LUK 1
1
Tukwuno no Ofwo Tiofulos
1Atwa ofwugwo shiyeni i'ɛlɛ ya aba maa e 'nyeci anabarɛ iyi nɛ ulwa nɛ ati 'yajɛ na ashashɛ tu. 2Atwa na kwụbɛ iwɛ ɛtɛ ne eshe aba taa nu umozhigo, aba du njɛ ugondu ti'nyeci ti ibɛ, nazhɛ ee ti peni iŋ.#Jon 1:1 3Gana na ti Ngee yeleji ijɛ kpaaŋ cɛrɛcɛrɛ taa nu umozhigo, ibɛ po yaa n shanɛ du iyi ibiye maa ma bu 'nyatanɛ iwɛ ibɛ, gabụ bụtụ bụ ụjɛrụma ge Tiofulos na shɛ bụtụ bu tugom na hwuri hwɛɛ.#Ugo 1:1 4M bu 'nyatanɛ ijɛ iwɛ maa mepi du tikpeke ti iyi nɛ ee bi mbisegeni.#Jon 20:31
E Enenji Tumata tu Jon Bɛnjɛ-bu-ubaptizim
5Bunongbo bu ko namba la na aka Hɛrod agwuma Judia, na ɛɛ hiɛŋ izeci ibwɛ gɛ Zɛkaria,#1:5 Zɛkaria: Kwo kaa, Zɛkarias. na namɛ na ashashɛ onongbo Abia, bi zeni biyikwo bwa na ashashɛ miaụŋ mu Aron#1:5 Aron: Ubwa shɛ batagwụ Moses, ubwa du kaa shɛ bunongbo bi hiin nu ubayiburu. Ɛ hiɛŋ izeci biyikwo ata ubwa, gɛ Ɛlizabɛt.#2 Shɛrụ 31:2 6Hwɛɛ aba ebeyebi shanɛ Agwatana atwa tiririri a zasa unu-tusapa nu unu-tupana wa Agwangwama keeni iyi elele nɛ Undwa mbishi aŋ o. 7Gɛ Ɛlizabɛt kaa shɛ bu'ulo, a zasa yɛu o. A inganjɛ kaa hwɛɛ aba ebeyebi.
8Jitoo ko na ti gɛ Zɛkaria ba nda ugondu tunongbo na agba Agwatana, iwɛnɛ ti yee ci bu maa ubwa shɛ ba nda ugondu tunongbo jita ata. 9Gana na tu ugondu tunongbo shɛ ni icɛcɛ tu'waŋ aa tala bụtụ, bee teni nu Umwono wa Agwangwama maa hwoŋzhingo iturɛre.#Ụban 30:7 10Atwa ofwugwo ata kpaaŋ namɛ no tupohondo aa nda adua na aka ata iturɛre tuhwoŋzhingo.
