Iiḍighi 8
8
1Aḍuugh phọ ịnighe ni ologhi ạSol.
ẠSol ạgbiphoghom bụo ạsiosi phọ
Kụ emiigh kꞌaḍio phọ ạḍiphe oboom ọgbiphoghom ạrolonaan ni bụphe omeeraam bọ Jịzos ẹpe Jeruselem, kụ oomo phọ ạbidi, omuton butelhedom mọ, ọwalala yogh ẹpe areelhe phọ aJudia rꞌaSameria. 2Kụ buniin awe aruukuan ọsighe Stivin ọghi oḍi kụ omoghi nyọdi iboom.
3 #
Iiḍ 22.4, 5; 26.9-11 Kụ ạSol ạnya ophiemi ạbuphe omeeraam bọ Jịzos, kụ ạḍua ghan otu ạgba otu, ạghoghogh nmạriir rꞌalephiri ạsighe ạghi ạloghoḍi ikoli.
Ọkaaph aani ooḅi ọghaaph phọ ẹpe Sameria
4Kụ bụphe ọwalala yogh bọ orelhe yogh ghan ọghaaph ọghaaph phọ Ẹnaan. 5Kụ aFilip ạghi ẹmha aSameria kụ ạghaaph ghan ịlo aMesaya phọ. 6Kụ aḍita awe phọ ọḅophoghan ọnaghanan ịpe aFilip ạghaaph bọ, ọḅile ghan ọmiin reḍeenaan phọ dị aḍighi bọ. 7Ịkaraph aruwaloor ịlooghi ghan ni emiteghu loor ịbadi awe ẹḍuaghu, kụ ịbadi ạrukugha rꞌạbudi ạraghaagh rꞌaruwol emuughu uḍumogh ni. 8Kụ iboom iboh ẹrolonaan bụo ẹmha phọ.
9Kụ oniin ọḅaghama, dị oghol mọ aSaimon, ạrol li pạ ẹmha phọ. Ọdi ạpheremiom ghan ni we aSameria ire phọ ọdi, ạḅem ghan mọ ọno oboom oye ni. 10Kụ oomo awe ụnaghanan ghan ni nyọdi, emiigh kꞌọbam ẹteeny kꞌogbogh, kụ ọḅem ghan mọ, “Oye phọ ọphon ịikpo phọ Ẹnaan oghol bọ mọ ‘igbogh ịikpo phọ’.” 11Bịdi ụnaghanan ghan nyọdi, ịdi eḍighi bọ kꞌẹminighan amem ọdi mạpheremiom bịdi ire phọ ọdi. 12Kụ ạnmariir rꞌalephiri umeeraam ni ooḅi ọghaaph phọ ọpo aFilip ạghaaph bọ ịlo ọmar phọ kꞌẸnaan rꞌaḍien phọ ạJizos Kraist, kụ owurogh bịdi mụum. 13Kụ ọdi aSaimon rꞌaloor ọdi ameeraam aani ni, kụ rowur nyọdi mụum, kụ ạtuan ghan Filip. Kụ ọdi ạmiin bọ ịiḍaany rꞌareḍeenaan phọ roḍighi yogh bọ, ịpher ri nyọdi.
14Kụ mem dị abutelhedom mọ ọrol bọ Jeruselem ọnaghan bọ mọ ạbuo aSameria momeeraam ọghaaph phọ Ẹnaan, kụ ọlogh Pita rꞌạJon mọ ọghi. 15Kụ rosi, kụ ọoḅereghi Ẹnaan mọ bụphe momeeraam bọ ọmoogh aani Uwaloor Iigbia phọ. 16Mem mọ ọpo phọ Uwaloor Iigbia phọ kősoorom rꞌoniin ọnyo ạbidi, uwurogh bịdi mụum bịn esi aḍien phọ ạJizos Ọmoogh-we phọ. 17Kụ aPita rꞌạJon rọḅam rạghaagh rụmhu ạbidi, kụ Uwaloor Iigbia phọ asoorom aani bịdi.
18Kụ aSaimon rọmiin mọ abutelhedom mọ rọḅam ghan rạghaagh rụmhu kụ kọngo Uwaloor Iigbia phọ, kụ ạmerenyan ikpoki. 19Kụ ạḅem mọ, “Ịngo aani ịmi ịikpo phọ ịphen phọ, ọbo ọlo mị ạḅam aani rạghaagh ạmi ẹmhu ạmoogh aani Uwaloor Iigbia phọ!”
