạna.”
19ẠLeban ạḅem mọ, “Ẹnighe ni ọngo ạna nyọdi epu lọ mị kạngo nyọdi ọnon oye; tọl sịen rꞌạmi.” 20Kụ ạJekob akumu Lẹban oḍual ạsia pịdi ọdi ạmoogh aRechel, kụ amem mọ ẹghigh ịphurukpu asuḍughul-otu bịn esi ọdi loor ẹphomoghian phọ dị ạphomoghian bọ Rechel.
21ẠJekob ạḅeni Lẹban mọ, “Ạsia phọ memunughan. Meera mị upin ọnyani phọ ạna.” 22ẠLeban ạamaghagh oomo awe ẹmha phọ kụ ole ẹyaal apinien. 23Kụ ọlo ḍughul phọ ạḍiphe, kpạripe rꞌaRechel, ạLeban ạḅogh Lia ọḅel ọnyani phọ ọdi kụ ạngo Jẹkob, kụ bịdi ọrolan esi. 24(ẠLeban ạsighe Zilpa ẹbene-ọnyani ọdi ạngo Lia ịdipho ọnyani-otu.) 25Mẹḅaal li ḍịroor, kụ ạJekob akiton ạmiin mọ aLia kụ ọnyani phọ ọngo bọ nyọdi. Kụ ạJekob ạghi apuru Lẹban mọ, “Ịphen nạ uḍighi bọ ịmi ịghen? Mịna úkol ẹmhu aRechel kụ akumu bọ nyịna? Uḍighi ika kụ nạ uugbegheḍiom bọ ịmina ịduon?”
26ẠLeban ạphagharanaan mọ, “Íḍighi eḍighinom ịyaar ẹphen ọphur ọnughenyan ọbam ọony kụ egbi osi okumoor. 27Kori amuneni eeḍio ọḍe apinien phọ, kụ mị ạngo nyịna nyọori phọ, lọ nạ kukumunaan ni ịmi ịnon oḍual ạsia.”
28ẠJekob ạtuugh ịpe ọḅeni bọ nyọdi aḍighi amuneni riiḍio phọ, kụ ạLeban agbi ọḅogh aRechel ọnyani phọ ọdi ọngo ạJekob aḍighi ạnir. 29(ẠLeban ạsighe Bilha ẹbene-otu ọdi ạngo Rechel ịdipho ọnyani-otu.) 30Ọdi rꞌaRechel ọrolan esi kụ ọdi ạphomoghian Rechel apu Lia. Pọ kụ ẹdi ọdi ạḅophoghan ạrol ạḅile akumu Lẹban ịnon oḍual ạsia.
Ạnmuny phọ ọmaranaan bọ Jẹkob
31Mem dị Ọmoogh-we phọ ạmiin mọ Lia ụ́pomoghian, ọdi adughe ọophi aLia, kụ aRechel ạrol ẹ́mar. 32ALia aamor kụ ạmar olephiri, kụ aghol ḍien ọony phọ ọdi mọ aRuben. Ọdi ạḅem mọ, “Ageny ni, Ọmoogh-we phọ mạmiin ịminimiin phọ ạmi; nyịidipho mẹteeny dị olhom mọ ạmi kụphomoghian ịmi.” 33Kụ ọdi ạḅile aamor kụ ạmar kẹn olephiri kụ ạḅem mọ, “Ọmoogh-we phọ mạnaghan mọ ụlogh ni ịmi ḍien, kụ ạtu bọ ạḅile ụngo ịmi mọony phọ ọphon,” kụ ọdi aghol ḍien ọony phọ mọ ạSimion. 34Kụ ọdi ạḅile aamor kụ ạmar olephiri, kụ ạḅem mọ, “Mẹteeny dị olhom mọ ạmi rꞌạmi kọḅophoghan, ịdi eḍighi bọ mị mạmaranaan bọ nyọdi sịen ịraar ạnmuny,” kụ ọdi aghol ḍien ọony phọ mọ aLivai. 35Ọdi ạḅile aamor kụ ạmar olephiri kụ ạḅem mọ, “Egi phọ ẹphen mị kạseph Ọmoogh-we phọ,” kụ ọdi aghol ḍien ọony phọ mọ aJuda. Kụ asophe ẹmaria.
Currently Selected:
Emiighom 29: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
