LUK 18

N-ndumwa Tumanganjɛ iwɛ Bululo, na Bɛjɛmɛ-bụ-ụshɛrɛya

1Ge Jisus manganganɛ eseshi-iyi ubwa n-ndumwa mu ga maa e mepi gana na yaa shanɛ aŋ tilɛɛ maa a na nda adua ɛgbɛɛ zawa ulukwu. 2Bɛɛ hiɛŋ, Bɛjɛmɛ-bụ-ụshɛrɛya bu ko namba nụ ụshɛpwụ uko, na njɛ shɛ inyɛsɛ ya Agwatana, na mụnɛ shɛ kaa du bụtụ be elele ụjɛrụma. 3Bululo bu ko du kaa namba nụ ụshɛpwụ ata. Ba shana ba zhagana bụ ɛgbɛɛ, baa lụpa bụ, bɛɛ hiɛŋ, M peni n-ndumwa-zhɛ na bụtụ na ma n sukakana.

4Ama bɛjɛmɛ-bụ-ụshɛrɛya ata lacɛ, na aba ibɛ ya ti yaa namɛ fwalaa, nazhɛ bɛɛ mɛmɛ hiɛŋ, Okwo tu Ngaa njɛ shɛ inyɛsɛ ya Agwatana, Ngee peni shi kaa bụtụ be elele ụjɛrụma, 5ama N zhɛ ma pana bululo ga n-ndumwa-zhɛ, iwɛnɛ ti bɛɛ zhɛ ma n dwa ụcɛbɛ na tizhagajɛ tu ga baa zhagajɛ ɛgbɛ ɛgbɛ.

6Ibɛ po Agwangwama hiɛŋ, Hiɛ hwụjɛ kaa iwɛnɛ bɛjɛmɛ-bụ-ụshɛrɛya ga bo orugwusu jɛmɛ? 7Asha Agwatana zha shɛ a pana suu atwa na bee teri, a na a suyana bụ tu ụjita tu uwaŋna n-ndumwa-zhɛ, tu baa shɛlaga iwɛ ya aba ni isɛbwɛ-ti'ima? #Mat 24:22; Rom 8:33; Kolo 3:12; 2 Timo 2:10; N-ndu 6:10 8Mo hi mbiso maa, bi zhɛ ba pana aŋ n-ndumwa-zhɛ kakayɛ. Ama aka na ti Yɛu Bụtụ zhɛ be gwure, bi tɛ zhɛ bo jitono rishe-tɛtɛtana nu unyizo ga kaa?

N-ndumwa Tumanganjɛ iwɛ Bufarisi ne Bile-bụ-ụdalụ

9Ge Jisus manganganɛ atwa oko a na mama tɛtanɛ-rishe maa aba shɛ atwa tiririri, a na ngbaracɛ atwa vwɛ cwɛŋ n-ndumwa mu ga, bɛɛ hiɛŋ, 10Atwa oko eyebi munji nu Umwono wa Agwatana maa a njɛ adua, bụtụ bu ko shɛ Bufarisi, bụtụ bi yebi shɛ bile-bụ-ụdalụ.

11Bufarisi ata shikeni baa mama ndanɛ adua,#18:11 baa mama ndanɛ adua: Kwo kaa baa njɛ adua iwɛ ikɛnyi ibwɛ. bɛɛ hiɛŋ, Agwatana, N njɛ ugwoje bu, iwɛnɛ Ngaa shɛ shɛ gana atwa vwɛ, a na shɛ atwa tuhwulo, na atwa orugwusu, na anjɛ-tuwɛle, kwo kaa gana bile-bụ-ụdalụ ga.#Mat 6:5,7 12Ma nda ezumi kpalụ yebi ulade ulade, Ama pana Agwatana iyi-umpwa mi elele.

13Ama bile-bụ-ụdalụ ata shikeni taa dụlụ, bi eri shi ba shapa eshe ubwa okwo na azuba, ama bu po agba ubwa iyi, bɛɛ hiɛŋ, Oo Agwatana, hioko inyɛmɛnyɛmɛ mi Gamba bụtụ-bi-iwɛwɛ.

