JON 11

Tu'wo tu Lazaros

1Bụtụ bu ko namba la ba gwuma, ɛɛ hiɛŋ izeci ibwɛ ga Lazaros, bɛ shɛ bụtụ bu Bɛtani na shɛ ụshɛpwụ Meri buhongwu Mata.#Luk 10:38,39 2Ge Meri ata ubwa la 'waŋnɛ manɛbɛ mụ ụhiụŋ ubiye bee dudugeni Agwangwama nu uhiuhiu, harɛ boo wofwoji ɛvwɛvwɛjɛ ubwa ne tihiŋzhe tu bwa. Ikwenyi ibwɛ ga Lazaros ya gwuma.#Jon 12:3 3Nazhɛ angwụfwụ ubwa tumwanɛ butumwa pi Jisus, ɛɛ hiɛŋ, Agwangwama, bụtụ ata obo lubo ba gwuma.

4Aka na ti ge Jisus hwụjɛ iwɛ ɛtɛ, bɛɛ hiɛŋ, Shɛ tu'wo kaa ti zhɛ ta sha ukwunanga ụngwụ ga o, ama iwɛ ụjɛrụma wa Agwatana, iwɛ maa Yɛu ya Agwatana du 'yaga ụjɛrụma tedure nu bwa. 5Ge Jisus kaa lubi Mata to buhongwu bwa ge Meri keeni Lazaros. 6Okwo ti ge Jisus hwụjɛ maa ga Lazaros ba gwuma, bɛ jɛjɛ waa no ofwo ata baa namɛ ijitɛ iyebi.

7Na aba ibɛ, nazhɛ bɛɛ hiɛŋ eseshi-iyi ubwa, Hwure ti zhe ma Judia sasana.

8Nazhɛ eseshi-iyi ubwa jishijɛ bụ, ɛɛ hiɛŋ, E-Bimbisegeni, hwuwayɛ hwuwayɛ go Eju ga jala maa e bi tegeni atayɛ, ibɛ hŋ ɛbi zhaananɛ apata?

9Ge Jisus jishijɛ aŋ, bɛɛ hiɛŋ, Shɛ auwa umpwa-na-ba-eyebi suu i shɛ ụjita uko? Bụtụ be elele ba zha tahaŋnụ nu uwaŋna bi zha shɛ ba twa udukwutwa o, iwɛnɛ tu baa kwụbɛ uhioko-uhwaŋna unyizo ga. 10Ama bụtụ be elele na ba zha tahaŋnụ nụ ụjita, ubwa ba twa udukwutwa, iwɛnɛ tu baa zasa uhioko-uhwaŋna.

11Aka na ti ge Jisus jɛmɛ iwɛ gɛ, nazhɛ boo to tuhwulo bɛɛ hiɛŋ aŋ, Biyejilo tu ga Lazaros leyi malabụ, N zhɛ maa mɛ zhingicinjɛ bụ.

12Eseshi-iyi ubwa hiɛŋ bụ, Agwangwama, yaa shɛ boo woto malabụ, asha bi zhɛ ba zhɛmanana.

13Ama ge Jisus mbishi aŋ ya caakwụ tu'wo tu bwa. E ge heŋshi yebe maa iwɛ malabụ mu ga bụtụ ba ta ụhinjanụ baa njɛ iwɛ muba.

14Nazhɛ ge Jisus mbishi aŋ ya caakwụ, bɛɛ hiɛŋ, Ga Lazaros 'wi. 15Ma nda unyasa iwe hŋ iwɛnɛ tu Ngaa zasaba apata, iwɛ maa hiɛ tɛtana-rishe. Hwure ti zhe ma pu bwa.

16Nazhɛ ga Tomas na shɛ ɛdɛngwurɛbɛ, hiɛŋ eseshi-iyi vwɛ, Hwure tu hwuri ma maa tu 'wi ma du ne Bimbisegeni.#11:16 tu 'wi ma du ne Bimbisegeni: Tɛjɛshɛrɛga tu vwɛ tu zasa ne Bimbisegeni o, ama ti hiɛŋ, nu bwa. Nekeshi atwa oko zhɛ a haŋsa maa nu bwa ata i shɛ ga Lazaros. Ama nu bwa ata i shɛ ne Jisus.

Ge Jisus Ubwa Shɛ Tihiɛ keeni Uraiŋ

17Aka na ti ge Jisus ci apata, baa hwụjɛ maa o nuwoŋ Lazaros#11:17 o nuwoŋ Lazaros: Kwo kaa, O nuwoŋ bu. taa jita neshi na hwayɛ. 18Ụshɛpwụ ata ɛɛ hiɛŋ Bɛtani kaa gwumwongonu nu Jɛrusalɛm, ụdụlụ ubwa namɛ gana ti imɛle iyebi gba. 19Eju ofwugwo zhajɛ no ofwo Mata keeni Meri maa a ingatanjɛ aŋ iwɛ ikwenyi ya aba.

