Emiighom 27
27
Ạizik ạngo Jẹkob ḍịseph
1Mem dị Ạizik mạkpo, ariḍien ọdi meḅaaghaph, eten rạ́miin ghan mun, kụ ạmagh Ịso ọkpana phọ ọdi kụ ạḅeni nyọdi mọ, “Mọony ạmi.”
Kụ ọdi ameera, ạḅeni nyọdi mọ, “Pọrono ạmi sịen.” 2Kụ Ạizik ạḅeni nyọdi mọ, “Nạ ạmiin ni mọ mị mạkpo kụ eeni mị kamugh ni esi dị ị́kel. 3Ụgua, nyịidipho sịghe kụmugh phọ ạna rꞌịkpina phọ, mite ạghi ịtaya ẹpe eḍum mọ ụraphanaan ịmi ẹnam. 4Kụ ạsaam eḍien phọ ẹpe rịḅeeraan ghan bọ ịmi, kụ ạsighe uruom. Mị role reten, mị kạngo nyịna ḍịseph kụ mị agbi omugh.”
5Mem mọ Ạizik rạḅeni bọ Ịso ọony phọ ọdi, ạRibeka rạnaghan ghan ni. Kụ Ịso aḅetenu ạghi ịtaya ọwa ẹnam ọraph ọsighe oruom Ạizik. 6ẠRibeka ạghaaph ạḅeni Jẹkob ọony phọ ọdi mọ, “Pụruku mị ạnaghan ni ịdi Ạizik ọde phọ ạna ạḅeni Ịso umor phọ ạna 7mọ ạghi ạraph ẹnam ạsighe ạsaam eḍien phọ ẹpe ẹḅeeraan bọ nyọdi, mọ ọno alhe ạseph nyọdi risigh Ọmoogh-we phọ. 8Mọony ạmi, nạghan ịphen mị kạḅeni bọ nyịna nyịidipho. 9Kịa sịphe aḍita ịga phọ ạsighe ịyal ibunabuna ạnmuny ạrutu-ịga uruom pịdi mị ạsa egeny eḍien phọ ẹpe rẹḅeeraan ghan bọ ọde phọ anyina. 10Nạ kạsighe ạkiom ọdi ale, ạseph nyịna kụ agbi omugh.”
11ẠJekob ạḅeni Rịbeka onhiin phọ ọdi mọ, “Nạ alegheri ni mọ Ịso umor phọ ạmi oye ạburu kụ mị ạmoogh ọdinodino ozu. 12Oḍighom ịyaar ọde phọ ạmi kụḅogh ni ịmi apogh, bịn mị maḍighi oye iigbegheḍiom, bịn mị ạsighe itulughian ạngo loor ạmi kpạripe rꞌạḍiseph.”
13ẠRibeka onhiin phọ ọdi ạḅeni nyọdi mọ, “Mọony ạmi, osuughi nyịna ịkaraph ịnhu, pọ itulughian phọ ịpe isoroghuom ịmi. Ụnaghanan ịmi, mọony ạmi, kịa ạsighe rụtu-ịga phọ uruom.” 14Kụ ọdi ạghi ạsighe aruomonaan onhiin phọ ọdi, kụ onhiin phọ ọdi ạsighe ạsaam eḍien phọ ẹpe ẹḅeeraan bọ ọde phọ ọdi. 15Pọ kụ ẹdi ạRibeka ạsighe ịkaraghi ịma ạrusuoma Ịso ịdi dị aseere sịphe otu phọ, ạkpologhi Jẹkob esoony ọony phọ ọdi. 16Kụ ạsighe ruzu ạrutu-ịga phọ aakpereghiom rạghaagh ạJekob, ạḅile anyorom orum mọ ọdi ạburu úlho bọ. 17Kụ ạsighe eḍien phọ rẹdugh bọ, ạḅaram ạbred phọ ọdi ạsa bọ, ạngo Jẹkob ọony phọ ọdi.
18Kụ ạJekob agbi nụun ọghi ẹpe ọde phọ ọdi odi bọ, kụ ạmagh mọ, “Ọde ạmi.”
Kụ ọde phọ ameera mọ, “Mị odi ni sịen,” kụ apuru mọ, “Nạ ọghen ọony ạmi?”