14Ge Jisus hiɛŋ aŋ, Mo hi mbiso maa, Bile ata bụ ụdalụ ji ni ihwɛ ibwɛ nu n-ndumwa-zhɛ uhwuri Bufarisi ata. Iwɛnɛ po bụtụ be elele na meme mungicinji, ɛ zhɛ e zucinje bu, bụtụ be elele na kaa meme zucinje, ɛ zhɛ o mungicingo bu.#Mat 23:12; Luk 14:11; 1 Pita 5:6

Ge Jisus Peni Miaụŋ mu Tiweewee Uwebiye

(Mat 19:13-15; Mak 10:13-16)

15Nazhɛ atwamwa suje miaụŋ mu tiweewee pi Jisus maa tumongono mu. Ama aka na te eseshi-iyi ubwa kwụbɛ aŋ, ee tezhigeni aŋ.

16Ama ge Jisus suyanɛ eseshi-iyi ubwa pu bwa, bɛɛ hiɛŋ aŋ, Lono ma maa miaụŋ mu tiweewee mi zhajɛ pi mi. Ta lakana aŋ ma o. Iwɛnɛ ta Cɛnjɛ-ta-tugwama ta Agwatana tɛ shɛ ma tu atwa gana ga. 17Iwɛ-tɛkana Omo hi mbiso maa, bụtụ be elele na le shi Cɛnjɛ-ta-tugwama ta Agwatana gana yɛu ticwɛŋ, bi zha shɛ bo tono na tuba kwukwuŋ.

Iwɛ Bɛzhɛgba

(Mat 19:16-30; Mak 10:17-31)

18Nazhɛ uhiu we Eju uko heŋteni Jisus, bɛɛ hiɛŋ, E-Bimbisegeni bi biye, imbe Ngɛɛ zhɛ ma nda maa ma 'yaga uraiŋ unyizo-nomm? #Luk 10:25

19Ge Jisus heŋteni bu, bɛɛ hiɛŋ, Uwembe po ɛbi n hiɛŋ, Bụtụ bi biyee? Za bụtụ be elele na shɛ bụtụ bi biye o, semi Agwatana kiri. 20Bi mepi unu-tupana ata na hiɛŋ: Ta kwụna bụtụ o, To zundo izunde o, Ta la tiseyida tu tukata o, Pana shibi keeni nobu ụjɛrụma.#Ụban 20:12-16; Undwa 5:16-20; Rom 13:9; Jem 2:11

21Nazhɛ bụtụ ata jishijɛ bụ, bɛɛ hiɛŋ, Okwo taa aka na Ngaa ta shɛ yɛu tisemberi, Ma hwuga-unu onu-tupana ga hwɛɛ.

22Ama aka na ti ge Jisus hwụjɛ iwɛ ɛtɛ baa jɛmɛ, bɛɛ hiɛŋ bụ, Iyi ike ta bu 'nyananɛ. Zhaga sanga iyi elele nɛ abɛ 'yajɛ, maa suji ukwuribi ata peni okofwo, nazhɛ ɛbi zhɛ ba 'yaga uduciya na azuba, nazhɛ zhajɛ n 'wa.#Luk 12:33; Ugo 2:45

23Ama aka na ta bụtụ ata hwụjɛ iwɛ ɛtɛ, yaa gwumanɛ bụ tebiye, iwɛnɛ tu baa 'yajɛ uduciya duwa.

24Aka na ti ge Jisus kwụbɛ maa i gwumanɛ bụ tebiye, bɛɛ hiɛŋ, Hioko ma gana na ti yaa 'yaganɛ azhɛgba ikɛnyi maa e teni na Cɛnjɛ-ta-tugwama ta Agwatana! 25I zasa iwɛ maa irihende duri ni inyɛnu yo otulo, i ci gana na maa bɛzhɛgba teni na Cɛnjɛ-ta-tugwama ta Agwatana o. 26Nazhɛ atwa na hwụjɛ iwɛ ɛtɛ hiɛŋ, Asha gaaba eri bo bino yaa? 27Ge Jisus jishijɛ, bɛɛ hiɛŋ, Iyi nɛ atwa eri shi a nda, Agwatana tuba eri a nda iŋ.#Umoz 18:14; Job 42:2; Jɛrɛ 32:17; Luk 1:37

28Nazhɛ ga Pita hiɛŋ bụ, Hioko, ti genjii iyi tu ye elele atu bu 'wa.