11Nazhɛ butumwa ba Agwatana ba azuba bananɛ bụ caakwụ, bee shikeni nu u'ala ubiye utuku-ụrụpɛ ata boo hwoŋzhingo iturɛre.#Luk 2:9; Ugo 5:19 12Aka na ti gɛ Zɛkaria kwụbɛ bụ, inyɛsɛ ibwɛ shɛ bụ. 13Ama butumwa ata ba azuba hiɛŋ bụ, A-Zɛkaria, ta nda inyɛsɛ o. Agwatana hwugwa adua bụ. Biyikwo bu gɛ Ɛlizabɛt zhɛ ma bu matanga yɛu-ye-eyi, ɛbi zhɛ kaa ba pa iŋ izeci ta Jon.#Luk 1:30 14Tumata tu bwa ti zhɛ ta bu pana unyasa tubwada, atwa ofwugwo zhɛ a nda du unyasa iwɛ tumata tu bwa. 15Yɛu ɛtɛ kaa zhɛ ya sha bụtụ bụ ụ'wụtụ ne eshe Agwangwama, bi zha shɛ ba swa meni mụ tụ'walụ ta afwafwa, okwo mayaga o, ama Mpiala mi Tijilo mi zhɛ mo shino na amɛ ubwa taa na aka na bino bwa zhɛ ba mata bụ.#Tɛrɛ 6:3; Luk 7:33 16Ubwa kaa zhɛ ba jɛshɛrɛga atwa Isrɛl ofwugwo maa e zhe no ofwo Agwangwama na shɛ Agwatana aba. 17Ubwa zhɛ bo hwulono Agwangwama umbe na mpiala mu ukpahiŋ mu ko mu ko mu naa na ge Elaija 'yajɛ la, maa togotogwu eshi na miaụŋ ma aba, maa jɛshɛrɛga atwa na ga hwụjɛ shɛ la unu maa a na nda ya iyi tiririri, maa imangana Agwangwama atwa ubwa tebiye.#Mala 4:5,6
18Gɛ Zɛkaria heŋteni butumwa ata ba azuba, bɛɛ hiɛŋ, Gana naa Ngɛɛ zhɛ ma mapa maa ijɛ zhɛ ya ndaa? Iwɛnɛ tu Ngaa injɛ, biyikwo mi kaa du injɛ.#Luk 1:34
19Butumwa ata jishijɛ bụ, bɛɛ hiɛŋ, Gamba n shɛ ge Gebrɛl na shikeni na agba Agwatana. Agwatana kaa n tumwanɛ maa mo bu mbiso iwɛ gɛ, maa ma bu anangana anabarɛ ga ebiye.#Dan 8:16; 9:21 20Ama bi zhɛ ba sha igwureni, bi zha shɛ ba ala iwɛ tụdụmana uuwa i ci aka na ti ijɛ zhɛ ya nda o, iwɛnɛ ta abụ tɛtanɛ shɛ iwe mi nɛ kaa zhɛ ya nda na aka na teni cɛŋ rishe. 21Yaa dama atwa na 'yacɛ Zɛkaria, iwɛnɛ ti bee ilegeji nu umwono wa Agwatana. 22Aka na ti gɛ Zɛkaria banɛ, bi eri shi ba dumana iwɛ na aba o, ibɛ po ee eshiciji maa i 'yajɛ ozobu na bɛɛ kwubɛ nu umwono wa Agwatana. 23Bi eri shi ba duma n-ndumwa nu unu o, semi ni i'ɛlɛ kiri baa sakakana aŋ iwɛ.
24Na aba na tụ ụjita ata keshici, nazhɛ biyikwo bwa gɛ Ɛlizabɛt le ofubo, baa mama intanɛ ipiɛnɛ itɛ, bɛɛ hiɛŋ, 25Gana Agwangwama n ndwanua nụ ụjita na baa n ndanɛ uwebiye maa ma m pashɛnga ụpụrusa ne eshe atwa ta.#Ayiz 4:1
E Enenji Tumata ti Jisus
26Ti ipiɛnɛ icihiŋ keshici, nazhɛ Agwatana tumwanɛ butumwa bwa ba azuba ge Gebrɛl utumwa nụ ụshɛpwụ uko na namɛ na cɛnjɛ tu Galili, na ɛɛ hiɛ izeci ubwa Nazarɛt, 27no ofwo yɛu-yo-o ike nɛ ta shɛ usapa, nɛ ɛɛ hiɛŋ izeci ibwɛ ge Meri, nɛ ɛɛ hiɛŋ bụtụ na bo yingono bu go Josɛf, na shɛ bụtụ bu umwamwa Devid.#Mat 1:18 28Ta butumwa ata ba Agwatana ba azuba zhajɛ no ofwo Meri, baa 'walụ bụ, bɛɛ hiɛŋ bụ, Okwu yoo, gabụ na ee peni uwebiye duwa,#1:28 gabụ na ee peni uwebiye duwa: Tɛjɛshɛrɛga tu ko ti shiyeni maa, na ashashɛ eyikwo. Agwangwama namɛ na bụ.
