LUK 16

N-ndumwa Tumanganjɛ iwɛ Uhiu-ihwɛ wo Orugwusu na kaa Incɛ

1Ge Jisus hiɛŋ eseshi-iyi ubwa, Bɛzhɛgba bu ko namba la na 'yajɛ uhiu-ihwɛ. Ee mbishi bɛzhɛgba ata maa uhiu-ihwɛ gɛ abi 'yajɛ, ba 'waŋtanga i'wɛŋnɛ bu hwɛɛ. 2Ibɛ po agwuma-ihwɛ ɛtɛ suyanɛ uhiu-ihwɛ ɛtɛ, bɛɛ hiɛŋ bụ, Gana na iwɛ bu nɛ Ama hwuga i shɛɛ? N swegeni gana na aba nda ugondu bu uhiu-ihwɛ. Bi eri shi ba sha ya uhiu-ihwɛ o.

3Ibɛ po uhiu-ihwɛ ɛtɛ mɛmɛ hiɛŋ, Imbe Ngɛɛ zhɛ ma nda gana na ta agwuma-ihwɛ mi zhɛ ma m bacɛnga nu ugondu muu? N eri shi kaa ma hwaŋ itimɛ o, iyi tụlụpa kaa i n shanɛ ezuye. 4Bɛɛ hiɛŋ, M mepi ya iyi nɛ Ngɛɛ zhɛ ma nda, iwɛ maa atwa n le hwuŋ nu nhwaŋ ma aba na aka na tu baa n vwɛ nu ugondu mu.

5Ibɛ po baa suyaganɛ atwa na ga yɛ agwuma-ihwɛ ibwɛ atashɛ atwa oko oko. Bɛɛ hiɛŋ bụtụ bi hiiŋ, Ashaamba abɛ yɛ agwuma-ihwɛ mi utashɛɛ?

6Bɛɛ jishijɛ bụ, bɛɛ hiɛŋ, Agaruwa manɛbɛ ma buta dipi-yebi (100).

Ibɛ uhiu-ihwɛ ɛtɛ hiɛŋ bụ, Shapɛ utakada utashɛ bụ kakayɛ maa gɛga 'nyeci agaruwa dupu.

7Bee heŋteni binya bụtụ, bɛɛ hiɛŋ bụ, Ashaamba tuba utashɛ bụ namɛɛ?

Bụtụ ata jishijɛ bụ du, bɛɛ hiɛŋ, Azhɛka iyimɛyɛ dipii-yebi.

Uhiu-ihwɛ ɛtɛ hiɛŋ bụ, Shapɛ utakada utashɛ bụ kakayɛ maa gɛga 'nyeci azhɛka iyimɛyɛ dupu-nu-talacɛ (80).

8Ibɛ po agwuma-ihwɛ ɛtɛ dumanga uhiu-ihwɛ ɛtɛ wo orugwusu, iwɛnɛ tu baa njɛ iyi nu uhwaŋna ti'inta. Iwɛnɛ ta miaụŋ mu unyizo ga#16:8 Miaụŋ mu unyizo ga: Kwo kaa, miaụŋ mu usara ga. mɛ incɛ mee hwuri miaụŋ mu uhioko-uhwaŋna, nu gana na aa nda iyi na atwa aba.

9Ge Jisus to tuhwulo, bɛɛ hiɛŋ, Ibɛ po Omo hi mbiso maa, nda ma uhwara nu uduciya unyizo ga maa hi 'yaga eyejilo, iwɛ maa okwo aka na tu uduciya hiŋ ihi hwuwonowuŋ hwuŋ, maa tuba e hi le nu nhwaŋ mu unyizo-nom.#Luk 12:33; 18:22

10Bụtụ be elele na eri ba sha bụtụ bɛ tɛcara ni iyi ticwɛŋ, asha bi eri du ba sha bụtụ bɛ tɛcara ni iyi i'wɛtwɛ. Bụtụ be elele na kaa shɛ bụtụ bo orugwusu ni iyi ticwɛŋ, asha bi zhɛ du ba sha bụtụ bo orugwusu ni iyi i'wɛtwɛ.#Mat 25:21; Luk 19:17 11Yaa shɛ ahiɛ shɛ shɛ atwa tɛcara nu uduciya unyizo ga, gaaba zhɛ mo hi utogono uduciya tugom igbɛtɛtɛ ɛ? 12Yaa shɛ ehi meme mbiseni shi maa hiɛ shɛ atwa tɛcara ni iyi binya bụtụ, gaaba zhɛ ma hi pana inɛɛ nɛ shɛ inee hiiŋ? 13I zasa yɛu-ugondu ye elele nɛ eri ya ndana shɛgwuma-shi-ihwɛ shi yebi ugondu o. Shibwonu asha bi zhɛ bo lubo bu ko, bɛɛ zhɛ bo imo bu na bi yebi, kwo kaa bi zhɛ ba muna bu ko ụjɛrụma, bɛɛ zhɛ ba ngbaraka bu na bi yebi cwɛŋ. Hi eri shi hia ndana Agwatana ugondu keeni uduciya ti'yaga o.#Mat 6:24

N-ndumwa mu na ge Jisus Jɛmɛ

(Mat 11:12,13; 5:13,32; Mak 10:11,12)

14Aka na ta Afarisi a na o lubo ukwuribi hwụjɛ ijɛ hwɛɛ, oo sumono ya Jisus. 15Ge Jisus hiɛŋ aŋ, Ahiɛba na hi mama nda atwa tiririri ne eshe atwa, Agwatana kaa mepi shɛmɛ shi hiŋ. Iwɛnɛ ti iyi nɛ atwa a muna ụjɛrụma, i shɛ tuba iyi-tupwaŋ ne eshe Agwatana.#1 Sam 16:7; Eshi 21:2; Luk 10:29; Ugo 1:24

