LUK 10

Ge Jisus Tumwanɛ Atwa Dupu-nu-woshi-na-ba-eyebi Utumwa (72)

1Na aba inɛ gɛ, ibɛ Agwangwama teri anya atwa dupu-nu-woshi-na-ba-eyebi,#10:1 dupu-nu-woshi-ba-ba-eyebi: Tɛjɛshɛrɛga tu ko ti hiɛŋ, dupu-nu-woshi Gobwonu du na buwala bu 17. (72) baa tumwanɛ aŋ utumwa atwa eyeyebi, nu umbe ubwa, nu ụshɛpwụ we elele keeni ofwo elele na baa jala maa hikokono.#Luk 9:1,2,51,52 2Bɛɛ hiɛŋ aŋ, Iyi tugwubo gembi ama anjɛ-ugondu twa sụ ufwugwo. Ibɛ po na tabwa ma Agwangwama iyi tugwubo maa bɛcinjɛ anjɛ-ugondu maa e zhe no ofwo tugwubo ta ata tu bwa.#Mat 9:37,38; Jon 4:35 3Zhaga ma! Gamba n hi tumwanɛ gana maa miaụŋ-ma-agwụdụ mu na aa tumwanɛ na ashashɛ ogwusu.#Mat 10:16 4Ta 'waŋna ma arɛta ukwuribi, okwo ulapa, okwo abida o, ta 'walụ ma kaa du bụtụ be elele nu uhwaŋna o.

5Ihwɛ ye elele ehi teni hiɛŋ ma tugwo, Ga amɛ-olom nama ni ihwɛ gɛ.#1 Sam 25:6 6Yaa shɛ bụtụ ba amɛ-lom namba ni ihwɛ ɛtɛ, asha a'walụ amɛ-olom hiŋ zhɛ a nama nu bwa, yaa shɛ kaa baa zasaba, asha ga a'walụ amɛ-olom hiŋ gwure pi hiŋ. 7Nama ma ni ihwɛ ɛtɛ, maa hiɛ yɛ, hi swe iyi elele nɛ ee hi peni apata, iwɛnɛ ta bɛnjɛ-bu-ugondu lanɛ maa a cɛpɛ bụ alubashɛ ubwa. Ta zhaga ma ni ihwɛ ihwɛ o.#Undwa 24:15; 1 Kor 9:14; 10:27; 1 Timo 5:18

8Ụshɛpwụ we elele ehi teni, ee hi le, iyimɛyɛ ye elele ee hi peni apata, ya ma. 9Nɛnga ma agwumashɛ elele namba apata, mbiso aŋ ma maa, Cɛnjɛ-ta-tugwama ta Agwatana tu gwumwonu pi hiŋ. 10Ama ụshɛpwụ we elele na ehi teni, ee hi le shi, bana ma hi zhe ne ekpekiti ubwa, hiɛŋ ma, 11Okwo upwupwutu ụshɛpwụ hiŋ na shivwɛvwɛjɛ shi tu shi suje, ta wafwaga aŋ maa a shɛ gana iyi nɛ zhɛ ma hi la tiseyida tụ wɛ. Ama okwo ti yaa shɛ gana ata, mapa ma maa Cɛnjɛ-ta-tugwama ta Agwatana tu gwumwonu pi hiŋ.#Ugo 13:51 12Mo hi mbiso maa i zhɛ yo dobogono hwuŋ Sụdụm nụ ụjita ụshɛrɛya uhwuri ụshɛpwụ ata.#Umoz 19:24-28; Mat 11:24; Judu 7

Atwa Ashɛpwụ na Tɛtanɛ Shɛ Jisus Rishe

(Mat 11:20-24)

13Ahiɛba atwa Korazin, hi zhɛ hia nda hwuŋ adangboo! Ahiɛba atwa Bɛtisaida, hi zhɛ hia nda hwuŋ adangboo! Yaa ga shɛ nu Taya keeni Saidụn aa njɛ ugondu na aa njɛ na ashashɛ hiŋ, asha a jɛshɛrugwa-shihaŋsa sha aba cala cala, oo urugwonuo tugwuno tụ ụcɛnjɛ tɛnda, aa na dula ma'alụ.#10:13 oo urugono tugwuno tụ ụcɛnjɛ tɛnda, aa na dula ma'alụ: Kwụba ti'eshicigono tu Mat 11:21 #Ayiz 23:1-18; Izik 26:1-21; Joɛl 3:4-8; Emos 1:9,10; Zɛka 9:2-4 14Ama i zhɛ yo dobogono hwuŋ atwa Taya keeni atwa Saidụn nụ ụjita ata ụshɛrɛya ihi hwuri. 15Ahiɛba atwa Kapanaum, ɛ zhɛ suu mo hi gombicingo na azuba? Ɛ zhɛ me hi zucinje hwuŋ kaa tutu ukwokwo ulwa.#Ayiz 14:13-15

16Bụtụ na ba hwulaga iwe hiŋ, ba hwulaga du iwe mi, bụtụ na kaa ba laka iwe hiŋ, asha ba laka du iwe mi, bụtụ na ma n laka, asha ba laka du bụtụ na n tumwanɛ.#Mat 10:40; 18:5; Mak 9:37; Luk 9:48; Jon 13:20

Atwa ata Dupu-nu-woshi-na-aba-eyebi Gwure nu Unyasa

17Ama atwa ata dupu-nu-woshi-na-ba-eyebi gwure nu unyasa, ɛɛ hiɛŋ, Agwangwama, okwo atumwa-ibiri du a hwụjɛ-unu tu ni izeci bu.

