JON 9

Ge Jisus Nɛnjɛ Bụtụ na Ee Meci nu Ulubwo

1Ti ge Jisus zhɛ tɛkashɛka, baa kwụbɛ bụtụ bu ko na ee meci nu ulubwo. 2Ibɛ po eseshi-iyi ubwa unseni bu, ɛɛ hiɛŋ, E-Bimbisegeni, gaaba kwuŋ njɛ iwɛwɛ upo ee meci bụtụ ga nu ulubwoo? Ubwa suu okwo atwa na meci bu?

3Ge Jisus jishijɛ aŋ, bɛɛ hiɛŋ, Ta bụtụ ga, ta atwa na meci bu a njɛ shɛ iwɛwɛ o, ama iwɛ maa Agwatana mbiseni ugondu ubwa caakwụ tedure nu bwa. 4I shɛ tilɛɛ maa tɛ njɛ ma ugondu bụtụ na n tumwanɛ tu uwaŋna ta namɛ. Aka na tu ụjita shi, i zasa bụtụ na eri ba nda ya ugondu o. 5Tu Ngaa ta namɛ nu unyizo, Gamba n shɛ uhioko-uhwaŋna unyizo.#Mat 5:14; Jon 8:12

6Aka na tu baa jɛmɛ iwɛ ɛtɛ, baa 'wɛŋ mecemi na cɛnjɛ, bee vwunji mecemi ma ata maa shɛ udwodwo, nazhɛ bee sweni udwodwo ata ne eshe olubo ata. 7Bɛɛ hiɛŋ bụ, Zhaga dula meni mu ukwokwo Silom, (egini Silom i shɛ, Tumwanɛ.) Bụtụ ata zhe ga baa dụrɛ, bee jiye nu uhioko-uhwaŋna.

8Nazhɛ atwa na gwumwongonu no ofwo na bụtụ ata namɛ keeni atwa na kwụbwa bụ la cala a na mepi maa bɛ shɛ olubo na ba shana ba lụpa iyi. Ɛɛ hiɛŋ, Shɛ bụtụ ganana suu ba shana ba gɛga ba lụpa iyi?

9Ama atwa oko hiɛŋ, Ubwa ganana, anya atwa hiɛŋ, Awo, shɛ ubwa o, ama bụ sụbɛ bụ kwakwa.

Ama bụtụ ata ni ikɛnyi ibwɛ hiɛŋ aŋ, Gamba ganana.

10Nazhɛ ee heŋteni bu, ɛɛ hiɛŋ, Gana na eshe bu njɛ oo ushigwoo?

11Bɛɛ jishijɛ aŋ, bɛɛ hiɛŋ, Bụtụ ata ɛɛ hiɛŋ ge Jisus, ubwa njɛ udwodwo bee sweni ne eshe mi, bɛɛ n hiɛŋ, Zhaga dula meni mu Silom. Ngee zhe ga Ngɛɛ durɛ, nazhɛ Omo hioko ya uhwaŋna.

12Ee heŋteni bu, ɛɛ hiɛŋ, cee baa namɛɛ?

Bɛɛ jishijɛ aŋ, bɛɛ hiɛŋ, M mepi shi o.

Afarisi o Hoŋtono Bụtụ ata ge Jisus Nɛnjɛ Iheŋtengene

13Ibɛ po ee zeriji bụtụ ebe ge lubeni la no ofwo Afarisi. 14Iwɛnɛ po nụ Ụjita-ụhinjanụ la kaa ge Jisus sweni olubo ata udwodwo ne eshe ubwa. 15Afarisi heŋteni bu sasana, gana na baa njɛ upo boo hioko uhwaŋna. Bɛɛ hiɛŋ aŋ, Udwodwo bee sweni ne eshe mi, nazhɛ Ngaa dụrɛ meni, ibɛ po Omo hioko ya uhwaŋna.

16Ibɛ po Afarisi oko hiɛŋ, Bụtụ ga ge Jisus, bu beni shi no olugwo Agwatana o, iwɛbɛ po bee shiyeni shi Ụjita-ụhinjanụ eshe.

Anya atwa hiɛŋ, Gana na bụtụ bi iwɛwɛ eri ba nda arụhwajɛ gana gaa? Ibɛ po tubogwu ti zhajɛ na ashashɛ aba.

17Afarisi heŋteneni bụtụ ata, ɛɛ hiɛŋ, Imbe kwuŋ ɛbi hiɛŋ iwɛ bụtụ gaa? Bi hiɛŋ ree maa ubwa ushije eshe bu.

Bụtụ ata jishijɛ aŋ, bɛɛ hiɛŋ, bigesere baa shɛ.

18Ibɛ po Eju tɛtanɛ shɛ rishe maa bi ge lubeni la nazhɛ boo hioko ya uhwaŋna. Uuwa aa suyanɛ atwa na meci bụtụ ata eshe ubwa ushigwo. 19Ee unseni aŋ, ɛɛ hiɛŋ, Yɛu hiŋ nɛ suu? Igɛtɛ ɛhi hiɛŋ hi meci la nu ulubwo. Gana na baa njɛ boo hioko ya uhwaŋna hwuwayɛɛ?