16Undwa Moses keeni iyi nɛ egesere 'nyeci namwawaŋ nazhɛ ga Jon bɛnjɛ-bu-ubaptizim zhajɛ. Te kwuni taa na aka ata aa ananga Anabarɛ Ebiye iwɛ Cɛnjɛ-ta-tugwama ta Agwatana, bụtụ bụtụ kaa momo sho maa tono na tuba.#Mat 11:12,13 17I zasa iwɛ maa azuba keeni unyizo keshici i ci maa okwo ukangasụ bi'nyata bi iyi nɛ 'nywotwo nu Undwa 'inɛ o.#Mat 5:17,18; Luk 21:33

18Bụtụ be elele na keri biyikwo bwa, bee zeni binya, asha tuwɛle baa njɛ. Bụtụ be elele na kaa du zeni biyikwo na bwolo bwa karɛ, asha tuwɛle du baa njɛ.#Mat 5:31,32; 19:9; 1 Kor 7:10,11

Bɛzhɛgba na Lazaros

19Bɛzhɛgba bu ko namba la bo urugono otogwo uduhwa ushenje, keeni tugwuno ti ilinɛn ti biye, baa nda unyasa nu uraiŋ na baa ya iyi-heri iyi-heri. 20Bukofwo bu ko du namba la ɛɛ hiɛŋ izeci ibwɛ ga Lazaros, na tu'waba tu bwa tɛ shɛ andala hwɛ hwɛɛ, oo shilo bu no odubo bɛzhɛgba ata.#Jon 11:1-44; 12:1,9 21Ba jala maa bu na ya okwo owunzu iyimɛyɛ ɛtɛ ya layajɛ nu uteburu bɛzhɛgba ata maa shigo. Shɛ inɛ ɛtɛ kiri o, shiwawa sha zhajɛ shoo songo andala ata ubwa.

22Jitoo ko bukofwo ata 'wi, atumwa-azuba shepi bu na agba Abraham. Bɛzhɛgba ata du 'wi, ee ni bu. 23Ta bɛzhɛgba ata namɛ ne e'uye,#16:23 ne e'uye: Aba shɛ unyizo wa atwa na 'wi, kwo kaa nhwaŋ-me-e'uye, apata aa zha, aa 'yacɛ ụjita na ɛɛ zhɛ a duma ụshɛrɛya wa aba umɛwɛɛ. bee shepi eshe na azuba baa kwụbɛ Abraham taa dụlụ abana Lazaros na namɛ na agba ubwa. 24Ibɛ po bɛzhɛgba ata ugananɛ Abraham, bɛɛ hiɛŋ bụ, Ada Abraham, hioko inyɛmɛnyɛmɛ mi, maa tumwanɛ kaa Lazaros maa shiyono buvwa bwa ne meni maa mɛ n cɛ nu urworwo maa urworwo mu lemi, iwɛnɛ tu Ngaa namɛ epe Ama nda ụbaụta na bụratụ bu ulwa ga.

25Ama ga Abraham jishijɛ bụ, bɛɛ hiɛŋ, Ɛ-yɛu mi, Teyinje maa bi yɛwa la tuwebiye tụ bụ na aka na abu namɛ nu unyizo, iyi iwɛ tuba ibɛ jiteni la Lazaros. Ama hwuwayɛ, a ingatanga bu ya epe, gabụ ta tuba bu namɛ ya nu ụbaụta.#Luk 6:24 26Shɛ inɛ ɛtɛ kiri o, isese tuwaŋrɛ bacɛ ba na ashashɛ tu ne hiŋ, iwɛ maa kede atwa eri tubana no olugwo tu maa e keshi pi hiŋ o, maa kede atwa banɛ du no olugwo hiŋ maa ɛ kɛshɛ pu tu o.

27Bɛzhɛgba ata hiɛŋ bụ, Ada, asha ma bu tabwa maa tumwanɛ bu ni ihwɛ bishi mi, 28iwɛnɛ tu Ngaa 'yajɛ miaụŋ-mo-bino mu ta mu na mu namba, iwɛ maa tɛtagana aŋ unu tebiye, iwɛ maa kede a zhajɛ hwuŋ nu ụbaụta ga o.

29Ga Abraham jishijɛ bụ, bɛɛ hiɛŋ, Go Moses keeni egesere namba#16:29 Go Moses keeni egesere namba: Nekeshi inɛ ɛtɛ ya duma iwɛ atakada undwa a na go Moses 'nywotwo keeni atakada elele na egesere 'nywotwa la. Atakada ata go Moses 'nyeci keeni anaa na egesere 'nyeci aba shɛ Unu Ụngwụshɛ Tutwa. no ofwo aba, ga a hwụjɛ iwɛ ya aba.#Jon 5:45-47; Ugo 15:21

30Bɛzhɛgba ata hiɛŋ Abraham, Ada, awo, ama yaa shɛ bụtụ bu ko beni no olugwo atwa na uwo, bee zhe no ofwo aba, ɛ zhɛ a jɛshɛrɛga-shihaŋsa.

31Ga Abraham hiɛŋ bụ, Yaa shɛ aa hwụjɛ shɛ iwɛ Moses keeni inɛ ye egesere, asha okwo bụtụ bu ko hiɛ no olugwo atwa na 'wi bee zhegeni aŋ, shihaŋsa sha aba shi zha shɛ sha jɛshɛrugwa o.

Currently Selected:

LUK 16: RBT

Highlight

Copy