29Iwɛ ɛtɛ kaa dama Meri duwa, baa haŋsa iyi nɛ shɛ ecilo a'walụ ata.
30Ama butumwa ata jishijɛ Meri, bɛɛ hiɛŋ, E-Meri, ta nda inyɛsɛ o, Agwatana ubu pwonuo uwebiye.#Luk 1:13 31Bi zhɛ ba la ofubo, ɛbi zhɛ ba mata yɛu-ye-eyi, ɛbi zhɛ ba pa iŋ izeci ti ge Jisus.#Mat 1:21; Luk 2:21 32Yɛu ɛtɛ zhɛ ya sha bụtụ bụ 'wụtụ duwa, ɛ zhɛ ɛ hiɛŋ iŋ, Yɛu ya Agwatana na Hwuri Kpaaŋ. Agwangwama na shɛ Agwatana zhɛ a pana bụ tugwama gana ugwunukwoshi ubwa ge Devid.#2 Sam 7:12,13,16; Ayiz 9:7 33Ubwa zhɛ ba ya tugwama ti ihwɛ Jekob unyizo-nom. Tugwama tu bwa kaa ti zha shɛ to hwuwowu kwukwuŋ! #Ayiz 9:6; Dan 2:44; Mat 28:18
34Ama ge Meri heŋteni butumwa ata, bɛɛ hiɛŋ, Gana naa ijɛ zhɛ yo tumo tu Ngaa ta shɛ usapaa? #Luk 1:18
35Nazhɛ butumwa ata ba azuba jishijɛ Meri, bɛɛ hiɛŋ, Mpiala mi Tijilo muba mi zhɛ ma zhajɛ pụ bụ, ukpahiŋ wa Agwatana na Hwuri Kpaaŋ, ubwa zhɛ mo bu ubo gana uzhizhi. Yɛu ɛtɛ ɛbi zhɛ ba mata, ɛ zhɛ ɛ hiɛŋ iŋ, Yɛu ya Agwatana. 36Kwụba, upiana ucihiŋ na ti gɛ Ɛlizabɛt ushumwa ata bụ na ɛɛ hiɛŋ bu'ulo le ofubo yɛu-ye-eyi na ti'inga tu bwa. 37Iwɛnɛ ti yaa zasa iyi elele nɛ ngezeni Agwatana tɛnda.#Umoz 8:14
38Nazhɛ ge Meri jishijɛ butumwa ata ba azuba, bɛɛ hiɛŋ, Yɛu-ugondu ya Agwangwama Ngaa shɛ, ga i n shanɛ gana na tu baa jɛmɛ. Nazhɛ butumwa ata ba azuba genji bu bee hwuri.
Ge Meri Zhegeni Ɛlizabɛt
39Ge Meri ishijɛ apata na aka ata kakayɛ, bee zhe nu ụshɛpwụ uko na namɛ na cɛnjɛ tu nshama mu Juda. 40Bee teni ni ihwɛ Zɛkaria, baa 'walụ Ɛlizabɛt. 41Aka na ti gɛ Ɛlizabɛt hwụjɛ a'walụ Meri, yɛu nɛ ta namɛ na amɛ ubwa jwe ungapa. Nazhɛ Mpiala mi Tijilo mi shini amɛ Ɛlizabɛt. 42Gɛ Ɛlizabɛt uganɛ duwa, bɛɛ hiɛŋ, Gabụ bɛ shɛ biyikwo na ee peni uwebiye na ashashɛ eyikwo, ge e zhemonjino yɛu gɛ ɛbi zhɛ ba mata! #Luk 11:27 43Imbe Ngaa nduwa maa ma 'yaga ụjɛrụma ga, maa bino ba Agwangwama mi zhajɛ tụkwụba ti mii? 44Kwụba, aka na tu Ngaa hwụjɛ a'walụ bụ, ibɛ po yɛu nɛ ta namɛ na amɛ mi njɛ unyasa harɛ yee jwe ungapa. 45Biyikwo na tɛtanɛ iwɛnɛ Agwangwama jɛmɛ rishe gwoje, iwɛnɛ ta Agwangwama zhɛ a nda maa ge iyi nɛ baa jɛmɛ nu bwa sɛ.