29Ge Jisus hiɛŋ aŋ, Iwɛ-tɛkana Omo hi mbiso maa, Bụtụ be elele na genji ihwɛ ibwɛ, te biyikwo bwa, ta miaụŋ-mo-bino bwa, ta atwa na meci bu, ta miaụŋ mu bwa, iwɛ Cɛnjɛ-ta-tugwama ta Agwatana. 30Bi zhɛ ba lashɛga hwuŋ iyi nɛ hwuri gana ata na aka ga, bɛɛ zhɛ kaa ba lashɛganana hwuŋ uraiŋ unyizo-nom na aka ye e ci.

Ge Jisus Dumananɛ iwɛ Tu'wo tu Bwa

(Mat 20:17-19; Mak 10:32-34)

31Ge Jisus suji eseshi-iyi ubwa umpwa-na-ba-eyebi geri bu ko, bɛɛ hiɛŋ aŋ, Hioko ma, ti zhɛ umungwo Jɛrusalɛm. Iyi elele nɛ egesere 'nywotwo la iwɛ Yɛu Bụtụ zhɛ yɛ sɛ hwɛɛ.#Ayiz 53:1-12 32Iwɛnɛ tɛ ɛ zhɛ a shapa bụ a pana atwa na shɛ shɛ Eju,#18:32 a pana atwa na shɛ shɛ Eju: I eri ya sha Orom ata untanganɛ cɛnjɛ te Eju na aka ata ge Jisus zhajɛ la. ɛ zhɛ a nda bu asada, ɛɛ zhɛ a twaga bu, ɛɛ zhɛ o zwogono bu mecemi; 33Ɛ zhɛ o kwuto bu, ɛɛ zhɛ a kwụna bụ, ama bi zhɛ bɛ hiɛ nụ ụjita ụtatụ.

34Ama eseshi-iyi ubwa eshiciji shi iyi nɛ baa jɛmɛ okwo ike, n-ndumwa ma ata kaa mu swakanɛ aŋ, e mepi shi ijiji ecilo iyi nɛ baa jɛmɛ o.

Ge Jisus Nɛnjɛ Olubo Oko

(Mat 20:29-34; Mak 10:46-52)

35Ti ge Jisus gwumwonu nu Jɛriko, to olubo oko jɛjɛ nu ụzalụ uhwaŋna ba lụpa iyi. 36Aka na to olubo ata hwụjɛ ta atwa ofwugwo a kashaka, bee heŋteni iyi nɛ teni.

37Ee mbishi bu, ɛɛ hiɛŋ, Ge Jisus Bụtụ bu Nazarɛt ubwa zhɛ tɛkashɛka.

38Baa uganɛ, bɛɛ hiɛŋ, E-Jisus, gabụ Yɛu Devid, hioko inyɛmɛnyɛmɛ mi!

39Nazhɛ atwa na hwuri umbe tazhɛganɛ bụ, ɛɛ hiɛŋ bụ, Nama saiŋ. Ama bi keeni nazhɛ n'ungwa duwa, bɛɛ hiɛŋ, Gabụ Yɛu Devid, hioko inyɛmɛnyɛmɛ mi.

40Ge Jisus shikeni, bee peni atwa ata unu maa, ga shapɛrɛganɛ bụ bụtụ ata. Aka na to olubo ata gwumwongonu, ge Jisus heŋteni bu, bɛɛ hiɛŋ, 41Imbe aba jala maa ma bu ndanaa?

Olubo ata jishijɛ bụ, bɛɛ hiɛŋ, Iyɛri, lono maa ma kwụbanana uhwaŋna mu.

42Ge Jisus hiɛŋ bụ, Hiokonono uhwaŋna bụ. Rishe rụ bụ tɛtɛtana ri bi bicinji.

43Gunu ata bee hiekeneni hwaŋna ubwa, baa 'wa Jisus, baa shɛtana Agwatana. Aka na ta atwa ata kwụbɛ iŋ, aa shɛtanganɛ du Agwatana.

Currently Selected:

LUK 18: RBT

Highlight

Copy