20Aka na tu ga Mata hwụjɛ maa ge Jisus be ci ba, bee teji bu uhwaŋna, ama ge Meri tuba ta jɛjɛ nu umwono. 21Ga Mata hiɛŋ Jisus, Agwangwama, Yaa shɛ abu ga namba, ikwenyi mi ga zha shɛ yo 'wo yebe o. 22Okwo hwuwayɛ go, M mepi maa iyi elele nɛ abụ lụpɛ Agwatana, Agwatana kaa zhɛ ma bu pana iŋ.

23Ge Jisus jishijɛ bụ, bɛɛ hiɛŋ, Ikwenyi bu zhɛ yɛ hiɛ.

24Ga Mata jishijɛ bụ, bɛɛ hiɛŋ, M mepi maa bi zhɛ bɛ hiɛ nɛ tihiɛ tụ ụjita umɛwɛɛ.

25Ge Jisus hiɛŋ bụ, Gamba n shɛ tihiɛ keeni uraiŋ.#11:25 tihiɛ keeni uraiŋ: Tɛjɛshɛrɛga tu ko ti cala tu zasa keeni uraiŋ o. Bụtụ na n tɛtanɛ-rishe okwo bee 'wi, bi zhɛ ba nama waa; 26atwa elele na kaa namɛ a na n tɛtanɛ-rishe, a zha shɛ o 'wo ya kwukwuŋ. Bu tɛtanɛ iwɛ ɛtɛ rishe suu?

27Ga Mata hiɛŋ bụ, Iiŋ, Agwangwama, N tɛtanɛ-rishe maa gabụ bɛ shɛ ga Krast Yɛu ya Agwatana nɛ ye ci nu unyizo.

Ge Jisus Cwɛ-u'wo

28Na aba na tu ga Mata jɛmɛ iwɛ gɛ, bee gwuri baa suyanɛ buhongwu bwa ge Meri swɛɛ, bɛɛ hiɛŋ bụ, Bimbisegeni tuwo, ba bu suyana ba. 29Aka na ti ge Meri hwụjɛ iwɛ ɛtɛ, bɛɛ ishijɛ kakayɛ, bee zhegeni Jisus. 30Ge Jisus te teni shi nụ ụshɛpwụ na aka ata o, ama bu ta namɛ no ofwo ata ga Mata twa nu bwa. 31Aka na te Eju ata ga namɛ nu bwa nu umwono a ingatanga bụ kwụbɛ ti bɛɛ ishijɛ kakayɛ bee beni, aa 'wa bụ, ɛ gɛ hiɛŋ okwo nu u'uye bɛɛ zhɛ maa twa-u'wo.

32Ti ge Meri ci ofwo ata ge Jisus namɛ, aka na tu baa kwụbɛ Jisus, bee leyi nɛ ɛvwɛvwɛjɛ ubwa, bɛɛ hiɛŋ bụ, Agwangwama, yaa shɛ abu ga namba, ikwenyi mi ga zha shɛ ye 'wo yebe o.

33Aka na ti ge Jisus kwụbɛ ti ge Meri ba twa-u'wo, te Eju na zhagajɛ nu bwa a twa du u'wo. Ge Jisus ngwuleni na amɛ na amɛ ubwa baa mama tuka. 34Bee heŋteni aŋ, bɛɛ hiɛŋ, Cee bwa ehi ni buu? Ɛɛ jishijɛ bụ, ɛɛ hiɛŋ, Iyɛri, zhajɛ kwụbɛ.

35Ge Jisus cwɛ-u'wo.

36Ibɛ po Eju ata hiɛŋ, Hioko ma, gana na tu bee lubi bu duwa.

37Ama atwa oko na ashashɛ aba hiɛŋ, Bụtụ ga ubwa ushije eshe olubo, bi ge eri shi suu ba nda gana elele maa kede bụtụ ga du 'wi yebe?

Ga Lazaros Banɛ nu U'uye

38Ge Jisus mama tuka sasana na amɛ na amɛ ubwa, bee zhe nu u'uye ata. Ụpangwụ kaa waa shɛ, utayɛ kaa ee kepi unu ubwa. 39Ge Jisus hiɛŋ aŋ, Ushigo ma utayɛ ga.

Ga Mata na shɛ bụngwụfwụ bụtụ ata, hiɛŋ bụ, Agwangwama, bi 'yajɛ ya ụhiụŋ, taa jita neshi na hwayɛ te e ni bu.

40Ge Jisus jishijɛ bụ, bɛɛ hiɛŋ, M bu hiaŋ shɛ suu maa yaa shɛ abu tɛtanɛ-rishe, bi zhɛ ba kwụba ụjɛrụma wa Agwatana?

