Iiḍighi 9
9
Ịdi okiton Sọl
(Iiḍighi 22.6-16; 26.12-18)
1Mem mọ ạmuen phọ, ạSol ósoph ghan mem ọpaarogh rꞌọwa ghan ịlo ọze ạbumatuan Ọmoogh-we phọ, kụ ạghi esi uwo ẹmhu oyil ạrikia phọ, 2ạlom rịnya ọghimom arubughotu phọ ạDamaskos, mọ ọno ạmiin nmạriir rꞌalephiri lọ rọdaph Emoom Eten Ọmoogh-we phọ, pọ ọno ạphaḍi yogh bịdi arighelom Jeruselem.
3Ọdi aten rạki kụ ạtol rapogh Dạmaskos, ekperenom kụ aḍiboom ạḍiḅaal ẹḍua kꞌạke esoorom nyọdi. 4Kụ ọdi ameel ude, kụ ạnaghan ẹḍogh dị ẹmagh nyọdi mọ, “Sọl, Sọl! Uḍighi ika kụ nạ rụgbiphoghom bọ ịmi?”
5Kụ ọdi apuru mọ, “Ọmoogh-we, nạ ạnhian?”
Kụ ẹḍogh phọ ẹḅem mọ, “Mị ạJizos phọ ọpo nạ rạgbiphoghom bọ. 6Ḅetenu amite ẹpe ẹmha phọ, kọḅeni ni nyịna ịdi nạ kaḍighi!”
7Kụ awe phọ ạbuphe rꞌọdi rọki bọ ọmeregha bịn nam, kụ ạri ụnaghan ni ẹḍogh phọ, kụ oye ụ́miin. 8Kụ ạSol aḅetenu bọ ạḅarion riḍien ọdi, ọ́miin mun eten; kụ ọpham ḍịghaagh ọdi osiom Dạmaskos. 9Kụ esi ịraar aḍughul-otu ọdi eten ọ́miin, eḍien ólhe, mụum ọ́phughol.
10Kụ oniin ạmatuan dị oghol mọ Ạnanayas, ạrol li Dạmaskos. Kụ Ọmoogh-we phọ ạmagh nyọdi esi uḍien mọ, “Ạnanayas!”
Kụ ọdi ameera mọ, “Ọmoogh-we, mị odi ni sịen.”
11Kụ Ọmoogh-we phọ ạḅeni mọ ọdi aḅetenu ạghi kꞌaJudas, ẹpe oḅodo phọ oghol bọ mọ oseleeny phọ, kụ apuru oye ọlo ạTasos dị oghol mọ ạSol. Mọ ọdi rạaḅereghi ni, 12kụ mạmiin uḍien oye dị oghol mọ Ạnanayas dị aru ạḅam rạghaagh ẹmhu ọdi, ịlo dị kạmiin eten.
13Kụ Ạnanayas mọ, “Ọmoogh-we, ịbadi awe mụḅeni ni ịmi ịlo ịkaraph dị oye phọ ọphon aḍighi yogh we phọ ạna ẹmha aJeruselem. 14Kụ ọdi ạar ri ịikpo rụmhu ariil ạrikia phọ kụ aru ẹphen ịlo ọphaḍi yogh ạbulo rokol ghan ḍien phọ ạna.”
15Kụ Ọmoogh-we phọ ạḅeni nyọdi mọ, “Kịa ni! Mị mạsaḅar nyọdi omitiom aḍien phọ ạmi oḍeenaan aruuruen rꞌạbuo ạrumhu phọ ạbidi, rꞌaweye phọ Ịzirel. 16Mị kaḍeenaan ni nyọdi oomo phọ ịpe ọdi kạtuan bọ ḍien phọ ạmi ạmiinom.”
17Kụ Ạnanayas ạḍua ạghi aḍigh otu phọ, kụ rọḅam rạghaagh ẹmhu ọdi, kụ ạḅem mọ, “Sọl, umor ạmi! ẠJizos Ọmoogh-we phọ, ọpo amitenaan bọ nyịna egaan ẹpe eten phọ, mem mọ nạ ratu bọ ẹphen, kụ urom ịmi mọ mị utu ọbo nạ ạḅile ạmiin eten, ḅịle kẹn Uwaloor Iigbia phọ amuza loor ạna.” 18Kụ egina amem bịn ạraraar dị ẹghigh ipholopol ina ẹḍua riḍien phọ ọdi emeleghu, kụ ạḅile ạmiin eten, kụ aḅetenu kụ owur nyọdi mụum. 19Kụ role eḍien, bịn ạḅile ạmoogh ịnyaam.
ẠSol ạkaaph ooḅi ọghaaph phọ ẹpe Dạmaskos
Kụ ạSol ạrolan bụmatuan phọ ạDamaskos ịminighan aḍughul-otu, 20kụ anyeene ạghiighi rubughotu phọ amiigh ọghaaph mọ ạJizos kụ Ọony phọ Ẹnaan.
21Kụ eḍigh iikia esi oomo phọ ạbuphe ọnaghan bọ, kụ opuru ghan mọ, “Ọphon kọ́di ạwa ghan bọ ophiemi ạbuphe oghol ghan bọ ḍien phọ ạJizos ẹpe Jeruselem? Kụ ọdi ọ́tuan ọphaḍi yogh ạbidi ọghiom ạbuo ạrumhu ariil ạrikia phọ kụ aru bọ ẹphen?”
22Kụ ạSol ạghaaph ni ạkpaariom mọ ọphon kụ aMesaya phọ, kụ ịnyaam ọghaaph phọ ọdi ephoph, dị ạbuo aJu ạDamaskos ịyaar útue ụkaaph.