20Kụ aPita ạḅeni nyọdi mọ, “Ikpoki ạna ephiom ni nyịna, sịen dị nạ ragbiom ghan mọ nạ katue ni ạsighe ikpoki akoom inmo phọ Ẹnaan! 21Nạ rꞌayoor ụ́ḅoph oghuugh, ịdi eḍighi bọ ologhi ạna ọ́nighe esi Ẹnaan. 22Kiton ạwile ịkaraph ịitughian ikpoki phọ ịphen, kụ ạaḅereghi Ọmoogh-we phọ, mọ ẹghigh, pọ ọdi ạsar ạwilenaan nyịna. 23Mị ạmiin mọ ologhi ẹḍim kụ amuza loor ạna, kụ ịkaraph ẹphaḍi ni nyịna.”
24Kụ aSaimon ạḅeni Pita rꞌạJon mọ, “Ikol ẹmhu ạmi ẹeḅereghi Ọmoogh-we phọ, ọbo ịphen nyina ẹghaaph bọ kimitenaan ghan bọ ịmi!”
25Kụ mem dị aPita rꞌạJon mọghaaph ọghaaph Ọmoogh-we phọ ọgbaanyami, kụ oḅula Jeruselem. Rotigheel bọ, ụghaaph ni ooḅi ọghaaph phọ oleenye ịbadi ạramha eelhe phọ aSameria.
AFilip rꞌokpolom oye ọlo Ẹtiopia
26Kụ ọokpaany Ọmoogh-we phọ aru ạḅeni Filip mọ, “Ḅetenu ạghi eten ẹdala phọ ẹpe ẹḍua bọ Jeruselem rẹki Gaza!” 27Kụ ọdi aḅetenu rạki bịn azuan oophoony oye ọlo Ẹtiopia. Ọdi okpolom oye ni, dị ạpaghaghaam ẹelha aKandasi, ukueni-ạnir phọ Ẹtiopia. Ọdi ạghi Jeruselem oghueni Ẹnaan 28raḅula, kụ odi sịphe ookilemineen ạgada phọ ọdi rạbal ghan ḍịnya oyil phọ Azaya. 29Kụ Uwaloor Iigbia phọ ạḅeni Filip mọ, “Ḍuraan aḅulolom ẹpe ạgada phọ!” 30Kụ aFilip aghiil ạghi ạteeny, kụ ạnaghan dị oye phọ rạbal ghan ḍịnya oyil phọ Azaya, kụ apuru mọ, “Nạ ạnaghan ni ẹmhu ịpe nạ rạbal bọ?”
31Kụ ọdi mọ, “Mịna kạnaghan bọ ika, emuton dị ọnon oye ạgba ẹmhu phọ ụḅeni ịmi?” Kụ ọdi ạmagh Filip mọ aru ạsiiny ạrolan nyịno. 32#Azay 53.7, 8Kụ ọdi ạal ghan sịphe ạḍinya iigbia phọ, ịduon mọ,
“Ọdi ạghigh oyool-ọga dị ororori rọki ọmeegh.
Anamaghan ịdipho ọony oyool-ọga mem mọ rọsam bọ suphuugh phọ.
Ọdi ịyaar ọ́ghaaph.
33Ụgilaam ni nyọdi, akeel nyọdi ụ́waanaan.
Oye kátue ạkaaph ịlo ẹemara phọ ọdi,
ịdi eḍighi bọ mophiemi ghuḍum ọdi sịen aḅirini phọ.”
34Kụ oye phọ ạphagharanaan Filip mọ, “Ụḅeni ịmi! Ịlo ạnhian kụ ịdi oyil phọ rạkaaph bọ? Ịlo aloor ọdi ḍụghum, kụ ọnon oye ni?” 35Kụ aFilip amiighom ẹkpigh phọ ẹphen phọ, kụ ạghaaphom ooḅi ọghaaph ịlo ạJizos ạḅeni nyọdi. 36Kụ bịdi oru osi okol ạmuum, kụ oye phọ ạḅem mọ, “Mịin aani mụum sịen! Eeghe kụ kemirighan bọ nyịna owur aani ạmi?” [ 37Kụ aFilip ạḅeni nyọdi mọ, “Nạ ameeraam rꞌoomo ologhi ạna, pọ mị kawur ri nyịna.” Kụ ọdi mọ, “Mị ameeraam ni mọ ạJizos Kraist kụ Ọony phọ Ẹnaan.”]
38Kụ ọdi ạmeremi ạgada phọ, kụ ịyal phọ ạbidi, aFilip rꞌoophoony oye phọ, osoroghu pạ ạmuum mọ, kụ aFilip awur nyọdi. 39Kụ bịdi rophun, bịn Uwaloor Ọmoogh-we phọ ạgbatan Filip ạsighe, bịn oye phọ nyọdi ọ́miin mun, kụ rꞌibo kụ anyeene agheel. 40Kụ ụḅile ọmiin Filip ẹpe Azotos, kụ ọdi ạḍua ẹmha ạgba ẹmha ạghaaph ghan ooḅi ọghaaph phọ kụ agbi osi aSizaria.
Currently Selected:
Iiḍighi 8: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
