Emiighom 26
26
Ạizik atugh ẹpe Gerar
1Ịgbakuro ịḅile ni esoor ẹpe ade phọ; ịphen kụ itum ịḅel ịgbakuro phọ ịpe esoor bọ mem mọ Ebraham, kụ Ạizik agheel kꞌẠbimelek ọdaam mọ aFilistia ạghi asi ẹpe Gerar. 2Kụ Ọmoogh-we phọ amite egaan kụ ạḅeni Ạizik mọ, “Úkeel ghan ẹpe Ijipt, tọl li sịen ade phọ ạḍien, sịen mị ạḅeni bọ nyịna mọ tọl. 3#Emi 22.16-18Tugh ni sịen ade phọ ạḍien. Mị kạrolonaan ni nyịna kụ ạseph nyịna. Mị kạngo nyịna rꞌọto ạna oomo ade phọ ạḍien. Mị kamuneni ni ịyo phọ mị rꞌEbraham ọde phọ ạna rꞌạmi oghiran bọ. 4Kụ mị aḍighi ịdi ạnmuny phọ ạna kọmar omuzeḍi ịdipho ạraanaan phọ edi bọ kꞌạke phọ, kụ mị ạsighe oomo ạramha phọ ịphen ạngo nmụny ạna. Kọtuan nmụny ạna kụ ọseph oomo areelhe ịsien aḅirini phọ, 5ịdi eḍighi bọ Ebraham ụnaghanan ịmi, ạnaghanan ịpe mị ạḅeni bọ nyọdi, kụ aako iilogh phọ ạmi rꞌịtooghi phọ ạmi rꞌeḍighinom ịyaar phọ ạmi.”
6Pọ kụ ẹdi Ạizik arugh bọ pạ Gerar. 7#Emi 12.13; 20.2Kụ awe ịpa ẹmha phọ opuru nyọdi ịlo ạnir phọ ọdi. Kụ ọdi ạḅeni mọ, “Ọdi umarani ạmi.” Loor oghiilaan ọbo awe ẹmha phọ kọtuan ghan bọ loor ẹnighe phọ ạRibeka okiigh nyọdi kụ ọ́ḅem bọ mọ ọdi ạnir ọno, ịdi eḍighi bọ ọdi kụ ạnir dị ạkaraghi bọ ni ạnighe. 8Bịdi mọrol ẹpe phọ obia kụ Ọdaam Ạbimelek aFilistia phọ ạrol kꞌọdi aḅiila ẹbam eghuugh otu phọ kụ ạmiin Ạizik rꞌạRibeka ạnir phọ ọdi rọdo ịdi ropegh. 9Kụ Ạbimelek ạmagh Ạizik kụ ạḅeni mọ, “Tọ, ọkar igeny ọdi phọ ạnir ạna ni. Uḍighi ika kụ nạ ạḅem bọ mọ ọdi umarani ạna?”
Ạizik ạḅeni nyọdi mọ, “Mị ugbiom mọ, ịdipho oḍighom ịyaar, kọtuan ẹmhu ọdi bịn ughiigh ịmi.”
10Kụ Ạbimelek ạḅeni mọ, “Ịphen nạ uḍighi bọ iyoor ịghen? Mụghumo oniin oye ạsighe ni ạnir phọ ạna ạrolan esi, tụ ọbo nạ mạsighe ịiḅaghami ạḅam ẹmhu ayoor.” 11Kụ Ạbimelek ạphur rụru we phọ ọdi mọ, “Tọrobo oye lọ ạḅogh oye phọ ọphon, mọ ạḅogh ạnir phọ ọdi, pọ kokiigh ni oye phọ ọpo.”
12Ạizik aḅeph ozo sịphe ade phọ kụ lhạ phọ ạḍiphe phọ ọdi abugha ni iboom ibugha dị esoor oniin okuron amem epu ịpe ọdi aḅeph bọ loor esi dị Ọmoogh-we phọ ạseph nyọdi. 13Oye phọ aḍumaan rạki ghisigh, kụ ọdi ạmoogh ni eboom ẹelha. 14Ọdi mạmoogh iyool-ịga, rụtu-ịga, sịnam rꞌaḍita ạnmuny-otu, kụ awe ạbuo aFilistia phọ ọlogh nyọdi ḍien. 15Oomo asighuḍia phọ abutelhedom ọde phọ ọdi oguphogh bọ mem mọ Ebraham, awe ạbuo aFilistia phọ omirighan bịdi, orool ọogha oḍueghiom sughuḍia phọ.
