ZƐKARIA 11

Iwɛ Bi'iywa bu Tukata

1Oo gabụ Lɛbanon, kapashanga shidubo shɛ bụ

iwɛ maa ulwa tweni i'wɛ'wɛ bu yo osobu!#11:1 i'wɛ'wɛ bu yo osobu: A duma n-ndumwa mi i'wɛ'wɛ yo osobu epe, maa i shɛ ụsụbwa we edenji kwo kaa shɛgwuma sha ata shi 'yajɛ ukpahiŋ.

2Zwono ma nu u'wo gboo, hi no jirongono ahiɛba i'wɛ'wɛ yo orokwo,

iwɛnɛ tụ ụ'wụ'wụ hiŋ usobu loyogwogwo,

i'wɛ'wɛ ɛtɛ hiŋ ụjɛrụma kaa zasaba ya o.

Twa ma u'wo ahiɛba i'wɛ'wɛ ye ekpekpeshi nɛ namɛ nu Bashan,

iwɛnɛ to o dwowo uwapa hiŋ na inshi.

3Shɛlaga ma u'wo na a'iywa hiŋ a twa,

shɛlaga ma tungwulo tu na esemberi izeci o ngwulo,

iwɛnɛ ta a njɛ ụshɛka Jodan ufwu.

A'iywa-agwụdụ Eyebi

4AGWANGWAMA na shɛ Agwatana mi hiɛŋ, ga ma sha bi'iywa bu unyama wa agwụdụ na ɛɛ zhɛ a shɛla. 5Atwa na so aŋ shɛrɛ aŋ, ee hwuri uzawa ulwapɛ we elele, ee senji usunda wa aba, ɛɛ hiɛŋ, Shɛtana ma AGWANGWAMA, tɛ shɛ ya azhɛgba. Kwụba, okwo bi'iywa ba aba bi ikɛnyi aba kwụbɛ shɛ inyɛmɛnyɛmɛ ya aba o.

6Iwɛbɛ po AGWANGWAMA hiɛŋ, N zha shɛ ma kwụba ya inyɛmɛnyɛmɛ ya atwa na namɛ na cɛnjɛ tu ga o. Kwụba N zhɛ mo zwono atwa elele ni i'ɛlɛ ya a'yagajɛ keeni shɛgwuma sha aba, nazhɛ ɛɛ zhɛ a pana atwa ụbaụta. N zha shɛ kaa mo bicingo aŋ ni i'ɛlɛ ya aba o.

7Ibɛ po Ngaa shɛ ya bi'iywa-ba-agwụdụ ata ɛɛ zhɛ a shɛla, iwɛ atwa ata na a sa a sanganana. Ibɛ po Ngee suji shekwute shi yebi, Ngoo po bu ko izeci, tu go Tulubo, Ngoo po bu na bi yebi izeci, tu go Unu-tutwa. Ibɛ po Ngaa ngbaracɛ ya agwụdụ ata. 8Na amɛ upiana uko gba, Ngaa njɛ a'iywa ata atatụ ufwu. Ama N zasa isɛbwɛ-ti'ima na aba o, aba du kaa n to ni i'ime. 9Ibɛ po Ngɛɛ hiɛŋ unyama ata, N zha shɛ ma sha ya bi'iywa hiŋ o. A na elele na shɛ o 'wo, ge e 'wi, a na elele na kaa shɛ a nda ufwu, ga a njɛ ufwu, ama ga a na ata vwɛ, mama ndanụ ufwu. 10Ngee shepi bukwuto mi go Tulubo Ngoo dwonu, maa go unu na Ngaa twa la na atwa kpaaŋ bwaratagwwụ. 11Ibɛ po unu ata tutwa bwaratagwwụ ga jita ata, gana na tu unyama wa agwụdụ ata, medenji atwa ata a pana aŋ ụbaụta, m ngbaracɛ, e mepi maa n-ndumwa ma ata mɛ shɛ mu na ma AGWANGWAMA. 12Ibɛ po Ngɛɛ hiɛŋ aŋ, Yaa shɛ yee hi teneni cɛŋ, asha n cɛpɛ ma utashɛ mu, ama yaa shɛ yee hi teneni shi kaa cɛŋ, asha untangana uŋ ma. Nazhɛ aa n cɛpɛ utashɛ mu, waa shɛ azụrụfa talacɛ.#Mat 26:15 #Mat 27:9,10

13Nazhɛ AGWANGWAMA hiɛŋ, 'Wanga bumo-bu-nkwasha ukwuribi ata, utashɛ na teni cɛŋ maa a cɛpɛ iwe mi ta. Ngee suji ga azụrụfa ata talacɛ Ngaa 'wanjɛ bumo-bu-nkwasha.#11:13 bumo-bu-nkwasha: Ama tɛjɛshɛrɛga tu ko ti hiɛŋ, umwono uduciya wa AGWANGWAMA. 14Nazhɛ Ngaa kwụshɛ bukwuto mi bi yebi, bu na ata ɛɛ hiɛŋ, go Unu-tutwa, ibɛ po tutogwu ta atwa Isrɛl na atwa Juda tu bwadụ, a shɛ shɛ ya miaụŋ-mo-bino bu ko.

15Nazhɛ AGWANGWAMA n hiɛŋ, Shaanana bi'iywa-ba-agwụdụ a na teni shi ya cɛŋ na aka ga. 16Iwɛnɛ po N zhɛ mɛ ishicinjɛ bi'iywa-ba-agwụdụ bu ko, na iwɛ agwụdụ na a nda ufwu zha shɛ ya ta, na kaa zha shɛ ba dwalakaka anaa na 'inɛ,#11:16 anaa na 'inɛ: Kwo kaa anaa na o rungo gbom. Tɛjɛshɛrɛga ti nya ti hiɛŋ, anaa na ta waŋnɛ. na kaa zha shɛ ba nɛnga anaa na eri-ụngwụ, bi zha shɛ kaa du ba biga anaa na 'yajɛ ulapiya o, ama tiya kiri bɛɛ zhɛ na ya usunda wa aba, bɛɛ zhɛ kaa na dwatwaga to ogwogwozwo aba. 17Bi'iywa-ba-agwụdụ be elele na te shi eshe, na kaa genji unyama wa agwụdụ, bi zhɛ ba nda hwuŋ adangboo! Go utokwobi po bu nu ụragbamụ keeni rishe ru bwa ru u'ala ubiye! Ga ụragbamụ ubwa hweteni hwɛɛ, ge rishe ru bwa ru u'ala ubiye ri lubeni kpirimi!

Currently Selected:

ZƐKARIA 11: RBT

Highlight

Copy