MATIU 4

Ge Setan Menji Jisus ni Ishɛmɛ

(Mak 1:12,13; Luk 4:1-13)

1Nazhɛ Mpiala mi zeriji Jisus, ee teni nụ ụshɛka iwɛ maa Ibiri menji bu.#Ehib 2:2-18; 4:15 2Na aba na ti ge Jisus njɛ ezumi#4:2 ge Jisus njɛ ezumi: Ezumi ga shɛshɛ Rubassa o, i shɛ Rugwonyi, unu-tukapa kaa i shɛ Rugara. Ama Rubassa rɛ shɛ tunama uzawa iyimɛyɛ tiya, na aka na ti iwɛ gwumanɛ bụtụ keeni aka na bụtụ meme gengeni Agwatana ni iyi tɛnda gana adua. iwɛŋnɛ buhanda ni ijitɛ buhanda, imunɛ kaa gwụmɛ bụ ya.#Ụban 34:28; 1 Shɛgwu 19:5-8

3Nazhɛ bimenji ata zhajɛ pi Jisus, bɛɛ hiɛŋ bụ, Yaa shɛ abɛ shɛ Yɛu ya Agwatana gom, asha hiɛŋ atayɛ ga tileni epe maa a jɛshɛrɛjɛ ibrɛd.

4Ge Jisus jishijɛ bụ, bɛɛ hiɛŋ, I 'nyeci, yɛɛ hiɛŋ, Shɛ ni ibrɛd kiri butugwumwa ba ya uraiŋ o, semi nu n-ndumwa me elele mu na mu banɛ nu unu wa Agwatana.#Undwa 8:3

5Nazhɛ Ibiri shepi Jisus nu u'una ata tijilo, bee shikicinji bu taa ni ikerikeje umwono wa Agwatana, #Nehi 11:1; Dan 9:24; N-ndu 21:10 6Bɛɛ hiɛŋ bụ, Yaa shɛ abɛ shɛ Yɛu ya Agwatana gom, asha meme gengenji maa ngbi, iwɛnɛ te e 'nyeci, ɛɛ hiɛŋ,

Ubwa zhɛ ba pana atumwa ubwa azuba unu iwɛ bụ,

iwɛ maa o bu so ni i'ɛlɛ ya aba,

iwɛ maa kede po uvwɛvwɛjɛ bụ nu utayɛ o.#Shɛzu 91:11,12

7Ge Jisus hiɛŋ bụ, E 'nyeci du kaa, ɛɛ hiɛŋ, Bɛ shɛ shɛ ba manga Agwangwama na shɛ Agwatana bu o.#Undwa 6:16

8Nazhɛ Ibiri shepeneni Jisus ni ishɛmɛ ike tilegbe legbe, bee mbiseni bu cɛnjɛ-ta-tugwama tu unyizo ga kpaaŋ, tu ụjɛrụma u tuba, 9bɛɛ hiɛŋ bụ, Yaa shɛ ebi ge me kwuzeni, abu n zhɛbɛ, N ngɛ zhɛ ma bụ pana ijɛ kpaaŋ.

10Ge Jisus hiɛŋ bụ, E-Setan, hwulo beye! E 'nyeci, ɛɛ hiɛŋ, Gabụ bɛ shɛ ba zhɛba Agwangwama na shɛ Agwatana bụ, ubwa kiri abɛ shɛ ba ndana iyi.#Undwa 6:13 11Aka na ti Ibiri genji Jisus, nazhɛ atumwa Agwatana azuba zhajɛ aa ndanɛ bụ iyi.

Ge Jisus Kwuni Ugondu Ubwa Tɛnda nu Galili

(Mak 1:14,15; Luk 4:14,15)

12Aka na ge Jisus hwụjɛ maa e kepi Jon nu umwono-tishi, bɛɛ ishijɛ, bee gwuri nu Galili.#Mat 14:3; Mak 6:17; Luk 3:19,20 13Ti ge Jisus genji Nazarɛt, bee zhe baa jɛjɛ nu Kapanaum ata namɛ nu ụpalanụ itekwu ɛtɛ namɛ na cɛnjɛ tu Zɛbulon keeni Naftali.#Mak 1:21; Luk 4:23; Jon 2:12 14Inɛ gɛ teni iwɛ maa gɛ iwɛ ɛtɛ ga Ayizaya bigesere ata dumwa la sɛ, inɛ hiɛŋ.

