Emiighom 25
25
Ạbunon ạnmuny ạnmuny Ebraham
(1 Krọnikuls 1.32-33)
1Ebraham ạḅile aphin ọnon ạnir dị oghol mọ aKetura, 2kụ ạmaranaan nyọdi Zimran, Joksan, Medan, Mịdian, Isbak rꞌaSua. 3AJoksan ạmar Siba rꞌaDedan, kụ ạnmuny aDedan ạbuen: Ashurim, Letusim rꞌaLeumim. 4Ạnmuny ạMidian ạbuen: Efa, Efer, Hanok, Abida rꞌEldaa. Oomo phọ ạbuen phọ ạnmuny aKetura.
5Ebraham ạwilenaan ni oomo aruphua phọ dị ạmoogh bọ Ạizik. 6Kụ ọlo nmụny ạnmariir phọ Ebraham ạgaany bọ, ọdi ạsighe rạraar bịn ạngaani kụ, mem mọ ọdi odi bọ ni, aphoroghom bịdi sịphe otu phọ Ạizik ọony phọ ọdi, kụ bịdi ọghi rạmha ẹpe erumuḍio phọ remite ghan bọ kụ orughogh.
Aḍuugh phọ rꞌamaḍi phọ Ebraham
7-8Ebraham amugh mem dị mạkar ri ạkpo ạman oniin okuron oḍualdi rꞌoogh ạsia. Kụ ọto ạbidi ookpomoghan oḍi nyọdi. 9Ạizik rꞌỊsmael ạnmuny phọ ọdi ọsighe nyọdi ọghi oḍi ẹpe epogh asighiigh phọ ẹpe Makepela sịphe aleeny phọ Efron ọony phọ aZohar ọlo ạHitait phọ, koten bọ kụ ọteeny Mamre. 10#Emi 23.3-16Leeny phọ, ḍịphe Ebraham agho bọ ḍịghaagh ạHitait phọ, ịsiphe kụ ẹdi oḍi bọ Ebraham rꞌaSera ạnir phọ ọdi. 11Reten ḍuugh phọ Ebraham kụ Ẹnaan ẹseph Ạizik ọony phọ ọdi, ọpo arugh bọ atuman “Ghuḍia ọpo odi ghan bọ kụ rụmiin ghan bọ ịmi”.
Bụo ẹemara Ịsmael
(1 Krọnikuls 1.28-31)
12Ịsmael, ọpo aHegar ọlo Ijipt phọ ọnyani-otu phọ aSera ạmaranaan bọ Ebraham, 13ạmoogh nmụny phọ ạbuen kọgo bọ sịen, ọony aruom mọony: Nebayot, Kedar, Ạdbeel, Mibsam, 14Misma, Duma, Mạsa, 15Hadad, Tẹma, Jetur, Nafis rꞌaKedema. 16Bụen phọ kụ abugbogh ạburude aḍioph rꞌịyal arughunughun phọ. Asiḍien ạbidi kụ ịdi ọsighe kụ ooghologhom iipolo phọ ạbidi rꞌạramha phọ ạbidi. 17Ạḍikpo Ịsmael sịen aḅirini phọ ẹman oniin okuron ịraardi rꞌoḍual ạsia. Kụ ọto ạbidi ookpomoghan oḍi nyọdi. 18Bịdi ụ́ḅar rꞌạbueri phọ ạnmuny phọ Ịsmael kụ orughan, ụghi ghụn de ịsiphe ịbaay aHavila rꞌaSur, koten kụ ọteeny Ijipt, ẹpe ḍịghaagh ẹlo Asiria, kụ orugh.
Ịpe ọmar bọ Ịso rꞌạJekob
19Bụen kụ oghiil ạnmuny Ạizik, ọony phọ Ebraham. Ebraham kụ ọde Ạizik. 20Ạizik ạman inyadi ạsia mem mọ ọdi aphin bọ Rịbeka ọnyani ạBetuel ọlo ạSiria ẹpe Mesopotamia, umarani ạLeban. 21Ạizik aghol ẹmhu ạnir phọ ọdi kụ ạaḅereghi Ọmoogh-we phọ, loor esi dị ạnir phọ ọdi ẹ́mar, kụ Ọmoogh-we phọ ạnaghanan ịiḅereghi phọ ọdi, kụ ạRibeka aamor. 22Ạnmuny phọ ọrol sịphe ọkuruḅaka phọ kụ ronyuughian, kụ ọdi ạḅem mọ, “Iḍighi ika kụ ịyaar dị ẹrol ịduon kimitenaan bọ ịmi?” Kụ ọdi ạghi apuru Ọmoogh-we phọ.
23 #
Rom 9.12
Kụ Ọmoogh-we phọ ạḅeni nyọdi mọ, “Ịyal areelhe kụ edi bọ sịphe ọkuruḅaka phọ ạna. Ịyal phọ areelhe phọ nạ kạmar bọ kodia ni, oniin kụ kạmoogh ịikpo apu nyoniin, okumoor phọ kakumunaan ghan ọbam mọ.”
24Kụ ariiḍio ẹmaria phọ ọdi remunughan, kụ ạmar ịyal alephiri ạnmuny. 25Ọḅel ọony phọ aru amite kụ rạtogh, oomo phọ ọdi ạburu ạburu. Pọ kụ ẹdi oghol bọ nyọdi mọ Ịso. 26Kụ umor phọ ọdi aru amite, ạpam eeghim Ịso; pọ kụ ẹdi oghol bọ nyọdi mọ ạJekob. Ạizik mạman odiinydi ạsia kụ ạmar nmụny.
Ịso abool ịkpana phọ ọdi
27Mem dị ạnmuny phọ ophoph ọmanam oḍighi we, Ịso ạmaar ịtaya, oye dị ạphomoghian rukumuan ologhi eḍum, kụ ọlo ạJekob onakara oye dị ạrol ghan ologhi otu bịn. 28Ạizik ạphomoghian Ịso, ịdi eḍighi bọ ọpo kụ rạngo ghan nyọdi ịnam ạa; ạRibeka ạkaraghi ạsighe Jẹkob.
29Eniin aḍio mem dị ạJekob ragir mooboph ọḍu, Ịso mạḍua ịtaya phọ atigheel aḍigh otu. Ọkoony rasiph nyọdi, 30kụ ạḅeni Jẹkob mọ, “Ọkoony rughiigh ịmi. Ụngaani ẹnum ạmutogh-tọgh amooboph ọḍu phọ ạna mị ule.” (Ụtuan ịduon kụ oghol bọ ḍien phọ ọdi mọ Idom.)
31ẠJekob ạḅeni Ịso mọ, “Mị kạngo ni nyịna eru mạar dị nạ aalha ịmi ịkpana phọ ạna rodon.”
32Ịso ạḅeni Jẹkob mọ, “Ẹnighe ni-a. Mị ramugh ni ịduon phọ; eeghe ạsuo kụ ẹdi ịkpana phọ kịngo ịmi nụun?”
33 #
Hib 12.16
ẠJekob ạḅeni Ịso mọ, “Kunya ụngo ịmi rodon,” kụ Ịso aghunya aalha ịkpana phọ Jẹkob. 34Kụ ạJekob ạsighe ạbred akor mooboph phọ dị ạsa bọ ạngo Ịso, kụ ọdi alhe ạphughol mụum kụ aḅetenu ạḍua. Ịso ọ́maghami ịyaar ịkpana phọ ọdi.
Currently Selected:
Emiighom 25: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