18Ge Jisus jishijɛ aŋ, bɛɛ hiɛŋ, N kwụbɛ Setan tu baa banɛ na azuba baa layɛ gana ubɛrɛ.#N-ndu 12:9; Jon 12:31 19Hioko ma, N hi peni ụhwada maa hi fwundacɛ egbezhi, na shina, tu ukpahiŋ bụtụ ata bi i'ime we elele, i zasa kaa iyi elele nɛ zhɛ ma hiɛ gwụcɛnga o.#Shɛzu 91:13 20Ama okwo ti yaa shɛ gana ata, ta nda ma unyasa iwɛnɛ ta mpiala mụ wɛ mu hwụjɛ-unu hiŋ o, ama na nda ma unyasa iwɛnɛ to o 'nywotwo nzeci mi hiŋ na azuba.#Undwa 32:32; Shɛzu 69:28; Dan 12:1; Ehib 12:23; N-ndu 21:27

Ge Jisus Njɛ Unyasa

(Mat 11:25-27; 13:16,17)

21Na aka ata ge Jisus njɛ unyasa na amɛ Mpiala mi Tijilo, bɛɛ hiɛŋ, Oo Bishi mi na shɛ Agwangwama azuba tu unyizo, N njɛ ugwoje bu, iwɛnɛ ebu sweci ijɛ iwɛ maa kede atwa ti'inta keeni atwa na eshiciji iyi eri iŋ tụkwụba o, ebi kepishingeni tuba atwa tukwakwa.#10:21 atwa tukwakwa: Tɛjɛshɛrɛga tu ko ti hiɛŋ miaụŋ mi shenje. #1 Kor 1:26-29Eeba, Ada, gana yaa bu kwụlanɛ ta.

22Ti ge Jisus jishirijɛ eshe geri be eseshi-iyi ubwa,#10:22 Ti ge Jisus jishirijɛ eshe geri be eseshi-iyi ubwa: Tɛjɛshɛrɛga tu ko tu zasa n-ndumwa ma ata o. bɛɛ hiɛŋ, Bishi mi n utwogwonuo iyi elele ni i'ɛlɛ mi. Za bụtụ mepi bụtụ na Yɛu shɛ, semi Bishi, za kaa du bụtụ mepi bụtụ na Bishi shɛ, semi Yɛu, keeni bụtụ be elele na kwụlanɛ Yɛu maa kapɛshɛngana bụ bụtụ na Bishi shɛ.#Mat 28:18; Jon 3:35; 10:15; 13:3

23Nazhɛ ge Jisus mbiyanɛ eseshi-iyi ubwa, bee mbishi aŋ swɛɛ, bɛɛ hiɛŋ, Atwa na a kwụba iyi nɛ ahia kwụba gwoje! 24Mo hi mbiso maa, egesere ofwugwo keeni shɛgwuma, a ga jala maa a kwụbɛ iyi nɛ ahia kwụba, ama a kwụbɛ shɛ iŋ o, maa a hwụjɛ iyi nɛ ahia hwuga, a hwụjɛ iŋ o.

N-ndumwa Tumanganjɛ iwɛ Busamaria bi Biye

25Ibɛ bụtụ bu ko bu Undwa zhajɛ bee menji Jisus, bee heŋteni bu, bɛɛ hiɛŋ, E-Bimbisegeni, imbe Ngɛɛ zhɛ ma nda maa ma 'yaga uraiŋ unyizo-nomm? #Mat 19:16; Mak 10:17; Luk 18:18

26Ge Jisus jishijɛ bụ, bɛɛ hiɛŋ, Imbe ee 'nyeci nu Undwaa? Imbe tuba abɛ rɛcɛ apataa?

