ZƐKARIA 9
9
AGWANGWAMA Jɛmɛ Ụshɛrɛya we Edenji
1N-ndumwa ma AGWANGWAMA ma sukakana cɛnjɛ tu Hadrak, tijama ta muba kaa du tu patanɛ ụshɛpwụ Damaskos. Iwɛnɛ po eshe atwa keeni alamụ Isrɛl hwɛɛ ngbaracɛ geri ba AGWANGWAMA.#9:1 eshe atwa keeni alamụ Isrɛl ngbaracɛ geri ba AGWANGWAMA: Kwo kaa rishe kwo kaa eshe AGWANGWAMA ngbaracɛ atwa kpaaŋ keeni alamụ Isrɛl. Tɛjɛshɛrɛga tu ko ti hiɛŋ, ashɛpwụ Aram a shɛ a na AGWANGWAMA. N-ndumwa mu ga mu zasa kpataa na buwala ga o 2Tu Hamat ata namɛ apata du, tu Taya keeni Saidụn, ti iyi elele nɛ aa shɛ egwoni ni bɛ. 3Atwa Taya meme meni uba ukpahiŋ, ee suteni azhɛnarɛya gana upwupwutu, azụrụfa balanɛ aŋ gana tiri ti ihwɛŋnɛ ya amɛ ụshɛpwụ. 4Ama AGWANGWAMA zhɛ a lashaga i'wɛŋni'wɛŋni ibwɛ hwɛɛ. Bɛɛ zhɛ bo kwubishigo du uduciya ubwa ni itekwu, ulwa kaa zhɛ wo hwoŋzhingo ụshɛpwụ ata kwunduu. 5Atwa na namɛ nụ ụshɛpwụ ata ɛɛ hiɛŋ Ashkɛlon zhɛ a kwụba iŋ, inyɛsɛ kaa zhɛ ya sha aŋ. Atwa Gaza du zhɛ a kwụba iŋ, ɛɛ zhɛ no hwuŋpilongwu na cɛnjɛ iwɛ ụngwụ na aa hwuga, gobwonu du atwa Ekron, iwɛnɛ ta ashɛlatụ hwuwonowoŋ aŋ. Gaza zhɛ wa vwunga agwuma aba, i zasa kaa bụtụ zhɛ ba nama ya na Ashkɛlon.#Ayiz 14:29-31; Jɛrɛ 47:1-7; Izik 25:15-17; Joɛl 3:4-8; Emos 1:6-8; Zɛfa 2:4-7 6Atwa na zasa ụlamụ, zhɛ a nama na Ashdod, ibɛ AGWANGWAMA hiɛŋ, N zhɛ mo iricingo tubusa ta atwa Filistia hwɛɛ. 7N zhɛ ma bacɛnga aŋ nu usunda mehieŋ tiya, ti iyimɛyɛ nɛ ee ge jirimi tiya. Tumwata ta atwa kpaaŋ ti zhɛ ta sha atwa mi, ɛ zhɛ a sha gana udenji uko nu Juda. Ekron zhɛ wa sha gana atwa Jɛbus. 8N zhɛ ma 'yaka umwono mu, N zha shɛ mo lono maa ejeshi elele na nda atwa mi tuhwulo, i zasa kaa bụtụ ba abwagara be elele zhɛ na kashɛka uŋ o. N kwụbwa gana na aa pana atwa mi ụbaụta.
Tizhajɛ ta Agwuma Zayon
9Ahiɛba atwa Zayon, bwada ma unyasa ụ'wụtụ!
Ahiɛba atwa Jɛrusalɛm, ugana ma n'ungwa me ewili,
Kwụba ma agwuma hiŋ ta e ci pi hiŋ!
Be ci na tufwuga keeni tụlasụ,
ama bu meme zucinje baa jɛjɛ na aba
izhinyɛci, na aba biywoywo bi
izhinyɛci nɛ izhinyɛci meci.#Mat 21:5; Jon 12:15
10AGWANGWAMA hiɛŋ,
N zhɛ ma bacɛnga ihɛŋtu ujasa ni Ifrem,
ti idɛkwɛ ujasa nu Jɛrusalɛm,
ɛ zhɛ a kwusataga itɛ ya aba ujasa,
Agwuma ata zhɛ a kalanɛ edenji amɛ-olom,
bi zhɛ ba ya tugwama tu bwa te kwune no olugwo na itekwu kwune uuwa i ci ofwo na itekwu kwunanjɛ,
te kwune no olugwo ata Urefu kwune uuwa i ci
ukwunanga cɛnjɛ tu unyizo.#Shɛzu 72:8
Tugwuricinje ta Atwa Agwatana
11AGWANGWAMA hiɛŋ, Yaa shɛ inɛɛ bụ, N zhɛ mɛ jwɛ
atwa bụ na tijama tu u'ibwa ata zasa meni,
iwɛ unu na Ngaa twa la na bụ, tedure ne mehieŋ mụ ụrụpɛ.#Ụban 24:8
12Gwulo ma nu uba hiŋ, ahiɛba ajama ti'ima a na 'yajɛ ashɛlatụ.
Hwuwayɛ go ibɛ Ngaa jɛmɛ kpataa maa,
N zhɛ me hi gwuricingeni uwebiye kpalụ yebi,
iwɛ ụbaụta ata ahiɛ njɛ la.
13N zhɛ ma nda uhwara na atwa Juda gana uta bijeshi,
ma nda uhwara na atwa Isrɛl gana a'inla ubwa.
N zhɛ mo vwurongo miaụŋ-me-eyi mu Zayon gana utokwobi,
ma jasa miaụŋ me Egrik.
14AGWANGWAMA zhɛ a bananɛ atwa ubwa,
bɛɛ zhɛ ba kala a'inla ubwa gana ɛbɛrɛ.
AGWANGWAMA Mokondo na Hwuri Kpaaŋ zhɛ o hwulupono ukakacɛ,
bɛɛ zhɛ bo rungo gana ujipo na banɛ tuta.
15AGWANGWAMA na Huri Kpaaŋ zhɛ a jilanɛ atwa ubwa,
ibɛ po ɛɛ zhɛ e iricingo atwa i'ime ya aba kpaaŋ.
Ɛ zhɛ a lasụ aŋ na atayɛ ikwele,#9:15 ɛ zhɛ a lasụ aŋ na atayɛ ikwele: Tɛjɛshɛrɛga tu ko ti hiɛŋ, ɛ zhɛ a lasụ ekeri atayɛ nkwolo. N-ndumwa mu ga mu zasa kpataa na buwala ga o.
ɛɛ zhɛ na ugaga gana atwa na swe mayaga.
Ɛ zhɛ o shino ofwo gana mehieŋ mu na mi shini nu ugbamgbam na ee
dudugeni nu utukwu-ụrụpɛ.
16AGWANGWAMA na shɛ Agwatana aba zhɛ o bicingo aŋ jita ata,
gana iyimabiga nɛ shɛ atwa ubwa.
Nazhɛ ɛɛ zhɛ na ta na cɛnjɛ tu bwa
gana udara na aa njɛ tisemberi ni ikwɛmbɛ.
17Hioko ma gana na yɛɛ zhɛ ya zhɛma keeni
yɛɛ zhɛ ya pilanụ na cɛnjɛ tu ga!
Iyi izɛgwu cɛnjɛ tu ga zhɛ ya nda maa miaụŋ mi
tisemberi mu waŋnɛ,
meni mụ tụ'walụ ta afwafwa ma tuba mi zhɛ ma nda maa showo shɛ waŋnɛ.
Currently Selected:
ZƐKARIA 9: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008
