MAK 16

Tihiɛ ti Jisus

(Mat 28:1-8; Luk 24:1-12; Jon 20:1-10)

1Aka na tụ Ụjita-ụhinjanụ keshici, ge Meri biyikwo ata bu Magdala, ne Meri bino ba ata Josɛs na Salome, sɛ iyi ifwugwo nɛ 'yagajɛ ụhiụŋ ubiye maa a sụkwụtwa ru'wo ri Jisus. 2Ee zhe nu u'uye nu uvwungwa dididi jita bu ulade, na aka na tu uwaŋna wa banɛ. 3Oo momo hoŋtongonu tɛ ɛ tɛ zhɛ, ɛɛ hiɛŋ, Gaaba zhɛ mo tu ushigono hwayɛ utayɛ nu u'uyee? Iwɛnɛ po uhwuri ugombo. 4Aka na te e shepi eshe, aa kwụbɛ tobwolo u ushigwowo. 5Aka na te e teni nu u'uye, aa kwụbɛ tu usemberi uko jɛjɛ geri bu u'ala ubiye, bee urigeni utogwo ụcɛnjɛ, ibɛ po igɛhi 'imɛ aŋ.

6Ibɛ po usemberi ata hiɛŋ aŋ, Kede igɛhi ihiɛ 'imɛ o. M mepi maa hia jalakaka Jisus bụtụ ata bu Nazarɛt, ee tegeni nrɛ nụ ụ'wụ'wụ-ubatanɛ. Bi hiwa, bu zasaba ya epe o. Kwụba ma ofwo na ee ge wecicinji bu.#Shɛzu 16:10 7Ama zhaga mbiso ma eseshi-iyi ubwa ti ga Pita, maa bi zhɛ mo hi hwulono bo to Galili. Apata ɛhi zhɛ hia kwụba bụ, gana na ti bee hi mbiswo la.#Mat 26:32; Mak 14:28

8Aa bananjɛ nu u'uye, ee gezhiji, aa zhɛgɛda, iwɛnɛ ti yaa dama aŋ. Ama e mbishi shi kaa bụtụ be elele o, inyɛsɛ kaa shɛ aŋ.

Ge Meri Biyikwo ata bu Magdala Kwụbɛ Jisus

(Mat 28:9,10; Jon 20:11-18)

9[Aka na ti ge Jisus hiɛ jita ata bu ulade nu uvwungwa dididi, bee meme mbiseni Meri biyikwo ata bu Magdala hiiŋ, ubwa la bee becinji atumwa-ibiri ecenje na amɛ ubwa.#16:9 Umeseyi tɛjɛshɛrɛga tu ko tụ ngwụshɛ tu zasa shɛwala shi ga o 9-20. Atwa oko kaa 'nyeci shu nyapadụ, kwo kaa nu ukwunanga uhiuhiu ga umɛwɛɛ. 10Ge Meri zhe bee mbishi atwa vwɛ a na ga namɛ la ne Jisus, ta a nda ụcɛnjɛ, aa twagana-u'wo. 11Aka na ti ge Meri mbishi atwa ata maa ge Jisus hiɛ, a tɛtanɛ shɛ n-ndumwa mu bwa rishe o.

Eseshi-iyi eyebi Kwụbɛ Jisus

(Luk 24:13-35)

12Na aba inɛ ɛtɛ ge Jisus meme mbiseni eseshi-iyi ubwa eyebi na masha mi nya, tɛ ɛ zhɛ ne ehilo. 13Nazhɛ atwa ata gwure ee mbishi atwa vwɛ aba, atwa vwɛ tɛtanɛ shɛ waa n-ndumwa ma aba rishe o.

Eseshi-iyi Umpwa-nu-boo-ko Kwụbɛ Jisus

(Mat 28:16-20; Luk 24:36-49; Jon 20:19-23; Ugo 1:6-8)

14Na aba inɛ ɛtɛ, ge Jisus meme mbiseni eseshi-iyi ubwa umpwa-nu-boo-ko ta a gɛgajɛ aa ya iyi. Bee tezhegeni aŋ iwɛnɛ ta a tɛtanɛ shɛ n-ndumwa ma atwa na kwụbɛ bụ ti bɛɛ hiɛ rishe. 15Nazhɛ ge Jisus hiɛŋ aŋ, Zhaga ma nu unyizo kpaaŋ, maa hi enengeni atwa elele na Agwatana karɛ Anabarɛ Ebiye.#Ugo 1:8 16Bụtụ be elele na tɛtanɛ-rishe, aa njɛ bụ ubaptizim, bi zhɛ bo bino. Ama bụtụ na tɛtanɛ shɛ rishe, n-ndumwa mi zhɛ ma wụma bụ. 17Eseyida na zhɛ a 'wa atwa na tɛtanɛ-rishe na: ɛ zhɛ na bacɛnga atumwa-ibiri, ɛɛ zhɛ na duma rɛjɛmɛ ru ufwo ni izeci mi; 18ɛ zhɛ o sugo ahwa ni i'ɛlɛ ya aba; okwo ee swe iyi nɛ ya kwụna bụtụ, i zha shɛ ya nda aŋ iyi elele o, ɛ zhɛ a patangana i'ɛlɛ ya aba no ohiuhiu agwumashɛ, ɛɛ zhɛ a zhɛmanana.

Ge Jisus Munji na Azuba

(Luk 24:50-53; Ugo 1:1-11)

19Aka na ta Agwangwama Jisus hwuweni aŋ iwɛ timbiso, ee shepi bu na azuba, baa jɛjɛ nu u'ala ubiye wa Agwatana.#Ugo 1:9-11 20Nazhɛ eseshi-iyi Jisus beni ee enenji no ofwo elele, Agwangwama kaa ba nda ugondu ata na aba, baa pana iwɛ ɛtɛ ikɛnyi tedure na arụhwajɛ na 'wa uŋ.]

Currently Selected:

MAK 16: RBT

Highlight

Copy