Azunga Ashɛtwa na ge Meri Zụnjɛ
46Ge Meri hiɛŋ,
Ma pana Agwangwama ụjɛrụma na amɛ mi,
47ahaŋsa mi kaa a bwada unyasa na Agwatana na shɛ Bibicinji mi, #1 Timo 2:3; Tait 2:10; Judu 25
48iwɛnɛ ti bee peni abashɛ mi Gamba yɛu ibwɛ ugondu nɛ 'nyanɛ.
Te kwuni na aka ga, uwaŋnɛ we elele zhɛ mɛ n hiɛŋ,
Bu gwoje.#1 Sam 1:11
49Iwɛnɛ ta bụtụ ata bu ukpahiŋ n ndwanua iyi i'wɛtwɛ.
Izeci ibwɛ kaa shɛ izeci tijilo.
50Ubwa kaa bo hioko inyɛmɛnyɛmɛ ya atwa na a sụma bụ
inyɛsɛ,
te kwuni nu uwaŋnɛ uko i ci uwaŋnɛ unya.
51Bee mbiseni ukpahiŋ ubwa, na tugarataga tu na
bee gereteji tuhaŋsa ta atwa unyangana.
52Ubwa kezhecenji atwa ukpahiŋ nu n-ndwụtwụ ma aba,
bee mungecenji tuba atwa na meme zucinje.#Job 5:11; 12:19
53Baa bɛjɛ atwa na imunɛ ga gwụmɛ ni iyimɛyɛ ibiye,
bee jicinji tuba azhɛgba ni imunɛ.
54Bee mbiyeni yɛu ibwɛ ugondu ge Isrɛl, aka na bee teyinje inyɛmɛnyɛmɛ ibwɛ nɛ bee hieci;
55gana na baa njɛ iyi nɛ bee shileni la eshi tu unu,
te kwune na Abraham tutu ajalalo ubwa unyizo-nom.#Umoz 17:7; 18:18; 22:17; 1 Sam 2:1-10; Maik 7:20
56Ge Meri namɛ nɛ Ɛlizabɛt ipiɛnɛ itɛtu, nazhɛ bee ji ni ihwɛ ibwɛ.
Tumata tu Jon Bɛnjɛ-bu-ubaptizim
57Aka na to ofubo Ɛlizabɛt nɛ, bee meci yɛu ibwɛ ye eyi. 58Aka na ta ababɛshɛ aba keeni atwa aba hwụjɛ maa Agwangwama hieci inyɛmɛnyɛmɛ ibwɛ duwa, aa njɛ unyasa nu bwa.
59Tɛ ɛ hiɛŋ jita tụndatụ na hwayɛ te e meci yɛu ɛtɛ, aa zhajɛ maa e jeji yɛu ɛtɛ teleyi, ɛɛ hiɛŋ go po iŋ izeci ike ike ni inɛ bishi bwa ti gɛ Zɛkaria.#Umoz 17:12; Liv 12:3 60Nazhɛ bino ibɛ hiɛŋ aŋ, Awo! Ama go po iŋ izeci tu ga Jon.
61Ɛɛ hiɛŋ bụ, I ta zasa bụtụ be elele na oo powo izeci go na ashashɛ atwa bu o. 62Ibɛ po aa dumanɛ iwɛ ne bishi bwa ni i'ɛlɛ maa duma gana na baa jala maa o po yɛu ɛtɛ ibwɛ izeci.