27Bụtụ ata jishijɛ bụ, bɛɛ hiɛŋ, I hiɛŋ, Bɛ shɛ bo lubo Agwangwama na shɛ Agwatana bụ na amɛ bụ kpaaŋ, to ohwulu bu kpaaŋ, tu ukpahiŋ bụ kpaaŋ, ta ahaŋsa bụ kpaaŋ, bɛ shɛ du bo lubo uyebi bu gana na obu momo lubo.#Liv 19:18; Undwa 6:5; Rom 13:9; Gala 5:14; Jem 2:8

28Ge Jisus jishijɛ bụ, bɛɛ hiɛŋ, Ajɛshɛgwa bu teni cɛŋ, zhaga nda gana ata nazhɛ ɛbi zhɛ ba ya uraiŋ.#Liv 18:5

29Ama gana na ta bụtụ ata ba jala maa mama pana n-ndumwa-zhɛ, bee heŋteni Jisus, bɛɛ hiɛŋ, Gaaba tuba shɛ uyebi muu?

30Ge Jisus jishijɛ bụ, bɛɛ hiɛŋ, Bụtụ bu ko beni la nu Jɛrusalɛm, bɛɛ zhɛ Jɛriko, bee leyiteni ashɛrɛ nu uhwaŋna. Ashɛrɛ ata ushiji utogwo ubwa, ee jibi bu tebiye, ee weŋpeni ihwungwɛ cwɛŋ bana, nazhɛ ee genji bu ee hwuri. 31Ti ijɛ ɛtɛ teni gana ata, ibɛ bunongbo bu ko zhɛ tɛkashɛka nu uhwaŋna ata, baa kwụbɛ bụtụ ata, baa vwụrɛ nụ ụzalụ unya bee hwuri. 32Gobwonu du aka na ta Bulivai bu ko zhajɛ bee ci apata, baa kwụbɛ bụ, baa vwụrɛ sasana nụ ụzalụ unya bee hwuri. 33Ama ta Busamaria bu ko zhɛ tahaŋnụ, bee zhe bee ci apata, baa kwụbɛ bụtụ ata, ibɛ inyɛmɛnyɛmɛ ibwɛ shɛ bụ. 34Bee zhe pu bwa, baa shananjɛ andala ata aa ga gwụcanjɛ bụ manɛbɛ ma buta keeni meni mụ tụ'walụ ta afwafwa, nazhɛ bee umpi andala ata. Bee shepi bu bee peteni na aba iyimabiga nɛ baa ga suka, bee shepi bu ni ihwɛ nɛ maa zokwu, baa ngbaracɛ bụ apata.#2 Shɛrụ 28:15 35Ti iyi heri, bɛɛ vwɛ azụrụfa arinya eyebi bee peni agwuma-ihwɛ ɛtɛ oo go zokwu, bɛɛ hiɛŋ bụ, Ngbaraka ugwumashɛ ga. Ama yaa shɛ yaa ta 'yajɛ hwuŋ iyi elele nɛ abu ta njɛ ufwu uhwuri gana ga, aka na Ngee gwure, N zhɛ ma bu tụpa hwɛɛ.

36Ge Jisus heŋteni bụtụ ebe bu Undwa, bɛɛ hiɛŋ bụ, Na ashashɛ atwa ga atatụ, gaaba ebi heŋshi maa ubwa shɛ uyebi bụtụ ata leyiteni ashɛrɛ?

37Bụtụ ata jishijɛ bụ, bɛɛ hiɛŋ, Bụtụ ata kwụbɛ inyɛmɛnyɛmɛ ibwɛ.

Ge Jisus hiɛŋ bụ, Zhaga nda du gana ata baa njɛ.

Ge Jisus Teni Umwono Ata Mata ne Meri

38Gana na ata Jisus a zha tahaŋnụ ta aba, bee teni ụshɛpwụ uko, nazhɛ biyikwo bu ko na ɛɛ hiɛŋ izeci ibwɛ ga Mata 'imɛ bu ugaiŋ ni ihwɛ ibwɛ.#Jon 11:1 39Ga Mata kaa 'yajɛ buhongwu na ɛɛ hiɛŋ izeci ibwɛ ge Meri, ubwa tuba jɛjɛ nu ukaka wa Agwangwama, baa shɛlaga imbisegeni ibwɛ. 40Ama ahaŋsa Mata ci ụkpakwụ iwɛ iyi ifwugwo nɛ baa ndana aŋ. Ibɛ po baa zhajɛ, bɛɛ hiɛŋ Agwangwama, I bi te shi suu to buhongwu mi n genji Ama nda ugondu ga Ngooko? Mbiso bu maa gɛ ishijɛ maa mo mbiyono.

41Ama Agwangwama jishijɛ bụ, bɛɛ hiɛŋ, A-Mata, A-Mata! Amɛ bụ hashɛganụ iwɛ iyi ifwugwo nɛ aba nda. 42Iyi ike gba kiri#10:42 iyi ike gba kiri: Tɛjɛshɛrɛga tu ko ti hiɛŋ, iyi imbɛnɛ, kwo kaa iyi ike ya nda bụtụ ukekeshi. kaa i to bụtụ ukekeshi. Ge Meri tolwo urobwo ubiye na aa zha shɛ a lashɛga bụ uŋ ya kwukwuŋ.

Currently Selected:

LUK 10: RBT

Highlight

Copy