23 #
2 Kọr 11.32, 33 Kụ ịminighan aḍughul-otu reten, kụ ạbuo aJu phọ omite ezue ịlo oghiigh ạSol, 24kụ ezue phọ eḍigh rụru ọdi. Kụ bịdi okori ghan eḍighom ẹmha phọ ḍughul rꞌootaany, ọbo ọteeny nyọdi oghiigh. 25Ḍiniin aḍughul kụ ạbumatuan phọ ọdi ọsighe nyọdi ọlogh egunum kụ oḅughe epogh iikpe ẹmha phọ ọkpaaghi oseere.
ẠSol asi Jeruselem
26Kụ ạSol asi bọ Jeruselem ạwa ni ịlo ọḅophoghan rꞌạbumatuan phọ, kụ oomo phọ ạbidi oghiilaan nyọdi, úmeeraam mọ ọdi maḍighan bụno. 27Kụ ạBanabas ạlogh ḍịghaagh ạsighe nyọdi ạghiomonaan butelhedom mọ, kụ ạghaaph ạḅeni bịdi, mọ ạSol mạmiin Ọmoogh-we phọ ẹpe eten, bịdi ọkaaphan, ḅịle mọ ẹpe Dạmaskos ọdi ạghaaph ni ịlo aḍien phọ ạJizos rꞌạkpo ologhi. 28Kụ ọdi ạrolan rꞌạbidi, ẹghi rꞌerigheel, ẹpe Jeruselem. 29Ạghaaphom ghan rꞌạkpo ologhi ịlo aḍien Ọmoogh-we phọ, ạḅile ghan ạpharanaan ịparanaan rꞌạbuo aJu phọ rọḅa ghan bọ ọnhu phọ aGris, kụ bịdi oosophoghian ghan ịlo oghiigh ọdi. 30Kụ ạbumatuan phọ rọnaghan kụ ororori nyọdi osiemi Sizaria, kụ ọdi ạḍua pạ agheel Tạsos.
31Mụen kụ amem dị oomo ạbuo ạsiosi phọ ẹpe Judia rꞌaGalili rꞌaSameria ọmoogh ẹepho kụ omiigh ọmoogh ạsini rꞌaḍiphoph; kụ Uwaloor Iigbia phọ ạloghonaan ni ḍịghaagh ọlogh eegu Ọmoogh-we phọ.
APita asi rạmha ạLida rꞌạJopa
32Kụ aPita arelhe yogh oomo arikpisi phọ kụ asiom ọmiin awe ạsiosi phọ orugh bọ ẹpe Lịda. 33Ẹpe phọ ọdi ạmiin ni oniin oye dị oghol mọ Inias, dị ạḍighaagh rꞌaḍuwol emugh kụ mạrol ẹmina ọphaanya ạsia. 34Kụ aPita ạḅeni nyọdi mọ, “Inias! ẠJizos Kraist maakonom nyịna. Ḅetenu akpooghi ẹmina phọ ạna!” Egina amem bịn ọdi aḅetenu, 35kụ oomo phọ ạbuphe orugh bọ Lịda rꞌaSaron ụmiin ni nyọdi, kụ okiton omeeraam Ọmoogh-we phọ.
36Kụ ẹpe Jọpa oniin ạmatuan ạrol li dị oghol mọ ạTabita (dị rokol ghan ọnhu aGris mọ ạDokas, ẹmhu ịduon phọ pọ ọnyaghimir). Ọdi ạmoogh eeḅi eḍighinom ịyaar, anmo ghan inmo. 37Ạnir phọ ọphon ameel ẹzegh riiḍio phọ ịpe kụ amugh. Kụ owur nyọdi mụum ọmuneen osoph-ạnyu otu ẹedaneen. 38Kụ ạbumatuan phọ ọnaghan mọ aPita odi ẹpe Lịda, ẹmha dị etuman, kụ orom ịyal awe dị ọghi ọmagh nyọdi, kụ ọkpaariom mọ, “Káabinya! Nụun aru ụteeny iyoor!” 39Kụ aPita aakolobian ạdaph bịdi ạghi. Rosi kụ ọsighe nyọdi ọsiinyom ẹpe osoph-ạnyu phọ. Kụ oomo arukpukele ạnmariir phọ ọmeregha okoom nyọdi romoghi yogh, kụ oḍereghinaan nyọdi iinmenan rꞌạrusuoma phọ ạDokas ạkol ghan bọ, mem mọ kőmugh bọ. 40Kụ aPita amiteghom oomo phọ ạbidi erugh, kụ akpuḍian ạaḅereghi, kụ akiton asoman oḍim mọ ọmuneen bọ kụ ạmagh mọ, “Tạbita, ḅetenu!” Kụ ạnir phọ ạḅarion riḍien ọdi, kụ rọmiin Pita, kụ ạrol ude. 41Kụ aPita asele ḍịghaagh ọdi ạpham ạnir phọ ạmeremi, kụ aagbologh bụo ạsiosi phọ rꞌarukpukele ạnmariir phọ, kụ ạḅogh nyọdi ạngo bịdi imoom. 42Kụ eeleghaan oomo ạJopa, kụ ịbadi omeeraam Ọmoogh-we phọ. 43Kụ ịphen phọ eten bọ, aPita ạrol li ịminighan aḍughul-otu ẹpe Jọpa kꞌaSaimon phọ ọpo ọkponyon ghan bọ ruzu ịnam mọ.
Currently Selected:
Iiḍighi 9: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