41Nazhɛ ee ushiji ga utayɛ ata. Ge Jisus shepi eshe ubwa na azuba, bɛɛ hiɛŋ, Ada, N njɛ ugwoje bu ta aba hwuga iwe mi. 42M mepi ni ikɛnyi mi maa ba hwuga iwe mi aka elele. Ama N jɛmɛ iwɛ gɛ iwɛ maa ofwugwo ga rungwutwonu epe tɛtana-rishe maa gabụ bu n tumwanɛ.

43Aka na tu baa jɛmɛ iwɛ ɛtɛ, baa uganɛ duwa, bɛɛ hiɛŋ, Lazaros, banɛ!

44Nazhɛ bụtụ ebe ge 'wi banɛ ga, apashɛ te umpenji i'ɛlɛ ibwɛ tɛ ɛvwɛvwɛjɛ ubwa. Ikerenu du te peri nu unu ubwa. Ge Jisus hiɛŋ aŋ, Tufwurungo bu ma maa hwulo.

I Namɛ na Shihaŋsa she Eju maa a Kwụnɛ Jisus

(Mat 26:1-5; Mak 14:1,2; Luk 22:1,2)

45Ibɛ po Eju ofwugwo a na zhe pi Meri, a na kaa kwụbɛ ijɛ ge Jisus njɛ, tɛtanɛ bụ rishe. 46Ama atwa oko na ashashɛ aba zhe pa Afarisi, ee mbishi aŋ iyi nɛ ge Jisus njɛ. 47Ibɛ po ehiu onongbo na Afarisi suyanɛ ajɛmɛ-ụshɛrɛya maa a ụlwatagwụ, ɛɛ hiɛŋ, Nanaa ɛti zhɛ ta nda maa? Bụtụ ga ba nda arụhwajɛ ofwugwo. 48Yaa shɛ eti genji bu gana ga, atwa kpaaŋ zhɛ a tɛtana bụ rishe, nazhɛ Orom zhɛ a zhajɛ a lashɛga#11:48 a lashɛga: tu ko ti hiɛŋ, a nda umwono…ufwu. Umwono ga tu wa Agwatana, tu udenji tu#11:48 Umwono: Tɛjɛshɛrɛga tu ko ti hiɛŋ ofwo tijilo. hwɛɛ ni i'ɛlɛ tu.

49Ama bụtụ bu ko na ashashɛ aba na ɛɛ hiɛŋ ga Kayafas, na shɛ du kaa Bunongbo bụ 'wụtụ nu uywa ata, jishijɛ aŋ, bɛɛ hiɛŋ, Hi mepi shi ga iyi elele kwukwuŋ! 50Asha hi mepi shi ree maa i shɛ titeni ti hiŋ maa ga bụtụ bu ko 'wi iwɛ atwa, iwɛ maa kede udenji ileni hwɛ hwɛɛ o?

51Bɛ jɛmɛ shɛ iwɛ gɛ na tuhaŋsa ti ikɛnyi ibwɛ o, ama iwɛnɛ tu baa shɛ Bunongbo bụ 'wụtụ nu uywa ata, ibɛ po baa jɛmɛ tigesere maa ge Jisus zhɛ bo 'wo iwɛ udenji wa aba, 52ama shɛ iwɛ udenji wa aba kiri o, ama iwɛ maa sotulonu du miaụŋ ma Agwatana mu na mu garatagwụ.

53Te kwuni ya jita ata, Eju a haŋsagana Jisus gana na maa a kwụnɛ bụ.

54Iwɛbɛ po ge Jisus rinji shi ya caakwụ na ashashɛ Eju, ama bu beni apata bee teni nụ ụshɛpwụ na ɛɛ hiɛŋ, Ifrem, ne shihilo shɛ na shi gwumwongonu nụ ụshɛka, apata baa namɛ ne eseshi-iyi ubwa.

55Isene Tɛkashɛka ye Eju gwumwonu, ibɛ po atwa ofwugwo bananjɛ ne shihilo ee munji Jɛrusalɛm tobwolo ụjita Isene te ci shi o, iwɛ maa a mama njɛ shɛshɛshɛ gana na tu Undwa we Eju hiɛŋ. 56Ee kwuni Jisus tijalakaka, ee shikekeni nu Umwono wa Agwatana, oo momo hoŋtongonu, ɛɛ hiɛŋ, Imbe ehi heŋshii? Asha bi zha shɛ ree ba zhajɛ Isene gɛ kwukwuŋ? 57Nazhɛ ehiu onongbo keeni Afarisi peni atwa unu maa bụtụ be elele na mepi ofwo na baa namɛ, ga duma iwɛ maa ɛ imɛ bu.

Currently Selected:

JON 11: RBT

Highlight

Copy