Iiḍighi 16
16
ATimoti ạdaph aani Pọl rꞌạSailas
1ẠPol ạghi ni asi Daabi rꞌạListra, kụ sịphe Lịstra, ạmiin oniin ạmatuan dị oghol mọ aTimoti. Onhiin ọdi ọlo aJu dị mameeraam aani, kụ ọde phọ ọdi ọlo aGris. 2Ạbuo ạsiosi phọ ẹpe Lịstra rꞌAikoniom ụgba ni igey ịlo aTimoti. 3Kụ ạPol ạwa ni mọ ọdi ạdaph nyịno kụ aḍun, ịdi eḍighi bọ oomo aJu phọ odi bọ rạmha phọ ịpe olegheri ni mọ ọde phọ ọdi ọlo aGris. 4Kụ ịdipho bịdi ọḍua ghan bọ ẹmha ọgba ẹmha, ụḅeni ghan ni we ạsiosi phọ iilogh phọ abutelhedom mọ rꞌikumoor awe phọ ọlogh bọ ẹpe Jeruselem, kụ ọphur rụru mọ ọmaar ooko. 5Bịdi ụkparami ghan ni omeeraam ạbuo ạsiosi phọ, kụ aḍita phọ eḍiza ghan aḍio etum ḍio.
ẠPol ạmiin uḍien ẹpe Troas
6Bịdi ukiton ni reelhe aFrijia rꞌaGaletia, ịdi eḍighi bọ Uwaloor Iigbia phọ ómeera mọ ọghaaph ọghaaph phọ ẹpe eelhe Esia. 7Bịdi osi emitenom aMaisia rọwa oḍigh eelhe aBaitinia, kụ Uwaloor phọ ạJizos ómeera. 8Esi ịduon phọ kụ bịdi okiton Maisia ọghi osi Troas. 9Ḍughul kụ ạPol ạmiin uḍien oye ọlo aMasidonia dị ạmeera rạaḅereghian ghan nyọdi mọ, “Ḅẹeny ẹphen Masidonia ụlhoghonaan iyoor ḍịghaagh!” 10Ọdi rọmiin bọ uḍien phọ, bịn yoor uzipheriom mọ Ẹnaan mịmagh iyoor ịlo ọghi ọghaaph ooḅi ọghaaph ọḅeni ạbidi, kụ ọghi ọwa oghuugh dị kụsaany iyoor asiemi Masidonia.
Ịdi okiton oniin ạnir dị oghol mọ ạLidia ẹpe Filipai
11Kụ yoor oḍigh oghuugh ẹpe Troas ọḅeeny osoor Samotres. Rẹḅaal kụ yoor osul Nịapolis, 12kụ ọḍua osi Filipai, ẹkpana ẹmha aMasidonia, eḍighi kẹn marugh awe ẹgham aRom. Kụ yoor ọrol sịen phọ ịminighan aḍughul-otu. 13Rẹteeny ḍio ophooghian phọ, kụ yoor ọḍua ẹmha phọ ọghi oogbom ọphiiny esi dị yoor ogbiom mọ esi ịiḅereghi. Kụ yoor ọrologhu ude ọghaaph ọghaaph phọ ọḅeni nmạriir dị ookpomoghan. 14Kụ oniin ạnir dị oghol mọ ạLidia, ọlo aTiatira, dị rabologhi ghan roodor, ạnaghan aani. Ọdi aghueni ghan ni Ẹnaan, kụ Ọmoogh-we phọ aghughuron ologhi ọdi ozuumaam ọnaghan ịpe ạPol ạghaaph bọ. 15Kụ owur nyọdi rꞌọto ọdi mụum, kụ ọdi ụḅeni iyoor mọ, “Nyina ẹeḅeghion ephogh mọ mị ameeraam ni Ọmoogh-we phọ, pọ iseseeny, itu eḍigh kꞌạmi ẹrol!” Kụ ạkpaariom ni tụtu yoor ọghi.
Ọlogh bịdi ikoli ẹpe Filipai
16Eniin aḍio yoor oten rọki esi ịiḅereghi phọ, kụ oniin ẹbene-ọnyani dị eru eghola uzuan iyoor. Ọdi ạmiin ghan ịmiin kụ agboomi iboom bụrude-otu ọdi. 17Kụ ọphon phọ ạdaph ghan Pọl rꞌayoor ạlooghi ghan mọ, “Awe phọ ạbuen phọ, ạrebene Egbogh Ẹnaan phọ, dị riḍeenaan inyina reten ọmoogh ạpeleeny.” 18Aḍighi ghan ni ịduon ịminighan aḍughul-otu, kụ ẹeḅaghami Pọl tụtu akiton asoman ạḅeni eru phọ mọ, “Mị ạsighe ḍien phọ ạJizos Kraist rạḅeniom nyịna mọ mite loor ọnyani phọ ạḍua!” Egina amem bịn emite.