15Cɛnjɛ tu Zɛbulon na cɛnjɛ tu Naftali,

tu na tu namɛ geri bi itekwu, hileniye Urefu Jodan.

Nu Galili ata shɛ cɛnjɛ ta atwa na shɛ shɛ Eju.#Ayiz 9:1,2 16Atwa na jɛjɛ la ne tishi,

a kwụbwa uhioko-uhwaŋna ụ'wụtụ,

uhioko-uhwaŋna kaa bonono atwa na

jɛjɛ la na cɛnjɛ to tu'wo.

17Te kwuni na aka ata, ge Jisus kwuni i'enenji, bɛɛ hiɛŋ, Jɛshɛrɛga ma shihaŋsa, Cɛnjɛ-ta-tugwama ta azuba tu gwumwonu.#Mat 3:2

Ge Jisus Suyanɛ Ekwuzhi eneshi

(Mak 1:16-20; Luk 5:1-11)

18Ti ge Jisus ba zha tahaŋnụ nụ ụpalanụ Itekwu ɛtɛ Galili, baa kwụbɛ miaụŋ-mo-bino mu ko mi yebi. Aba shɛ ga Saimon na du ɛɛ hiɛŋ ga Pita, na Andru yɛu-bino bwa, ta a 'waŋ igwune ya aba ni itekwu ɛtɛ, iwɛnɛ ta a shɛ ekwuzhi 19Ge Jisus hiɛŋ aŋ, Hwure ma hi n 'wa, N zhɛ ma hi nda ekwuzhi atwa ti'ima. 20Ee genji ga n-ngwuno ma aba gunu ata aa 'wa bụ. 21Aka na ti ge Jisus beni apata, baa kwụbananɛ miaụŋ-me-eyi ma binya bụtụ bu ko mi yebi, ge Jemis ni yɛu-bino bwa ga Jon, a na shɛ miaụŋ mi Zɛbɛdi. A namɛ nụ ụhaŋtụ, ne bishi ba aba, aa nangangana n-ngwuno ma aba. Ge Jisus suyanɛ aŋ.#Jon 1:35-42 22Nazhɛ ee genji ụhaŋtụ, te bishi ba aba, aa 'wa bụ.

Ge Jisus Mbisegeni, Bee Enenji, Baa Nɛnjɛ Atwamwa

(Luk 6:17-19)

23Ti ge Jisus bo rungo ofwo elele na cɛnjɛ tu Galili. Boo mbisogono atwa iyi no shimwono shɛ tụ'ulwatagwụ sha aba, baa ananga du kaa Anabarɛ Ebiye Cɛnjɛ-ta-tugwama, baa nɛnga du atwa elele, ni igwumɛgwumɛ ya aba.#Mat 9:35; Mak 1:39 24Ibɛ po urishi ubwa mburusonu, wee zhe tutu cɛnjɛ ti Siria kpaaŋ, iwɛbɛ po ee sugeni bu atwa na ụngwụ gɛnɛgɛnɛ wa pana ụbaụta, ta atwa na a laya tigbici, ta atwa na a sụma-ụmpɛ, ta atwa na tu'waba ta aba tu 'wegeni, baa nɛnjɛ aŋ hwɛɛ aba. 25Atwa ofwugwo ụ'wụtụ bananjɛ nu Galili, ti Dikapolis,#4:25 Dikapolis: Ashɛpwụ aba umpwa oo togotogwu aa suyana ya Dikapolis. A namɛ geri bu uwanna-banụ bu Samaria keeni Galili, aba shɛ atwa na 'wa masha mu na Egrik a nda iyi. tu Jɛrusalɛm, tu Judia keeni hileniye Urefu Jodan, aa 'wa bụ.

Currently Selected:

MATIU 4: RBT

Highlight

Copy