63Baa njɛ useyida ni i'ɛlɛ maa a panɛ bụ iyi ti'nyeci, aa panɛ bụ ga, bee 'nyeci, bɛɛ hiɛŋ, Ga Jon ɛɛ hiɛŋ izeci ibwɛ, yaa dama atwa ata kpaaŋ.#Luk 1:13 64Gunu ata boo ushigwo, bụratụ bwa tufwurungwo, baa dumanɛ iwɛ, bee zhemonjino Agwatana. Ibɛ po yaa dama atwa ata kpaaŋ! 65Inyɛsɛ shɛ ababɛshɛ aba, ibɛ po atwamwa a dumanga iwɛ ijɛ kpaaŋ na cɛnjɛ tu nshama mu Juda no ofwo elele. 66Atwa elele na kaa hwụjɛ iŋ, a na haŋsa iwɛ ibɛ na shihaŋsa sha aba, ɛ hiɛŋ, Imbe yɛu gɛ zhɛ ya sha hwuuŋ? Iwɛnɛ tu ukpahiŋ wa Agwangwama namwawaŋ nu bwa.
Tigesere tu na Gɛ Zɛkaria Jɛmɛ
67Nazhɛ Mpiala mi Tijilo mi shini amɛ Zɛkaria, baa jɛmɛ tigesere, bɛɛ hiɛŋ,
68Zhemonjino ma Agwangwama na shɛ Agwatana atwa Isrɛl.
Iwɛnɛ ti bee mbiyeni aŋ, bee bicinji aŋ.
69Bee ti peni bibicinji bu ukpahiŋ#1:69 bibicinji bu ukpahiŋ: Abayiburu oko hiɛŋ, mahiuaŋ mu ubino. Kpalụ gembi ufwugwo ubayiburu wa duma iwɛ mahiuaŋ, asha wa duma iwɛ ụsụbwa ukpahiŋ. ụ'wụtụ ni ihwɛ yɛu ibwɛ ugondu ge Devid,
70gana na tu boo shilwo la unu tedure ne egesere ubwa tijilo
a na namwawaŋ la cala cala,
71iwɛ maa mo ti bicingo ni i'ɛlɛ ya atwa i'ime tu
keeni atwa elele na ma tu sukakana.
72Ubwa kaa hieci inyɛmɛnyɛmɛ ye eshi tu,
bee teyinje unu ubwa tijilo na bee shiri la,
73Ibɛ shɛ unu ata bee shileni la bishi tu ga Abraham,
74na aka na ti bee ti bicinji ni i'ɛlɛ ya atwaa i'ime tu,
75iwɛ maa ta ndana bụ iyi ne tijilo keeni ne tiririri
ne eshe ubwa uzawa inyɛsɛ, tutu tu'wo tu tu.
76Gabụ yɛu gɛ mi, ɛ zhɛ du mɛ bi hiɛŋ, Bigesere ba
Agwatana na Hwuri Kpaaŋ,
iwɛnɛ ti yaa shɛ gabụ bi zhɛ bo hwulono AGWANGWAMA umbe
maa na hangana bu uhwaŋna, #Ayiz 40:3; Mala 3:1
77maa eshicigeni atwa ubwa iwɛ ubino maa e gengeni aŋ iwɛwɛ ya aba, #Mak 1:4
78tedure ni inyɛmɛnyɛmɛ tu nɛ Agwatana hieci,
i zhɛ kaa na ta pu tu
raawụụ gana uwaŋna na wa banɛ na tụla, #Mala 4:2
79maa iti peni uhioko-uhwaŋna atuba na tɛ jɛjɛ ne tishi
tu uzhizhi tu'wo,
maa iti zeriji nu uhwaŋna wa amɛ-olom.#Ayiz 9:2; Mat 4:16
80Yɛu ɛtɛ kaa ya waŋna, baa kaana ukpahiŋ ti'yaga nu mpiala. Baa namɛ nụ ụshɛka uuwa i ci aka na bee meme mbiseni atwa Isrɛl.#Luk 2:40,52
Currently Selected:
LUK 1: RBT
Highlight
Share
Copy
Want to have your highlights saved across all your devices? Sign up or sign in
Rubassa Bible © Bible Society of Nigeria, 2008