16Pọ kụ ẹdi Ạbimelek ạḅeni Ạizik mọ, “Kookoroghian ạḍua ẹphen, ịdi eḍighi bọ nạ maḍum upu iyoor.” 17Sịphe kụ ẹdi Ạizik ạḍua ẹpe phọ, kụ agheel ẹpe Eḍiiny aGerar kụ ạlogh ogbogo kụ arugh ẹpe. 18Ạizik ạḅile aguphogh ẹpe phọ sighuḍia ạmuum, ịpe oguphogh bọ mem mọ Ebraham ọde phọ ọdi odi bọ; Ebraham romugh bịn bụo aFilistia phọ omirighan bịdi; kụ Ạizik ạtuugh siḍien phọ ịpe ọde phọ ọdi aaghologh bọ aaghologh.
19Abutelhedom mọ Ạizik oguph ẹpe eḍiinyaan bọ bịn okputon okol ạmuum. 20Abupoghom ịnam aGerar rꞌabupoghom ịnam Ạizik ọtuan ghuḍia phọ ọruanagh, kụ ọḅem ghan mọ, “Mụen ạmuum ayoor,” kụ oghol ḍien aghuḍia phọ mọ Ọruonu, ịdi eḍighi bọ bịdi rotu esi ọdi ḍịaḅa.
21Kụ bịdi ọḅile oguph ọnon aghuḍia, kụ bịdi ọḅile kẹn ọtuan ghuḍia phọ ọpo ọruanagh, kụ ọdi aghol ghuḍia phọ ọpo mọ Ạmulogh-ḍien. 22Ọdi ạwile pạ phọ kụ ạghi ẹnon esi kụ aguph ọnon aghuḍia; kụ bịdi ụ́tuan mun ghuḍia nyọon ụ́tuanagh. Kụ ọdi aghol ḍien aghuḍia phọ mọ Ẹereegh; ịduon phọ rẹḅem ghan mọ, “Ọmoogh-we phọ mụngo iyira ẹereegh orugh ịsien ade phọ, kụ yira kọmoogh ẹeḍiom sịen ade phọ ạḍien.”
23Kụ Ạizik ạḍua ẹpe phọ agheel Beersheba. 24Kụ Ọmoogh-we phọ amite egaan esi ọdi ḍughul phọ ạḍiphe kụ ạḅeni nyọdi mọ, “Mị kụ Ẹnaan Ebraham mọ ọde phọ ạna, aruugu nyịna kúsiph. Mị odianaan ni rꞌạna. Mị kạseph ni nyịna, mị kạtuan ni ẹmhu Ebraham otelhedom mọ ạmi ạbughe oghiil ạna.” 25Kụ Ạizik ạkan enmeny ạrikia aghol ḍien Ọmoogh-we phọ kụ ạlogh ogbogo sịphe phọ. Kụ abutelhedom mọ Ạizik oguph ọnon aghuḍia sịphe phọ.
Ịyo phọ Ạizik rꞌẠbimelek oghiran bọ
26 #
Emi 21.22
Ạbimelek, Ahuzat ọyaghiri ọdi rꞌaFikol uwo ẹmhu ạbuo ẹgham mọ ọdi, ọḍua Gerar ọghi kꞌẠizik. 27Sịphe kụ ẹdi Ạizik apuru bịdi mọ, “Nyina ịtuan eeghe kụ eru kꞌạmi? Nyina ịlogh ịmi ḍien, iphorogh ịmi ẹmha anyina.”
28Kụ bịdi ọḅeni nyọdi mọ, “Yoor ọmiin mọ Ọmoogh-we phọ odianaan rꞌạna, kụ yoor uru mọ nạ rꞌayoor oghiran ịyo; oghiran ịyo aghuḍuul. 29Nạ iyoor ịkaraph kúgbiom; yoor nyịna ịkaraph kúgbiom. Ịdipho yoor nyịna ịkaraph úḍighi bọ, yoor ọwile bọ nyịna mọ ḍụa rꞌẹwoor, nyịidipho nạ oye dị Ọmoogh-we phọ ạseph.” 30Kụ Ạizik ạko bịdi igoni kụ bịdi olhe ọphughol. 31Kụ bịdi oḅetenu eḅon ạḍiroor kụ oghiran ịyo. Ạizik arorori bịdi asiemi eten, kụ bịdi ogheel rꞌẹepho.
32Ḍio phọ ạḍiphe abutelhedom mọ Ạizik oru ọḅeni nyọdi ịlo aghuḍia phọ bịdi oguph bọ, mọ bụno mọteeny mụum. 33Kụ ọdi aghol ghuḍia phọ mọ Ịyo. Ịpe kụ ẹdi oghol bọ ẹmha phọ ẹpe phọ mọ aBeersheba kꞌarodon.
Aruuruen ạnmariir phọ Ịso aphinogh bọ
34Mem dị Ịso mạman inyadi ạsia kụ aphinogh ịyal ạnmanyaan ạHitait: Judit ọnyani phọ aBeeri, ḅịle rꞌaBasemat ọnyani phọ Elon. 35Bụen phọ ụngo Ạizik rꞌạRibeka mukum ologhi.
Currently Selected:
Emiighom 26: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