19Kụ ạJekob ạḅeni ọde phọ ọdi mọ, “Mị Ịso ọkpana ọony phọ ạna. Mị mạtuugh ịpe nạ ụḅeni bọ ịmi aḍighi. Seseeny, tọl aaleeny, ạa ẹnum ẹnam mọ mị aruomaan bọ nyịna pịdi nạ ụngo ịmi ḍịseph phọ ạna.”
20Ạizik apuru nyọdi mọ, “Mọony ạmi, uḍighi ika kụ nạ aagborion bọ ịduon origheel?”
Kụ ạJekob ạphagharanaan mọ, “Ọmoogh-we phọ, Ẹnaan phọ ạna, kụ ịngo ịmi.” 21Ạizik ạḅeni Jẹkob mọ, “Mọony ạmi, ḍuraan ạabeeph ẹphen mị ạḅogh nyịna upogh mụghumo nạ ọkaraghi Ịso ọony phọ ạmi ni mụghumo kọ́di.” 22Kụ ạJekob aḍuraan ạabeeph loor Ạizik ọde phọ ọdi, kụ Ạizik ạazuogh nyọdi kụ ạḅem mọ, “Ẹḍogh phọ ẹlo ạJekob, kụ ạraghaagh phọ ịlo Ịso.” 23Ọdi ọ́lhogh nyọdi elegh ịdi eḍighi bọ ạraghaagh phọ ọdi ẹmoogh ạburu ịdipho ạraghaagh phọ Ịso umor phọ ọdi. Ọdi raḍighi ịlo ọngo ḍịseph phọ ọdi, 24kụ ạḅile apuru nyọdi mọ, “Nạ ọkaraghi Ịso ọony phọ ạmi phọ ni?”
Ọdi ạphagharanaan mọ, “Ạmi ni.”
25Kụ Ạizik ạḅem mọ, “Mọony ạmi, sịghe ịma ịisa phọ ạna uruom mị ule, ẹrol dị mị ạseph nyịna.” Kụ ọdi ạsighe ạngo nyọdi kụ ọdi ale; ạngo nyọdi miim ọdi ạphughol. 26Ạizik ọde phọ ọdi ạḅeni nyọdi, mọ, “Tue utuman ịmi ụkpun ịmi, mọony ạmi.” 27#Hib 11.20Kụ ạghi atuman nyọdi kụ ạkpun nyọdi, kụ Ạizik ạnaghan eḍu ạsuoma phọ ọdi, kụ ạseph nyọdi, kụ ạḅem mọ, “Mịin, eḍu ạsuoma phọ ọony phọ ạmi repur ịdipho eḍu aleeny lọ Ọmoogh-we phọ mạseph. 28Ẹnaan ẹngo ghan nyịna ooto ẹpe kꞌạke phọ rꞌẹnuum ịsien ade phọ, ẹngo ghan nyịna ịbiakpa rꞌịghol emuzeḍi. 29#Emi 12.3Awe okumu ghan nyịna, areelhe kịrokiro phọ ọoḅereghi ghan nyịna. Mọogh ghan ịikpo esi abumor phọ ạna, ạnmuny abumor phọ ạna okpuḍian ghan nyịna. Tọrobo oye lọ asu nyịna ọkaraph ọghor, pọ mosu nyọdi ọkaraph ọghor; kụ tọrobo oye lọ asu nyịna ooḅi ọghor, pọ mosu nyọdi ooḅi ọghor.”
Ịso ạlom aani Ạizik ḍịseph
30Ạizik mạngooghi ḍịseph phọ ạmadan kụ ạJekob ạḍua. Mọony amem bịn kụ iten, Ịso umor phọ ọdi arigheel ịtaya phọ. 31Ọdi ạsa aani ịma ịisa dị ẹdugh kụ ạsighe ạghiom ọde phọ ọdi, kụ ạḅeni nyọdi mọ, “Ọde, tọl aaleeny kụ ạa ẹnum ẹnam mọ dị mị marom nyịna, pịdi nạ ụngo ịmi ḍịseph phọ ạna.”
32Kụ Ạizik ọde phọ ọdi apuru nyọdi mọ, “Nạ ạnhian?”
Kụ ọdi ạphagharanaan mọ, “Mị ọony phọ ạna ni. Mị Ịso ọkpana ọony phọ ạna.”
