UMOZHIGO 28

Ga Azik Hiɛŋ Jekob ga Zha No ofwo Laban

1Nazhɛ ga Azik suyanɛ Jekob, baa 'walụ bụ, baa tɛtaganɛ bụ unu, bɛɛ hiɛŋ, Ta zana biyikwo na ashashɛ miaụŋ-mo-o me Ekenan ga o. 2Ishijɛ zhe Padan-aram ni ihwɛ Bɛtuɛl butatugwa bụ, maa zanɛ apata biyikwo na ashashɛ miaụŋ-mo-o mu Laban ikwenyi nobu. 3Ga Agwatana na Hwuri Kpaaŋ ubu peni-uwebiye maa meci miaụŋ mu ufwugwo, maa na kaana ufwugwo tugombo duwa, iwɛ maa shɛ bishi be edenji ofwugwo. 4Ga ma bu pana-uwebiye nɛ bee peni la Abraham tutu ajalalo bu, iwɛ maa 'yaga cɛnjɛ tu ga abɛ shɛ bụlashɛ na tuba, tu ga Agwatana peni Abraham! #Umoz 17:4-8 5Ga Azik tumwanɛ ga Jekob, baa sanɛ Padan-aram no ofwo Laban, yɛu Bɛtuɛl Bisiria ata, na shɛ ikwenyi Rebeka, bino Jekob keeni Isụ.

Ge Isụ Zeni Biyikwo bi Nya

6Ti ge Isụ kwụbɛ maa ga Azik pwonuo Jekob uwebiye, baa tumwanua bụ sasana maa zha Padan-aram maa zanɛ biyikwo apata. Gana na ti bee peni bu uwebiye baa tɛtaganɛ bu unu bɛɛ hiɛŋ, Bɛ shɛ shɛ ba zana biyikwo na ashashɛ miaụŋ-mo-o me Ekenan ga o. 7Baa kwụbɛ kaa maa ge Jekob hwụjɛ-unu bishi keeni bino bwa, baa sanɛ Padan-aram. 8Aka na ti ge Isụ kwụbɛ maa eyikwo Ekenan lemicinji shi bishi bwa ga Azik amɛ o. 9Ibɛ po ge Isụ sanɛ no ofwo Ishmɛl yɛu Abraham, baa zanɛ yɛu ibwɛ ge Mehalat bụngwụfwụ Nebaiot, bee medenji eyikwo na baa ga 'yagawa.

Ụwalabụ na ge Jekob Wetegeni ni Bɛtɛl

10Ge Jekob genji Biɛ-shiba, baa sanɛ geri bu Haran. 11Bee ci ofwo oko, boo zokwu apata nụ ụjita ata, iwɛnɛ tu uwaŋna teni. Bee suji atayɛ na namɛ apata, baa njɛ utudu uhiuhiu, bee weci apata bee leyi malabụ. 12Bee wetegeni apata ụwalabụ, baa kwụbɛ te egenegbe oko shɛnjɛ na cɛnjɛ, ihiŋhiŋ ya aba kaa timengeni tụla. Baa kwụbɛ atumwa-azuba ta a patanganɛ na aba oo mungo ee zwe! #Jon 1:51 13Baa kwụbɛ ta AGWANGWAMA shikeni na azuba aba. Bɛɛ hiɛŋ, Gamba N shɛ AGWANGWAMA na shɛ Agwatana Abraham bishi bu keeni Agwatana Azik, N zhɛ ma bụ pana cɛnjɛ tu ga ebu weci na tuba keeni ajalalo bu, 14Ajalalo bu kaa zhɛ o gombo ufwugwo gana upwupwutu, ɛ zhɛ kaa o mburusonu tu ụzalụ bu uwaŋna-twonuo keeni ụzalụ bu uwaŋna-banụ tụ ụzalụ tuzuba keeni tuta. Tedure na ajalalo bu kaa Ngɛɛ zhɛ ma pana amwamwa atwa cɛnjɛ tu unyizo ga kpaaŋ uwebiye. 15Hioko, N namɛ na bụ, Ngɛɛ zhɛ ma bu ngbaraka no ofwo elele na ɛbi zhɛ. N zhɛ me bu gwuricinje na cɛnjɛ tu ga, N zha shɛ ma bu ganga uuwa i ci aka na Ngaa njɛ iyi nɛ Ngee bi shileni-unu ibɛ.

16Nazhɛ ge Jekob zhinjɛ malabụ, bɛɛ hiɛŋ, AGWANGWAMA namɛ epe gom, Gamba kaa m mepi shi o. 17Baa njɛ inyɛsɛ, bɛɛ hiɛŋ, Epe 'yajɛ igɛhi tebiye! Epe shɛ shɛ ofwo tɛgadaga o, epe shɛ umwono wa Agwatana keeni odubo tutono na azuba.

18Ge Jekob ishijɛ nu uvwungwa dididi, bee shepi utayɛ ebe bee ge peteni uhiuhiu ubwa, bee shikicinji uŋ bee dudugeni uŋ manɛbɛ na azuba ubwa. 19Boo po ofwo ata izeci, bɛɛ hiɛŋ, Bɛtɛl,#28:19 Bɛtɛl: Egini Bɛtɛl i shɛ, umwono wa Agwatana. ama ɛ hiɛŋ la izeci ụshɛpwụ ata maa Luz cala.

20Nazhɛ ge Jekob shileni AGWANGWAMA unu, bɛɛ hiɛŋ, Yaa shɛ ɛbi zhɛ ba nama ne mi, maa n ngbaraka na tahaŋnụ tu ga Ngɛɛ zhɛ, ebi m peni kaa iyimɛyɛ tiya keeni tugwuno tu tu'urugono; 21maa Me gwure sasana ni ihwɛ bishi mi na amɛ-olom, asha gabụ bi zhɛ ba sha Agwatana mi. 22Asha utayɛ ga u titeyinje Ngee shikicinji epe, zhɛ wa sha umwono wa Agwatana. Iyi elele nɛ kaa ebi m peni, N zhɛ ma bu pana iyi-u'umpwa ibɛ.

Currently Selected:

UMOZHIGO 28: RBT

Highlight

Copy