Emiighom 16
16
AHegar rꞌỊsmael
1-2ASerai ạnir phọ Ebram nmụny ọ́maranaan Ebram, kụ ọlo ọdi ạmoogh ni ọnyani-otu ọlo Ijipt dị oghol mọ aHegar. Kụ iḍighi kụ aSerai ạḅeni olhom mọ ọdi mọ, “Ọmoogh-we phọ musophoghom ịmi ọmaraghi ạnmuny, kụ seseeny, kịa ọnyani-otu phọ ạmi rꞌạna ẹrolan esi, ịduon sịen ọdi kụmaraghinaan ni ịmi nmụny.” Kụ Ebram ạnaghanan Serai ạnir phọ ọdi. 3(Mẹman ḍioph ạsia Ebram arugh bọ ẹpe ade phọ aKenan kụ aSerai ạḅogh bọ Hegar ọnyani-otu phọ ọdi ạngo olhom mọ ọdi.) 4Ebram rꞌaHegar ọrolan esi kụ ọnyani phọ asoph eghun. Mem dị aHegar aloghoma bọ mọ ọno raamor, bịn aphogh onhiin-otu phọ ọdi asooromi bịn ọ́man mun ịyaar esi ọdi.
5ASerai ạḅeni Ebram mọ, “Nạ kụ ụkom bọ ịiḅaghami phọ ạmi. Mị rꞌaloor kụ ụḅogh ọnyani-otu phọ ạmi ạngo nyịna mọ ịtolan esi, kụ emiigh kꞌamem mọ ọdi aloghoma bọ mọ ọno odi rꞌeghun, ọdi muphogh ịmi asooromi. Ọmoogh-we phọ kụ asoph ọoruen ạna rꞌạmi oye lọ odi riliom!”
6Kụ Ebram ạḅeni Serai mọ, “Pọrono ọnyani-otu ạna. Mị mạḅogh nyọdi ạngo nyịna. Ḍighi nyọdi ịlo ẹḅeeraan nyịna.” Kụ aSerai ạmiine Hegar, kụ ọnyani phọ aghiil asuma.
7Ọokpaany Ọmoogh-we phọ ạmiin Hegar ọgbal ọodu dị ạmuum odi ẹpe ẹdala phọ, ọodu phọ ọpo odi bọ ẹpe eten phọ rẹki bọ ẹpe Sur. 8Kụ ọdi apuru mọ, “Hegar ọnyani-otu phọ aSerai, nạ ụḍua ẹghen kụ aru bọ? Kụ nạ rạki ẹghen?”
Kụ ọdi ạphagharanaan mọ, “Mị akiilaan Serai onhiin-otu phọ ạmi kụ mị rasuma.”
9Ọokpaany Ọmoogh-we phọ ạḅeni nyọdi mọ, “Ḅula agheel kꞌonhiin-otu phọ ạna, asooromi loor ạna esi ọdi.” 10Kụ ạḅaram mọ, “Mị kạbughe ni ẹemara ẹemara phọ ạna. Nạ kạmaraghi ni amuzeḍi ḍita dị kótue ọbal omuneni.” 11Kụ ọokpaany Ọmoogh-we phọ ạḅile kẹn ạḅeni nyọdi mọ, “Nạ kạmar olephiri ọony. Kol nyọdi mọ Ịsmael ịdi eḍighi bọ Ọmoogh-we phọ mạmiin ni ịminimiin phọ ạna. 12Kụ ọlo ọony phọ ạna kaḍighi oye dị úsereghian, ạkigh ịdipho ẹnam adool. Ọlo ọdi ạmiin bịn ọdi kazuom ghan elephiri; ọlo ạmiin nyọdi bịn kazuom ni nyọdi elephiri. Ọdi kátughogh ghan atuman bumor ọdi.”
13Kụ aHegar apuruan mọ, “Ọkaraghi agey ni, mịna phọ kụ ụmiin Ẹnaan kụ odi ghan bịn úmugh?” Kụ iḍighi kụ ọdi ạta Ọmoogh-we phọ ạḅaanaan bọ nyọdi mọ “Ẹnaan dị rẹmiin ghan eten.” 14Kụ ọtuan ịduon phọ oghol ghuḍia phọ ọpo odi bọ igbo aKades rꞌaBered kꞌarodon mọ “Aghuḍia ọpo odi ghan bọ kụ rụmiin ghan bọ ịmi.”
15 #
Gal 4.22
AHegar ạmaranaan Ebram olephiri ọony kụ Ebram aghol ḍien ọony phọ mọ Ịsmael. 16Ebram ạman bọ ọphaanyadi rꞌodiiny ạsia mem mọ ọmar bọ Ịsmael.
Currently Selected:
Emiighom 16: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