33Ạizik akperenom kụ amaghagha kụ apuru mọ, “Ạnhian? Ọphon ạsighe bọ ẹnam ịtaya phọ ạsa bọ uruomonaan ịmi kụ mị ạa bọ, kụ nạ agbi bọ oru, kụ mị mạseph bọ nyọdi, ạnhian? Ii, mị mạseph nyọdi.”
34Mem dị Ịso ạnaghan bọ ịphen ọde phọ ọdi ạghaaph bọ, bịn ologhi ọdi eeph, awagharan emoghi rạlooghi, kụ ạḅeni ọde phọ ọdi mọ, “Ụseph aani ịmi ịlo ạmi, seseeny, ọde ạmi.”
35Kụ Ạizik ạḅem mọ, “Umor phọ ạna mạsighe iigbegheḍiom ạḍuanam ḍịseph phọ ạna.”
36 #
Emi 25.29-34
Ịso ạḅem mọ, “Iikia ílho, ḍien phọ ọdi ạJekob. Sịen ịyal ạraraar ọdi muugbegheḍiom bọ ịmi: ịkpana phọ ạmi ọdi mạar ịmi, kụ mịin, mạḅile kẹn ạsighe ḍịseph phọ ạmi ạḍuanam. Rꞌẹphurukpu ạḍiseph nạ ịmina úsughenaan?”
37Kụ Ạizik ạphagharanaan Ịso mọ, “Mị maḍighi nyọdi uwotu ạna. Ọdi kụ ạmoogh nyịna. Mị mạḅogh oomo abumor phọ ọdi ạngo mọ bịdi oḍighi butelhedom ọdi. Mị mạseph ịbiakpa ọdi rꞌịghol ọdi. Eeghe kụ isugha bọ, mọony ạmi, dị mịna kạngo bọ nyịna?”
38 #
Hib 12.17
Ịso ạkpaariom ni ạgbanian ọde phọ ọdi mọ, “Aḍiniin phọ ạḍiseph phọ ạḍien bịn kụ ịdi nạ ạmoogh? Ọde ạmi, seseeny, ụseph aani ịmi.” Ịso ạlho kụ awagharan emoghi.
39 #
Hib 11.20
Ạizik ọde phọ ọdi ạḅeni nyọdi mọ, “Nạ katugh ghan de dị ẹeḍiom ị́moogh ooto kꞌạke kásoor ghan. 40#Emi 36.8; 2 Ạbud 8.20Elhool ẹgham mọ ạna kụ ẹdi nạ kạsighe aḍumom. Nạ kakumu ghan umor phọ ạna, tụtu ẹteeny mem dị nạ kạgbatanaan ạmoogha loor, ạnyagharanaan oḍigh phọ ọdi orum mọ ạna.”
41Kụ Ịso ạlogh ḍien Jẹkob loor ịphen phọ ọde phọ ọdi ạseph bọ Jẹkob, kụ Ịso ạatughian ịduon: “Ariiḍio okughuḍi ọde phọ ạmi ị́kel mun. Amem mọ ọpo reten kụ mị akiigh Jẹkob.”
42Kụ ịphen Ịso okumoor ọony phọ ạghaaph bọ ọghi ọghaaph ọḅeni Rịbeka, kụ ọdi arom ọghi ọmagh Jẹkob esoony ọony phọ ọdi, ạḅeni nyọdi mọ, “Nạghan. Ịso umor phọ ạna rạatughian ghan ịlo oghiigh ạna. 43Nyịidipho, mọony ạmi, nạghan ịphen mị kạḅeni bọ nyịna. Ḅetenu ạtuonom Lẹban ọony onhiin phọ ạmi ẹpe Hạran, 44ạrolan nyọdi ẹpe, tụtu ọghagh ologhi umor phọ ạna asoroghu, 45kụ ọdi awula ịyaar phọ nạ maḍighi bọ nyọdi. Kụ mị atom oye atu ạsighe nyịna aḅulemi. Mị kạtu eeghe kụ atoph ịyal ạnmuny ạmi eniin aḍio?”
Ạizik ạkiomaan Jẹkob kꞌạLeban
46Kụ ạRibeka ạḅeni Ạizik mọ, “Ạnmariir Ịso phọ ạbuen phọ rụngo ghan ịmi mugbogh amukum ologhi. Eru mạar dị ạJekob ạḅile aphin aani kẹn bụo aruuruen phọ ạbuen, pọ mị kamugh ni.”
Currently Selected:
Emiighom 27: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