19Ạburude-otu phọ ọdi ọmiin bọ mọ oḍuom ologhi ạsuo ikpoki phọ ólho mun, usiph ni Pọl rꞌạSailas ọghogh osoorom egbogh erugh ọngo bụo ạrumhu phọ. 20Kụ mem dị ọsighe bọ bịdi osiemi risigh abuugboom ịiruen phọ ụḅem mọ, “Awe phọ ạbuen phọ ạbuo aJu dị oru rọgbaragbarami ẹmha phọ ayoor. 21Rọtughemi ghan eḍighinom ạraraar dị iyoor ị́kpianaan. Yoor ạbuo aRom kótue ọdaph.” 22Kụ aḍita awe phọ oḍighan aani oruphiom bịdi.
Kụ abuugboom ịiruen phọ ọkporion rụsuoma Pọl rꞌạSailas ọphanyi, kụ ọto mọ ọguroghom bịdi ịkpara. 23Rọkuami rọgurogh bịdi, kụ onyuughi ọloghoḍi otu ikoli, ọto ọngo okoriom mọ mọ ạmaar ạkasaghiom bịdi. 24Rọnaghan bọ ịtooghi phọ ịphen, kụ ạsighe bịdi ạlogh ẹpe osoph ologhi otu ikoli phọ kụ ạloghoḍi bịdi olool.
25Kụ ogbo aḍughul phọ ạPol rꞌạSailas ọoḅereghi rọmoor sụor kọngo Ẹnaan, kụ ạbueri ạbuo ikoli phọ ọnaghanan ghan. 26Ekperenom bịn ade phọ edegh, tụtu otu ikoli phọ aphiigha kꞌephighiom mọ, arughuugh phọ eghunyonu, iḍigh oomo awe phọ erunyian. 27Kụ okoriom mọ asuma ạmiin dị arughuugh phọ meghunyonu, kụ agbiom ghan mọ ạbuo ikoli phọ mosumughu, kụ aruph elhool ẹgham ịlo oghiigha aloor. 28Kụ ạPol ạlho ạghiom ạnyu mọ, “Kákiigha loor ạna! Oomo phọ ayoor omunughan ni sịen.”
29Kụ okoriom mọ ạḅem mọ ọsighe ịtozi oru, atiraan aḍigh rapiigha rꞌeepuph, kụ akpuḍian risigh ạPol rꞌạSailas, 30ạsighe bịdi amitiom kụ apuru mọ, “We phọ, mịna kaḍighi ika kụ ạmoogh pẹleeny?”
31Kụ bịdi mọ, “Meeraam Jịzos Ọmoogh-we phọ, bịn nạ rꞌọto ạna kọmoogh ni pẹleeny.” 32Kụ bịdi ọghaaph ọghaaph Ọmoogh-we phọ ọḅeni nyọdi, rꞌoomo ạbudi ọrol kꞌọdi. 33Ẹega ẹega ḍughul phọ, kụ okoriom mọ aḍighi mụum riisi phọ ọgurogh bọ bịdi, kụ bịdi úpiemi mem owur ọdi rꞌoomo ọto kꞌọdi mụum. 34Kụ ạsighe bịdi asiom otu ạḅamanaan eḍien, kụ ạmoogh iboom iboh, rꞌoomo phọ kꞌọdi, mọ ạbuno momeeraam Ẹnaan.
35Rẹḅaal kụ abuugboom ịiruen phọ orom we mọ ọghi omiteghom bịdi.
36Kụ okoriom mọ ạghaaph ạḅeni Pọl mọ, “Abuugboom ịiruen phọ ọḅem mọ kịwile inyina egheel. Nyịidipho itu emiteghu egheel rꞌedughom!”
37Kụ ạPol ạḅeni we phọ orelhe bọ dom mọ mọ, “Mụgurogh iyoor esi ogbo, ọloghoḍi ikoli, dị yoor oru ni bụo aRom, kụ bịdi rọwa ghan ịlo omian omitiom ayoor? Ugbi ni, bịdi oru rꞌaloor kụ umiteghom iyoor!”
38Kụ ạbuo adom mọ oḅula ọghaaph ịphen phọ ọḅeni buugboom ịiruen phọ. Ọnaghan bọ mọ ạPol rꞌạSailas ạbuo aRom ni, kụ eḍigh ruugu esi ạbidi, 39kụ oru ọoḅereghian. Ororori bịdi omitiom otu ikoli phọ, kụ ọḅeni mọ bịdi ọḍua sịphe ẹmha phọ. 40Romiteghu bọ kụ oḍigh kꞌạLidia, kụ rọmiin bụo ạsiosi phọ rọodereghi, kụ ọḍua.
Currently Selected:
Iiḍighi 16: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