20Nazhɛ atwa na meci bu jishijɛ aŋ, ɛɛ hiɛŋ, Yɛu tu nɛ ga, ti meci bu la ga nu ulubwo. 21Ama ti mepi shi gana na baa njɛ boo hioko ya uhwaŋna o, okwo gaaba ushije eshe ubwa ahoo. Shɛ yɛu baa shɛ o, unsono bu ma, bi zhɛ ba duma ni ikɛnyi ibwɛ. 22Atwa na meci bu jɛmɛ gana ga, iwɛnɛ ta a nda inyɛsɛ ye Eju. Iwɛnɛ te Eju twawa-unu maa bụtụ be elele na jɛmɛ caakwụ maa ga Krast baa shɛ, ɛ zhɛ a bacɛnga bụ nu umwono tu'ulwa. 23Ibɛ po atwa na meci bu hiɛŋ, Shɛ yɛu baa shɛ o, unsono bu ma.

24Aa suyanɛ sasana bụtụ ebe ge lubeni la, ɛɛ hiɛŋ bụ, Shilo-unu na agba Agwatana#9:24 Shilo-unu na agba Agwatana: Kwo kaa pana Agwatana ụjɛrụma. maa jɛmɛ iwɛ-tɛkana. Ti mepi maa bụtụ ga ubu nɛnjɛ bɛ shɛ bụtụ-bi-iwɛwɛ.

25Bɛɛ jishijɛ aŋ, bɛɛ hiɛŋ, Okwo bụtụ-bi-iwɛwɛ baa shɛ M mepi shi o, iyi ike gba nɛ Ngee mepi i shɛ, N nge lubeni la ama Mo hioko ya uhwaŋna hwuwayɛ.

26Nazhɛ atwa ata heŋteni bu sasana, ɛɛ hiɛŋ, Imbe baa bu njɛɛ? Gana naa baa bɛ njɛ nazhɛ bee ushije eshe buu?

27Bɛɛ jishijɛ aŋ, bɛɛ hiɛŋ, N ngo hi mbiswo cebe, hi shiri shi acɛbɛ o. Imbe po ahia jala maa Mo hi mbisononoo? Hia jala suu maa hiɛ shɛ du eseshi-iyi ubwa?

28Ibɛ po aa twagajɛ bụ, ɛɛ hiɛŋ, Gabụ bɛ shɛ biseshi-bi-iyi bu bwa, ɛɛ hiɛŋ atuba, tɛ shɛ eseshi-iyi Moses. 29Ti mepi maa Agwatana ubwa jɛmɛ la n-ndumwa no Moses, ama ti mepi shi olugwo na bụtụ ga banɛ o.

30Nazhɛ bụtụ ata jishijɛ aŋ, bɛɛ hiɛŋ, I shɛ kaa iyi nɛ ya dama bụtụ tɛ ɛhi hiɛŋ maa hi mepi shi olugwo na bụtụ ata banɛ o, ubwa kaa ushije eshe mi! 31Ti mepi maa Agwatana hwụjɛ shɛ iwɛ ya atwa-iwɛwɛ o, ama ti mepi maa bụtụ be elele na ba sụma Agwatana inyɛsɛ, na kaa ba nda ukwulana ubwa, bi zhɛ ba hwuga iwɛ bụtụ ata. 32Te kwuni taa nu umozhigo, a ta hwụjɛ shɛ la maa bụtụ be elele ushije ba bụtụ na ee meci nu ulubwo eshe kwukwuŋ. 33Yaa shɛ bụtụ ga ge beni shi no olugwo Agwatana, bu ga zha shɛ ba ala maa nda iyi elele o.

34Ɛɛ jishijɛ bụ, ɛɛ hiɛŋ, Ni iwɛwɛ ee bi meci du gom. Gabụ suu bi zhɛ bu mo tu mbisogono iyi? Ibɛ po ee becinji bu nu umwono Tụ'ụlwatagwụ.

Sholubo Du Suu Atɛ Shɛ?

35Ti ge Jisus hwụjɛ maa e becinji bụtụ ata nu umwono t'ụlwatagwụ, aka na ge Jisus kwụbɛ bụ, Bee heŋteni bu, bɛɛ hiɛŋ, Bu tɛtanɛ yibwa Yɛu Bụtụ#9:35 Yɛu Bụtụ: Tɛjɛshɛrɛga tu ko ti cala ti hiɛŋ, Yɛu ya Agwatana. rishe hŋ?

36Bụtụ ata heŋteni Jisus, bɛɛ hiɛŋ, Iyɛri, gaaba nu maa Ma tɛtana bụ rishee?

37Ge Jisus hiɛŋ bụ, Bu kwụbwa bụ, ubwa ganana kaa ba njɛ n-ndumwa na bụ.

38Nazhɛ bụtụ ata hiɛŋ bụ, Agwangwama, N tɛtanɛ-rishe, nazhɛ bee kwuzeni Jisus.

39Ge Jisus hiɛŋ, Iwɛ ụshɛrɛya Ngaa zhajɛ nu unyizo ga, iwɛ maa sholubo shɛ kwụbɛ uhwaŋna, maa atwa na ga kwụbɛ uhwaŋna tuba lubeni.

40Aka na atwa oko na ashashɛ Afarisi hwụjɛ iwɛ ɛtɛ, ɛɛ hiɛŋ bụ, sholubo du suu atɛ shɛ?

41Ge Jisus hiɛŋ aŋ, Yaa shɛ ehi ge lubeni, hi ga zha shɛ hia 'yaga n-ndumwa-tụwụma o, ama hi hiɛŋ hia kwụba uhwaŋna, tụwụma ti hiŋ tu ta kaa ti tileni.

Currently Selected:

JON 9: RBT

Highlight

Copy